Filipenses 3

1Nde' nu de ru bicy na, bet lagy der nu nac nur Jesucrisht. Ya̱ wagazeeda̱ ne̱e̱ lo der tuuba' tir laaba' de coz nu bi mne̱e̱, nunu de coz nu mne̱e̱ locyuub ñi der nu cue' gyicy dza mbecy der. 2Cuidad der nu de mbecy nu na gal nu na che̱', de yu nu rlyuu de coz fals, de yu nu rnu cuerp ni ornu rcaay beey sircunsision par nu gabe nu nac yu mbecy ni Ñgyoozh. 3Tees de ub na na den gal nu na mbecy nu rishli ca beey sircunsision, gun de ub na rishli nac naa ni Ñgyoozh. Nac naa nim, gun Espiriit Yon nim rlocyuub mi uub na nu caan mi. Nac naa nim, gun Jesucrisht ricy mi nu yet lagy na. Nac naa nim, gun wagyicy cup na consuel lo ub zi'l na par nu gruu mbañ naa. 4Gun bi bicy na nu gac gyicy cup na consuel lo ub zi'l na par nu gruu mbañ na, orze' ni' ya̱ gac gyicy cupa̱ consuel lo uba̱. Benu ca zi'l na mbecy rnii tooy nu gac gyicy cup yu consuel lo ub zi'l yu, nunu nde' gyicy ñi nu gruu mbañ yu, orze' ya̱ ricy cup zira̱ raso̱o̱ nu ni gyicy cupa̱ consuel lo uba̱, benu gyicya̱. 5Gun pcaa dey beey sircunsision cuerp ne̱ ornu bza' shuñ dzi nu gula̱. Naca̱ nez mbecy Israeel. Famil ne̱ bruuy lat nez Benjamiing. Ya̱ naca̱ mbecy Israeel, nunu de mbel ne̱ nac yu mbecy Israeel. Ya̱ guca̱ mbecy fariseo, gun tona' la bicy pa̱a̱ nu dela leey ni de mbecy Israeel. 6Ya̱ tona' la bzu ferta̱ nu de mod nu rzeña lagy de mbecy Israeel, gashtal psheed zi̱ de mbecy nu ricy cup consuel lo Jesucrisht. Ya̱ tona' la se'ñ bicya̱ nu leey ni de mbecy Israeel, nunu warusu ni tub la mbecy nu riib yu cyi ica̱. Nde' nu ricy cup zira̱ raso̱o̱ nu gyicy cupa̱ consuel lo uba̱, bi bicy na nu ni ñgyicya̱. 7Tees na rad lagya̱ nu dela coz nu guze̱e̱ nu dzi sac ze', dela nde' wacyiiñ ñi, gun dzi zir sac Crisht par de nu nde'. 8Nunu walab de nde' zi'l coz nu a̱' sac, sinu ni' dela coz nu bicya̱ a̱' sac ñi, gun dzi zir sac ñi nu yu' lo̱ Shuaan den Jesucrisht. Par nu nac mi bdune' dela coz ne̱. Nunu ya̱ ricya̱ nu de coz ze' nañ gal nu na toop, gun orze' gyicya̱ gan gaca̱ ni Crisht. 9Nunu ya̱ nac du̱m. Gaze' nu Ñgyoozh gyicy mi ya̱ par mbecy nu sac cyi. Walab nu nac nu ricy pa̱a̱ nu leey nim, nde' nu gyicy mi ya par mbecy nu sac cyi, sinu nu ricy cupa̱ consuel lo Crisht. Gun Ñgyoozh bi mniim nu bi ricy mi de mbecy par mbecy nu sac cyi nu nac nu gyicy cup dey consuel lo Crisht. 10Coz nu rlagya̱, nde' nu nap chu' lo̱ Crisht. Rlagya̱ nu gyicy nu Ñgyoozh ya̱ coz ily gal nu bicy num Jesuuz ornu bicy mi nu byabañ mi. Rlagya̱ nu gzac zi̱ gal nu bzac zi Crisht, nunu gaca̱ gal nu na tub mbecy nu gut ornu gut mi. 11Gun ya̱ drish lo̱ nu gaza' ya̱ gyabaña̱ ornu gyabañ de mbecy gut. 12Walab nu bi bicya̱ gan nu bi byaca̱ gal mod nu rlagya̱ nu gaca̱. Walab nu sac falt ne̱. Tees rloo lo̱ nu gyaca̱ gal mod nu rlagy Crisht nu gaca̱ ornu pcuim ya̱ nu gaca̱ nim. 13Der bicy na, ya̱ walab nu rne̱e̱ nu bi bicya̱ gan. Ya̱ wagyicy cuena̱' de coz nu bded par ich, sinu rloo lo̱ nu gyicya̱ gan par lo. 14Ricya̱ tub fers nu shupa̱ laza̱, gun orze' gyicya̱ gan i̱ nu cuic Ñgyoozh ni den nu nac Jesucrisht. Gun par nde' blosum de ub na. 15Dela mbecy nu byafert nu de coz ni Ñgyoozh rlagy ñi nii too dey nu nac de coz ze' gal nu rnii to̱o̱ ya̱. Benu tub mbecy reña' rnii tooy par ya̱, tees ca ni gaal lyuu Ñgyoozh loy ca na coz nu rishli. 16Tees de ub na rlagy ñi nu se'ñ gyicy na nu de coz nu bi gud lagy na. 17Der bicy na, bicy der gal nu ricy ya̱, nunu ca ic der de yu nu ricy gal nu bicy de̱ nu de yu nu gusa nu ya̱. 18Gun zañ tir bi mne̱e̱ lo der, nunu na nu nis urlo̱ rne̱e̱ lo der, nu tona' la yu' mbecy nu zay contr ni de coz nu bzac Crisht lo cruuz. 19De yu ze' nit lo dey gabily. De mbecy ze' de gyel bizh nac ñii ñgyoozh ni dey, nunu ornu ricy dey coz to' lo, lugaar nu gat lo dey ca nu ricy dey gyel le' niy. De yu ze' coz ni gyishlombecy zi'l ii zu dey shcab. 20Tees de ub na wagyicy na gal nu ricy de yu ze', gun de ub na gyibaa, nde' ledz na. Nunu rlez den biñ nu ruu gyibaa cyid mi nu co mbañ mi de ub na. Mi ze' Shuaan den Jesucrisht. 21Mi ze' chaam cuerp gyidz ii ni den. Gyicy mi nu gyac ñi gal nu na cuerp lily ni ub mi. Nunu ni gyicy mi nu nac nu gac gyicy mi coz ily, nunu laaba' nu nac nu dzi cyiiñ mi nu gyicy mi coz ily, nde' nu chetib ic mi dela coz.

will be added

X\