Filipenses 1

1Ya̱ Baly nu Timoteo ricy de̱ coz nu rnii Jesucrisht. Na zeed de̱ ñgyoozh ni dela mbecy ni Jesucrisht nu yu' gyedz Filipos. Nunu zeed de̱ ñgyoozh ni de yu bel nu riib ic lat de mbecy nim, nunu zeed de̱ ñgyoozh ni de ayudant ni dey. 2Ñgyoozh Uz den, nu Shuaan den Jesucrisht gyicy mi faboor nu nap gyicy num de ru. Gyicy mi nu cheti ri añ ni der. 3De tir la ornu yeza' lagya̱ de ru, orze' drica̱ gras ni Ñgyoozh. 4Nunu la zi'l tiem nu rdiña̱ lo Ñgyoozh ni der, dub gal ri lagya̱ rdiña̱ lom, 5gun de ru bicy nu der ya̱ riiñ tublaazh la par nu ptush las den de riidz nu sac ni Jesucrisht lat de mbecy. Ni bicy nur ya̱ nese dzi nu bri̱ lo der nu loga la nunu ni' zi'l ricy der mas gashtal dzi na. 6Nunu ya̱ bi neña̱ nu Ñgyoozh, biñ nu bzuub gyi' riiñ nañ lardoo der, mi ze' za' lom ñii ornu shuub dzi nu cyid Jesucrisht tuuba' tir. 7Nunu ricy cupa̱ raso̱o̱ nu ni rnii to̱o̱, gun ya̱ tona' la razañ lagya̱ der. Gun Ñgyoozh bicy num den faboor lat nu ri̱ yu' gyiib, o ornu rza̱ lo de mbecy nu riib ic. Gun faboor ze', nde' nu gzu ferta̱ nu nac de riidz nu sac ni Jesuuz, nunu drica̱ nu gad lagy de mbecy nu nde' coz rishli. 8Ñgyoozh rad lagy mi nu ya̱ ric la añ ne̱ nu rlagya̱ zaca̱ der, gun ya̱ razañ lagya̱ der gal nu razañ lagy Jesucrisht de ru. 9Ya̱ rdiña̱ lo Ñgyoozh nu tub dzi ga ca zir der losa'r. Lat nu ricy der nde', ya̱ diña̱ lom nu shaal zir mi shcab ni der nu gad lagy der ca na coz nu se'ñ nu gyicy der. 10Gun orze' dub laa tiem gac cui der ca na coz nu nap zir, gun orze' gac der mbecy nu caacy lardoo, nunu gac der mbecy nu sac falt ni ornu shuub dzi nu cyid Crisht. 11Gun ornu shuub dzi ze', Jesucrisht bi bya' lo nu bicy mi nu byac der mbecy nu bicy coz nu se'ñ, gun orze' ca lagy mbecy lo Ñgyoozh nunu gyabic dey gyel mbecy nim. 12Ya̱ rlagya̱ nu gad lagy der bicy na, nu de coz nu bzaca̱ nde' rishli gaal blocyuub ñi nu bzu de riidz nu sac ni Jesuuz. 13Ze' na dela de soldad nu yu' ro' riiñ nu dela de' zir mbecy rad lagy dey nu ya̱ ri̱ yu' gyiib nu nac Crisht. 14Nunu Shuaan den Jesuuz briic mi baloor ni zigy de bicy na ornu bzaac dey coz nu guc lat nu ri̱ nañ yu' gyiib. Nde' nu wacchib la dey rshaal yu riidz nu bruu lo Ñgyoozh. 15Rishli yu' la be mbecy nu rshaal yu riidz ni Crisht, gun rasaap lagy dey ni riiñ nu ricya̱. Nunu rlagy dey ded loy lo̱. Ze' yu' ga' mbecy rniiy riidz ni Crisht, gun rlagy yu gyicy yu coz nu se'ñ. 16Mbecy nu bzata̱ loga la ze', yu ze' rnii dey riidz ni Ñgyoozh par nu ricy dey ub yu nu nac yu mbecy nu ricy ñi presis. Walab nu dub gal ri lagy dey rniiy. Rzii dey nu gyicy yu nu deet gac nañ lardo̱o̱ lat nu ri̱ yu' gyiib. Ze' yu' ga' mbecy rnii dey riidz ni Crisht nu nac nu rca dey mbecy. Rad lagy dey nu Ñgyoozh pcaam ya̱ nu gzu ferta̱ nu gyicya̱ riiñ nu nac riidz nu sac ni Jesucrisht. 18Lac zi'l mod nu rnii too dey nu ricy yu, tees par ya̱ se la la nde'. Mas nu dub gal ri lagy dey o nu walab dub gal ri lagy dey ricy yu, tees rnii dey riidz ni Crisht. Nde' ricy ñi nu tona' la yet lagya̱. Nunu yeta' lagya̱ 19Gun ya̱ rad lagya̱ nu gruu napa̱. Ni gac gun de ru rgyiiñ der lo Ñgyoozh ne̱ nunu gun Espiriit Yon ni Jesucrisht rlocyuub mi ya̱. 20Coz nu drish lo̱, nde' nu cue' zaan Ñgyoozh nu gyicya̱ coz nu gyicy ñi nu gat lo̱. Tees wacchib la̱ rne̱e̱ riidz nu sac ni Crisht. Ni mod na par dub laa tiem ricya̱ coz nu gyicy ñi nu ca lagy mbecy lom. Ca lagy mbecy lom mas nu gruu mbaña̱ o nu cut dey ya̱. Lac zi'l. 21Gun par ya̱, benu cui mbaña̱, orze' gyicya̱ coz nu rlagy Crisht zi'l. Ze' benu gata̱, orze' napa' zir. 22Benu gzu zira̱ gyishlombecy ii, orze' gac gyicy zira̱ coz nap par Crisht. Nde' nu wagad lagya̱ ca nañ rlagya̱. 23Pcan laa shcab ne̱. Wagad lagya̱ ca na nu nap zir. Ya̱ rlagya̱ gata̱, gun orze' gya̱ cyiiñ du̱ Crisht. Ni mod nap zir par ya̱. 24Tees ricy zir ñi presis nu cyiiña̱ gyishlombecy ii par nu locyuuba̱ de ru. 25Na bi bguugy lardo̱o̱ ni de coz ze', nde' nu ya̱ rsa' lagya̱ nu gzu̱ se ñuu la be tiem gyishlombecy ii, gun orze' cyiiña̱ lat dela der, gun orze' gac locyuuba̱ de ru nu nap zir gyicy cup der consuel lo Crisht, nunu gyet lagy zir der nu nac de coz nu ricy cup der consuel lo. 26Gun ornu yapa̱ lo der tuuba' tir, orze' gyabic zir der gyel mbecy ni Jesucrisht nu nac ya̱. 27Bzu der cuidad. Nu se'ñ gu' der gal nu rlagy ñi nu chu' mbecy nu rzeña lagy ni de riidz nu sac ni Crisht. Gun orze' mas yap güi̱i̱ der o mas saca̱ lat der, tees rlagya̱ gyeña̱ nu ricy der tub zi'l shcab. Nunu rlagya̱ gyeña̱ nu gal gaa la rzu fert zir der ni de coz nu rzeña lagy den, de coz nu rnii de riidz nu sac ni Jesuuz. 28Nunu rlagya̱ gyeña̱ nu wacchib der lo de mbecy nu rzi lagy lo der, gun nde' gyicy ñi nu gabe nu de mbecy nu rzi lagy ze' nit lo dey. Nunu laab nde' ricy ñi nu gabe nu de ru gruu mbañ der. Nunu nde' coz nu gyicy Ñgyoozh. 29Ñgyoozh bicy mi faboor num de ru walab tub lo zi'l nu gyicy cup der consuel lo Crisht, sinu ni' zi'l nu gzac zi ga' der nu nac mi. 30De ru nu ya̱ tublaazh la rza den contr de mbecy nu rzi lagy lon. Bi bzaac der lac mod bicya̱. Nunu mas na reñ der lac mod na de coz nu ricya̱ lat nu rza̱ contr ni dey.

will be added

X\