San Mateo 9

1Orze' Jesuuz gu'm nañ tub barc zam tub la' ga' ru' nisyudoo. Orze' brim gyedz nu rcyiiñ mi. 2Orze' bru'ña nu dey tub mbecy chi̱ lom. Riib yu lo nuun. Na ornu Jesuuz gud lagy mi nu dzi ricy cup dey consuel lom, orze' nam rab mi yu rat ze': ―Yu feñ, cue' dzi gyicy shnir. Briic baloor. Ya̱ bi ricy sulagya̱ de cyir ―nam. 3Laab ze' nguaa la be de yu nu rlyuu leey ni Ñgyoozh. Orze' na dey nañ lardooy: “Coz nu yu ii mniiy, nde' zañ contr ni Ñgyoozh”, rnii dey nañ lardooy. 4Tees Jesuuz gud lagy mi de coz nu mnii dey nañ lardooy. Orze' nam rab mi dey. ―¿Lagu dzi shiñ rnii too der? 5Dzi zir a̱' biigy par nu ne̱e̱ nu bi ricy sulagya̱ de cyir gaze' nu ne̱e̱ nu wes su nunu bza. 6Tees na lyu̱u̱ lo der nu ya̱, biñ nu byac mbecy, ricy cupa̱ rishbeey nu gyicy sulagya̱ de cyi de mbecy gyishlombecy ii ―nam. Orze' Jesuuz nam rab mi mbecy chi̱ ze': ―Weshte. Gush nuun nir yaa yu'r ―nam. 7Orze' mbecy chi̱ ze' weshtey nunu yay par yu'y. 8Ornu de mbecy bzaac dey nde', orze' gudzib dey, nunu byabic dey gyel mbecy ni Ñgyoozh. Byabic dey gyel mbecy nim gun briic mi rishbeey ni mbecy nu gyicy yu coz ily. 9Orze' Jesuuz bruum lugaar ze' zam. Na nez nu zam bzaac mi ya̱, tub mbecy nu la Mateo zuba̱ rlo̱o̱ tiñ tub lugaar ze' nu rboo dey tiñ por cuen ni gubier Rom. Gaze' nu nam rab mi ya̱: ―Da ca icha̱ ―nam. Orze' wes su̱ za ca̱ ich mi. 10Na despuees, ornu Jesuuz bru'ñam yu̱', lat nu zub mi row mi gyit, orze' bru'ña zigy de mbecy nu rboo tiñ por cuen ni gubier Rom, nu zigy de mbecy bdune' bru'ña dey. Orze' gusub dey nuy mi tublaazh la lo tub zi'l mez. 11Na ornu bzaac de mbecy fariseo, orze' bdugyi' dey lo de yu nu rsya' lom: ―¿Lagu moscuel ni de ru row yu gyit tublaazh nu de mbecy nu rboo tiñ por cuen ni gubier gal nu de mbecy bdune'? ―na dey. 12Na ornu güeñ Jesuuz nde', orze' nam rab mi dey: ―Par de mbecy ruub walagy ñi doctoor tees par de mbecy rat rlagy ñi. 13Gua der. Gash ñuur shcab ben lac yaruu riidz ni Ñgyoozh ze' nu rniiñ: “Ñgyoozh nam: Ya̱ rlagya̱ nu gashni lagy der losa'r. Walagya̱ nu cuic der gun bañcyug lo̱, nam.” Ni rniiñ gun ni' ya̱ a̱' yapa̱ nu redza̱ de mbecy nu sac cyi, sinu dredza̱ de mbecy cyi par nu ne' dey cyiy ―nam. 14Na de yu nu rsya' lo Waa nu briib nis mbecy bru'ña dey lo Jesuuz. Orze' na dey rab yum: ―De̱ ya̱ gal nu de mbecy fariseo rca̱ de̱ ni uba̱ nu cue' da̱w de̱ gyit lat nu rzu bich de̱ nu nac Ñgyoozh. ¿Lagu de yu nu rsya' lor wagyicy dey nde'? ―na dey. 15Orze' na Jesuuz nam rab mi dey: ―Ya̱ na gal nu na tub nob. ¿Walab gaal gac gyicy shni de mbecy nu yu' lo fandang lat nu gabee rded nob lat dey? Tees shuub dzi nu co mbecy nob ze' lat dey. Orze' gaze' nu gac ca dey ni ub yu nu cue' goy gyit par nu gyicy shni dey. 16’Gun mod nu bicy de gyitoo bel, nde' nañ gal nu na tub negy gush. Ni tub la mbecy wayicy mi rumien negy gush nu tub la' negy cub nu nigul gyo' nis, gun nis gash beñ negy cub ze'. Orze' shaa ye zir negy gush ze'. 17Nunu mod nu bicy de gyitoo bel, nde' nañ gal nu na tub gyid gush nu rgu' choow dey ñup ni urbyay. Ni tub la mbecy wac cu' choow yu ñup urbyay cub nañ gyid gush gun nis cyich ñiñ. Orze' shu dela ñup urbyay ze'. Orze' nit lo gyid ze'. Nde' nu rlagy ñi cu' choow dey ñup urbyay cub nañ gyid cub, gun orze' rup laañ zu nap ñi ―na Jesuuz. 18Lat nu Jesuuz gabee zum rniim de riidz ze', orze' bru'ña tub yu nu riib ic lat de mbecy Israeel. Orze' gusu tib yu lom. Orze' nay rab yum: ―I'ña̱ saa la gut ñi. Tees benu ru char gal yaar ñii, orze' gyabañ ñi ―nay. 19Orze' wes su Jesuuz nu za num yu. Nunu de yu nu rsya' lom za nu dey mi. 20Na zu tub biñ mñaa. Bi bza' trocyup ña'n nu rat mi nu rshu reñ mi. Orze' becha'm par ich Jesuuz. Gaze' nu gul yaam ru' shab mi, 21gun mnii toom nu mas ñuu shab Jesuuz gal yaam, orze' gyac mi. 22Orze' Jesuuz bish cyam bgüiim lo biñ mñaa ze'. Orze' nam rab mim: ―Cue' dzib ru biñ mñaa. Nu nac nu bicy cup ru consuel lo̱, nde' nu byac ru ―nam. Orze' lueg la byac biñ mñaa ze'. 23Na ornu bru'ña Jesuuz yu' mbecy nu riib ic ze', orze' gu'm nañ yu'. Orze' bzaac mi nu bi nguaa de musiic, nunu bzaac mi nu dzi deet nguaa de mbecy nu ricy shni dey. 24Orze' nam: ―Bruu chu der ii, gun fiñ guzh ii nu nas zi'l ñi walab nu guut ñi ―nam. Orze' de mbecy brugyi' rigy nu naañ dey mi. 25Cuanzir nu bruu de mbecy ich yu' ze', orze' Jesuuz gu'm nañ yu'. Gaze' nu bdu' yaam yaa fiñ guzh gut ze'. Orze' wesh teñ. 26Orze' bzu laa riidz ni de coz nu guc ze' dutuub la de lugaar ze'. 27Ornu Jesuuz bruum lugaar ze' zam, orze' cyup mbecy lo ca' za cay ich mi. Orze' brugyi' rbish ti dey: ―Gushni ñuu lagy de̱ ya̱, Jesuuz, nez rey Dabi ―na dey. 28Ornu Jesuuz gu'm nañ yu', orze' de yu lo ca' ze' becha' dey lom. Orze' bdugyi'm lo dey: ―¿A rzeña lagy der nu gac gyicya̱ nu nde'? ―nam. Orze' na dey: ―Rzeña lagy de̱ Jesuuz ―na dey. 29Orze' Jesuuz gul yaam urlo dey. Orze' nam rab mi dey: ―Gac ñii gal nu rzeña lagy der ―nam. 30Orze' byanap urlo dey. Orze' Jesuuz fert bdu'm riiñ yaa dey. Orze' nam rab mi dey: ―Cue' nii der lo ni tub la mbecy ―nam. 31Tees, laab or bruu dey lom, orze' brugyi' rtush las dey riidz dutuub la lugaar ze', de coz nu bicy mi. 32Lat nu bruu de mbecy nu guc lo ca' ze' lom, orze' bru'ña la be mbecy nuy tub mbecy nu byagop lom. Byagop yu nu bicy ni nuras yu. 33Orze' cuanzir nu bloo chum nuras ze', orze' gop ze' brugyi' rniiy. Orze' tona' la za nu ic de mbecy. Orze' na dey: ―Rila a̱' zac den coz nu na gal nu na nii lo de yu ni de mbecy Israeel ―na dey. 34Tees de mbecy fariseo na dey: ―Yu nu riib ic de nuras briic yu rishbeey ni yu ii par nu co chuy de' zir nuras ―na dey. 35Jesuuz gusam dela lat gyedz nu dela ranch. Tub ga la gyedz nu rded mi rlyuum ni de mbecy nañ yu' nu rsya' mbecy riidz ni Ñgyoozh. Pshaal mi de riidz nu sac ni gyel gubier ni Ñgyoozh, nunu bicy yac mi mbecy ni de lo la güii. 36Ornu bzaac mi de mbecy zigy, orze' tona' la gushni lagy mi dey, gun shni yu' dey, nunu rshi'ñ dey baloor. Na dey gal nu na shily nu sac cyu nu rña. 37Orze' nam rab mi de yu nu rsya' lom: ―Rishli gaal cosech tona' la sheñ ñi, tees de yu nu ricy riiñ, ñuu zi dey. 38Nde' nu, bdiiñ der lo Shuaan cosech ze' nu gzeed zir mi mbecy nu te' de cosech ze' ―nam.

will be added

X\