San Mateo 4

1Gaze' nu Espiriit Yon ni Ñgyoozh gua num Jesuuz tub lugaar ub zi par nu gyicy nuras preb mi. 2Brim cyuu dzi nu cyuu rel nunu rila wangow mi gyit. Orze' despuees byan mi. 3Orze' becha' nuras lom par nu gyicy yu preb mi. Orze' nay: ―Benu ru rishli gaal nac ru i'ñ Ñgyoozh, orze' mnii lo de gyita' ii nu gyac ñi gyishtily ―nay. 4Orze' Jesuuz nam rab mi nuras: ―Lat de riidz ni Ñgyoozh rniiñ: “Walab gyishtily zi'l gyicy ñi nu cui mbañ mbecy, sinu ni' zi'l dela riidz nu rnii Ñgyoozh gyicy ñi nu cui mbañ dey”, rniiñ ―nam. 5Gaze' nu za nu nuras mi par Jerusaleeng, gyedz ni Ñgyoozh. Orze' pshup yu Jesuuz ze' nu gya zir ni yu' nu driib zily de mbecy Israeel Ñgyoozh. 6Orze' nay rab yum: ―Benu ru rishli gaal nac ru i'ñ Ñgyoozh, bzut yeñ gashtal lo yu re, gun ryat ru lat de riidz ni Ñgyoozh ornu rniiñ: Ñgyoozh cu'm riiñ yaa de anc nim nu ña dey ru. Orze' laagy yaa dey ru gun orze' cue' nu gad güii par ni gyi'r lo de gyita', rniiñ ―na nuras. 7Orze' Jesuuz nam rab mi nuras: ―Ni' zi'l rniiñ lat de riidz nim: “Cue' gyicy ru preb Ñgyoozh Shuaan ru, biñ nu nac Ñgyoozh nir”, rniiñ ―na Jesuuz. 8Gaze' nu za nu ga' nuras mi gashtal too tub bicy ily. Orze' blyuuy dela lugaar nu yu' gyishlombecy nu dela gyel lily niñ lom. 9Orze' nay rab yum: ―Ya̱ rica̱ dela nde nir benu zu tib ru lo̱ par nu riib zily ru ya̱ ―nay. 10Orze' Jesuuz nam rab mi nuras. ―Bruu chu lo̱ ii nuras, gun lat de riidz ni Ñgyoozh rniiñ: “Briib zily Shuaan ru biñ nu nac Ñgyoozh nir, nunu coz nu rlagy zi'l mi gyicy ru”, rnii riidz nim ―na Jesuuz. 11Orze' nuras bruu chuy lo Jesuuz. Orze' bru'ña de anc par nu locyuub dey mi. 12Ornu Jesuuz güeñ mi nu pshet lag mbecy Waa pres, orze' zam par Galilea. 13Tees wancyiiñ mi Nazaret sinu guam pcyiiñ mi tub gyedz nu la Capernaum. Capernaum nde' garee riñ ru' nisyudoo lo yu ni de nez mbecy Zabulón nu ni nez Neftalí. 14Ni mod guc ñi par nu gyu' niñ gal nu pcaa Isaías, yu nu mnii por cuen ni Ñgyoozh: 15De yu ni nez Zabulón nu de yu ni nez Neftalí nu ri tub la ga' ru' gyoow Jordaang garee ru' nisyudoo, gal nu de lo yu ni Galilea, ze' nu yu' mbecy nu walab mbecy Israeel, 16de mbecy nu yu' lugaar ze' rded dey ze' nu cow. Gzac dey tub gyi ily nu cuic ñi yaa. Gyi ze' nde' cuic ñi yaa lat de mbecy nu yu' ze' nu cow, ze' nu yu' mbecy nu na gal nu na mbecy gut, rniiñ. 17Nese tiem ze' brugyi' Jesuuz nu rshaal mi de coz ni Ñgyoozh. Orze' nam: ―Mne' der dela cyi nu ricy ru gun sñuu ga cyid gyel gubier ni Ñgyoozh ―nam. 18Lat nu gusa Jesuuz de ru' nisyudoo ni Galilea, orze' bzaac mi cyup mbecy nuy bicy yu. Tub yu lay Simo̱o̱, nunu laab yu ze' rnii dey Bed. Ze' tuuba'y lay Ndrees. Rup laa dey nac yu mbecy rub bel. Yu' dey nu rne'y gyish niy lo nis. 19Orze' na Jesuuz rab mi dey: ―Da ca der icha̱. Orze' ya̱ gyicya̱ nu gal nu rub der bel, ni' zi'l te' der mbecy gun orze' cyid ca dey icha̱ ―nam. 20Orze' laab or la ze' bzeeñ dey gyish niy za ca dey ich mi. 21Orze' bzam sñuu miiñ par lo. Ze' bzaaca'm tub cyupa' dey nuy bicy yu: Santiag nuy Waa. De yu ze' nac yu i'ñ Zebedeo. Yu' dey nañ tub barc nuy uz yu. Laaba' gyish nu rub bel ricy nap dey. Orze' Jesuuz bredz mi dey. 22Orze' lueg la bzeeñ ga dey barc niy. Bzeeñ ga la dey uz yu. Orze' za nu dey mi. 23Jesuuz gusam dutuub la lo yu ni Galilea. Tub ga la lugaar nu rded mi, rlyuum ni de mbecy nañ de yu' nu rsya' dey riidz ni Ñgyoozh, nunu pshaal mi de riidz nu sac ni gyel gubier nim, nunu bicy yac mi de lo la güii nu rac ni de mbecy. 24Orze' bzu laa riidz dutuub la lo yu ni Siria de coz nu ricy mi. Orze' brugyi' rza nu dey dela mbecy nu rat de lo la güii lom, nu dela mbecy nu rzac de lo la coz deet. Rza nu dey de yu nu bicy ni nuras. Rza nu ga' dey de yu nu nash bi. Nunu rza nu ga' dey de yu nu nac mbecy chi̱. Orze' Jesuuz bicy yac mi dela dey. 25Nunu tona' la mbecy zigy bruuy lo yu ni Galilea, bruu dey lat de tii gyedz nu rnii dey Decápolis, nunu bruu ga' dey Jerusaleeng, nunu bruu ga' dey de la lo yu ni Judea, nunu bruu ga' dey tub la' ga' lo yu ni ru' gyoow Jordaang. Orze' dela de yu ze' guay lo Jesuuz.

will be added

X\