San Mateo 28

1Na or bded sab, dzi nu rzu lagy mbecy, ornu bza' yu noming napor, orze' Li nu bruu Magadán, nu tuuba' Li gua dem gal ru' baa ni Jesuuz. 2Orze' de repent la briib tub duru ily. Orze' bruu tub anc ni Ñgyoozh gashtal gyibaa. Bet yu lo yu. Orze' ptuyub yu gyita' nu rsoow ru' gyerbaa ze'. Gaze' nu gusub yu tooñ. 3Anc ze' rabeey gal nu rabee gyi ni guzii. Ze' shab yu, nde' tub negy cacy iily laa. 4Na ornu bzaac de soldad anc ze', orze' gush la bis dey nu tanta' gudzib yu. Orze' bdzo'w la dey. 5Orze' anc ze' nay rab yu de biñ mñaa ze': ―Cue' dzib der. Ya̱ rad lagya̱ nu de ru ryub der Jesuuz, biñ nu gut lo cruuz. 6Saca'm ii. Bi byabañ mi gal nu mniim nu gzac mi. Orze' da der da güiir lugaar ze' nu bri dey mi. 7Orze' na ga' anc ze': ―Dzach zi der yaa niir lo de yu nu rsya' lom. Niir nu Jesuuz bi byabañ mi. Orze' mi ze' bi ya gam lo der par Galilea. Re zac der mi. Ni niir lo dey. Nde' coz nu ca lo cuen nu ne̱e̱ lo der ―na anc ze'. 8Orze' dzach bruu dem ru' baa ze' yam carer. Gudzib dem tees ni' zi'l tona' la yet lagy dem. Orze' ya dem carer ya num raso̱o̱ lo de yu nu rsya' lo Jesuuz. 9Orze' sij la bruu zac Jesuuz lo dem. Orze' nam: ―Shnu ru ―nam rab mi biñ mñaa ze'. Orze' de mi ze' becha'm lo Jesuuz. Orze' bduyaa dem yeñ gyi'm nunu pca dem mi. 10Orze' na Jesuuz rab mi de biñ mñaa ze': ―Cue' dzib der. Yaa nii der lo de bicya̱ nu gya dey Galilea. Orze' ze' zac dey ya̱ ―nam. 11Na lat nu bi ya de biñ mñaa ze', orze' la be de soldad nu mña ru' baa ze' byay nu bya tooy riidz lo de uz zub lo dela de coz nu guc. 12Orze' de uz zub lo ze' guay gua tooy rishlo de yu bel ni de mbecy Israeel par nu gyicy dey tub zi'l riidz. Orze' sheñ tiñ briic dey ni de soldad. 13Orze' na dey rab yu de soldad ze': ―Rlagy ñi nii der nu de yu nu rsya' lo Jesuuz, gua dey rel, orze' bloo dze dey cuerp ni Jesuuz lat nu nas der. 14Nunu benu gyeñ Pilato, yu nu riib ic, nu ni mod bzac der, orze' de̱ ya̱ cyaag de̱ ic yu, gun orze' de̱ ya̱ soow su̱ de ru loy ―na dey. 15Orze' de soldad ze' gush dey de tiñ ze'. Orze' bicy dey gal nu mnii de uz zub lo ze'. Orze' riidz nu mnii de soldad ze', nde' riidz nu zaab lat de mbecy Israeel mas gashtal dzi na. 16Orze' de trotub yu nu rsya' lom gua dey Galilea gashtal logyi' ze' nu mnii Jesuuz nu cha dey. 17Orze' ornu bzaac dey mi, orze' pca dey mi. Nomaas yu' la be mbecy lat dey nu wangad lagy dey ti laab mi. 18Orze' Jesuuz byagaab mi lo dey. Orze' nam rab mi dey: ―Ñgyoozh briic mi rishbeey ne̱ nu gyicya̱ dela coz gyibaa nu gyishlombecy ii. 19Gua der lo dela mbecy nu yu' dutuub la gyishlombecy, nunu gyicy der nu gyac dey mbecy nu rsya' lo̱. Nunu briic der nu zu nis dey par nu gabe nu nac nu dey Ñgyoozh uz den, nunu par nu gabe nu nac nu dey ya̱ i'ñ mi, nunu par nu gabe nu nac nu dey Espiriit Yon nim. 20Nunu lyuu der ni dey nu gyicy paay nu dela coz nu mne̱e̱ lo der. Nunu cue' nit lagy der nu ya̱ nac du̱ der dub laa tiem gashtal shuub la dzi ni gyishlombecy ii ―nam.

will be added

X\