San Mateo 27

1Laab bza' yu la tuuba' dzi, orze' de uz zub lo gal nu de yu bel ni de mbecy Israeel byatublaazh dey par nu go dey riidz ben lac mod gyicy dey par nu gat Jesuuz. 2Orze' pcyiig dey mi za nuy mi. Orze' bgu' dey mi yaa Poncio Pilato, yu nu riib ic por cuen ni gubier Rom. 3Na ornu Judas, yu nu bish cya ich Jesuuz, ornu gud lagy yu nu mnii dey nu gat Jesuuz, orze' brugyi' nu rnii tooy nu nap zir benu cue' ñlyuuy Jesuuz lo dey. Orze' bish cyay gua zeeñ yu gal rub tii tiñ plat ze' lo de uz zub lo, nu lo de yu bel ni de mbecy Israeel. 4Orze' nay: ―Ya̱ shiñ bicya̱ nu nac nu bish cya̱ ich tub mbecy nu sac falt ni, nunu gashtal cut la dey yu ―nay. Tees de yu ze' nay rab yuy: ―Par nu nac nu nde' se la la nu ricy ñi ne̱ de̱ ya̱. ¡Nde' cuen ni ru! ―na dey rab yu Judas. 5Orze' mne' la Judas tiñ ze' loli' ni yu' nu driib zily mbecy Ñgyoozh. Orze' bruuy ze' yay. Orze' bzaab gyi̱y ub yu. 6Orze' de uz zub lo pte' dey dela tiñ ze'. Orze' na dey: ―Wac zeeñ den tiñ ii nañ alcansi ni gun, gun tiñ ii bicy ñi nu gut mbecy ―na dey. 7Orze' psaap dey riidz ben lac gyicy nu dey tiñ ze'. Orze' wii dey tub nac yu nu la Yu ni Mbecy nu Rzaa Gyis. Orze' yu ze' wii dey ñi nu tiñ ze', par nu gac ñii tub campyo̱o̱ nu cach dey de mbecy yad. 8Nde' nu gashtal tiem na, yu ze' lañ Yu nu Guud nu Nac Reñ. 9Ni mod guc ñi par nu byu' niñ gal nu mnii Jeremías, tub yu nu mnii por cuen ni Ñgyoozh, ornu nay: Orze' gush dey gal rub tii tiñ plat ze', pres nu mnii de mbecy Israeel nu cyish dey nu nac mi. 10Orze' nu tiñ ze' wii dey tub nac yu nu la Yu ni Mbecy nu Rzaa Gyis, gal nu mnii Ñgyoozh lo̱ nu gyicya̱, na Jeremías. 11Na Jesuuz zum lo yu nu riib ic por cuen ni gubier par nu cugyi'y lom. Orze' nay: ―¿A ru nac ru rey ni de mbecy Israeel? ―nay. Orze' na Jesuuz: ―Laab ni gal nu ru mniir ―nam. 12Orze' de uz zub lo ze' gal nu de yu bel ni de mbecy Israeel brugyi' driib dey cyi too Jesuuz, tees rila wanniim. 13Orze' Pilato bdugyi'y lom tuuba' tir: ―¿A wagyeñ ru de cyi nu driib dey toor? ―nay. 14Tees Jesuuz ni tub riidz wanniim. Orze' Pilato, yu nu riib ic ze', tona' la za nu ic yu. 15Na de ña'n la, lat nu rzu' sa' ni Pas, orze' yu nu riib ic ze', rlaay tub pres: ca zi'l na yu nu gnii mbecy nu dulaa. 16Tees tiem ze' ri tub mbecy nu la Barrabás pres. Yu ze' dela mbecy yu' lo dey yu par nu dzi coz ily bicy yu. 17Orze' lat nu bi yu' tublaazh de mbecy, orze' na Pilato rab yu dey: ―¿Ca na mbecy rlagy der nu gla̱a̱? ¿A gla̱a̱ Barrabás o ti gla̱a̱ Jesuuz, yu nu rnii der Mesías? ―nay. 18Ni mniiy gun nap gud lagy yu nu nac gyel rasaap lagy, nde' nu bgu' dey Jesuuz yaay. 19Na lat nu gusub Pilato lugaar ze' nu dri beey cyi, orze' bzeed mñaay tub raso̱o̱ loy. Orze' nam: “Cue' ne' ic ru lat asunt ni mbecy nu sac falt ni ze', gun che tona' la shiñ bguu pcaala̱ nu nac mi ze'”, na mñaay. 20Tees de uz zub lo ze' gal nu de yu bel ze' pcuugy dey lardoo de mbecy zigy nu cyiñ dey nu glaa Pilato Barrabás. Orze' cyiñ dey nu gat Jesuuz. 21Tees ornu ni bicy dey, orze' Pilato, yu nu riib ic ze', orze' bdugyi'y lo dey tuuba' tir. Orze' nay: ―¿Ca na dey lo cyup yu rlagy der nu gla̱a̱ yu? ―nay. Orze' na de mbecy: ―¡Barrabás! ―na dey. 22Orze' na ga' Pilato: ―Ze' ¿la coz rlagy der nu gyicya̱ du̱ Jesuuz, yu nu rnii der Mesías? ―nay. Orze' dela dey mniiy: ―¡Cut ruy lo cruuz! ―na dey. 23Orze' na ga' Pilato: ―¿La ñuu coz a̱' nap bicy yu? ―nay. Tees dzi zir bish ti dey. Orze' na dey: ―¡Cut ruy lo cruuz! ―na dey. 24Na ornu Pilato gud lagy yu nu wayicy yu gan, sinu de mbecy zigy bi yu' la dey nu gyicy yu coz deet, orze' mniiy lo tub mbecy nu cha gyiiy nis par nu naay lo rgüii la dela mbecy. Orze' nay: ―Ya̱ sac falt ne̱. Benu cut der mbecy nap ii, nde' falt ni de ru ―nay. 25Orze' na ga' de mbecy zigy: ―Nu gat yu ze', nde' cuen ne̱ de̱ ya̱, gal nu ni de nez de̱ nu gruu zac par lo ―na dey. 26Orze' Pilato blaay Barrabás nu nac de riidz nu mnii de mbecy. Orze' bicy yu mandaar nu gaaz dey Jesuuz. Orze' bgu'y mi yaa dey par nu caa dey mi lo cruuz. 27Orze' de soldad gua nu dey mi nañ yu' ze' nu riib ic de gubier. Orze' dela soldad nu yu' ze' byatublaazh dey lom. 28Orze' bloo dey shab mi. Orze' bzuu dey mi tub negy ña. 29Gaze' nu bel dey ya gyech. Bzaa dey tub coron nu bri dey toom. Orze' bzuu dey tub yagyi yaa beem. Orze' gusu tib dey lom. Nunu brugyi' rguu bdzaa dey mi. Orze' na dey: ―Shnu ru, rey ni de mbecy Israeel ―na dey. 30Orze' brugyi' rco yeñ dey lom. Orze' bloo dey yag nu zu yaam ze', nunu brugyi' rshet dey ñi toom. 31Ornu blazh bguu bdzaa dey mi, orze' bloo dey negy ña ze' yeñ mi. Orze' bzuu dey mi laab shab mi. Orze' za nu dey mi par nu caay mi lo cruuz. 32Orze' nez nu za dey bdzeel yu tub mbecy Cirene, yu nu la Simo̱o̱. Orze' por fers la pcaa dey yu nu cha nuy cruuz ni Jesuuz. 33Orze' bru'ña dey tub lugaar nu la Gólgota. Nde' tub riidz nu yaruuñ: Lugaar ni cyug too añ. 34Gaze' nu briic dey ñup urbyay nu yu' can nu tub lo coz lya nu go'm. Tees ornu bicy mi preb ñi, orze' wangalagy mi go'm ñii. 35Orze' pcaa dey mi lo cruuz. Orze' de soldad bloo dey cuen ben ca na dey dugyiy tub ga shab mi. 36Despuees ni de nu nde', orze' gusub dey nu rñay mi. 37Orze' par too cruuz nu pcaa dey mi, pcaa dey tub gyicy cyim nu rniiñ de falt nim. Orze' rniiñ: “Yu ii Jesuuz, rey ni de mbecy Israeel”, rniiñ. 38Orze' ni' zi'l pcaa dey cyup gubaan lo cruuz cuit mi: tub yu par yaa beem, ze' tuuba'y par yaa reg mi. 39Orze' de mbecy nu rded lom rgyib la ic dey nu gyel rgubdzaa, nunu rab zi dey mi. 40Orze' na dey: ―Ru mniir nu nit lor yu' nu driib zily mbecy Ñgyoozh, nunu nañ chon dzi mniir nu shes sur ñii. ¡Na bloo mbañ ub ru na! Benu rishli nac ru i'ñ Ñgyoozh. ¡Bet lo cruuz! ―na dey. 41Ni' zi'l de uz zub lo, nu de yu nu rlyuu leey ni Ñgyoozh, nu de yu bel ni de mbecy Israeel bgubdzaa dey mi. 42Orze' na dey: ―Bloo mbañ yu reña' mbecy, tees ub yu wagac co mbañ yu. Nunu nac yu rey ni de mbecy Israeel. Ze' benu gyet yu lo cruuz, orze' cheña lagy den niy. 43Bicy cup yu consuel lo Ñgyoozh. Na rlagy ñi co mbañ Ñgyoozh yu benu rishli yet lagy mi mod nu bicy yu, gun rniiy nu nac yu i'ñ mi ―na dey. 44Orze' ni' zi'l de gubaan nu ca num lo cruuz brugyi' nu rgubdzaa dey mi. 45Orze' tub or widoo bet cow dutuub la lo yu gal tub gyiib chon or gudze, gaze' nu bzu yaa. 46Gaze' nu or ze' ye brish ti Jesuuz. Orze' nam: ―Elí, Elí, ¿lema sabactani? ―nam. Riidz ze' yaruuñ: “Ñgyoozh ne̱, Ñgyoozh ne̱, ¿lagu bzaan ru ya̱?” 47Orze' la be mbecy nu yu' ze', ornu güeñ dey nu brish tim, orze' na dey: ―Yu re rbedz yu Elías, yu nu mnii por cuen ni Ñgyoozh ―na dey. 48Orze' lueg la tub mbecy gush yu carer gua gyiiy tub coz nu chayo' nis. Orze' psal yuñ lo ñup zii ni urbyay. Gaze' nu bzuub yuñ lo tub yagyi. Briic yuñ go'm. 49Tees de' zir mbecy na dey: ―Blez güiin, ben a cyid Elías nu co mbañ yuy ―na dey. 50Orze' tuuba' tir ye brish tim. Orze' gut mi. 51Orze' laab or ze' negy nu zaab gyero' ni lugaar yon nañ yu' nu driib zily mbecy Ñgyoozh pshala lañ gaal zi nu gush ñi gal ic lañ nu gal lo yu la. Nunu briib duru. Nunu de gyita' bet rich ñi. 52Nunu de baa ni añ byaal ru'ñ. Nunu zigy mbecy ni Ñgyoozh nu bi gut byabañ dey. 53Orze' bruu dey gyerbaa niy. Na despuees, ornu byabañ Jesuuz, orze' bya dey Jerusaleeng, gyedz ni Ñgyoozh. Orze' ze' zigy mbecy bzaac dey de yu ze'. 54Na ornu bzaac yu nu riib ic de soldad gal nu de' zir soldad nu briib duru ze' nu dela de' zir coz nu guc, orze' gudzib dey. Orze' na dey: ―¡Rishli gaal biñ ii guc mi i'ñ Ñgyoozh! ―na dey. 55Orze' zet yu' zigy biñ mñaa. Rgüii dem lo Jesuuz. Laab de mi ze' biñ nu gua ca ich Jesuuz nese nu gusam Galilea, nunu blocyuub dem Jesuuz. 56Lat de biñ mñaa ze' ri Li nu bruu tub gyedz nu la Magadán, nu tuuba' Li, ñaa Santiag nu See, nu ñaa de i'ñ Zebedeo. 57Na or bi yecheñ, orze' bru'ña See, tub mbecy guani'ñ nu bruu Arimatea. Ni' yu ze' nac yu tub yu nu rsya' lo Jesuuz. 58Orze' guay lo Pilato, nu bdiiñ yu cuerp ni Jesuuz loy. Orze' Pilato mniiy nu cuic dey cuerp ni Jesuuz ni See. 59Orze' gush yu cuerp nim, nunu ptiish yuñ tub sab cacy fin. 60Orze' gua riy mi nañ tub gyerbaa cub ni ub yu. Gyerbaa ze' sa bicy yu mandaar nu bduuñ dey ñi nañ gyita'. Orze' psoow yu ru'ñ nu tub gyita' ily. Orze' yay. 61Tees Li nu bruu Magadán, nu tuuba' Li gucua dem ru' baa ze'. 62Na or bza' yu tuuba' dzi, laab nde' dzi nu rzu lagy mbecy, orze' de uz zub lo, nu de mbecy fariseo gua dey lo Pilato. 63Orze' na dey: ―Shi Pilato, byeza' lagy de̱ nu lat nu gabee mbañ mbecy rguu ze', orze' nay: “Ornu bi bza' chon dzi nu guta̱, orze' gyabaña̱”, nay. 64Nde' nu ne̱e̱ lor nu gyicy ru mandaar lo de mbecy nu cha ña dey ru' baa niy gashtal shuub la dzi chon, gun nis ru'ña de yu nu rsya' loy rel. Orze' co dze dey cuerp niy. Gaze' nu nii dey lo mbecy nu byabañ yu. Orze' benu ni gac nu nac gyel rguu ze', orze' shiñ zir gruuñ gaze' gyel rguu nu mnii Jesuuz nu loga ―na dey. 65Orze' na Pilato: ―Gac cha nu der de soldad nu gña dey. Gua der nu gyicy segur ru ru' baa niy. Ca na la benu gac ―nay. 66Orze' bruu dey zay. Nunu bicy segur dey ru' baa. Orze' pcaa dey beey lo gyita' nu rsoow ru' gyerbaa ze'. Nunu bzeeñ dey soldad ze' nu rña dey.

will be added

X\