San Mateo 26

1Na ornu blazh mnii Jesuuz dela de riidz ze', orze' nam rab mi de yu nu rsya' lom: 2―De ru bi rad lagy der nu nañ cyup dzi chu' sa' ni Pas. Orze' ya̱, biñ nu byac mbecy, gu' dey ya̱ yaa de mbecy par nu cut dey ya̱ lo cruuz ―nam. 3Orze' laab tiem ze' de uz zub lo gal nu de yu bel ni de mbecy Israeel byatublaazh dey yu' Caifás, yu nu riib ic de uz. 4Orze' bloo ic dey tub mod par nu shet lag dey Jesuuz pres nu nac gyel rguu, gun orze' gyicy dey nu gat mi. 5Tees na dey: ―Walagy ñi shet yaan yu lat sa' gun nis gyach de mbecy ―na dey. 6Na lat nu pcyiiñ Jesuuz Betania yu' Simo̱o̱, yu nu gurat gyedz nu la lepra, 7orze' bru'ña tub biñ mñaa lo Jesuuz nu tub lamet nu byaa nu gyita' nu la alabastro. Dza laa nañ ñi nu yu' asecy zguul nu dzi ñgyup sac. Orze' lat nu gabee zub mi rom gyit, orze' biñ mñaa ze' pcoom asecy zguul ze' too Jesuuz. 8Na ornu bzaac de yu nu rsya' lom, orze' guzi lagy dey. Orze' brugyi' rnii dey: ―¿Lagu leew la mnit lom asecy zguul re? 9Gun nde ñgyac nsa'y ñi par nu sheñ tiñ ñgyaad. Orze' tiñ ze' mbic mi ni de mbecy zi ―na dey. 10Na ornu gud lagy Jesuuz de coz nu mnii dey, orze' nam rab mi dey: ―¿Lagu ricy seed der biñ mñaa ii? Mi ii tona' la nap bicy num ya̱. 11Gun mbecy zi dub laa tiem yu'y lat der. Tees ya̱ walab dub laa tiem cyiiña̱ lat der. 12Coz nu bicy biñ mñaa ii num ya̱ ornu pcoom asecy zguul cuerp ne̱, nde' par nu rzu lily mi ya̱ par ornu cach dey ya̱. 13Ya̱ rishli rne̱e̱ lo der nu ca zi'l lugaar ni gyishlombecy nu shaal dey riidz nu sac nu bruu lo Ñgyoozh, orze' nii ga' dey coz nu bicy nu biñ mñaa ii ya̱ par nu gyeza' lagy mbecy mi ―na Jesuuz. 14Orze' Judas Iscariote, tub yu nu bruu lat trocyup de yu nu blosu Jesuuz, gua niiy lo de yu nu riib ic de uz. 15Orze' nay rab yu dey: ―¿La be cyish der ne̱, orze' ya̱ gyabica̱ Jesuuz yaa der? ―nay. Orze' bza' lo dey nu cyish yu gal rub tii tiñ plat niy. 16Orze' nese or la ze' brugyi' ryub Judas mod par nu gu'y Jesuuz yaa dey. 17Dzi loga ni sa' nu row dey gyishtily nu sac lebadur, orze' de yu nu rsya' lo Jesuuz bru'ña dey lom. Orze' na dey rab yum: ―¿Ca rlagy ru nu cha̱ de̱ zu ye̱ coz nu gyicy na che dzi sa' ni Pas? ―na dey. 18Orze' nam rab mi dey: ―Yaa der lat gyedz. Orze' cha der lo i mbecy. Orze' ze' nii der: “Masht nam: Ya̱ byap or ne̱, nunu ya̱ nu de yu nu rsya' lo̱ ded de̱ sa' ni Pas yu'r, nam.” Ni nii der ―na Jesuuz. 19Orze' de yu nu rsya' lom bicy dey gal nu mniim. Orze' bzu ye dey tub comid ni dzi sa' ni Pas. 20Na or biche, orze' gusub Jesuuz nu de trocyup yu nu rsya' lom nu gyicy dey che. 21Orze' lat nu ricy dey che, orze' nam rab mi dey: ―Ya̱ rishli rne̱e̱ lo der nu lat de ru gruu su tub ru nu cush cyar icha̱ ―nam. 22Orze' tona' la bicy shni de yu nu rsya' lom. Orze' tub ga dey brugyi' rgugyi' dey lom. Orze' na dey: ―Shuaana̱, ¿walab gaal ya̱? ―na dey. 23Orze' na Jesuuz rab mi dey: ―Tub yu nu rne' gyishtily laab nañ tub zi'l gya'n nu ya̱, yu ze' cush cya'y icha̱. 24Gun ya̱, biñ nu byac mbecy, rishli gata̱ gal nu pcaa de yu nu mnii por cuen ni Ñgyoozh. ¡Tees cuaa yu nu cush cya icha̱! Nap zir bi bicy na nu cue' ñgyal yu nu ni gyicy ze' ―nam. 25Orze' na Judas, yu nu bish cya ich mi: ―Masht, ¿walab gaal ya̱? ―nay. Orze' na Jesuuz: ―Gal nu ru mniir, nde' laab ni ―nam. 26Na lat nu gabee nguaa dey row yu gyit, orze' Jesuuz gush mi tub gyishtily. Orze' briic mi gras ni Ñgyoozh nu nac ñii. Gaze' nu blew mi ñii. Orze' briic mi ñii ni de yu nu rsya' lom. Orze' nam: ―Gush der gyishtily ii gow ru, gun nii cuerp ne̱ ―nam. 27Gaze' nu gusha̱'m tub taz nu yu' ñup urbyay. Orze' briica'm gras ni Ñgyoozh. Gaze' nu briic mi ñii ni dey. Orze' nam: ―Dela de ru go' der nu yu' nañ taz ii. 28Gun nu nii reña̱ nu gzu nap ñi trat cub nu bicy Ñgyoozh nu de mbecy. Nu nii reña̱ nu dushu par nu gruu mbañ zigy mbecy, par nu gyicy sulagy Ñgyoozh ni dela cyi dey. 29Ya̱ rishli rne̱e̱ lo der nu rila wado' ga̱' ñup ni urbyay tuuba' tir gashtal shuub la dzi nu do̱' du̱ de ru ñup cub lugaar ze' nu riib ic Ñgyoozh, uz den ―nam. 30Na ornu blazh biil num dey tub Salmo, orze' bruu num dey yu' ze' za num dey bicy ni ya Oliva. 31Gaze' nu nam rab mi dey: ―Rel na dela de ru checa der nu gyicy cup ru consuel lo̱ nu nac de coz nu gzaca̱, gun ni rniiñ lat de riidz ni Ñgyoozh. Orze' nam: “Ya̱ duta̱ biñ nu rña shily, orze' dela shily nim grush las ma”, nam. 32Tees despuees ornu gyabaña̱, orze' ya̱ gya̱ ga̱ lo de ru par Galilea ―nam. 33Orze' na Bed rab yum: ―Mas dela dey checa dey nu gyicy cup dey consuel lor nu nac de coz nu gzac ru, tees ya̱ rila wane̱' ru ―nay. 34Orze' na ga'm rab mi yu: ―Ya̱ rishli rne̱e̱ lor nu laab rel na, anzir nu cuedz ngüel ru' loga ma, chon tir niir nu a̱' yu' lor ya̱ ―nam. 35Tees Bed bzu fert yu. Orze' nay: ―Mas gata̱ du̱ ru, tees ya̱ rila wane̱e̱ nu a̱' yu' lo̱ ru ―nay. Nunu ni' zi'l mnii de' zir de yu nu rsya' lom. 36Orze' Jesuuz gush nez mi zam nu de yu nu rsya' lom tub lugaar nu la Getsemaní. Orze' nam: ―Bzub der ii lat nu ya̱ cha̱ par re nu ne̱e̱ du̱ Ñgyoozh ―nam. 37Orze' za nu reñ mi Bed nu rup laa i'ñ Zebedeo. Orze' brugyi' ricy shnim, nunu tona' la deet rac nañ lardoom. 38Orze' nam rab mi dey: ―Ya̱ rlagy la̱ gata̱ nu tanta' shni rac nañ lardo̱o̱. Blez der ii nunu bzu der altant nu ya̱ ―nam. 39Gaze' nu gua ga'm sñuu miiñ par lo. Orze' wes saa tiily mi lo yu nunu brugyi' rnii num Ñgyoozh. Orze' nam: ―Uza̱, benu gac, ¿a wabo chur taz nu gzuub ru'? Tees cue' gac ñii gal nu rlagya̱ sinu gal nu rlagy ru ―nam. 40Na ornu bish cyam lo de yu nu rsya' lom ze', orze' byap mi dey nguaa nas yu. Orze' nam rab mi Bed: ―¿Walab gaal ni ñuu tub or wangagyee der nu nzu der altant nu ya̱? 41Bzu der altant nunu mnii nu der Ñgyoozh, gun orze' cue' gyicy de coz cyi gan der. Gun nañ lardoo der rlagy ru gyicy ru coz nap tees cuerp ni der wacyiiñ ñi ―nam. 42Orze' nu cyup la nu rzam nu rnii num Ñgyoozh, orze' nam: ―Uza̱, ben a wac co chur taz nu gzuub ru̱' o gashtal do̱' la ñii, tees gac ñii gal nu ru rlagy ru ―nam. 43Orze' bish cya ga'm tuuba' tir zam lo dey. Orze' ni' zi'l byap mi dey nguaa nas yu, gun rsuun la pcaal dey tanta' nu yeed ñi. 44Orze' bzeeñ mi dey za ga'm nu nii num Ñgyoozh tir chon la. Orze' mniim laab de riidz nu mniim or loga. 45Orze' bish cya ga'm lo dey. Orze' nam rab mi dey: ―¿Walab gaal gabee nas ru' der nunu gabee rzu lagy der? Na bi ryap or nu ya̱, biñ nu byac mbecy, gu' dey ya̱ yaa de mbecy cyi. 46Wes su der yaa na. Gun bi yad gaab yu nu cush cya icha̱ ―nam. 47Lat nu gabee rnii ru'm, lueg la bru'ña Judas, tub yu nu bruu lat trocyup de yu nu rsya' lom. Bru'ñay nu zigy mbecy nu nuu mandzicy, nu yu nu nuu garot. Yad dey par mandaar ni de yu nu zub lo ni de uz, nunu par mandaar ni de yu bel ni de mbecy Israeel. 48Ze' Judas, yu nu bish cya ich mi, bi mniiy lo dey lac mod gyicy yu par nu gad lagy dey cyu Jesuuz. Orze' mniiy: ―Yu nu da̱w chit lo, yu ze' nde'. Orze' gua nu der yu pres ―mniiy lo dey. 49Na ornu bru'ña Judas lo Jesuuz, orze' becha'y lom. Orze' nay rab yum: ―¡Masht, shnu ru! ―nay. Orze' bdow yu chit lom. 50Orze' na Jesuuz rab mi yu: ―Judas, bicy ca na la nu yad ru gyicy ru ―nam. Orze' becha' de mbecy lom. Bdu' yaa dey mi. Gaze' nu za nu dey mi pres. 51Tees tub yu nu zu nu Jesuuz bloo zay mandzicy niy nañ gyid yu'ñ. Orze' pcyug yu gyidag tub moz ni yu nu riib ic de uz. 52Orze' na Jesuuz: ―Bdu' choow mandzicy ze' se'ñ gun dela yu nu rgyish lo lo mandzicy gat yu nu mandzicy. 53¿A wagad lagy der nu ya̱ gac ne̱e̱ lo Ñgyoozh, uza̱, nu zeed mi zigy zir anc par trocyup nac soldad nu locyuub dey ya̱? 54Tees benu ni, ¿lac mod gac par nu gyu' ni de riidz ni Ñgyoozh gal nu rniiñ nu gac? ―nam. 55Orze' na Jesuuz rab mi de mbecy zigy ze': ―¿Lagu yad tub der ya̱ gal nu rza tub dey tub gubaan: nu mandzicy nu garot? Gun de dzi la bri̱ blyu̱u̱ ni der loli' ni yu' nu driib zily mbecy Ñgyoozh. Nunu wancu' yaa der ya̱ nu ñgya nu der ya̱ pres. 56Tees dela nii ni raac ñi par nu gyu' niñ gal nu bi cañ lat de riidz ni Ñgyoozh, gal nu mnii de yu nu mnii por cuen nim ―na Jesuuz. Orze' laab or la ze' dela de yu nu rsya' lom bzeeñ dey mi. Bruu chu dey lom zay. 57Orze' de yu nu gua tub Jesuuz gua nu dey mi yu' Caifás, yu nu riib ic de uz. Ze' byatublaazh de yu nu rlyuu leey ni Ñgyoozh, nu de yu bel ni de mbecy Israeel. 58Ze' Bed gua cay ich Jesuuz. Orze' zet zet zi'l zaab yu ich mi gashtal bri lay loli' ni yu nu riib ic ze'. Orze' gu'y gusub yu loli' ze' nu de yu nu rña yu' ze' par nu güiiy ben lac mod za' lo dey nu Jesuuz. 59Orze' de uz zub lo, nu dela de yu nu zu riiñ lat junt zub lo byub dey mod par nu griib dey cyi fals toom, gun orze' gad mod nu cut dey mi. 60Tees rila wangad ni tub la mod ni dey mas zigy mbecy gua dey briib dey gyidza toom. Orze' gal brusu gaal cyup mbecy. 61Orze' na dey: ―Yu ii nay: “Ya̱ gac tilya̱ yu' nu driib zily den Ñgyoozh, nunu nañ chon dzi gac shes su̱ ñii tuuba' tir”, nay ―na dey. 62Orze' yu nu riib ic ze' wes suy, orze' nay rab yu Jesuuz: ―¿A waniir lagu sac falt nir? ¿La ñuu cyi driib dey ic ru? ―nay. 63Tees Jesuuz ri zi'l zum. Rila waniim. Orze' na ga' yu nu riib ic ze': ―Rishli gaal ni Ñgyoozh mbañ, mnii lo̱ de̱ benu nac ru Mesías, biñ nu nac i'ñ Ñgyoozh ―nay. 64Orze' na Jesuuz rab mi yu: ―Laab gal nu ru mniir. Ya̱ rishli rne̱e̱ lo der nu gzac der ya̱, biñ nu byac mbecy, zuba̱ par yaa bee Ñgyoozh, biñ nu rac ricy de lo la coz ily. Nunu gzac der ya̱ yapa̱ lat za ―nam. 65Orze' yu nu riib ic ze' pshala lay shab yu par nu gabe nu walab se'ñ mniim. Orze' nay: ―Yu ii bzat ziy Ñgyoozh. ¿La' zir be teshtig rlagy ñi par yu ii? Na bi güeñ der de riidz a̱' nap nu mniiy. 66¿La ñuu rnii too der? ―nay. ―Yu ii yu' falt niy nunu rlagy ñi gat yu ―na dey. 67Orze' brugyi' rcoo yeñ dey lom. Nunu brugyi' nu rgaaz dey mi. Ze' yu' ga' dey briich yaay lom. 68―Ru, Mesías, ¡mnii lo̱ de̱ cyu briich yaa lor! ―na dey. 69Na Bed gusub yu loli' ni ich yu' ze'. Orze' bru'ña tub criad loy. Orze' nañ rab ñiy: ―Ni' ru gusa nur Jesuuz, biñ nu bruu Galilea, ¿shiñ? ―nañ. 70Tees Bed mniiy nu walab lo rgüii la dela mbecy. Orze' nay: ―Ya̱ wagad lagya̱ la coz rniir ―nay. 71Orze' zay par gyero'. Ze' bzaac tuuba' criad yu. Orze' nañ rab ñi de mbecy nu yu' ze': ―Ni' mbecy ii gusa num Jesuuz, biñ nu bruu Nazaret ―nañ. 72Orze' ni' zi'l mnii Bed nu walab. Orze' nay: ―Ñgyoozh shiñ gyicy num ya̱ benu ya̱ walab rishli rne̱e̱. ¡Ya̱ a̱' yu' lo̱ cyu mbecy nde'! ―nay. 73Na guchi ga' sñuu nde', orze' de yu nu yu' ze' na dey rab yu Bed: ―Wanted la ni' ru nac ru tub yu nu bruu lat dey, gun rabee nu nac mod nu za riidz nu rniir ―na dey. 74Orze' Bed nay: ―Ñgyoozh shiñ gyicy num ya̱ benu walab rishli rne̱e̱. ¡Ya̱ a̱' yu' lo̱ cyu mbecy nde'! ―nay. Orze' laab or la ze' bredz ngüel. 75Orze' byeza' lagy yu de coz nu mnii Jesuuz ornu nam: “Anzir nu cuedz ngüel ru' loga ma, ru niir nu a̱' yu' lor ya̱ chon tir” ―nam. Orze' bruu Bed zay. Nunu tona' la zi ruun yu.

will be added

X\