San Mateo 25

1’Mod nu rac nu gyel gubier ni Ñgyoozh, nde' nañ gal nu na mod nu guc nu tii fiñ feñ. Gush deñ candiil niñ gua cheel ñi nob. 2Na gaay ñi nac ñii fiñ ndeja̱d. Ze' gaaya' deñ nac ñii fiñ cuidad. 3Orze' de fiñ ndeja̱d ze' za nu deñ candiil niñ. Tees wancha nu sheñ deñ asecy par nu nchaa ga' deñ nañ candiil niñ tuuba' tir. 4Ze' de fiñ cuidad ze' za nu deñ candiil niñ gal nu sheñ asecy. 5Na ornu bded tiem nu wangri nob ze', orze' brugyi' nu ryeed pcaal deñ. Orze' gush pcaal delañ. 6Na ornu bi yad razeel rel, orze' brugyi' rbish ti mbecy: “¡Bi yeed nob! ¡Bruu der nu cha cheel ru nob!” rnii dey. 7Orze' dela de fiñ feñ ze' wesh te deñ carer, nunu bzu nap deñ candiil niñ. 8Orze' de fiñ ndeja̱d ze' nañ rab ñi de fiñ cuidad ze': “Doo ñuu asecy ni der ne̱ de̱, gun ryuu candiil ne̱”, naañ. 9Orze' na de fiñ cuidad ze': “Waric de̱ asecy. Gun ni par de̱ ya̱ wal ñii, ze' yegar par de ru. Gua der lo mbecy nu rut asecy. Orze' lo mbecy ze' zi der ñii nir”, na deñ. 10Tees lat nu gua zii de fiñ ndeja̱d ze' asecy niñ, lat ze' bri la nob. Orze' de fiñ nu bzu lily ze' gu' deñ nu nob lo fandang. Orze' byoow ro'. 11Na ornu byoow ro', orze' bri gaaya' de fiñ ndeja̱d ze'. Orze' na deñ ta'ñ gyero': “Pshaal ñuu ro' ne̱ de̱”, na deñ. 12Tees orze' na nob ze': “Ya̱ rishli a̱' yu' lo̱ de ru”, nay ―na Jesuuz. 13Orze' na ga'm: ―Orze' rlagy ñi gac der mbecy nu rzu altant, gun ni wagad lagy der ni ca dzi ni ca na or yap ya̱, biñ nu byac mbecy, tuuba' tir ―nam―. 14’Mod nu rac nu gyel gubier ni Ñgyoozh, nde' nañ gal nu na mod nu bzac tub mbecy nu gua biaj. Ornu bi zuu lay nu chay tub lugaar, orze' bredz yu dela moz niy nu bdu'y riiñ yaay nu ñay dela suuy. 15Orze' tub yu briic yu gaay tant tiñ niy. Ze' tuuba'y briic yu cyup tant tiñ niy. Ze' tuuba'y briic yu tub tant tiñ niy. Dub gal mod nu rlyu nu cyiiñ tub ga dey dub ni tiñ briic yu ni dey. Orze' gush nez yu zay. 16Na moz nu guud gaay tant tiñ ni ze', lueg la guay bicy yu dalje̱z nu tiñ ze'. Orze' bicy yu gan tub gaaya' tant tiñ. 17Ni' zi'l bicy moz nu guud cyup tant tiñ ni ze'. Orze' bicy yu gan tub cyupa' tant gal nu guud niy. 18Tees yu nu guud tub tant ni ze', orze' yay bduuñ yu gyegy nu pcach yu tiñ ni patro̱o̱ niy. 19’Na ornu bi rac zañ tiem, orze' bri patro̱o̱ ze'. Orze' bza' loy nu de moz ze' niy. 20Nu loga la bru'ña yu nu guud gaay tant tiñ ni ze'. Orze' byabic yu gaay tant nu za nuy ze' gal nu tub gaaya' tant i'ñ ñi. Orze' nay rab yu patro̱o̱ niy: “Ru briic ru gaay tant ne̱. Na ii ga' tub gaaya' tant nu bicya̱ gan”, nay. 21Orze' patro̱o̱ ze' nay rab yuy: “Nap tona' la. Ru nac ru tub moz nu ricy paa. Na par nu bicy paar nu ñuu mi' nu briica̱ nir, na riiñ ily zir grica̱ nu gyicy ru. Gyeed gun gyet lagy ru nur ya̱”, na patro̱o̱. 22Orze' bru'ña ga' yu nu guud cyup tant ni ze'. Orze' nay rab yu patro̱o̱ niy: “Ru briic ru cyup tant ne̱. Nde' nu gyash ru ñii nir, gal nu cyupa' tant nu bicya̱ gan”, nay. 23Orze' na patro̱o̱ niy rab yuy: “Nap tona' la. Ru nac ru tub moz nu ricy paa. Na par nu bicy paar nu ñuu mi' nu briica̱ nir, nde' nu na riiñ ily zir grica̱ nu gyicy ru. Na gyeed gun gyet lagy ru nur ya̱”, na patro̱o̱. 24’Tees ornu bru'ña ga' yu nu guud tub tant tiñ ni ze', orze' nay rab yu patro̱o̱ niy: “Ya̱ rad lagya̱ nu ru nac ru tub mbecy nu dzi cyigy lardoo. Gun ru wagyicy ru riiñ, tees rboor gana̱z ni de moz nir. 25Orze' gudziba̱. Nde' nu ya̱ pcacha̱ tiñ nir lo yu. Nde' nu ii gyash ru ca na nu nir”, nay. 26Orze' patro̱o̱ ze' nay rab yuy: “Dzi ga mbecy zed nac ru. Dzi ga a̱' nap ru, benu ru rad lagy ru nu ya̱ ryasha̱ de gana̱z ni de moz ne̱, mas wagyicy uba̱ riiñ. 27Orze' ¿lagu wanchar ñgya seeñ ru tiñ ze' nañ banc? Gun orze' ornu ndri̱ gyabic ru tiñ ne̱ nu ñuu i'ñ ñi”, nay. 28Orze' na patro̱o̱ rab yu de yu nu yu' ze': “Bloo der tub tant tiñ nu ri yaay. Briic der ñii ni yu nu ricy cup tii tant. 29Gun mbecy nu bi ricy cup gad zir ñi niy nunu gashtal grusuba' lañ niy. Ze' mbecy nu sac ni gashtal coz miiñ nu ricy cup yu gruuñ niy. 30Ze' moz wacyiiñ ii, bloo der yu chay ich yu', ze' nu cow. Ze' gun yu nunu siigy lay yu”, nay ―na Jesuuz―. 31’Ornu ya̱, biñ nu byac mbecy, chu' nu gaca̱ rey, orze' yapa̱ nu de anc ne̱ nunu chesuba̱ nu gyub ica̱ de mbecy lugaar ze' nu yu' gyel lily ne̱. 32Orze' dela mbecy ni gyishlombecy gyatublaazh dey lo̱. Orze' ya̱ glewa̱ dey nu gyac cyup nac yu gal nu ricy tub mbecy nu rña shily nu co reñ yu shily lat de chiib. 33Orze' ya̱ zeeda̱ de shily par yaa be̱e̱. Ze' de chiib zeeda̱ ma par yaa rega̱. 34Orze' ya̱ biñ nu nac rey, ne̱e̱ lo de mbecy nu yu' par yaa be̱e̱: “Da der gun Ñgyoozh, uz den, nap ricy num der. Gush der gyel nap nu bi bzu ye Ñgyoozh ni der ze' nu riib ic mi nese anzir nu gzub gyi' gyishlombecy. 35Gun ya̱ byana̱, ze' de ru briic ru coz nu da̱w. Ya̱ bigya̱ nis, ze' de ru briic ru nis do̱'. Ya̱ guca̱ mbecy zu nez, ze' de ru bredz ru ya̱ nu gua̱ yu'r. 36Ya̱ bicy falt shaba̱, ze' de ru briic ru shaba̱. Ya̱ gurata̱, ze' de ru biid güii der ya̱. Ya̱ bet laga̱ nañ yu' gyiib, ze' de ru biid zaab lo der ya̱”, ne̱e̱. 37Orze' de mbecy nap nu yu' par yaa be̱e̱ nii dey: “Shuaan de̱, ¿gul bzaac de̱ ru nu ran ru, ze' briic de̱ coz nu gow ru? O ¿gul bzaac de̱ ru nu rbigy ru nis, ze' briic de̱ nis go'r? 38O ¿gul bzaac de̱ ru nu zu nez ru, ze' briic de̱ posad nir? O ¿gul bicy falt shab ru, ze' bric de̱ ñii nir? 39O ¿gul bzaac de̱ ru gurat ru, o gul bzaac de̱ ru rir yu' gyiib, ze' gua zaab lo de̱ ru?” nii dey. 40Orze' ya̱, biñ nu nac rey, ne̱e̱ lo dey: “Ya̱ rishli rne̱e̱ lo dela de ru mbecy nu ni bicy nu de bicya̱, de mbecy nu blaazha' zir mbecy shni, orze' ni' zi'l bicy nu der ya̱”, ne̱e̱. 41’Orze' ya̱, biñ nu nac rey, ne̱e̱ lo de mbecy nu yu' par yaa rega̱: “Bruu chu de ru lo̱ ii, de ru mbecy nu bzaa lagy Ñgyoozh ni. Gua der lo gyi nu rila wayu: lo gyi nu bzu ye Ñgyoozh par nuras nu de anc niy. 42Gun ya̱ byana̱, ze' de ru wancuic der nu da̱w. Ya̱ bigya̱ nis, ze' de ru wancuic ru nis do̱'. 43Ya̱ guca̱ mbecy zu nez, ze' de ru wancuedz ru ya̱ nu cha̱ yu'r. Ya̱ bicy falt shaba̱, ze' de ru wancuic der ñii ne̱. Ya̱ gurata̱ nunu betlaga̱ nañ yu' gyiib, ze' de ru wancyiid güii der ya̱”, ne̱e̱. 44Orze' nii dey lo̱: “Shuaan de̱, ¿gul bzaac de̱ ru nu ran ru, o nu bigy ru nis, o nu zu nez ru, o nu sac shab ru, o nu rat ru, o nu rir nañ yu' gyiib, ze' wanlocyuub de̱ ru?” nii dey. 45Orze' ya̱, biñ nu nac rey, ne̱e̱ ga̱' lo dey: “Ya̱ rishli rne̱e̱ lo der nu la zi'l tiem nu wanlocyuub der mas ñuu tub de mbecy nu blaazha' zir mbecy shni, orze' ni' zi'l wanlocyuub der ya̱”, ne̱e̱ lo dey. 46Orze' de yu ze' gyet lag dey lo cashtig nu rila wayeca. Ze' de mbecy nap gad nu cui mbañ dey lo Ñgyoozh tub la ―nam.

will be added

X\