San Mateo 24

1Orze' bruu Jesuuz loli' ni yu' nu driib zily de mbecy Ñgyoozh zam. Orze' bru'ña de yu nu rsya' lom. Orze' brugyi' rlyuu dey de yu' ze' lom. 2Orze' na Jesuuz rab mi dey: ―¿A rzac der dela coz ii? Ya̱ rishli rne̱e̱ lo der nu sac tub gyita' ii nu gyiyeeñ ñi too losa'ñ. Delañ dudily ñi ―nam. 3Orze' za num dey par too bicy ni ya Oliva. Orze' gusub mi. Orze' de yu nu rsya' lom byatublaazh dey lom par nu cugyi' reñ dey lom. Orze' na dey: ―Mnii lo̱ de̱ nu gul gac de nde'. ¿La na muesht gruu zac ornu cyid ru tuuba' tir? Nunu ¿gul shuub dzi ni tiem nu yu'n na? ―na dey. 4Orze' na Jesuuz rab mi dey: ―Bzu der cuidad nis guu mbecy der, 5gun tona' la zigy mbecy grusac yu nu gash yu nu la̱. “Ya̱ Mesías, biñ nu ca lo cuen nu co mbañ mbecy”, niiy. Orze' gyicy yu nu tona' la zigy mbecy gadza̱ dey. 6Ornu gyeñ der nu bi yu' gyel yuu gaab ga, gal nu de ze' nu zet, tees cue' dzib der, gun nde' coz nu rlagy ñi nu gac. Tees gabee nigul shuub dzi nu gya' lo dela coz. 7Gun tub nac mbecy chu'y gyel yuu nu tub naca' mbecy. Nunu tub gubier chu'y gyel yuu nu tuuba' gubier. Nunu cyid cubiñ. Nunu grib duru zañ lugaar ni gyishlombecy. 8Tees dela nde' nu gzub zi'l gyi'ñ nu gzac zi de mbecy. 9’Orze' gu' dey de ru yaa mbecy par nu shet zi dey de ru nunu par nu cut dey de ru. Nunu dela de mbecy gazi lagy dey lo der par nu nac ya̱. 10Nunu tiem ze' zigy de ru checa der nu gyicy cup ru consuel lo̱. Nunu gazi lagy der lo losa'r. Nunu cush cya' tub, cush cya tub zi'l der ich losa'r. 11Nunu gruu sac zigy mbecy rguu, mbecy nu nii nu nac mbecy nu rnii por cuen ni Ñgyoozh. Nunu gyicy dey nu gadza zigy mbecy. 12Nunu par nu tona' la gyañ nu shiñ gyicy de mbecy, orze' checa dey nu rcay losa'y. 13Tees yu nu gagye gashtal gat la, yu ze' yu nu co mbañ Ñgyoozh. 14Nunu de riidz nu sac ni gyel gubier ni Ñgyoozh grush las ñi dutuub la gyishlombecy par nu gad lagy de lo la mbecy. Gaze' nu shuub dzi ze'. 15’Na Ñeel, yu nu mnii por cuen ni Ñgyoozh, bzeeñ yu riidz ni coz bag nu gyicy ñi nu nit lo. Ornu zac der nu chu'ñ lugaar ni Ñgyoozh, (Mbecy nu csya' de riidz ii rlagy ñi nu gyicy yu nu gyet lag yu cuen. ) 16orze' de mbecy nu yu' lo de yu ni Judea rlagy ñi nu ruu chu dey chay par logyi'. 17Nunu mbecy nu zub too yu' walagy ñi nu gyet yu nu chu'y nañ yu'y nu coy la coz anzir nu ruu chuy. 18Mbecy nu ri ricy riiñ lat naa, walagy ñi nu cush cyay cha gyiy shab yu. 19¡Tees cuaa de biñ mñaa nu secyi zu tiem ze'! ¡Cuaa de biñ nu rgagy mdoo tiem ze'! 20Bdiiñ der lo Ñgyoozh nu cue' nu ruu chu der tiem rag, ni sab, dzi nu rzu lagy mbecy. 21Gun tiem ze' dzi zir zac zi mbecy gaze' de tiem nu bded gaal zi'l nu bzub gyi' gyishlombecy, nunu gaze' de' zir tiem nu yad par lo. 22Nunu benu Ñgyoozh wayicy shub mi tiem ze', orze' ni tub la mbecy waruu mbañ yu. Tees gyicy shuub mi tiem ze' par nu nac de mbecy nu bi pcuim. 23’Orze' benu ca na mbecy niiy lo der: “Güii ii zu Mesías, biñ nu ca lo cuen nu co mbañ mbecy” o “Güii re rim”, niiy. Tees de ru cue' cheña lagy der. 24Gun grusu mbecy rguu nu niiy nu nac yu Mesías. Nunu grusu mbecy rguu nu niiy nu nac yu mbecy nu rnii por cuen ni Ñgyoozh. Zañ muesht lyuu dey, nunu zañ nusuriidz gyicy dey par nu gad mod nu guu dey mbecy. Mas gashtal de mbecy nu bi pcui Ñgyoozh guu mbecy ze' dey, benu gac. 25Bzuub gyidag der, ya̱ tiem bi mne̱e̱ lo der. 26Nde' nu benu mbecy niiy lo der: “Güii der, tub lugaar ub zi ri Mesías”, niiy, cue' cha der loy. O benu nii ga' dey: “Guii der, re ri ngach mi”, nii dey, cue' cheña lagy der. 27Gun ya̱, biñ nu byac mbecy, sij zi'l gru'ña̱ gal nu ricy yaa ni guzii ornu rzuñ dutuub la baa. 28Gun ze' nu nguaa de cuerp gut, ze' gyatublaazh dela lyash ―nam―. 29’Na ornu ded tiem nu zac zi de mbecy ze', orze' gyet cow lo doo güidz, nunu beey wabica' ma yaa. De bel nu ta' baa gyet lag ma. Nunu dela fers nu nash baa cueñ ñii. 30Orze' gruu sac muesht ne̱ ya̱, biñ nu byac mbecy, baa. Orze' de lo la mbecy nu yu' gyishlombecy gun yu. Orze' zac dey ya̱, biñ nu byac mbecy, nu yapa̱ lat za baa. Zac dey nu gac gyicya̱ coz ily, nunu zac dey nu tona' la lily na̱. 31Orze' ya̱ zuu neza̱ de anc ne̱, ornu fert dulaa trompet par nu cha te' dey de mbecy nu bi bducui gashtal se tap la scyiñ ni gyishlombecy: gash ñi gashtal ze' nu bzub gyi' baa nu gashtal ze' nu bya' loñ ni gyi' baa. 32’Psya' der mod nu ricy ya las. Ornu bi rga'ñ nu driib lyag niñ, orze' de ru bi rad lagy der nu bi yad tiem zig. 33Ni' zi'l mod ornu zac der gac dela coz nu mne̱e̱ lo der, orze' bi neñ der nu ya̱, biñ nu byac mbecy, bi zu̱ la̱ nu yapa̱. 34Ya̱ rishli rne̱e̱ lo der nu de mbecy nu yu' tiem ze' walazh dey gat yu gal gac la dela de coz ze'. 35Baa nuñ gyishlombecy ii delañ ded niñ, tees riidz nu ya̱ rne̱e̱ nde' rila waded niñ. 36’Tees dzi ze', nu or ze', se cyu la rad lagy. Ni de anc nu yu' gyibaa, ni ya̱ i'ñ Ñgyoozh wagad lagya̱, sinu tub zi la Ñgyoozh uz den rad lagy mi. 37’Gal nu guc tiem ni Noé, ni' zi'l gac ornu shuub dzi nu ya̱ yapa̱ tuuba' tir. 38Tiem ze' anzir nu gyet gyey ily nu mnit lo gyishlombecy ze', orze' de mbecy pcyiiñ dey gyishlombecy ii. Nu bdow zi'l dey, nunu go'y, nunu pchelaa dey gashtal pshuub la dzi nu gu' Noé nañ barc. 39Tees ni wannii la too dey ti ni gac ñii gashtal bru'ña la gyey. Orze' za nuñ dey. Ni' zi'l gac ornu shuub dzi nu ya̱ biñ nu byac mbecy yapa̱ tuuba' tir. 40Orze' tiem ze' cyup mbecy riy ricy yu riiñ lat naay. Tub yu gruuy gyishlombecy ii nu gyay. Ze' tuba'y gyiyeeñ yu. 41Cyup biñ mñaa cam rom iiñ gyech. Tub mi gruum gyishlombecy ii nu gyam. Ze' tuba'm gyiyeeñ mi. 42’Orze' bzu der altant gun wagad lagy der ca dzi yap ya̱, biñ nu nac Shuaan der. 43Tees bicy der nu gad lagy ru tub coz. Benu tub shuaan tub yu' gad lagy yu la or cyid gubaan, orze' zu lily yu nunu wazaan yu nu chu'y nañ yu'y nu coy suuy. 44Nde' nu de ru rlagy ñi nu gyiyeeñ lily der, gun ya̱ biñ nu byac mbecy yapa̱ or nu rila a̱' sa' lagy der ―nam―. 45’¿Ca na moz nu ricy paa nu moz nu yu' shcab ni? Yu ze' bdu' patro̱o̱ niy riiñ yaay nu gyub ic yu de' zir moz nu yu' niy, par nu cuic yu nu gow de yu ze' or niñ. 46Dzi ni moz ze' benu gyap patro̱o̱ niy yu ornu griy nu ricy yu gal nu mniiy loy. 47Ya̱ rishli rne̱e̱ lo der nu patro̱o̱ niy cu'y riiñ yaay nu gyub ic yu dela coz niy. 48Tees benu moz ze' nac yu mbecy a̱' nap, orze' nii tooy nu wari gyiily patro̱o̱ niy. 49Orze' gyicy ras nuy de losa' moz yu. Gow yu, nunu go'y nu de mbecy rzugy. 50Orze' gri patro̱o̱ niy tub dzi nu a̱' sa' la lagy yu. Griy tub or nu wagad lagy lay. 51Orze' tona' la cashtig ily cuic yu ni moz ze'. Gyicy nuy yu gal nu ricy nu dey de mbecy rzuu lo. Orze' gun yu, nunu siigy lay yu.

will be added

X\