San Mateo 22

1Orze' brugyi' ga' rnii Jesuuz nu riidz tiily lo dey tuuba' tir. Orze' nam rab mi dey: 2―Mod nu rac nu gyel gubier ni Ñgyoozh, nde' mod nu guc nu tub rey. Rey ze' bzu yey tub sa' ni fandang par nu chelaa yu feñ niy. 3Orze' mniiy lo de moz niy nu chay cha teey de yu nu ca lo cuen nu cha fandang. Tees de yu nu ca lo cuen nu cha ze', wangalagy dey ñgyay. 4Orze' bzeed yu reña' moz nu chay. Orze' mniiy lo dey: “Mnii lo de yu nu ca lo cuen nu cyid ze' nu bi bzu lilya̱ dela coz nu dow den. Nunu bi bicya̱ mandaar nu gut chigud gal nu de bañ nu bi bicy re'ña̱. Delañ bi zu lily ñii nu cyid dey fandang”, nay. 5Tees de yu nu ca lo cuen nu cha fandang ze', wangyicy cuen dey. Tub yu zay lat naay. Ze' tuuba'y zay gyicy yu dalje̱z niy. 6Ze' tub naca' dey bdu' yaa dey de moz ni rey ze'. Orze' shiñ bicy nu dey yu gashtal biit la dey yu. 7Orze' tona' la guzi lagy rey ze'. Orze' bicy yu mandaar lo de soldad niy nu chay cut yu de mbecy nu biit moz niy ze', nunu caay gyi ledz dey. 8Gaze' nu bredz yu de moz niy. Orze' nay: “Dela de coz bi zu lily ñii par fandang, tees de yu nu ca lo cuen nu ñgyiid, wangyap dey nu ñgyiid yu. 9Orze' na gua der de nez zu. Orze' cuedz der cyu zi'l mbecy nu gyap ru nu cyid yu fandang”, nay. 10Orze' de moz ze' bruu dey zay de lat cay. Nunu bicy tublaazh dey ca na la de mbecy nu byap dey: tant mbecy a̱' nap nunu tant mbecy nap. Orze' bdzaa la nañ yu' ze' nu yu' mbecy lo fandang. 11’Orze' rey ze' gu'y nañ yu' ze' nu bgüiiy lo dela mbecy nu bru'ña ze'. Orze' bdu' cuen yu lo tub mbecy nu a̱' zuy negy par fandang. 12Orze' na rey ze' rab yu mbecy ze': “¿Lac guc gu'r ii ze' a̱' zur negy par fandang?” nay. Tees mbecy ze' rila waniiy. 13Orze' rey ze' nay rab yu de moz niy: “Pcyiigy der gyi'y nunu pcyiig der yaay. Nunu mne' der yu chay ze' nu cow, ze' nu gun yu nunu siigy lay yu”, nay. 14Gun Ñgyoozh rbedz mi zigy mbecy tees ñuu zi mbecy pcuim ―na Jesuuz. 15Orze' de mbecy fariseo ya dey, nunu orze' psaap dey riidz ben lac mod gac gyicy dey nu gadzam nu riidz par nu cu' zi dey mi. 16Orze' bzuu nez dey la be de mbecy nu nac nu de mbecy fariseo nu la be ga' de mbecy ni Herodes nu cha nii dey lom. Orze' na dey rab yum: ―Masht, de̱ ya̱ rad lagy de̱ nu ru rniir coz rishli. Nunu ru wagyicy cuen ru de coz nu rnii mbecy, sinu rlyuur ni dey mod nu rlagy Ñgyoozh nu chu' dey, gun ru a̱' nac ru mbecy nu rcui. 17Orze' mnii ñuu lo̱ de̱ mod nu ru rnii toor. ¿A gruu nap ñi nu griib den tiñ nu rbic dey ni yu nu riib ic de nasyoong, uti waruu nap ñi? ―na dey. 18Tees Jesuuz gud lagy mi nu nac dey mbecy rzi lagy. Orze' nam: ―Mbecy rzuu lo, ¿lagu rzu der caa ze' lo̱? 19Blyuu der tiñ nu cyish ru ze' lo̱ ―nam. Orze' gua nu dey tub tiñ plat lom. 20Orze' Jesuuz bdugyi'm lo dey: ―¿Cyu nab ca lo tiñ ii nunu cyu nu la ca looñ? ―nam. 21Orze' na dey: ―Lo César, yu nu riib ic de nasyoong, gal nu nu lay ―na dey. Orze' na ga' Jesuuz rab mi dey: ―Benu ni, orze' briic der ni César, yu nu riib ic ze', de coz nu nac niy, nunu briica' der ni Ñgyoozh de coz nu nac nim ―nam. 22Na ornu güeñ dey de riidz ze', orze' za nu la ic dey nunu zu ga lam gush nez dey yay. 23Laab dzi ze' gua la be de mbecy saduceo gua güii dey Jesuuz. De mbecy saduceo rnii dey nu ornu gat mbecy, orze' wagyabaña' dey. Nde' nu bdugyi' dey lo Jesuuz. Orze' na dey. 24―Masht, Moisees mniiy nu benu tub mbecy gat yu, ze' gyiyeeñ mñaay, ze' sac la i'ñ yu, orze' gash bicy yu byud ze', gun orze' cuic yu mdoo ni byud ze' por cuen ni gyitoo bicy yu, na Moisees. 25Na lat de ub na ii bzu gagy mbecy nuy bicy yu. Orze' yu loga guud mñaay. Orze' gut yu. Ze' mñaay wangaal lam mdoo. Orze' byeeñ byud ze' lo yu nu gul loy. 26Ni' zi'l bzac yu ze' nu gut yu. Orze' ni' zi'l bzac yu chon nu gul loy. Orze' ni' zi'l bzac byud ze' nu za' gagy la dey nuy bicy yu. 27Na ornu blazh dela dey gut yu, orze' ni' zi'l biñ mñaa ze' gut mi. 28Ze' na ornu shuub dzi nu gyabañ de mbecy gut ze', orze' ¿ca na de yu ze' lo gagy yu nuy bicy yu gac mñaa dey mi ze'? Gun dela dey pcyiiñ nuy mi ―na dey. 29Orze' Jesuuz nam rab mi dey: ―De ru radza der, gun de ru wagyet lag der cuen de coz nu mniiñ lat de riidz ni Ñgyoozh. Ni wagad lagy der la na coz nu gac gyicy mi. 30Ornu de mbecy nu bi gut gyabañ dey, orze' wachelaa ga' dey, sinu orze' chu' dey gal nu yu' de anc nu yu' gyibaa. 31Ze' na ni nu gyabañ mbecy, ¿walab gaal wacsya' der de riidz nu bzeeñ Ñgyoozh par de ru? Laab mi nam: 32“Ya̱ naca̱ Ñgyoozh ni Abraham, naca̱ Ñgyoozh ni Isaac, nunu naca̱ Ñgyoozh ni Jacob.” ¡Gun Ñgyoozh a̱' nac mi Ñgyoozh ni mbecy nu bya' lo la sinu nac mi Ñgyoozh ni mbecy nu mbañ mas bi gut yu! ―na Jesuuz. 33Na ornu güeñ de mbecy de riidz ze', orze' za nu la ic dey nu nac de coz nu blyuum. 34Orze' ornu gud lagy de mbecy fariseo nu psoow mi ru' de mbecy saduceo, orze' byatublaazh dey. 35Orze' bruu su tub yu nu rlyuu leey ni Ñgyoozh nu bdugyi'y lom par nu shet lag yum nañ caa. Orze' nay rab yum: 36―Masht, ¿ca na leey ni Ñgyoozh nac ñii leey zub lo zir? ―nay. 37Orze' na Jesuuz rab mi yu: ―“Pca Shuaan ru, biñ nu nac Ñgyoozh nir, nu dutuub la lardoor, nu dela gyel mbañ nir, gal nu nu dela shcab nir.” 38Nde' leey zub lo zir par de' zir leey. Nde' leey nu gya zir zu. 39Ze' leey cyup, nde' nu “Pca der losa'r gal nu rcar ub ru.” Nde' saap ñi leey loga ze'. 40Orze' lo cyup de leey ze' nac ñi cyong de' zir leey nu bzeeñ Moisees, gal nu de' zir de riidz nu bzeeñ de yu nu mnii por cuen ni Ñgyoozh ―nam. 41Lat nu gabee yu' tublaazh de mbecy fariseo, 42orze' na Jesuuz rab mi dey: ―¿La ñuu shcab rash der nu nac Mesías, biñ nu ca lo cuen nu co mbañ mbecy? ¿Cyu nez nac mi? ―nam. Orze' na dey: ―Nez Dabi nac mi ―na dey. 43Orze' na Jesuuz rab mi dey: ―Benu ni, ¿lagu mnii Espiriit Yon ni Ñgyoozh lo Dabi nu mniiy nu nac mi Shuaan yu? Gun ub la Dabi nay: 44Ñgyoozh nam rab mi Shuaana̱: “Gzub ru lugaar nu gzub mbecy nu gya zir zu par yaa be̱e̱ ii, gashtal gyicy la̱ nu gyicy ru gan de losa'r yuur”, na Ñgyoozh, na Dabi. 45’Orze' ¿walab gaal gac gruu Mesías, biñ nu ca lo cuen nu co mbañ mbecy lat nez Dabi, benu Dabi mniiy nu nac mi Shuaan yu? Gun bi guzañ na'ñ gul Dabi anzir nu gal mi. Orze' ¿walab gaal gac gruum lat nez yu? ―nam. 46Orze' rila wangac tush cya dey ni tub riidz. Nunu nese laab dzi la ze' wancuica' dey baloor nu ngugyi'y lom.

will be added

X\