San Mateo 2

1Jesuuz gul mi tub gyedz nu ri lo yu ni Judea nu la Beleeng. Gul mi tiem nu Herodes nac yu rey. Orze' bri la be mbecy nu bruu gashtal ze' nu driib doo, briy Jerusaleeng. De yu ze' nac dey mbecy nu rsya' de mod nu ricy bel baa. 2Orze' bdugyi' dey: ―¿Ca lugaar gul rey ni de mbecy Israeel? Gun gashtal ze' nu driib doo bzaac de̱ bel baa nu briic muesht nu bi gul yu. Nde' nu yap de̱ nu griib zily de̱ yu ―na dey. 3Na ornu güeñ rey Herodes nde', orze' tona' la guc deet nañ lardooy. Nunu ni zi'l guc deet nañ lardoo de' zir de mbecy gyedz Jerusaleeng ornu güeñ yu de coz ze'. 4Orze' Herodes bredz yu de uz zub lo, nunu bredz yu de yu nu rlyuu leey nu bzeeñ Moisees nu gyatublaazh dey. Orze' bdugyi'y lo dey ben ca lugaar gal Mesías, biñ nu ca lo cuen nu cyid nu co mbañ de mbecy. 5Orze' de yu ze' nay: ―Gal mi tub gyedz nu ri lo yu ni Judea nu la Beleeng, gun ni pcaa tub yu nu mnii por cuen ni Ñgyoozh ornu pcaay: 6Ru Beleeng, tub gyedz nu ri lo yu ni Judea, ru walab tub gyedz nu ich zir zu par de' zir de gyedz ily nu yu' lo de yu ni Judea, gun ze' nu ri ru gruu zac tub biñ nu gyub ic. Mi ze' gyub ic mi de mbecy ne̱, de mbecy Israeel. Ni pcaa de yu nu mnii por cuen ni Ñgyoozh ―na dey. 7Orze' Herodes dze ga bredz yu de yu nu rsya' mod nu ricy bel baa. Gaze' nu bdugyi'y lo dey la gaal tiem nu bruu zac bel baa ze'. 8Orze' bzuu nez yu dey zay Beleeng. Orze' nay: ―Gua der gal ze'. Nap yub der mdoo ze'. Ornu gyap ru yu ze', orze' yeeda' der laaba' par ii gun orze' gyoor rishlo̱. Gun ni' ya̱ cha̱ griib zilya̱ yu ―na Herodes. 9Na ornu bya' lo nu bee dey riidz nu rey Herodes, orze' de yu nu rsya' mod nu ricy bel baa ze' bruu dey loy zay. Na ornu bi zaab za dey zay, orze' bruu zaca' bel baa nu bi bzaac dey anzir par ze' nu driib doo ze'. Za ma gashtal ze' nu mbish mdoo ze'. Ze' guca ma. 10Ornu bzaac dey bel baa ze', orze' tona' la bet lagy yu. 11Orze' ornu gu' dey nañ yu', orze' bzaac dey mdoo ze' nu ñaam Li. Orze' gusu tib dey nunu briib zily dey mdoo ze'. Gaze' nu tub ga la dey pshaal yu ru' cajo̱o̱ niy. Orze' briic dey or ganim. Briic dey tub lo yaal nap nu dzi ñgyup sac ganim. Nunu briic dey tub lo ga' bid nu zguul ti' nu la mirra ganim. 12Orze' despuees mnii Ñgyoozh lat pcaal dey nu cue' cush cyay ded yu lo Herodes. Orze' reña' nez bish cya dey yay par ledz yu. 13Despuees ornu bi ya de yu nu rsya' mod nu ricy bel baa ze', orze' bruu zac tub anc ni Ñgyoozh Shuaan den lat pcaal See. Orze' nay rab yuy: ―Wesh te. Gush mdoo ii nu ñaam. Orze' na gua dze der gashtal lo de yu ni Egipto. Ze' cyiiñ ru gashtal ornu ya̱ ne̱e̱ lor, gun Herodes yub yu mdoo ii par nu cut yuy ―nay. 14Orze' See lueg la wesh tey, nunu gush yu mdoo ze', nunu pteey ñaa mdoo ze'. Orze' gush nez yu zay laab nañ rel ze', za nuy mdoo ze' nu ñaam par Egipto. 15Ze' pcyiiñ dey gashtal gut la Herodes. Ni guuc ñi par nu byu' niñ gal nu mnii Ñgyoozh Shuaan den lat de riidz nu pcaa tub yu nu mnii por cuen nim ornu nam: “Ya̱ bredza̱ i'ña̱ par nu gruum Egipto”, nam. Ni pcaa yu nu mnii por cuen ni Ñgyoozh. 16Na ornu gud lagy Herodes nu de yu nu rsya' mod nu ricy bel baa ze' nu bguu dey yu, orze' tona' la guzi lagy yu. Orze' bicy yu mandaar nu cut mbecy de yu nguzh mi' nu yu' ña'n cyup par gash. Cut dey de yu nguzh nu yu' Beleeng gal nu de yu nguzh nu yu' dub yub la gaab ga ru'ñ. Ni mod bicy yu gun gush yu tiem nu bruu zac bel baa gal nu mnii de yu nu rsya' mod nu ricy ma ze'. 17Ni mod guc ñi par nu byu' niñ gal nu pcaa Jeremías, tub yu nu mnii por cuen ni Ñgyoozh ornu pcaay: 18Lat gyedz nu la Ramá zaab ti' mbecy. Tona' la ruun dey. Tona' la ricy dey sentiir. De yu nu ruun ze', nde' nez Raquel. Ruun dey nu nac i'ñ yu. Tees walagy dey nu cuic mbecy consuel niy gun dela de i'ñ dey bi gut yu. Ni pcaa Jeremías. 19Despuees ornu gut Herodes, orze' tub anc ni Ñgyoozh Shuaan den bruu zaca'y lat pcaal See lat nu rcyiiñ yu Egipto. 20Orze' nay rab yuy: ―Wesh te. Gun gyar nu yu nguzh ze' nu ñaam. Yaa par lo de yu ni Israeel, gun na bi gut yu nu rlagy cut yu nguzh ze' ―nay. 21Orze' See wesh tey ya nuy yu nguzh ze' nu ñaam Li. Yay par lo de yu ni Israeel. 22Tees ornu güeñ yu nu Arquelao byeeñ yu lo uz yu Herodes nu riib ic yu Judea, orze' gudzib yu ñgyay lugaar ze'. Orze' laaba' lat pcaal yu mnii Ñgyoozh loy lac mod gyicy yu. Orze' guay tub lugaar ni Galilea. 23Na ornu briy ze', guay pcyiiñ yu tub gyedz nu la Nazaret. Ni guc de nde' par nu byu' niñ gal nu mnii tub yu nu mnii por cuen ni Ñgyoozh ornu mniiy nu mbecy niiy nu Jesuuz nac mi tub mbecy Nazaret.

will be added

X\