San Mateo 19

1Ornu blazh mnii Jesuuz de riidz ze', orze' bruum lo de yu ni Galilea zam par lo de yu ni Judea nu ri tub la' ga' dzu gyoow Jordaang. 2Orze' tona' la mbecy zigy gua ca dey ich mi. Orze' ze' bicy yac mi zañ mbecy rat. 3Orze' bru'ña la be de mbecy fariseo par nu gyicy dey preb mi. Gaze' nu na dey rab yum: ―¿A nap zuñ par lo leey ni Moisees nu gac zaan mbecy mñaay nu nac la zi'l gyi'? ―na dey. 4Orze' na Jesuuz rab mi dey: ―¿Walab gaal nigul sya' der de riidz ni Ñgyoozh, ze' nu rniiñ nu nese nu bzub gyi' gyishlombecy Ñgyoozh psa' lagy mi tub yu gyeey nu tub biñ mñaa? 5Ni' zi'l rniiñ nu de yu gyeey zeeñ dey uz yu nu ñaay par nu gyatublaazh yu nu mñaay. Orze' lo cyup dey gyac yu se tub zi mbecy, rniiñ. 6Nde' nu walaba' cyup dey nac yu sinu se tub ziy. Nde' nu ni tub la mbecy wac gyicy yu nu gla' losa' cyup mbecy, benu bi nac dey mbecy nu bi bicy tublaazh Ñgyoozh ―nam. 7Orze' na de mbecy fariseo ze' rab yum: ―Benu ni, ¿lagu mnii Moisees nu co mbecy gyicy rishbeey nu gzaan dey mñaay, orze' gzu nez yum gyam? ―na dey. 8Orze' na Jesuuz rab mi dey: ―Laab par nu dzi zed lo der, nde' nu Moisees briic yu rishbeey nu zaan der mñaar. Tees nese nu bzub gyi' gyishlombecy walab ni mod rlagy ñi. 9Ya̱ rne̱e̱ lo der nu cyu zi'l mbecy nu coy gyicy nu zaan yu mñaay, benu walab nu nac nu shiñ bicy mi nu reña' yu gyeey, orze' chelaay tuuba' biñ mñaa, orze' yu ze' ricy yu cyi nu wangyicy paay nu mñaay. (Nunu cyu zi'l mbecy nu gash tub biñ mñaa nu bzaan ñgyee, orze' yu ze' ni' zi'l ricy yu cyi par lo Ñgyoozh nu gul yu mñaa losa'y) ―nam. 10Orze' de yu nu rsya' lom nay rab yum: ―Benu ni rac nu tub yu gyeey nu mñaay, orze' nap zir nu cue' chelaan ―na dey. 11Orze' na Jesuuz rab mi dey: ―Par walab dela mbecy gac gyicy yac yu de riidz nu mnii der ze', tees de yu nu locyuub Ñgyoozh zi'l nu gac gzu laay ub ziy. 12Gun zañ coz gyicy ñi nu wacyiiñ mbecy nu chelaay. Gun yu' mbecy nil nese nu gul laay wacyiiñ yu nu chelaay. Ze' yu' ga' dey, mbecy bicy yu nu wacyiiñ yu nu chelaay. Ze' yu' ga' mbecy ricy yu nu wacyiiñ yu nu chelaay nu nac gyel gubier ni Ñgyoozh. Benu ca na mbecy gac gyicy yu nu cue' chelaay, orze' gac gyicy yuñ ―nam. 13Orze' la be mbecy bru'ña nu dey de yu nguzh lo Jesuuz par nu gal yaam dey nunu cyiñ mi lo Ñgyoozh ni dey. Orze' de yu nu rsya' lom bdza' dey ni de mbecy nu bru'ña nu de yu nguzh ze'. 14Orze' na Jesuuz rab mi dey: ―Bzaan der gyecha' de yu nguzh lo̱. Cue' niir lo dey nu ruu chuy. Gun lugaar ze' nu riib ic Ñgyoozh, nde' lugaar nu yu' mbecy nu na gal nu na de yu nguzh ii ―nam. 15Orze' gul yaam de yu nguzh ze'. Orze' bruum lugaar ze' zam. 16Tub tir gua tub yu feñ lo Jesuuz. Orze' nay rab yum: ―Masht nap, ¿la ñuu coz nap rlagy ñi nu gyicya̱ par nu cui mbaña̱ tub la? ―nay. 17Orze' na Jesuuz rab mi yu: ―¿Lagu rnii ga' ru nu nap ya̱? Se cyu' zir nu nap sinu tub zi la Ñgyoozh. Benu rlagy ru gad gyel mbañ nir, orze' rlagy ñi gyicy yac ru nu de riidz nu rnii Ñgyoozh lo de mbecy nu gyicy yac dey ―nam. 18Orze' na yu feñ ze': ―¿Ca na de riidz nu rzat ru ze'? ―nay. Orze' na Jesuuz: ―Cue' cut ru losa'r. Cue' gal ru mbecy nu wanchelaar. Cue' gyicy ru gubaan. Cue' riib ru gyidza too losa'r. 19Pca lagy lo uz ru nunu pca lagy lo ñaar, nunu pca losa'r gal nu rcar ub ru ―nam. 20Orze' na yu feñ ze': ―Dela nde' bi bicy yaca̱ ñii. ¿La' zir coz rlagy ñi nu gyicya̱? ―nay. 21Orze' na Jesuuz rab mi yu: ―Benu rlagy ru gac ru mbecy nu zu gal mod nu rlagy Ñgyoozh, orze' yaa cut ru dela coz nu yu' nir. Gaze' nu tiñ ze' cuic ru ni de mbecy zi. Orze' gyibaa gyad gyel nap nir. Nunu cyid ru nu cyid car icha̱ ―nam. 22Na ornu güeñ yu feñ ze' de riidz ze', orze' tona' la bicy shniy. Orze' yay. Gun tona' la yu' gyel nap niy. 23Orze' Jesuuz nam rab mi de yu nu rsya' lom: ―Ya̱ rishli rne̱e̱ lo der nu tona' la biigy nu chu' tub guani'ñ lat de mbecy nu riib ic Ñgyoozh. 24Nunu ne̱e̱ ga̱' lo der nu a̱' biigy zir nu ded tub camey gyeegy gyi' tub gyishtiib gaze' par nu chu' tub mbecy guani'ñ lat de mbecy nu riib ic Ñgyoozh ―nam. 25Na ornu güeñ de yu nu rsya' lom nde', orze' tona' la za nu ic dey. Orze' brugyi' rnii dey: ―Ze' benu ni, ¿cyu gac gruu mbañ? ―na dey. 26Orze' Jesuuz bgüiim lo dey. Orze' nam rab mi dey: ―Par de mbecy, rila wac gyicy dey nde'. Tees Ñgyoozh gac gyicy mi dela coz ―nam. 27Orze' na Bed rab yum: ―Ze' de̱ ya̱ bzeeñ de̱ dela coz nu yu' ne̱ de̱ nunu yap ca̱ de̱ ich ru. Orze' ¿la ñuu coz gad ne̱ de̱? ―nay. 28Orze' Jesuuz nam rab mi dey: ―Ya̱ rishli rne̱e̱ lo der, ornu shuub tiem nu bi zu nap dela coz, ornu ya̱ biñ nu byac mbecy, chesuba̱ nu gyub ica̱ ze' nu yu' gyel lily ne̱, orze' de ru mbecy nu yad ca icha̱ ni' chesub der lo trocyup yashily par nu gri bee der ni de trocyup nac nez mbecy Israeel. 29Nunu dela de mbecy nu bzeeñ coz ni nu nac ya̱, de yu nu bzeeñ yu', de yu nu bzeeñ bicy, de yu nu bzeeñ zan, de yu nu bzeeñ uz, de yu nu bzeeñ ñaa, de yu nu bzeeñ i'ñ, de yu nu bzeeñ yu ni, de yu ze' tub gaynal tant nu sheñ zir gyad niy nunu gad nu cui mbañ yu lo Ñgyoozh tub la. 30Tees zigy de mbecy nu gya zir zu na, de yu ze' gyac yu yu nu gash zir zu par lo. Ze' zigy de mbecy nu gash zu na, de yu ze' gyac dey mbecy nu gya zir zu par lo ―nam.

will be added

X\