San Mateo 18

1Laab tiem ze' bru'ña de yu nu rsya' lom. Orze' na dey: ―¿Cyu nu gya zir zu lat de yu nu riib ic Ñgyoozh? ―na dey. 2Orze' Jesuuz bredz mi tub yu nguzh mi' nu chay lom. Orze' bzum yu lat dey. 3Orze' nam rab mi dey: ―Ya̱ rishli rne̱e̱ lo der, benu wachaa der mod nu ricy ru, nunu benu wash der mod nu na gal nu na yu nguzh ii, orze' wac chu' der lat de yu nu riib ic Ñgyoozh. 4Mbecy nu gya zir zu lat de yu nu riib ic Ñgyoozh, yu ze' yu nu gyicy gyel gyidz ni. Nunu yu ze' yu nu gyac gal nu na yu nguzh mi' ii. 5Ca zi'l na mbecy nu shet ic yu nu gac nuy tub yu nguzh mi' gal nu na yu ii, orze' ni' pshet ic yu nu gac nuy ya̱ ―nam. 6Orze' na ga' Jesuuz: ―Cyu zi'l mbecy nu gyicy nu gnu tub mbecy shni nu ricy cup consuel lo̱, nap zir nu cyiig dey tub gyita' gyech ily nu rdugu yeñ yu. Gaze' nu shet lag dey yu lo nisyudoo par nu gat yu. 7¡Dzi ga cuaa de mbecy gyishlombecy ii nu ricy dey nu rnu losa'y! Gun segur la yu' coz nu ricy ñi nu ricy mbecy cyi, tees ¡cuaa mbecy nu rlyuu coz cyi lo losa'! 8’Nde' nu benu tub yaar o tub gyi'r gyicy ñi nu gyicy ru cyi, orze' nap zir nu cyug ru ñii nunu ne'r ñii gun nap zir nu gzur nu tu'nc tub yaar o nu tu'nc tub gyi'r, gaze' nu shet lag Ñgyoozh dutuub la cuerp nir lo gyi nu rila wayu. 9Nunu benu tub urlor gyicy ñi nu gyicy ru cyi, orze' cor ñii, nunu ne'r ñii, gun nap zir nu gzur nu tub zi urlor gaze' nu gyet lag ru lo gyi ni gabily nu rup laa urlor ―nam. 10Orze' na ga'm: ―Orze' cue' güii naañ der lo de mbecy nu na gal nu na de yu nguzh mi' ii. Gun gyibaa zaab zu la de anc ni dey lo Ñgyoozh, uz na, biñ nu zub gyibaa. 11Gun ya̱ biñ nu byac mbecy, yapa̱ nu loo mbaña̱ de mbecy bdune'. 12’¿Lac ñuu rzii der? Ze' benu tub mbecy zu tub gaynal shily niy, orze' dune' tub ma niy, ¿a walab nu zeeñ yu nobent zub gaa ma logyi', orze' cha yub yu tub bañ nu bdune' ze'? 13Gun ya̱ rishli rne̱e̱ lo der, benu gyicy yu gan nu gyad ma niy, orze' gyet zir lagy yu nu nac tub ma ze', gaze' nu nac nobent zub gaa bañ nu wantune' ze'. 14Ni' zi'l mod ricy Ñgyoozh, uz den, biñ nu zub gyibaa. Walagy mi nu dune' ni tub mbecy nu na gal nu na de yu nguzh mi' ii ―nam. 15Orze' na ga'm: ―Ze' benu ca na tub losa'r shiñ ricy nuy ru, orze' gua ub zi'l ru loy. Ornu ub ziy, orze' niir loy la na falt niy. Ze' benu zuub gyidag yu nir, orze' bicy ru gan bzu nap ruy. 16Ze' benu wazuub gyidag yu nir, orze' cuedz ru sa tub o sa cyup losa'r nu cha nur loy. Gun orze' gac cyup o chon teshtig nu gyeñ dey de coz nu gniir. 17Tees benu wazuub gyidag yu ni de yu ze', orze' gua niir lo de mbecy ni Ñgyoozh ornu yu' tublaazh dey. Orze' benu wangyeñ yu ni dela mbecy ze', orze' gyicy der yu par tub mbecy nu walab mbecy ni Ñgyoozh, o par tub mbecy nu rte' tiñ por cuen ni gubier Rom. 18’Ya̱ rishli rne̱e̱ lo der: lac zi'l mod nu ricy mbecy, benu de ru niir gashtal gyishlombecy ii nu walab ni rlagy ñi, orze' ni' zi'l gashtal gyibaa walab ni rlagy ñi nii Ñgyoozh. Nunu la zi'l coz nu de ru niir gashtal gyishlombecy ii nu laab ni, orze' ni' zi' laab ni nii Ñgyoozh gashtal gyibaa. 19’Nunu ne̱e̱ ga̱' lo der: benu cyup der tub zi'l riidz nu gniir ornu cyiñ der lo Ñgyoozh, uz der, biñ nu zub gyibaa, orze' gyicy mi gal nu rlagy der. 20Gun ca zi'l ze' nu gyatublaazh cyup der o chon ru nu nac ya̱, ze' zu̱ lat der ―nam. 21Orze' bru'ña Bed lo Jesuuz. Orze' nay rab yum: ―Shuaan de̱, ¿la be tir rlagy ñi nu gyicy sulagya̱ ni losa̱' ornu shiñ gyicy nuy ya̱? ¿A mas ñuu gagy tir? ―nay. 22Orze' na Jesuuz rab mi Bed: ―Walab nu rne̱e̱ nu gagy zi'l tir gyicy sulagy ru ni losa'r, sinu gashtal gagy tir nu setent gyicy sulagy ru ni losa'r ―nam―. 23’Nde' nu mod nu rac nu gyel gubier ni Ñgyoozh, nde' nañ gal nu na mod nu rac nu tub rey. Rey ze' ngulagy yu nza' loy ni de coz nu ca lo cuen ni de moz niy. 24Saa la brugyi'y nu rza' loy nu de moz niy ornu bru'ña nu dey tub yu nu zaab bee miyo̱o̱ la niy. 25Orze' como moz ze' sac la tiñ niy par nu gyabic yu ni rey ze', orze' rey ze' mniiy nu sa'y moz ze' nu mñaay nu de yu nguzh niy nu dela suuy par nu gad tiñ nu cyish yu dela di'ñ yu. 26Orze' moz ze' gusu tib yu lo rey ze'. Orze' nay rab yuy: “Cua̱a̱ ya̱, bicy cup ñuu pase̱z ne̱. Ya̱ grish gulya̱ dela nde' nir”, nay. 27Orze' rey ze' gushni lagy yuy. Orze' bicy sulagy yu ni moz ze' ni dela di'ñ yu. Orze' blaay yu. 28’Na ornu moz ze' bruuy ro' rey ze' yay, orze' bdzeel yu losa' moz yu, tub yu nu zaab ñuu mi' tiñ niy. Orze' bdu' yaay ngüe̱z yu. Orze' brugyi' rsi̱i̱y yeñ yu. Orze' nay rab yuy: “Gyabic ru tiñ nu zaab ru ze' ne̱”, nay. 29Orze' losa' moz yu ze' gusu tib yu loy. Orze' nay: “Bicy cup ñuu pase̱z ne̱. Gaze' gyabica̱ delañ nir”, nay. 30Tees yu ze' wangalagy yu gyicy cup yu pase̱z ni losa'y, sinu mniiy nu cha yu ze' nañ yu' gyiib gashtal cuaa lay dela nu zaab yu niy. 31Na ornu bzaac de' zir moz de coz nu guc, orze' tona' la deet guc nañ lardoo dey. Orze' gua too dey rishlo rey dela coz nu guc. 32Orze' rey ze' bredz yu moz ze' nu chay loy. Orze' nay rab yuy: “¡Ru mbecy a̱' nap! Ya̱ bicy sulagya̱ nir ni dela di'ñ ru gun mnishbaar lo̱. 33Orze' ni' ru rlagy ñi nu ñgyashni lagy ru losa'r gal nu ya̱ gushni lagya̱ ru”, nay. 34Orze' tona' la guzi lagy rey ze'. Orze' bzeed yu moz ze' lo cashtig gashtal cuaa lay dela di'ñ yu ―na Jesuuz. 35Orze' na ga'm: ―Ni' zi'l gyicy Ñgyoozh, uza̱, biñ nu zub gyibaa, nu de ru benu wayicy sulagy der ni losa'r nañ lardoor ―nam.

will be added

X\