San Mateo 17

1Ornu bded tub shuup dzi, orze' Jesuuz gua nu reñ mi Bed nu Santiag nu Waa, bicy yu. Orze' gup mi too tub bicy nu dzi gya nu de yu ze'. 2Orze' bdza nu na Jesuuz lo rgüii la dey. Orze' gal nu na doo güidz ni na lom byac. Ze' shab mi byacaacy ryal lañ. 3Orze' sij la bruu zac Elías nu Moisees, lo rgüii la de yu nu rsya' lom, nu ro dey riidz nu Jesuuz. 4Orze' Bed nay rab yu Jesuuz: ―Shuaan de̱, ¡dzi ga nap nu yu̱' de̱ ii! Benu rlagy ru, orze' za̱a̱ de̱ chon ramad ni der: tub par ru, tuuba' par Moisees, tuuba' par Elías ―nay. 5Orze' lat nu gabee rnii Bed, orze' bruu zac tub za ryal too dey. Orze' psoow ñi dey. Orze' zaab ti' mbecy lat za ze'. Orze' nam: ―Mi ii i'ña̱ nu tona' la rca̱, nunu tona' la yet lagya̱. Bzuub gyidag der nim ―nam. 6Na ornu güeñ de yu nu rsya' lom de riidz ze', orze' gugyit tiily la dey lo yu. Nunu tona' la gudzib dey. 7Orze' becha' Jesuuz lo dey nunu gul yaam dey. Orze' nam rab mi dey: ―Wes su der. Cue' dzib der ―nam. 8Na ornu bri' lo dey, orze' wansaca' dey cyu' zir mbecy. Se Jesuuz zi'l bzaac dey. 9Gaze' nu gush nez num dey bet mi par gyi' bicy ze'. Na lat nu ya num dey, orze' pcach mi ru' dey. Orze' nam rab mi dey: ―Cue' nii der lo ni tub la mbecy de coz nu bruu zac lo der gashtal shuub la dzi nu ya̱, biñ nu byac mbecy, gata̱ nunu gyabaña̱ tuuba' tir ―nam. 10Orze' de yu nu rsya' lom ze' na dey rab yum: ―¿Lagu de yu nu rlyuu leey ni Ñgyoozh rniiy nu Elías rlagy ñi nu cyid yu loga la? Gaze' nu cyid Mesías, biñ nu ca lo cuen nu co mbañ mbecy ―na dey. 11Orze' na Jesuuz rab mi dey: ―Rishli gaal nu Elías cyid yu loga la par nu gzu nap yu de la coz. 12Tees ya̱ ne̱e̱ lo der nu Elías bi biid yu, nunu de mbecy wangyu' lo dey yu, tees bicy nu dey yu dela coz a̱' nap nu mnii too dey nu gyicy nuy yu. Ni' zi'l mod ted zi dey ya̱, biñ nu byac mbecy ―nam. 13Orze' de yu nu rsya' lom bet lag dey cuen nu Waa nu briib nis mbecy rzat mi lo dey. 14Na ornu bru'ñam ze' nu byatublaazh de mbecy, orze' tub mbecy bru'ñay lo Jesuuz. Gusu tib yu lom. Orze' nay rab yum: 15―Jesuuz, gushni ñuu lagy i'ña̱ gun ricy ñi bi rat ca' niy. Nunu tona' la rzac yu. Bi guzañ tir yet lag yu lo gyi nu lo nis. 16Bi gua̱ du̱ yu lo de yu nu rsya' lor, tees wangac gyicy yac dey yu ―nay. 17Orze' na Jesuuz: ―¡A der mbecy nu yu' na! Dzi ga wagyicy cup der consuel lo̱. Dzi ga mnu shcab ni der. ¿La' zir be tiem rlagy ñi nu chesa̱ du̱ der? Da nu der yu nguzh rat ze' lo̱ ―nam. 18Orze' Jesuuz bicy mi mandaar lo nuras ze' nu cue' ni gyicy yu. Orze' bruu chuy lo yu nguzh rat ze'. Orze' laab or la ze' byac yu nguzh ze'. 19Na ornu bded nde', orze' de yu nu rsya' lom mnii nu reñ dey mi. Orze' na dey: ―¿Lagu wangac loo chu̱ de̱ nuras ze'? ―na dey. 20Orze' nam rab mi dey: ―Nde' par nu dzi ñuu mi' consuel ricy cup der lo̱. Gun rishli rne̱e̱ lo der benu ricy cup der mas ñuu miiñ consuel, mas ñuu gal nu na mbigy urnishtas, orze' gac nii der lo tub bicy nu gruu chuñ nu chañ tuuba' lugaar nunu gac ñii gal nu nii der. Gun ni tub coz warusuñ nu wac ñi benu ricy cup der consuel lo̱. 21Tees de nuras nu ni na, yu ze' waruu chuy benu i zi'l, sinu rlagy ñi nu cyiñ der lo Ñgyoozh, nunu ca der ni ub ru nu cue' gow ru gyit lat nu rzu bich der nu nac mi. 22Lat nu gabee rded mi tublaazh num de yu nu rsya' lom lo de yu ni Galilea, orze' Jesuuz nam rab mi dey: ―Ya̱, biñ nu byac mbecy, gu' dey ya̱ yaa de' zir mbecy. 23Orze' cut dey ya̱. Tees dzi chon gyabaña̱ ―nam. Orze' de yu nu rsya' lom, ornu güeñ dey nde', tona' la bicy shni dey. 24Na ornu Jesuuz nu de yu nu rsya' lom bri dey Capernaum, orze' de yu nu rboo tiñ por cuen ni yu' nu driib zily dey Ñgyoozh bru'ña dey lo Bed. Orze' na dey rab yuy: ―Ze' masht nir, ¿a cuic yu tiñ nu dric den par cuen ni yu' nu riib zily den Ñgyoozh? ―nay. 25Orze' na Bed: ―Cuic mi ñii ―nay. Ornu Bed gu'y nañ yu, orze' Jesuuz mniim loga la. Orze' nam: ―¿La ñuu shcab rash ru Simo̱o̱? ¿Ca na de mbecy cyish yu tiñ ni de rey gyishlombecy ii? ¿A de yu guledz cyish yu, uti de mbecy yad? ―nam. 26Orze' na ga' Bed: ―Laab de mbecy yad ―nay. Orze' na Jesuuz: ―Orze' de mbecy guledz, ¿a walagy ñi nu cyish dey beni? 27Par nu cue' gyicy na nu gazi lagy ni tub la mbecy, orze' gua ru' nisyudoo. Shet lag ru duu gyedz nir nu rub bel. Orze' bel loga la nu gad nir, orze' güiir ru' ma. Ze' ri tub tiñ nu gal ñii nu griib ru lo rup laa den. Orze' cha nur ñii cuic ru ni dey ―nam.

will be added

X\