San Mateo 15

1Orze' la be de mbecy fariseo, gal nu de mbecy nu rlyuu leey ni Ñgyoozh bruu dey Jerusaleeng za dey lo Jesuuz. Orze' bdugyi' dey lom. Orze' na dey: 2―¿Lagu de yu nu rsya' lo ru wagyicy yac dey nu de cushtom ni de gyitoo bel ni den nu wagnaa dey anzir nu gow yu gyit gal mod nu bzeeñ de gyitoo bel? ―na dey. 3Orze' Jesuuz nam rab mi dey: ―Ze' de ru, ¿lagu rlagy der zuub yaar de riidz ni Ñgyoozh par nu gyicy yac der cushtom ni gyitoo bel nir? ―nam. 4―Gun Ñgyoozh nam: “Pca lagy lo uz ru nunu pca lagy ru lo ñaar, gun yu nu nii zi ni uz o yu nu nii zi ni ñaa, yu ze' rlagy ñi nu gat yu”, nam. 5Tees de ru rniir nu benu tub mbecy niiy lo uz yu o niiy lo ñaay nu la zi'l coz nu rlagy ñi cuic yu ni dey, nde' bi briic yu ni Ñgyoozh. Orze' walagy ñi locyuub yu uz yu nu ñaay. 6Nde' nu par nu nac de cushtom ni gyitoo bel ni der, orze' rzu chu der de riidz nu rnii Ñgyoozh. 7¡A de ru mbecy rzuu lo! Tona' la nap mnii Isaías, yu nu mnii por cuen ni Ñgyoozh, ornu mniiy: 8De mbecy ii rzat dey ya̱ nu ru' zi'l yu. Tees nañ lardoo dey ricy zet lagy yu lo̱. 9Se la la cyiiñ ñi nu driib zily dey ya̱ gun driib zily ton dey ya̱. Leey nu bloo ic mbecy, nde' zi'l rlyuu dey. Ni na Ñgyoozh lat de riidz ni Isaías ―na Jesucrisht. 10Gaze' nu bredz Jesuuz de mbecy zigy nu gyatublaazh dey lom. Orze' nam rab mi dey: ―Dela der bzuub gyidag der, nunu bicy der nu gyet lag ru cuen. 11Nde' nu walab coz nu chu' par ru' mbecy gyicy ñi nu gabag yu, sinu coz nu driib ru' dey, nde' gyicy ñi nu gabag yu ―nam. 12Orze' de yu nu rsya' lom becha' dey lom. Orze' na dey rab yum: ―¿A wangad lagy ru nu de mbecy fariseo guzi lagy dey ornu güeñ yu de coz nu mniir? ―na dey. 13Orze' na ga'm: ―Coz nu rlyuu mbecy, nde' nañ gal nu na tub ya mni. Ca zi'l na tub ya mni nu walab Ñgyoozh uza̱ mnuuz mi, nde' rlagy ñi nu gruu lyuñ. 14Cue' gyicy cuen der dey, gun na dey gal na mbecy loca'. Benu tub lo ca' lyuuy nez ni losa' lo ca'y, orze' rup laa dey gyet lag yu tub zi'l gyegy ―nam. 15Orze' Bed nay rab yu Jesuuz: ―Pshaal lo de̱ de riidz tiily nu mniir ze' ―nay. 16Orze' na Jesuuz: ―¿Walab gaal ni' de ru wangyet lag der cuen? 17¿A wagad lagy ru nu de coz nu chu' par ru' mbecy yaañ par nañ yu? Orze' gruu ga'ñ nañ yu. 18Tees de coz nu driib ru' mbecy, nde' druuñ gashtal nañ lardooy. Orze' de coz ze' ricy ñi nu rabag yu. 19Gun nañ lardoo dey druu shcab a̱' nap. Ze' druu nu rut dey losa'y. Ze' druu nu ral dey losa'y nu wanchelaay. Ze' druu nu ral dey losa'y de lo la mod nu a̱' nap. Ze' druu nu ricy dey gubaan. Ze' druu nu rguu dey. Ze' druu nu rnii dey rishcuen. 20De nde' coz nu ricy ñi nu rabag mbecy. Tees benu mbecy wanaay ornu gow yu gyit, walab nde' gyicy ñi nu gabag yu ―nam. 21Orze' Jesuuz bruum lugaar ze' zam par lo de yu ni gyedz Tiro nu Sidón. 22Orze' bru'ña tub biñ mñaa, biñ Cananea nu pcyiiñ lugaar ze', lo Jesuuz. Orze' rbish ti num Jesuuz. Orze' nam: ―¡Jesuuz, biñ nu nac nez Dabi, gushni ñuu lagy ya̱! Fiñ guzh ne̱ bicy ni nuras ñi nunu tona' la rzac ñi ―nam. 23Tees Jesuuz rila waniim. Orze' bru'ña de yu nu rsya' lom. Orze' na dey rab yum: ―Mnii lo biñ mñaa re nu gyam, gun yad mi rbish tim par ich na ―na dey. 24Orze' na Jesuuz: ―Ñgyoozh bzuu nez mi ya̱ nu yapa̱ lat de mbecy Israeel, de yu nu na gal nu na shily bdune' ―nam. 25Tees biñ mñaa ze' becha'm lo Jesuuz. Orze' gusu tib mi. Orze' nam: ―Jesuuz, blocyuub ya̱ ―nam. 26Orze' na ga' Jesuuz: ―Walab se'ñ nu loon gyishtily yaa de yu nguzh nin par nu ne'n ñi lo che̱' ―nam. 27Orze' na biñ mñaa ze' rab mi Jesuuz: ―Laab ni gal nu mniir. Tees mas de che̱' gac gow ma de coz nguzh nu gyet lag lo mez ni shuaan ma ―nam. 28Orze' Jesuuz nam rab mi biñ mñaa ze': ―¡Dzi ga fert ricy cup ru consuel lo̱! Na ya̱ gyicya̱ gal nu rlagy ru ―nam. Orze' laab or la ze' byac fiñ nguzh nim. 29Orze' bruu Jesuuz lugaar ze' zam dub ru' nisyudoo la ni Galilea. Orze' pcam tub logyi' zam. Orze' ze' gusub mi. 30Orze' tona' la mbecy zigy byatublaazh dey lugaar ze' nu zub mi. Gua nu dey mbecy coj, gal nu mbecy lo ca'. Gua nu dey mbecy yaa bicy, gal nu mbecy gop. Gua nu dey zañ zir lo de mbecy rat. Gua tish dey de yu ze' lom. Orze' bicy yac mi dey. 31Orze' tona' la za nu ic de mbecy ornu bzaac dey nu de mbecy gop brugyi' rniiy; nu de mbecy yaa bicy byanap yaa dey; nu de mbecy coj brugyi' rza nap dey; nu de mbecy lo ca' brugyi' rzac dey. Orze' brugyi' nu driib zily dey Ñgyoozh, biñ nu driib zily de mbecy Israeel. 32Orze' Jesuuz bredz mi de yu nu rsya' lom nu gyatublaazh dey. Orze' nam rab mi dey: ―Ya̱ rashni lagya̱ de mbecy zigy ii gun bi bza' chon dzi nu yu' dey lo̱ ii, nunu blazh coz nu gow dey. Walagya̱ zuu neza̱ dey gyay yu'y gal ran zi'l yu, gun dzi ga suun ñi dey nez nu yay ―nam. 33Orze' na de yu nu rsya' lom: ―¿Tees lac gyicy na nu gad de coz nu gow de mbecy zigy ii? Gun ii tub lugaar ze' nu sac la mbecy ―na dey. 34Orze' na ga' Jesuuz rab mi dey: ―¿La be gyishtily ricy cup der? ―nam. Orze' na dey: ―Gagy gyishtily nu cyup chon bel mi' ―na dey. 35Orze' Jesuuz bicy mi mandaar nu gzub dey lo yu. 36Orze' gush mi gagy gyishtily ze' nu de bel ze'. Orze' briic mi gras ni Ñgyoozh. Orze' blew mi ñii briic mi ni de yu nu rsya' lom. Orze' de yu ze' bleez dey ñi lat de mbecy zigy. 37Orze' dela dey bdow gyel lay. Orze' blazh ze', pte' dey gagy la chicyiw de coz ngush nu brusub. 38De yu nu bdow gyishtily ze' tap miily dey nac yu. Reñ de biñ mñaa nu de yu nguzh. 39Despuees ni de nu nde', Jesuuz mnii num dey ñgyoozh. Orze' bzuu nez mi dey yay. Orze' gu'm nañ barc. Orze' zam par lo yu ni Magadán.

will be added

X\