San Mateo 14

1Laab tiem ze' rey Herodes, yu nu riib ic lo de yu ni Galilea, güeñ yu de riidz nu zaab ni Jesuuz. 2Orze' nay rab yu de yu nu zu riiñ loy: ―Yu ze', nde' Waa nu briib nis mbecy. Byabañ yu. Nde' nu rac ricy yu de nusuriidz ily ze' ―nay. 3Ni mniiy gun laab yu bicy yu mandaar nu pcyiig dey Waa nu pshet lag dey yu nañ yu' gyiib. Ni bicy yu par nu nac Herodías, mñaa bicy yu Lip. 4Gun Waa nu briib nis mbecy zaab rnii lay lo rey Herodes. Orze' rniiy: ―Ru rach ñi nir lo Ñgyoozh nu gush ru biñ mñaa ze' ―rniiy. 5Orze' rey Herodes ngulagy yu ñgyut yu Waa, tees gudzib yu lo de mbecy Israeel. Gun bicy dey Waa par tub yu nu mnii por cuen ni Ñgyoozh. 6Tees ornu pshuub dzi nu bicy dey sa' ni dzi nu gul rey Herodes, orze' i'ñ Herodías bilgyi'ñ lo dela mbecy. Orze' rey Herodes tona' la bet lagy yu. 7Orze' mniiy lo fiñ ze' nu waded la cuic yu la zi'l coz nu cyiñ ñi loy. 8Orze' nu loga la bdugyi'ñ lo ñaañ. Gaze' nu nañ rab ñi rey Herodes: ―Rlagya̱ nu cuic ru too Waa ne̱ nañ tub gya'n ―nañ. 9Orze' rey Herodes tona' la bicy shniy ornu güeñ yu riidz ze', tees como lo rgüii la de mbecy nu nguaa ze' mniiy nu waded la cuic yu la zi'l coz nu cyiñ fiñ feñ ze', 10orze' bicy yu mandaar lo tub soldad nu cha shi'ñ yu too Waa nañ yu' gyiib. 11Orze' lueg la za nuy ñi nañ tub gya'n. Orze' briic yu ni fiñ feñ ze'. Orze' fiñ feñ ze' gush ñi nde'. Orze' byabic ñi nde' ni ñaañ. 12Orze' despuees bru'ña de yu nu rsya' lo Waa nu gua te dey cuerp niy. Orze' pcach dey ñi. Orze' gua nii dey lo Jesuuz. 13Ornu güeñ Jesuuz coz nu bzac Waa, orze' bruum lugaar ze'. Zam tub lugaar ub zi nañ tub barc. Na ornu gud lagy de mbecy, orze' bruu dey lat de gyedz za ca̱ dey ich mi par lo yu bigy. 14Orze' Jesuuz bruum nañ barc. Na ornu bzaac mi de mbecy zigy, orze' gushni lagy mi dey. Orze' bicy yac mi de mbecy rat nu gua nu dey. 15Na or becheñ, orze' bru'ña de yu nu rsya' lom. Orze' na dey rab yum: ―Na tona' la bi gudze nunu ii tub lugaar ub zi. Bzuu nez de mbecy gyay, gun orze' cha dey lat de gyedz nu yu' gaab ga, gun orze' zi dey coz nu gow yu ―na dey rab yum. 16Orze' na Jesuuz rab mi dey: ―Walagy ñi nu gya dey. De ru briic coz nu gow dey ―nam. 17Orze' na ga' dey: ―Sac la' zir coz nu ricy cup de̱ nomaas gaay gyishtily nu cyup bel mi' ―na dey. 18Orze' na ga'm rab mi dey: ―Da nu der ñii lo̱ ii ben ―nam. 19Orze' Jesuuz mniim lo de mbecy nu gzub dey lo gyizh. Orze' bdu' yaam gaay gyishtily ze' nu cyup bel ze'. Orze' bgüiim par baa. Orze' briic mi gras ni Ñgyoozh. Orze' blew mi gyishtily ze'. Orze' briic mi ñii ni de yu nu rsya' lom. Orze' bleez dey ñi lat de mbecy zigy. 20Orze' dela mbecy bdow gyel la dey. Ornu blazh nu bdow dey, orze' brusub trocyup ru' chicyiw de coz nguzh ni gyishtily nu pte' dey ze'. 21De yu nu bdow ze' gaay miily dey nac yu: Ze' reñ de biñ mñaa nu de yu nguzh. 22Orze' Jesuuz mniim lo de yu nu rsya' lom nu chu' dey nañ barc par nu cha ga dey lo gashtal tub la' ga' ru' nisyudoo. Orze' Jesuuz byeeñ gam par nu nii num de mbecy ñgyoozh. Orze' bzuu nez mi dey yay yu'y. 23Na ornu blazh nu mnii num dey ñgyoozh na, orze' ub zi lam zam tub logyi' nu nii num Ñgyoozh. Na or becheñ laab lugaar ze' zum ub zi lam. 24Laab tiem ze' zaab barc nu za nu de yu nu rsya' lom gazel nisyudoo. Tees tona' la ricy nu de nguuly lo nisyudoo barc ze', gun par nez nu zañ druu bi. 25Na ornu gabee cas ru' zu, orze' rza la Jesuuz. Lo nis zam lo dey. 26Na ornu bzaac dey nu yad mi lo nis, orze' tona' la gudzib dey. Orze' rbish ti la dey. Orze' na dey: ―¡Nde' tub bis! ―na dey. Nunu rbish ti dey nu tanta' gudzib dey. 27Tees orze' Jesuuz nam rab mi dey: ―¡Briic der baloor! ¡Ya̱ nu nde'! ¡Cue' dzib der! ―nam. 28Orze' Bed nay rab yum: ―Shuaan de̱, ze' benu laab ru, orze' bicy nu ya̱ gza̱ lo nis nu yapa̱ lor ―nay. 29Orze' nam rab mi yu: ―Da ―nam. Orze' Bed bruuy nañ barc, nunu brugyi' nu rzay lo nis zay par lom. 30Tees ornu bdu' cuen yu nu dzi druu bi, orze' gudzib yu. Orze' brugyi' rzez ti̱y lo nis. Orze' brish tiy. Orze' nay: ―¡Shuaan de̱, bloo mbañ ya̱! ―nay. 31Orze' lueg la Jesuuz bdu' yaam yaay. Orze' nam rab mi yu: ―¡Dzi ga ñuu mi' consuel ricy cup ru! ¿Lagu bicy cyup ic ru? ―nam. 32Na ornu gu'y nañ barc nuy mi, orze' lueg la guri bi. 33Orze' de yu nu yu' nañ barc ze' gusutib dey lo Jesuuz. Orze' na dey rab yum: ―¡Rishli gaal ru nac ru i'ñ Ñgyoozh! ―na dey. 34Orze' bded dey lo nisyudoo ze'. Orze' bru'ña dey lo de yu ni Genesaret. 35Ornu de mbecy nu yu' lugaar ze' byu' lo dey Jesuuz, orze' ptush las dey riidz par dela lugaar ze'. Orze' za nu dey dela mbecy rat lom. 36Orze' mnishbaa dey lom nu zaan mi gal dey mas ñuu ru' shab mi. Orze' dela yu nu gul yaa ru' shab mi byac dey.

will be added

X\