San Mateo 13

1Orze' laab dzi ze' bruu Jesuuz nañ yu' nu rcyiiñ mi zam par ru' nisyudoo. Orze' ze' gusub mi. 2Orze' como tona' la mbecy zigy byatublaazh dey lom, orze' gu'm nañ tub barc gusub mi. Ze' de mbecy zigy gucua dey ru' nisyudoo. 3Ze' blyuum zañ coz ni dey nu riidz tiily. Orze' nam rab mi dey: ―Tub mbecy bruuy zay za nuuz yu mbigy. 4Lat nu rtich yu de mbigy ze', yu'ñ bet lag ñi ru' gyernez, orze' bru'ña chigyiñ bdow ma ñii. 5Ze' yu' ga'ñ bet lag ñi lo yu las ru' nu ri gyita' par nañ. Orze' dzach briib ñi gun las ru' yu ze'. 6Na ornu briib doo na, orze' bziiñ. Orze' guwach ñi gun sac sheñ yu nu shet nap ñi lyuñ. 7Ze' yu' ga'ñ bet lag ñi lat gyech. Orze' dzach guuly gyech ze'. Orze' pcyiig ñi de yamni ze'. 8Ze' yu' ga'ñ bet lag ñi lo yu nap. De nde' tona' la nap na cosech briic ñi. Yu'ñ briic ñi tub gaynal mbigy. Yu'ñ briic ñi gayon mbigy. Ze' yu' ga'ñ briic ñi gal rup tii mbigy ―nam. 9Orze' na ga'm: ―Mbecy nu zub gyidag rlagy ñi gyicy yu nu gyet lag yu cuen ―nam. 10Na despuees de yu nu rsya' lom becha' dey lom, orze' na dey rab yum: ―¿La gyi' nu rniir nu riidz tiily lo de mbecy? ―na dey. 11Orze' Jesuuz nam rab mi dey: ―Par de ru Ñgyoozh briic mi nu gad lagy der coz ni gyel gubier nim, de coz nu wagad lagy mbecy gulas. Tees de yu re wac gyet lag dey cuen. 12Gun mbecy nu ricy cup la coz, sheñ zir gad niy. Orze' tona' la coz sheñ gyicy cup yu. Tees yu nu sac ni, gashtal coz miiñ nu ricy cup yu gruuñ niy. 13Nde' nu ya̱ rne̱e̱ mod ni riidz tiily, gun orze' zac dey tees wayu' loy, nunu gyeñ dey tees wayet lag yu cuen. 14Gun orze' gyu' niñ gal nu mnii Isaías, yu nu mnii por cuen ni Ñgyoozh ornu nay: Ñgyoozh nam: “Mas gyeñ der, tees wayet lag der cuen. Nunu mas mbi la güii der, tees wayu' lo der. 15Gun shcab ni de mbecy ii guton ñi, nunu byoow gyidag dey, nunu byoow urlo dey. Gun orze' wazac dey nu urloy, nunu wayeñ dey nu gyidag yu, nunu wayet lag dey cuen nu shcab niy, nunu nis cush cya dey par lo̱, nis gyicy napa̱ dey”, na Ñgyoozh, na Isaías. 16’Tees de ru dzi ni der, gun rzac der nu urlor, nunu reñ der nu gyidag ru. 17Ya̱ rishli rne̱e̱ lo der nu zigy de yu nu mnii por cuen ni Ñgyoozh gal nu zigy de mbecy nap ngulagy dey nzac yu de coz nu de ru rzac ru, tees wansac dey. Nunu ngulagy dey ñgyeñ yu de coz nu reñ de ru, tees wangyeñ dey ―na Jesuuz―. 18’Bzuub gyidag der. Orze' gad lagy der lac yaruu riidz ni mbecy nu mnuuz mbigy ze'. 19De mbecy nu rzuub gyidag riidz ni gyel gubier ni Ñgyoozh par wayet lag dey cuen, de yu ze' na dey gal nu na yu nu ri ru' gyernez. Rnii mbecy riidz ze' lo dey, tees orze' dru'ña nuras rbooy de riidz nap ze' nañ lardoo dey. 20Ze' yu' mbecy nu na gal nu na mbigy nu bet lag lo yu las ru' nu ri gyita' par ñañ. Ornu nu loga la reñ dey riidz ni Ñgyoozh, orze' “O” rnii dey nunu yet lagy yuñ. 21Tees par nu las ru' yu ze', wac shet riidz ze' sheñ lyuñ. Orze' la be zi'l dzi ragyee dey. Tees despuees, ornu dru'ña nu zac ziy o ornu dru'ñañ nu deet rzac yu nu nac riidz ze', orze' druu chu dey lo riidz ze'. 22Ze' yu' mbecy nu na gal nu na mbigy nu bdunuuz lat gyech ze'. De yu ze' rzuub gyidag dey riidz ni Ñgyoozh. Tees de gyel rsug ic nu nac de coz ni gyishlombecy ii nunu de gyel ye rzac lo gyel nap, de nde' ricy ñi gan dey. Gal nu ricy gyech nu wacsaan ñi nu cuic ya mni cosech, ni ricy de coz ze'. Wacsaan ñi gyicy nap riidz ni Ñgyoozh shcab ni de mbecy ze'. 23Ze' yu' mbecy nu na gal nu na mbigy nu bet lag lo yu nap. Orze' ornu reñ dey riidz ze', orze' yet lag dey cuen, nunu rbic ñi cosech nañ lardooy. Yu'ñ briic ñi tub gaynal mbigy. Yu'ñ briic ñi gayon mbigy. Yu' ga'ñ briic ñi gal rup tii mbigy ―nam. 24Orze' Jesuuz mniim tuuba' riidz tiily lo dey. Orze' nam: ―Mod nu ricy riidz ni gyel gubier ni Ñgyoozh, nañ gal nu na mod nu bicy mbecy nu gua nuuz mbigy bducui lo yu ni ze'. 25Tees ornu dela dey nas yu rel, orze' bru'ña losa' yuuy. Orze' mnuuz yu mbigy gyish lat de mbigy nap ze'. Orze' yay. 26Na ornu guuly ñi nunu pshuub tiem nu ca nan za' niñ, orze' ni' zi'l guuly gyish nu bdunuuz lat yamni ze'. 27Orze' bru'ña de yu nu ricy riiñ ni mbecy ze'. Orze' na dey rab yuy: “¿Lac guc briib de gyish ze'? Ze' ru mnuuz ru mbigy bducui”, na dey. 28Orze' na yu nu mnuuz mbigy ze' rab yu dey: “Ca zi'l na tub yu nu rzi lagy gua nuuz yu nde'”, nay. Orze' na ga' de yu nu ricy riiñ ze': “¿A rlagy ru cha̱ de̱ loo lyu̱ de̱ de gyish ze'?” na dey. 29Orze' na yu nu mnuuz mbigy ze' rab yu dey: “Walagya̱, gun ornu co lyu der de gyish ze', orze' gyicy ñi nu gruu lyu ga' ya mni ze'. 30Nap zir zaan der galy ñi tublaazh la gashtal shuub tiem nu te̱' cosech. Orze' gyicya̱ mandaar lo de yu nu ricy riiñ ne̱ nu co lyu dey de gyish ze' loga la. Orze' gag yeñ ñi par nu chañ lo gyi. Orze' gaze' nu te' dey cosech ze' nunu cu' choow dey ñi nañ ye”, nay ―nam. 31Orze' Jesuuz mniim tuuba' riidz tiily lo dey. Orze' nam: ―Gyel gubier ni Ñgyoozh rac ñi gal nu rac nu tub mbigy ya urnishtas nu rnuuz mbecy lo yu niy, 32gun nde' mbigy nu blazha' zir mbigy mi' gaze' de' zir mbigy. Tees ornu raly ñi zily zir ñi yac ñi gaze' de' zir de yag mi'. Yac ñi gal nu na tub yag ily. Gashtal de chigyiñ nu rded lo bi dru'ña ma lat yaañ, nunu rzaa ma teez ma ―nam. 33Orze' mniim tuuba' riidz tiily lo dey. Orze' nam: ―Gyel gubier ni Ñgyoozh nañ gal nu na lebadur nu gush tub biñ mñaa. Bdu'm ñii lat chon nac arin. Orze' ptub yaam ñii, gun orze' lebadur ze' cshup ñi dela cub zañ ze' ―nam. 34De la nde' mnii Jesuuz lo de mbecy nu riidz tiily. Nunu waniim lo dey benu walab nu riidz tiily. 35Ni bicy mi par nu gyu' niñ gal nu mnii tub yu nu mnii por cuen ni Ñgyoozh ornu nay: Biñ nu ca lo cuen nu cyid nam: “Ya̱ gne̱e̱ lo dey nu riidz tiily. Ya̱ gne̱e̱ lo dey de coz nu wangad lagy mbecy nese nu bzub gyi' gyishlombecy”, nam, na yu nu mnii por cuen ni Ñgyoozh. 36Orze' Jesuuz mnii num dey ñgyoozh, orze' bzuu nez mi dey yay yu'y. Orze' gu'm nañ yu'. Orze' bru'ña de yu nu rsya' lom. Orze' byatublaazh dey lom. Orze' na dey rab yum: ―¿Lac yaruu de riidz tiily ni gyish nu briib lat ya mni ze'? ―na dey. 37Orze' Jesuuz nam rab mi dey: ―Mbecy nu mnuuz mbigy bducui ze', nde' ya̱ biñ nu byac mbecy. 38Na yu ze' nde' gyishlombecy ii. Ze' de mbigy bducui ze', nde' de mbecy nu rash gyel gubier ni Ñgyoozh. Ze' de gyish ze', nde' de mbecy nu nac nu nuras. 39Ze' mbecy rzi lagy nu mnuuz mbigy gyish ze', nde' nuras. Ze' cosech ze' nu nde' ornu shuub dzi ni gyishlombecy ii. Ze' de mbecy nu te' cosech ze', nde' de anc ni Ñgyoozh. 40Gal nu rte' dey de gyish nu ne' dey ñi lo gyi, ni' zi'l gac ornu shuub dzi ni gyishlombecy ii. 41Tiem ze' ya̱ biñ nu byac mbecy zuu neza̱ de anc ne̱ nu cha te' dey dela mbecy nu rlyuu coz cyi lo losa', gal nu de mbecy nu a̱' nap ricy. De anc ze' coy de mbecy nu shiñ ricy ze' lat de mbecy nu nac nu gyel gubier ne̱. 42Orze' zeed yu dey chay lo gyi. Ze' nu chu' dey gun yu nunu siigy lay yu ―nam―. 43Gaze' nu de mbecy ni Ñgyoozh ryal gabe dey gal nu rabe doo güidz lugaar ze' nu riib ic Ñgyoozh, uz dey. De yu nu rzuub gyidag rlagy ñi nu gyicy yu nu gyet lag yu cuen ―nam―. 44’Gyel gubier ni Ñgyoozh nañ gal nu na gyel nap nu ri ngach lo yu. Orze' tub mbecy byap yu gyel nap ze'. Orze' pcach yuñ tuuba' tir laab lugaar ze'. Nunu tona' la bet lagy yu. Orze' yay biit yu dela coz nu ricy cup yu, gaze' nu wiiy lugaar ze' nu ri gyel nap ze'. 45’Ni' zi'l mod ricy nu mbecy gyel gubier ni Ñgyoozh gal nu ricy de mbecy nu ricy dalje̱z nu rded ryub dey urndub nu dzi cyit na. 46Na ornu gyap yu tub urndub nu tona' la ñgyup sac, orze' yay nu cut yu dela coz nu ricy cup yu. Orze' cush cyay ziy urndub nu dzi sac ze'. 47’Mod nu rac nu gyel gubier ni Ñgyoozh, nde' mod nu rac nu tub gyish nu rub mbecy bel. Gyish ze' rne' dey ñi lo nisyudoo. Orze' zañ lo bel rzu' ma nañ ñi. 48Na ornu dzaa nañ gyish ze', orze' co dey ñi par lo yu wach. Orze' chesub dey nu cuiy de bel nu gu' nañ gyish ze'. Orze' de bañ nap cu' choow dey ma nañ chicyiw niy. Ze' bañ wacyiiñ ne' dey ma. 49Ni' zi'l mod gac ornu shuub dzi ni gyishlombecy ii. De anc gru'ña dey. Co reñ yu de mbecy a̱' nap lat de mbecy nap. 50Orze' zeed yu dey chay lo gyi, ze' nu chu' dey gun yu nunu siigy lay yu ―nam. 51Orze' nam rab mi dey: ―¿A yet lag der cuen dela de riidz ii? ―nam. ―A̱, yet lag de̱ cuen ―na dey. 52Orze' na ga'm rab mi dey: ―Ornu tub mbecy nu rlyuu leey ni Ñgyoozh rac yu de coz ni gyel gubier nim, orze' yac yu gal nu na shuaan tub yu'. Orze' yu ze' rbooy coz cub nu coz gush ze' nu yu' choow de coz niy ―nam. 53Ornu blazh mnii Jesuuz de riidz tiily ze', orze' bruum zam. 54Orze' brim ledz mi. Gaze' nu brugyi' rlyuum ni de mbecy nañ yu' nu rsya' dey riidz ni Ñgyoozh. Orze' tona' la za nu ic de mbecy. Orze' na dey: ―Ze' ¿ca psya' ga' yu ii de coz ily nu rniiy? Ze' ¿lac mod ricy yu nu rac ricy yu de nusuriidz ze'? 55Ze' ¿a walab yu ii i'ñ biryag? Ze', ñaay nde' Li nu de bicy yu Santiag, nu See, nu Simo̱o̱, nu Judas. 56Nunu ¿a walab laab lat na ii rcyiiñ de zan yu? Ze' ¿ca guud de coz nu ricy yu beni? ―na dey. 57Orze' wancheel reñ dey mi. Orze' nam rab mi dey: ―Ca zi'l lugaar mbecy rca lagy dey lo yu nu rnii por cuen ni Ñgyoozh. Nomaas ledz yu, nu de famil niy waca lagy dey loy ―nam. 58Orze' wangac gyicy mi zañ nusuriidz par nu wangyicy cup de mbecy ze' consuel lom.

will be added

X\