San Mateo 10

1Orze' Jesuuz bredz mi za' trocyup laa yu nu rsya' lom. Orze' briic mi rishbeey ni dey par nu co chu dey de nuras, nunu briic mi rishbeey nu gyicy yac dey mbecy nu rat de lo la güii, nu dela coz shni nu rzac de mbecy. 2Orze' nii nu la de trocyup Aposht. Gush lañ yu loga la, nde' Simo̱o̱, yu nu rnii dey Bed, nu bicy yu Ndrees, nu Santiag nu bicy yu Waa, de yu ze' i'ñ Zebedeo, 3Lip nu Bartol, nu Tomaas nu ya̱, Mateo, tub mbecy nu pte' tiñ por cuen ni gubier Rom, nu Santiag, i'ñ Alfeo, nu Tadeo, 4nu Simo̱o̱, yu nu nac partid nu la Celote, nu Judas Iscariote, yu nu bish cya ich mi. 5Orze' Jesuuz bzuu nez mi de trocyup Aposht. Orze' bdu'm riiñ yaa dey. Orze' nam: ―Cue' cha der lat de mbecy nu walab mbecy Israeel, nunu ni cue' cha der de ze' nu yu' mbecy Samaria. 6Nap zir gua der lat de mbecy Israeel, de yu nu na gal nu na shily bdune'. 7Gua der lo dey, nunu mnii der nu sñuu ga ri gyel gubier ni Ñgyoozh lat dey. 8Bicy yac der de mbecy rat, nunu bicy der nu gyabañ de mbecy gut, nunu bicy der nu gyacaacy de mbecy gubag nu nac gyedz nu la lepra, nunu co chu der de nuras. Ya̱ leew la grica̱ mod ze' ni der nu gac gyicy ru de coz ze'. Nde' nu cue' co der ir ornu gyicy der de nde' ―nam―. 9’Cue' cha nu der tiñ or, ni tiñ plat, ni tiñ corient. 10Ni cue' cha nu der moraal par nu rir coz nu gow der nez. Ni cue' cha nu der cyup shab ru. Nomaas nu zu zi'l der ze' gua nu. Nunu cue' cha nu der cyup nez gyid lab ru. Ni cue' cha nu der cyup yangar. Gun mbecy nu ricy riiñ yad ñi nu cuic dey coz nu gow yu. 11’Ornu gri der tub gyedz o tub ranch, orze' yub der tub mbecy nap, nu cyiiñ der loy gashtal gruu la der lugaar ze'. 12Ornu chu' der nañ yu' ze', ornu nii nu der yu ñgyoozh, orze' nii der nu Ñgyoozh gac num dey. 13Benu mbecy guyu' ze' nac yu mbecy nap, orze' gac ñii gal nu mnii der. Tees benu a̱' nap yu, orze' wac ñi gal nu mnii der. 14Benu mbecy washet ic dey nu chu'r tub yu' o tub gyedz, ni wazuub gyidag dey ni der, orze' gruu der lugaar ze' nunu cyib der yu gyedz ni gyid lab ru par nu gabe nu a̱' nap bicy dey. 15Ya̱ rishli rne̱e̱ lo der nu ornu shuub dzi nu gri bee Ñgyoozh ni de mbecy nu yu' gyedz ze', cashtig ily zir cuic mi ni dey gaze' cashtig nu cuic mi ni de mbecy nu gu' gyedz nu la Sodoma nu Gomorra ―nam―. 16’Güii der na. Ya̱ zu neza̱ der char. Nunu na der gal nu na shily nu cha lat lob. Guc der mbecy nu dzach zu gal nu zu bily, tees guc der mbecy gugy na gal nu na begy. 17Bzu der cuidad gun yu' de mbecy nu gu'y der yaa de fushtiz nunu yu' ga' mbecy nu gaaz dey de ru nañ yu' nu rsya' den riidz ni Ñgyoozh. 18Gashtal lo gubier nu lo de rey cha nu dey de ru nu nac ya̱, gun orze' gac zat der ya̱ lo dey gal nu lo de mbecy nu walab mbecy Israeel. 19Tees ornu gu' dey de ru yaa de fushtiz, cue' sug ic der la na riidz nu niir nunu cue' sug ic der nu lac na riidz nu gniir, gun ornu shuub tiem nu galagy ñi nu gnii der, orze' Ñgyoozh cuic mi riidz nu gniir. 20Gun riidz nu de ru gniir, nde' walab riidz ni ru zi'l, sinu nde' riidz ni Espiriit Yon ni Ñgyoozh uz den. Orze' de ru gniir riidz nu druu lo mi ze'. 21’Tees yu' mbecy nu gu' dey bicy yu yaa de mbecy nu rzi lagy par nu cut dey yu. Nunu yu' ga' mbecy nu ni zi'l gyicy nu dey i'ñ yu. Ze' yu ga' dey cush cyay ich uz yu gun orze' cut mbecy yu. 22Dela de mbecy gazi lagy dey lo der par nu nac ya̱. Tees yu nu gagye gashtal gat la, yu ze' gruu mbañ yu. 23Nunu ornu rted zi dey de ru tub gyedz, orze' cha der tuuba' gyedz. Tees ya̱ rishli rne̱e̱ lo der nu walazh chesa der de gyedz ni de mbecy Israeel anzir nu yapa̱ tuuba' tir, ya̱, biñ nu byac mbecy. 24’Sac ni tub yu nguzh scuel nu zily zir nac yu par moscuel niy. Nunu sac ni tub moz nu zily zir nac yu par patro̱o̱ niy. 25Beñ benu tub yu nguzh scuel gyac yu gal nu na moscuel niy. Nunu ni' zi'l beñ benu tub moz gyac yu gal nu na patro̱o̱ niy. Benu nii mbecy nu ya̱, tub mbecy nu riib ic nañ tub yu', naca̱ tub nuras nu la Beelzebé, orze' dzi zir rnii dey ni de ru, mbecy nu nac famil ne̱. 26’Nde' nu cue' dzib der lo de mbecy. Gun sac ni tub coz ngach nu waruu zac ñi. Nunu dela coz nu wagad lagy mbecy, nde' gad lagy dey. 27De coz nu rne̱e̱ lo der ngach, nde' co zac der ñii lat dela mbecy. Nunu de coz nu rne̱e̱ lo der dze ga, nde' ye la nii der lo de mbecy. 28Cue' dzib der lo de mbecy nu rut cuerp ni losa', tees wac cut dey lardoo losa'y. Nap zir gudzib der lo Ñgyoozh biñ nu gac nit lo cuerp ni mbecy nu lardooy gabily. 29’¿A walab nu rut dey cyup chigyiñ mi' par tub sentab mi'? Tees ni tub ma wayet lag ma lo yu benu Ñgyoozh uz der wazaan mi. 30Ze' yegar de ru, Ñgyoozh rad lagy mi la be gyich too der. Delañ ngab ñi nim. 31Nde' nu cue dzib der, gun de ru dzi zir sac der gaze' de chigyiñ zigy ze'. 32’Cyu zi'l mbecy nu gnii lo losa' nu ya̱ naca̱ Shuaan yu, ni' zi'l ne̱e̱ ya̱ lo Ñgyoozh uza̱ nu zub gyibaa nu nac yu ne̱. 33Tees cyu zi'l mbecy nu nii nu a̱' naca̱ Shuaan yu lo de mbecy, orze' ni' zi'l gyicya̱ du̱ yu lo Ñgyoozh, uza̱, biñ nu zub gyibaa. Ne̱e̱ nu a̱' nac yu ne̱ ―nam―. 34’Cue' nii too der nu ya̱ yapa̱ nu gyicya̱ nu nap chu' mbecy nu losa'y. Walab nu gyicya̱ nu nap chu' dey, sinu nu chucoo dey nu losa'y. 35Ya̱ yapa̱ nu gyicya̱ nu de yu gyeey chay contr ni uz yu. Ze' fiñ mñaa chañ contr ni ñaañ. Tub fiñ mñaa chañ contr ni ñaa gud ñi. 36De yu nu gac losa' yuu dey gruuy laab lat famil ni dey. 37’Mbecy nu rca zir uz, o yu nu rca zir ñaa gaze' ya̱, yu ze' rila wangyap yu nu gac yu ne̱. Yu nu rca zir i'ñ gyeey o i'ñ yu fiñ mñaa gaze' ya̱, yu ze' ni' zi'l wangyap yu nu gac yu ne̱. 38Cyu zi'l mbecy nu washet ic nu gzac zi nu nac ya̱, yu ze' ni' zi'l wangyap yu nu gac yu ne̱. 39Yu nu rlagy co nap ub gyishlombecy ii yu ze' wad nu cui mbañ yu. Ze' yu nu shet ic nu zac zi, nunu mas gat yu nu nac ya̱, yu ze' gruu mbañ yu ―nam―. 40’Cyu zi'l mbecy nu nap nii nu de ru, ni' zi'l nap nii nuy ya̱ nunu ni' nap nii nuy biñ nu bzuu nez ya̱. 41Cyu zi'l mbecy nu nap nii nu de yu nu mnii por cuen ni Ñgyoozh nu nac nu chay loy por cuen nim, orze' laaba' i yu nu rnii por cuen ni Ñgyoozh ze' gyad niy. Cyu zi'l mbecy nu nap nii nu tub mbecy nap, yu ze' laaba i mbecy nap ze' gyad niy. 42Cyu zi'l mbecy nu cuic mas ñuu tub taz nis rag go' yu nu blaazha' zir mbecy shni, yu nu yad ca icha̱, yu ze' segur la gyad iy ―nam.

will be added

X\