San Mateo 1

1Nu nii tub lisht ni de gyitoo bel ni Jesucrisht, biñ nu bruu lat nez gyitoo Dabi nu nez gyitoo Abraham. 2Abraham guc yu uz Isaac. Ze' Isaac guc yu uz Jacob. Ze' Jacob guc yu uz Judá nu de' zir de bicy yu. 3Ze' Judá guc yu uz Fares nu Zara. Ze' ñaa dey, mi ze' lam Tamar. Ze' Fares guc yu uz Esrom. Ze' Esrom guc yu uz Aram. 4Aram guc yu uz Aminadab. Aminadab guc yu uz Naasón. Naasón guc yu uz Salmón. 5Salmón guc yu uz Booz. Ze' ñaay lam Rahab. Ze' Booz guc yu uz Obed. Ze' ñaay lam Rut. Obed guc yu uz Isaí. 6Isaí guc yu uz rey Dabi. Ze' Dabi guc yu uz Salomoong. Ze' ñaay, nde' biñ nu guc mñaa Urías. 7Salomoong guc yu uz Roboam. Ze' Roboam guc yu uz Abías. Ze' Abías guc yu uz Asa. 8Asa guc yu uz Josafat. Josafat guc yu uz Joram. Joram guc yu uz Uzías. 9Uzías guc yu uz Jotam. Jotam guc yu uz Acaz. Acaz guc yu uz Ezequías. 10Ezequías guc yu uz Manasés. Manasés guc yu uz Amón. Amón guc yu uz Josías. 11Josías guc yu uz Jeconías nu de bicy yu. Tiem ze' gua de mbecy Israeel pres gashtal lo yu ni Babilonia. 12Despuees ornu bri dey Babilonia, Jeconías guc yu uz Salatiel. Salatiel guc yu uz Zorobabel. 13Zorobabel guc yu uz Abiud. Abiud guc yu uz Eliaquim. Ze' Eliaquim guc yu uz Azor. 14Azor guc yu uz Sadoc. Sadoc guc yu uz Aquim. Aquim guc yu uz Eliud. 15Ze' Eliud guc yu uz Eleazar. Eleazar guc yu uz Matán. Matán guc yu uz Jacob. 16Jacob guc yu uz See ñgyee Li. Fiñ ze' guc ñi ñaa Jesuuz, biñ nu rnii den nu nac Mesías, biñ nu ca lo cuen nu cyid nu co mbañ de mbecy. 17Orze' gush ñi nese tiem nu bzu Abraham gashtal tiem nu bzu Dabi guc trotap nac nez dey. Nunu guca' trotap nac nez dey, gush ñi nese tiem nu bzu Dabi gashtal tiem nu gua dey pres gal Babilonia. Nunu guca' tub trotapa' nac nez dey nese tiem nu gua dey pres ze' gashtal tiem nu gul Mesías, biñ nu ca lo cuen nu cyid nu co mbañ de mbecy. 18Mod nu guc ornu gul Jesucrisht. Li, fiñ nu guc ñaam, bi bya' lo riidz nu chelaañ See, tees anzir nu gyatublaazh dey, orze' bi rabee nu secyi zuñ nu nac coz ily nu bicy Espiriit Yon ni Ñgyoozh. 19See, yu nu gac ñgyeeñ nac yu tub mbecy nu ricy coz nu se'ñ. Orze' wangalagy yu coy gyel mbecy niñ lo dela mbecy. Orze' mnii tooy nu tily yu trat ze' dze ga nu wachelaay ñi. 20Lat nu rash yu shcab nu nac nde', orze' bruu zac tub anc ni Ñgyoozh loy lat pcaal yu. Orze' anc ze' nay: ―See nez Dabi, cue' dzib ru nu gash ru Li nu gac mñaar, gun secyi zuñ nu nac Espiriit Yon ni Ñgyoozh. 21Na gaal ñi tub mdoo gyeey. Orze' co lar mi Jesuuz. Ni gruu lam gun mi ze' co mbañ mi de mbecy ledz mi nu nac cyi dey ―na anc ze'. 22Dela de coz ii ni guuc ñi par nu byu' niñ gal nu mnii Shuaan den lat de riidz nu bzeeñ tub yu nu mnii por cuen nim ornu nam: 23Tub fiñ feñ yon chu' i'ñ ñi. Orze' gaal ñi tub mdoo gyeey. Mi ze' co la dey mi Emanuel, mniim. (Riidz Emanuel ze' yaruuñ: Ñgyoozh nac num de ub naa.) 24Na ornu See briish yu yaa ni pcaal ze', orze' bicy yu gal nu mnii anc ni Shuaan den. Orze' pchelaay Li. Byac ñi mñaay. 25Tees wangal dey losa'y gashtal bi bded nu gul i'ñ ñi. Nunu See bloo lay mi Jesuuz.

will be added

X\