San Marcos 9

1Orze' na' Jesuuz rab mi dey: ―Ya̱ rishli rne̱e̱ lo der nu yu' ca na mbecy nu yu' ii na la nu wat dey gal zac la dey nu cyid gyel gubier ni Ñgyoozh, nunu gabe nu dzi coz ily gac ―nam. 2Ornu bded tub shuup dzi, orze' Jesuuz gua nu reñ mi Bed, nu Santiag, nu Waa. Orze' gup mi too tub bicy gya num dey. Orze' ze' bdza nu nam lo dey. 3Shab mi byaryal ñi. Tona' la byacaacy ñi. Caacy zir ñi byac ñi gaze' nu caacy nu ricy de lo la yashtily nu yu' gyishlombecy. 4Orze' ze' bruu zac Elías nu Moisees lo rgüii la de yu nu rsya' lom. Orze' bee dey riidz nu Jesuuz. 5Orze' na Bed rab yu Jesuuz: ―Masht, ¡dzi ga nap nu yu̱' de̱ ii! Na za̱a̱ de̱ chon ramad ni der: tub par ru nu tuuba' par Moisees nu tuuba' par Elías ―nay. 6Ni mniiy, gun wagad lagy yu coz nu niiy, gun tona' la gudzib dey. 7Orze' bruu zac tub za psoow ñi dey. Nunu lat za ze' zaab ti' mbecy. Orze' nam: ―Mi ii i'ña̱ nu tona' la rca̱. Bzuub gyidag der nim ―nam. 8Orze' sij zi'l ornu bri' lo dey wansaca' dey cyu' zir mbecy. Ze' Jesuuz zi'l bzaac dey. 9Gaze' nu gush nez num dey bet mi par gyi' bicy ze'. Na lat nu ya num dey, orze' pcach mi ru' dey nu cue' nii dey lo ni tub la mbecy de coz nu bzaac yu. Sinu gal ornu gyabañ Jesuuz, biñ nu byac mbecy, gaze' nu nii dey. 10Orze' bicy yac dey pcach ru' dey. Tees bdugyi' dey lo losa'y lac yaruu nu gyabañ mi ze'. 11Orze' na dey rab yum: ―¿Lagu de yu nu rlyuu leey ni Ñgyoozh rniiy nu Elías rlagy ñi cyid yu loga la? Gaze' nu cyid Mesías, biñ nu ca lo cuen nu co mbañ mbecy ―na dey. 12Orze' na Jesuuz rab mi dey: ―Laab rlagy ñi cyid Elías loga nu gzu nap yu dela coz. Nunu bi cañ nu ya̱, biñ nu byac mbecy, rlagy ñi gzac zi̱ nu zañ lo coz, nunu rlagy ñi gyicy ñgya dey lo̱. 13Tees ya̱ rne̱e̱ lo der nu Elías rishli bi biid yu nunu bicy nu dey yu dela coz a̱' nap nu mnii too dey nu gyicy nuy yu gal nu bi cañ nu gzac yu ―nam. 14Na ornu bru'ñam gyi' bicy ze', ze' nu byeeñ de' zir de yu nu rsya' lom, orze' ze' bzaac mi nu tona' la mbecy zigy byatublaazh lo de yu ze'. Nunu gaza' de yu nu rlyuu leey ni Ñgyoozh yu'y zi ro dey riidz nu de yu nu rsya' lom. 15Na cuanzir nu bzaac dey mi, orze' za nu la ic dey, nunu becha' dey lom carer mnii nuy mi ñgyoozh. 16Orze' nam rab mi de yu nu rlyuu leey ni Ñgyoozh: ―¿La coz rgugyi' der lo dey? ―nam. 17Orze' brusu tub mbecy lat de mbecy zigy ze' nay rab yum: ―Masht, ya̱ yap du̱ i'ña̱ nu bicy ni nuras lor. Bicy yu nu byagop yu. 18Ca zi'l nu shet yaay yu ricy yu nu ricy ñi bi niy. Bdziñ la driib ru'y, nunu row yu lay yu, nunu rgyigy yu. Ya̱ mne̱e̱ lo de yu nu rsya' lor nu co chu dey yu, tees wangac ni dey ―nay. 19Orze' na Jesuuz rab mi dey: ―¡A̱ der mbecy nu yu' na! Dzi ga wagyicy cup der consuel lo̱. ¿La' zir be tiem rlagy ñi chesa̱ du̱ der? ¿La' zir be tiem rlagy ñi nu gagye̱ lo der? Da nu der yu nguzh rat ze' lo̱ ―nam. 20Gaze' nu gua nu dey yu nguzh ze' lom. Orze' ornu bzaac yu Jesuuz, orze' lueg la bicy nuras ze' nu bicy ñi bi niy. Wes saa lay rdudub lay mbish yu. Nunu driib bdziñ ru'y. 21Gaze' nu na Jesuuz rab mi uz yu: ―¿La be la tiem rac nu ni rzac yu? ―nam. Orze' nay rab yum: ―Nese miiñ lay ni rzac yu. 22Nunu zaab cya' la rshes saa nuras yu lo boo nunu rshet lag yuy lo nis par nu cut yuy. Tees benu gac gyicy ru la ñuu nur yu, gushni ñuu lagy de̱. Blocyuub de̱ benu gac ―nay. 23Orze' na Jesuuz rab mi yu: ―Yada' nu na'r: “Benu gac”, na'r. Dela coz gac gyicya̱ du̱ yu nu ricy cup consuel ―nam. 24Orze' lueg la brish ti uz yu nguzh ze'. Orze' nay: ―Ya̱ ricy cupa̱ consuel lor. Nunu blocyuub ya̱ nu gyicy cup zira̱ consuel ―nay. 25Orze' ornu Jesuuz bzaac mi nu byatublaazh de mbecy zigy lom, gaze' nu rdza'm ni nuras ze'. Orze' nam rab mi yu: ―Nuras nu ricy go̱' nunu nu ricy gop, ya̱ ricya̱ mandaar lor nu bruu chu loy ii. Nunu cue' ga' cush cyar cyid ru loy ―nam. 26Orze' brish ti nuras ze', nunu bicy yu nu tona' la bi ily bicy ñi ni yu nguzh ze'. Gaze' nu bruu chuy. Bya añ la yu nguzh ze' bzeeñ yu gal mnii la de mbecy nu gut yu. 27Tees Jesuuz bdu' yaam yaay bles sum yu. Orze' wes suy. 28Despuees ornu Jesuuz brim yu', gaze' nu de yu nu rsya' lom bdugyi' reñ la dey lom. Orze' na dey: ―¿Lagu wangac loo chu̱ de nuras ze'? ―na dey. 29Orze' nam rab mi dey: ―Nuras nu ni na wac ruu chuy i zi'l, sinu rlagy ñi cyiñ mbecy lo Ñgyoozh nunu rlagy ñi nu ca dey ni ub yu nu cue' goy gyit lat nu zu bich dey nu nac Ñgyoozh. Orze' gaze' nu gac co chu dey nuras ze' ―nam. 30Gaze' nu bruum lugaar ze' gusam dela lo yu ni Galilea, nunu wangalagy mi nu gad lagy mbecy ca chesam, 31gun blyuum ni de yu nu rsya' lom. Orze' nam rab mi dey: ―Ya̱, biñ nu byac mbecy, gu' dey ya̱ yaa de mbecy. Orze' cut dey ya̱. Tees nu za' dzi chon gyabaña̱ ―nam. 32Tees wangyet lag dey cuen lac yaruu riidz ze'. Nunu gudzib dey nu cugyi'y lom. 33Gaze' nu brim gyedz Capernaum. Ornu gu'm nañ yu', orze' bdugyi'm lo dey. Orze' nam rab mi dey: ―¿La ridz ro der nu losa'r ornu yap na nez? ―nam. 34Tees wannii la dey gun gyernez bee dey riidz nu losa'y nu ca na dey gac yu yu nu gya zir zu. 35Gaze' nu gusub mi nunu bredz mi za' trocyup laa dey. Orze' nam rab mi dey: ―Benu ca na mbecy rlagy yu gac yu yu nu gya zir zu, orze' rlagy ñi gyicy yu nu nac yu mbecy nu wagyicy ñi presis nunu gyicy yu de coz nu rlagy dela losa'y ―nam. 36Orze' bdu' yaam tub yu nguzh mi'. Bzum yu lat dey. Gaze' nu bri yaam yu. 37Orze' nam rab mi dey: ―Cyu zi'l yu nu shet ic nu gac yu tub yu nu na gal na yu nguzh mi' ii nu nac ya̱, orze' ni' zi'l shet ic yu nu gac nuy ya̱. Nunu yu nu shet ic nu gac nu ya̱, walab ne̱ ya̱ zi'l shet ic yu, sinu ni' shet ic yu ni biñ nu bzuu nez ya̱ ―nam. 38Orze' na Waa rab yum: ―Masht, de̱ ya̱ bzaac de̱ tub mbecy bloo chuy nuras nu nac rishbeey nu bruu lor, tees mne̱e̱ de̱ nu cue' nu ni gyicy yu gun wachesa nuy de ub na ―nay. 39Orze' na Jesuuz: ―Cue ca der niy, gun sac ni tub la mbecy nu gyicy nusuriidz nu nac rishbeey nu bruu lo̱, se lueg la gac shiñ niiy ne̱. 40Gun yu nu wacha contr nin, yu ze' yu nu rza faboor ni den. 41Nunu cyu zi'l mbecy nu cuic mas ñuu tub taz nis go' der nu nac ru ne̱, biñ nu ca lo cuen nu co mbañ mbecy, rishli rne̱e̱ lo der nu yu ze' segur la gyad iy ―nam―. 42’Cyu zi'l yu nu gyicy nu gnu yu nu na gal na tub yu nguzh nu ricy cup consuel lo̱, nap zir benu cyiigy dey tub gyita' ily nu rdugu yeñ yu. Gaze' nu shet lag dey yu lo nisyudoo par nu gat yu. 43Benu tub yaar gyicy ñi nu gnur, nap zir pcyug ñi, gun nap zir nu gzur nu tu'nc yaar gaze' nu gyar gabily nu rup laa yaar lo gyi nu rila wayu. 44Lugaar ze' wat bya' nunu rila wayu gyi. 45Nunu benu gyi'r gyicy ñi nu gnur, nap zir pcyug ñi, gun nap zir nu gzur nu tu'nc tub gyi'r, gaze' nu gyet lag ru gabily nu rup laa gyi'r lo gyi nu rila wayu. 46Lugaar ze' wat bya' nunu rila wayu gyi. 47Nunu benu tub urlor gyicy ñi nu gnur, orze' cor ñii, gun nap zir nu chu'r ze' nu riib ic Ñgyoozh nu tub zi urlor, gaze' nu gyet lag ru gabily nu rup laa urlor. 48Lugaar ze' nu wat bya' nunu rila wayu gyi. 49’Gun dela mbecy go gyi too dey gal nu ricy zed nu rgoñ too la coz. 50Tees benu zed ruu nu ri' niñ, orze' wacyiiñ ñi. Cue' zaan der nu ruu nu ri' ni zed ze' nañ lardoo der. Nunu nu gyel ri zu gu' der nu losa'r ―nam.

will be added

X\