San Marcos 8

1Tiem ze', ornu byatublaazha' dela mbecy zigy nunu wangad coz nu gow dey, orze' Jesuuz bredz mi de yu nu rsya' lom. Orze' nam rab mi dey: 2―Ya̱ rashni lagya̱ de mbecy zigy, gun bi bza' chon dzi nu yu' dey lo̱ ii, nunu blazh coz nu gow dey. 3Benu zuu neza̱ dey gyay yu'y gal ran zi'l yu, orze' suun ñi dey nez, gun yu' dey zet bruuy ―nam. 4Orze' na de yu nu rsya' lom rab yum: ―¿Lac gyicya' de ub na goow na dela mbecy zigy lugaar ub zi ii? ―na dey. 5Orze' nam rab mi dey: ―¿La be gyishtily ricy cup der? ―nam. Orze' na dey: ―Gagy ―nay. 6Gaze' nu bicy mi mandaar lo de mbecy zigy nu checua dey. Orze' gush mi gagy gyishtily ze'. Orze' briic mi gras ni Ñgyoozh. Gaze' nu blew mi ñii. Briic mi ni de yu nu rsya' lom nu cuic dey ni de mbecy zigy. Gaze' nu bleez dey ñi ni dela mbecy zigy. 7Ricy cupa' dey la be bel mi'. Orze' briica'm gras ni Ñgyoozh nunu pcaa ga'm de yu nu rsya' lom nu cuic dey ma gow de mbecy zigy. 8Orze' dela mbecy zigy bdow gyel la dey. Orze' blazh ze', pte' dey gagy la chicyiw coz nguzh nu brusub. 9De yu nu bdow ze', tap miily dey nac yu. Orze' Jesuuz ptush las mi dey yay. 10Gaze' nu lueg la gu' num de yu nu rsya' lom nañ tub barc. Bruum lugaar ze'. Gaze' nu bru'ñam lo yu nu la Dalmanuta. 11Orze' bru'ña de mbecy fariseo brugyi' rgugyi' dey lom par nu gyicy dey preb mi. Bdiiñ dey lom nu gyicy mi tub nusuriidz baa par nu gabe nu Ñgyoozh nac num mi. 12Gaze' nu gyi la byash lagy mi. Orze' nam rab mi dey: ―Ya̱ warica̱ nusuriidz. ¿Lagu rgyiiña' de mbecy nu yu' na nusuriidz? Ya̱ rishli rne̱e̱ lo der nu wada' nusuriidz par de mbecy nu yu' na ―nam. 13Orze' bruum lugaar ze'. Gu' ga'm nañ barc zam tub la' ga' ru' nisyudoo. 14Na de yu nu rsya' lom na mnit lagy dey cha nuy gyishtily. Nomaas tub zi gyishtily ricy cup dey nañ barc ze'. 15Orze' Jesuuz mniim lo dey nu gyicy cuidad dey. Gaze' nu nam rab mi dey: ―Bdu' cuen der nunu bicy cuidad der nu lebadur ni de mbecy fariseo nu lebadur ni Herodes ―nam. 16Orze' de yu nu rsya' lom bee dey riidz nu losa'y. Gaze' nu na dey: ―¿Ti walab nu a̱' dun gyishtily, nde' nu ni rniim? ―na dey. 17Ornu gud lagy Jesuuz coz nu mnii dey, orze' nam rab mi dey: ―¿Lagu rnii der nu wancyiid nu der gyishtily, nde' nu ni mne̱e̱? ¿Walab gaal wagyet lag der cuen? ¿Walab gaal noow na shcab ni der? 18Zub urlo der, ¿walab gaal wacsac der? Nunu zub gyidag der ¿walab gaal wagyeñ der? Nunu ¿walab gaal wagyeza' lagy der? 19Ornu blewa̱ gyishtily nu bdow gaay miily mbecy, ¿la be la chicyiw gyishtily nu brusub pte' der? ―nam. 20Orze' na dey: ―Trocyup ―nay. Orze' nam: ―Ze' ornu blewa̱ gyishtily nu bdow tap miily mbecy, ¿la be chicyiw gyishtily nu brusub pte' der? ―nam. Orze' na dey: ―Gagy ―nay. 21Gaze' nu nam rab mi dey: ―¿A walab gaal gabee wagyet lag ru' der cuen? ―nam. 22Gaze' nu bru'ñam Betsaida. Ze' bru'ña nu dey tub mbecy lo ca' lom. Mnishbaa dey lom nu gal yaam yu. 23Orze' bdu' yaam yaa mbecy lo ca' ze'. Gua num yu par ru' gyedz. Orze' pcoom nis yeñ mi urloy nunu gul yaam yu. Gaze' nu bdugyi'm loy ben a rzac yu mas ñuu ga. 24Gaze' nu brugyi' rgüiiy. Orze' nay rab yum: ―Ya̱ rzaca̱ mbecy gal na yag nay rded yu ―nay. 25Bdaaba' yaam urloy. Orze' mbi la bgüiiy. Orze' byac yu nunu byanap la rzac yu dela coz. 26Gaze' nu bzuu nez mi yu gyay yu'y. Orze' nam rab mi yu: ―Cue' chu'r lat gyedz ii ―nam. 27Despuees orze' bruu Jesuuz Galilea za num de yu nu rsya' lom par de gyedz nu yu' lo yu ni Cesarea ni Filipo. Nez zam bdugyi'm lo de yu nu rsya' lom. Orze' nam rab mi dey: ―¿Cyu rnii mbecy nu nac ya̱? ―nam. 28Orze' na dey: ―Yu' mbecy rniiy nu ru Waa nu briib nis mbecy. Ze' yu' ga' dey rniiy nu ru Elías. Ze' yu' ga' dey rniiy nu ru tub yu nu gu' gulas nu mnii por cuen ni Ñgyoozh ―na dey. 29Orze' nam rab mi dey: ―Ze' de ru, ¿cyu rnii der nu naca̱? ―nam. Orze' na Bed rab yum: ―Ru nac ru Mesías, biñ nu ca lo cuen nu co mbañ de mbecy ―nay. 30Orze' Jesuuz mniim lo dey nu cue' niiy lo ni tub la mbecy cyu nac mi. 31Gaze' nu brugyi' rlyuum ni dey nu ub mi, biñ nu byac mbecy, rlagy ñi gzac mi zañ lo coz deet. Nunu de yu bel ni de mbecy Israeel, nu de uz zub lo, nu de yu nu rlyuu leey ni Ñgyoozh, de yu ze' rlagy ñi ne' dey mi. Nunu rlagy ñi nu cut dey mi. Tees nañ chon dzi gyabañ mi. 32Orze' naal la mniim de coz ze'. Orze' Bed gua nu reñ yum. Gaze' nu mniiy lom nu cue' ni niim. 33Tees Jesuuz bish cyam bgüiim lo de yu nu rsya' lom. Orze' fert mniim lo Bed. Orze' nam: ―¡Bruu chu lo̱ ii nuras! Gun shcab nir wasaap ñi shcab ni Ñgyoozh, sinu shcab nir, nde' shcab ni mbecy zi'l ―nam. 34Orze' bredz mi dela mbecy nu de yu nu rsya' lom. Orze' nam rab mi dey: ―Benu ca na mbecy rlagy yu gac yu mbecy nu rsya' lo, orze' rlagy ñi cue' gyicy cuen yu coz nu rlagy ub yu. Nunu rlagy ñi shet ic yu nu gzac ziy nu nac ya̱. Orze' rlagy ñi gyicy yu gal nu rlagya̱. 35Gun yu nu rlagy co nap ub, yu ze' gnit loy. Tees yu nu nit lo nu nac ya̱, nunu nu nac riidz nu sac nu bruu lo Ñgyoozh, yu ze' yu nu rishli gruu mbañ. 36Gun ¿la rusub ni mbecy benu gyicy yu gan dela coz nu yu' gyishlombecy tees lardooy dune'ñ? 37Nunu ¿la coz gac cyish mbecy nu gyad lardooy? 38Tees cyu zi'l mbecy nu gat lo nu nac ya̱ nunu gat lo ga'y nu nac de riidz nu rne̱e̱ lo rgüii la mbecy nu wagyicy paa ni Ñgyoozh nunu de mbecy cyi nu yu' na, orze' ni' ya̱, biñ nu byac mbecy, gat lo̱ nu nac de yu ze' ornu shuub dzi nu yapa̱ nu gyel lily ni uza̱ gal nu de anc yon ―nam.

will be added

X\