San Marcos 6

1Orze' bruu Jesuuz lugaar ze' yam par ledz mi, Nazaret. Nunu de yu nu rsya' lom ya nu dey mi. 2Na ornu pshuub sab, dzi nu rzu lagy mbecy na, orze' brugyi' rlyuum ni dey nañ yu' nu rsya' dey riidz ni Ñgyoozh. Ornu de mbecy zigy güeñ dey de coz nu rlyuum, orze' tona' la za nu ic dey. Orze' na dey: ―Ze' ¿ca guud de riidz re niy? Ze' ¿ca guud shcab niy? Ze' ¿lac mod rac ricy yu nusuriidz ily ze'? 3Ze' ¿a walab yu ii biryag ze'? Ñaay Li. Bicy yu Santiag, nu See, nu Judas, nu Simo̱o̱. Nunu ¿a walab laab lat na ii rcyiiñ de zan yu? ―na dey. Orze' wancheel reñ dey mi. 4Orze' nam rab mi dey: ―Ca zi'l lugaar mbecy rca lagy dey lo yu nu rnii por cuen ni Ñgyoozh, nomaas de mbecy ledz yu, nu de famil niy, nu de famil nu yu' nuy nañ yu'y, dela de yu ze' waca lagy dey loy ―nam. 5Orze' ze' wangac gyicy mi nusuriidz, nomaas la be zi'l mbecy rat gul yaam dey. Bicy yac mi yu. 6Orze' za nu la ic mi nu wangyicy cup dey consuel lom. Orze' bruum Nazaret, gusam de' zir gyedz nu yu' gaab. Blyuum ni de mbecy. 7Orze' bredz mi de trocyup yu nu bi bloo sum ze' nu gyatublaazh dey. Gaze' nu brugyi' rzuu nez mi dey rzay cyup ga dey tub ga nez. Nunu briic mi rishbeey nu co chu dey nuras. 8Nunu bicy mi mandaar lo dey nu cue' cha nuy ni tub la coz par nez. Nomaas tub yanga zi'l dey cha nuy. Ni cue' cha nu dey moraal, ni cue' cha nu dey gyishtily, nunu cue' cha nu dey tiñ nañ nerbid niy. 9Nomaas gyidlab zi'l caa gyi' dey. Nunu cue' cha nu dey cyup yaag yu. 10Orze' na'm rab mi dey: ―Ca ze' nu cha der, gu' der nañ tub yu'. Orze' ze' cyiiñ der gashtal gruu la der lugaar ze'. 11Ca zi'l ze' nu washet ic dey nu chu' der, ni wazuub gyidag dey riidz nu nii der, orze' ornu gruu der lugaar ze', cyib der yu gyedz nu ta' gyidlab ru par nu gabe nu a̱' nap bicy dey. 12Orze' bruu dey zay nunu mnii dey lo de mbecy nu rlagy ñi ne' dey dela cyi nu ricy yu. 13Nunu bloo chu dey zañ nuras. Nunu briily dey asecy zigy mbecy rat. Nunu byac dey. 14Bzu laa riidz de coz nu ricy Jesuuz. Orze' rey Herodes güeñ yu de riidz ze'. Orze' nay: ―Byabañ Waa nu briib nis mbecy. Nde' nu cyiiñ yu nu gyicy yu de nusuriidz ze' ―nay. 15Yu' mbecy rnii dey nu Jesuuz nac mi Elías. Nunu yu' ga' mbecy rniiy nu Jesuuz nac mi tub mbecy nu rnii por cuen ni Ñgyoozh gal nu na de yu nu gu' gulas. 16Ornu Herodes güeñ yu de coz nu mnii mbecy, orze' nay: ―Laab yu ze' Waa, yu nu bicya̱ mandaar nu pcyug dey too. Na byabañ yu ―nay. 17Ni mniiy gun laab yu bicy yu mandaar nu pcyiig dey Waa, nunu pshet lag dey yu nañ yu' gyiib nu nac Herodías, mñaa bicy yu Lip, gun Herodes gush yum. Bicy mñaay mi. 18Ze' Waa mniiy lo Herodes nu rach ñii lo Ñgyoozh nu gush yu mñaa bicy yu. 19Orze' Herodías guzi lagy mi lo Waa. Ngulagy mi ñgyut mi yu tees wangac, 20gun Herodes gudzib yu loy. Gud lagy yu nu Waa nac yu mbecy nap par lo mbecy, nunu tant par lo Ñgyoozh. Orze' wansaan yu nu shiñ gyicy nu mbecy Waa. Nunu ornu mnii Waa loy, bet lagy yu mas pcan shcab niy. 21Tees orze' pshuub tub dzi nu guud mod nu gyicy Herodías nu gat Waa. Dzi ze', nde' dzi nu bicy dey sa' ni dzi nu gul Herodes. Orze' bredz yu de fushtiz, nu de yu nu riib ic de soldad, nu de yu nu ricy ñi presis nu yu' lo de yu ni Galilea. 22Orze' ornu bru'ña i'ñ Herodías ze' nu nguaa dey, orze' bily gyi'ñ. Orze' tona' la bet lagy Herodes gal nu de mbecy nu nguaa nuy lo mez. Orze' nay rab yu fiñ ze': ―Bdiiñ la zi'l coz nu rlagy ru lo̱. Orze' ya̱ rica̱ ñii nir ―nay. 23Orze' mniiy nu waded la cuic yu la zi'l coz nu cyiñ ñi mas gal cyaal de coz nu riib ic yu cuic yu niñ. 24Ornu bruuñ, orze' zañ lo ñaañ. Gaze' nu nañ rab ñim: ―¿La coz diña̱? ―naañ. Orze' na Herodías rab mi ñii: ―Gua cyiñ ru too Waa ―nam. 25Orze' fiñ ze' rlal dza lañ lueg la zañ lo Herodes bdiiñ ñi too Waa. Gaze' nu nañ: ―Ya̱ rlagya̱ nu lueg la cuic ru too Waa nu driib nis mbecy nañ tub gya'n ―nañ. 26Herodes tona' la bicy shniy. Tees gun bi mniiy nu waded la cuic yu la zi'l coz nu cyiñ ñi nunu bi güeñ dela mbecy nu nguaa nuy ze', orze' wangaca' gyicy cyup ic yu. 27Orze' lueg la bzuu nez yu tub soldad bicy yu mandaar loy nu cyid nuy too Waa. 28Orze' gua soldad ze', pshiñ yu too Waa nañ yu' gyiib. Orze' biid nuy ñi nañ tub gya'n. Briic yu ni fiñ feñ ze'. Orze' fiñ feñ ze' byabic ñi nde' ni ñaañ. 29Na ornu gud lagy de yu nu rsya' lo Waa na, orze' gua te dey cuerp niy. Pcach dey ñi. 30Ze' de trocyup aposht nu bzuu nez Jesuuz ze' bi byatublaazha' dey nuy mi. Orze' mnii dey lom dela coz nu bicy yu nu dela coz nu blyuuy. 31Orze' Jesuuz nam rab mi dey: ―Yaa der chan tub lugaar ub zi. Zu lagy ñuu der ―nam. Ni mniim gun tona' la zigy mbecy ya yeed la dey gashtal wacuica' lañ tiem nu gow dey gyit. 32Orze' gu' num dey nañ tub barc. Za dey tub lugaar ub zi. 33Tees de mbecy bzaac dey bruum zam, nunu byu' lo dey mi. Orze' zigy mbecy nu bruu dela gyedz nu yu' ru' nisyudoo ze', bicy lal dey zay gyi' lay tub la' ga' ru' nisyudoo. Orze' bru'ña dey anzir nu ru'ñam. 34Na ornu bruum nañ barc ze', orze' bzaac mi dela mbecy zigy ze'. Orze' gushni lagy mi dey, gun na dey gal na shily nu sac cyu rña. Ze' brugyi' rlyuum zañ lo coz ni dey. 35Ornu bi rdze, orze' de yu nu rsya' lom nay rab yum: ―Ii tub lugaar ub zi nunu tona' la gudze. 36Orze' bzuu nez mbecy chay de lugaar ii nu de gyedz nu yu' gaab. Orze' zi dey coz nu gow yu, gun ii sac coz nu gow dey ―na dey. 37Orze' na Jesuuz rab mi dey: ―De ru, briic coz nu gow dey ―nam. Orze' na dey rab yum: ―¿Walab gaal galagy ru nu gzi̱ de̱ bee miily la tiñ gyishtily nu ricy na gow dey? ―nay. 38Orze' na Jesuuz: ―¿La be gyishtily ricy cup der? Gua güii der ben ―nam. Ornu gud lagy dey la be, orze' na dey: ―Gaay gyishtily nu cyup bel ―na dey. 39Orze' Jesuuz mniim lo dela mbecy nu zub yu lo de gyizh ca' bee nac gay. 40Orze' gucua bee nac ga mbecy. Lo tub nac ga dey bee tub gaynal yu o bee cyaal gaynal yu gucuay. 41Orze' bdu' yaam gaay gyishtily ze' nu cyup bel ze'. Bgüiim par baa. Nunu briic mi gras ni Ñgyoozh nu nac de nde'. Gaze' nu blew mi gyishtily ze' briica'm ñii ni de yu nu rsya' lom nu cyez dey ñi ni de mbecy zigy. Orze' blewa'm cyup bel ze' briica'm ñii ni de yu nu rsya' lom par nu cyez dey. 42Orze' dela de mbecy bdow gyel la dey. 43Ornu bded nu bdow dey, orze' brusub trocyup ru' chicyiw de coz nguzh ni gyishtily ze' nu ni de bel ze' nu pte' dey. 44Lo dela yu gyeey nu bdow de gyishtily ze', gaay miily dey nac yu. 45Cuanzir blazh nde', orze' Jesuuz mniim lo de yu nu rsya' lom nu chu' dey nañ barc nu cha ga dey lom gal tub gyedz nu ri tub la' ga' ru' nisyudoo nu la Betsaida. Ub mi byeeñ gam par nu nii num de mbecy ñgyoozh. 46Na or blazh nu mnii num dey ñgyoozh na, orze' pcam par tub logyi'. Zam nu nii num Ñgyoozh. 47Na ornu becheñ na, barc ze' ri nu dey ñi laab gazel nisyudoo. Ze' Jesuuz ub zi lam byeeñ mi par lo yu bigy. 48Orze' bzaac mi nu tona' la fers za barc ni dey, gun par nez nu zañ druu bi. Na ornu gabee caas ru' zu, orze' rza la Jesuuz. Lo nis zam lo dey. Orze' ricy peem nu ded lom lo dey. 49Na ornu bzaac dey nu yad mi lo nis, orze' bis guzii dey mi. Orze' bish ti dey. 50Gun dela dey bzaac yum, nunu tona' la gudzib dey. Tees Jesuuz lueg la mnii num dey. Orze' nam rab mi dey: ―¡Briic der baloor! ¡Ya̱ nde'! ¡Cue' dzib der! ―nam. 51Orze' gu'm nañ barc ze' nu yu' dey, nunu guca nu druu bi. Orze' tona' la za nu ic dey, 52gun wangyet lag dey cuen coz nu bicy mi nu de gyishtily ze'. Gun noow na shcab ni dey. 53Ornu blazh bded dey lo nisyudoo, bru'ña dey lo de yu ni Genesaret. Ru' ze' bzeeñ dey barc niy. 54Orze' cuanzir nu bruu Jesuuz nañ barc ze', lueg la byu' lo de mbecy mi. 55Orze' dzach la gusa dey dutuub la lugaar, nunu brugyi' dru'ña nu dey mbecy rat lo nuun ca zi'l lugaar nu güeñ dey nu zum. 56Ca zi'l ze' nu rded mi, de ranch, de lat gyedz, o ngush, pcuaa dey de mbecy rat de lat yagyi', nunu mnishbaa dey lom nu zaan mi gal dey mas ñuu ru' shab mi. Orze' dela de yu nu gul mi byac dey.

will be added

X\