San Marcos 5

1Orze' bru'ña dey tub la' ga' ru' nisyudoo lo yu ni Gerasa. 2Orze' cuanzir nu bruu Jesuuz nañ barc ze', orze' lueg la bdzeel mi tub mbecy nu bruu lat de blyuu nu rcach de mbecy añ. Yu ze' tub mbecy nu bicy ni nuras. 3Nunu lat de blyuu ze' rcyiiñ yu. Nunu ni tub la mbecy wagac cyiig yuy. Mas nu caden wagac gag yu, 4gun zañ tir pcyiig dey gyi'y nu yaay nu caden. Tees rsug yu caden ze'. Nunu ni tub la mbecy wagac gyicy yu nu cuez se'y. 5Zaab za lay dzi rel la rded yu de logyi' nu lat de blyuu ze'. Rbish tiy, nunu rshi'ñ yu ub yu nu gyita'. 6Tees ornu bzaac yu Jesuuz zet ru' nu zam, orze' gush yu carer zay lom. Orze' gusu tib yu lom. 7Gaze' nu na Jesuuz rab mi yu: ―Bruu chu lo mbecy ii nuras ―nam. Orze' dub ru' la nuras ze' rbish tiy. Gaze' nu nay rab yu Jesuuz. ―¿La ryub ru yad ru lo̱ Jesuuz, i'ñ Ñgyoozh, biñ nu zily zir nac? ¡Cyoozh cue' sheed zir ya̱! ―nay. 9Orze' na Jesuuz rab mi yu: ―¿La lar? ―nam. Gaze' nu nay rab yum: ―Ya̱ la̱ bee miily gun zigy de̱ naca̱ ―nay. 10Orze' tona' mnishbaay lom nu cue' co chum yu lugaar ze'. 11Na par gyi' bicy ze' tona' la cuch zigy rded ma row ma. 12Orze' dela nuras ze' mnishbaa dey lo Jesuuz. Gaze' nu na dey: ―Bzuu nez de̱ ya̱ lo de cuch re gun orze' chu̱' de̱ nañ ma ―na dey. 13Orze' briic Jesuuz rishbeey nu gruu dey. Gaze' nu bruu dey lo mbecy ze'. Gu'y nañ de cuch zigy ze'. Orze' rzab la de ma bzu tiily ma par gyoow. Bet lag de ma lo nisyudoo. Gut de ma lo nis. Cyup la miily cuch ze' gut ma lo nis. 14Orze' de yu nu rña de cuch ze' gush dey carer ya niiy de coz nu guc lo de mbecy nu yu' lat gyedz nu lo de mbecy nu yu' ngush. 15Na ornu bru'ña de mbecy ze' lo Jesuuz nunu ornu bzaac dey mbecy nu bicy ni de nuras ze', zub yu, zuy shab yu, nunu byanap shcab niy, orze' tona' la gudzib dey. 16Orze' dela de mbecy nu bzaac coz nu guc ze' mniiy lo de mbecy zigy ze' lac mod guc nu de cuch ze' nunu lac mod guc nu mbecy nu bicy ni nuras ze'. 17Orze' brugyi' rnishbaa dey lo Jesuuz nu ruum ledz dey. 18Na ornu gu' Jesuuz nañ barc ze', orze' yu nu bicy ni nuras ze' mnishbaay lom nu cha num yu. 19Tees Jesuuz wansaan mi. Orze' nam rab mi yu: ―Yaa lo de famil nir nunu niir de coz ily nu bicy Ñgyoozh num ru. Niir nu Ñgyoozh gushni lagy mi ru ―nam. 20Gaze' nu mbecy ze' gush nez yu zay. Orze' brugyi' rniiy lo dela mbecy nu yu' lo de yu ni Decápolis de coz ily nu bicy Jesuuz num yu. Orze' tona' la za nu ic de mbecy ze'. 21Orze' Jesuuz gu'm nañ barc gula'm tub la' ga' dzu ru' nisyudoo. Orze' tona' la mbecy zigy byatublaazh dey lom. Laab ru' nisyudoo ze' zum. 22Orze' bru'ña tub mbecy nu la Jairo, yu nu riib ic nañ tub yu' nu rsya' mbecy riidz ni Ñgyoozh. Laab bzaac lay Jesuuz, orze' wes saay lom. 23Nunu tona' la mnishbaay lom. Orze' nay rab yum: ―I'ña̱ se nu gat zi'l lañ. Cua̱a̱ ya̱ chan gal yaar ñii gun, orze' gyac ñi, nunu cui mbañ ñi ―nay. 24Orze' Jesuuz za num yu. Tona' la mbecy zigy za ca dey ich mi gal rcyi'ñ su la dey mi. 25Orze' lat de mbecy ze' ri tub biñ mñaa nu bza' trocyup ña'n rshu reñ mi. 26Zigy doctoor bicy nuy mi zañ lo guñaa. Mnit lo dela tiñ nim, nunu wangyac mi. Ca nu bicy ye zir ñi. 27Na ornu gu' gyidag mi de coz nu bicy Jesuuz na, orze' becha'm par ich Jesuuz lat de mbecy zigy ze', nunu gul yaam shab mi. 28Gun mnii toom nu mas ñuu shab Jesuuz gal yaam, orze' gyac mi. 29Orze' laab or la ze' guca reñ ze', nunu gud lagy lam nu byac mi ni güii ze'. 30Lueg la gud lagy Jesuuz nañ lardoom nu bruu fers nim. Orze' bish cyam bgüiim par ich mi lat de mbecy zigy. Gaze' nu nam: ―¿Cyu gul shaba̱? ―nam. 31Orze' de yu nu rsya' lom na dey rab yum: ―Ru rzac ru nu de mbecy zigy rcyi'ñ su dey ru. Ze' ii nar: “¿Cyu gul ya̱?” nar ―na dey. 32Tees gabee rgüii ru'm dub yub la lom par nu zac mi cyu gul mi. 33Orze' bru'ña biñ mñaa ze'. Tona' la gudzib mi, nunu rash la bis mi, gun gud lagy mi coz nu bzac mi. Orze' wes saam yeñ gyi' Jesuuz, nunu mniim dela coz nu rishli. 34Gaze' nu na Jesuuz rab mi biñ mñaa ze': ―Biñ mñaa, ru byac ru gun bicy cup ru consuel lo̱. Orze' dub gusht la yaa, nunu bi mnit güii nu rat ru ―nam. 35Lat nu gabee rnii nu ru' Jesuuz biñ mñaa ze', orze' bru'ña tub mbecy nu bruu yu' mbecy nu riib ic ze'. Orze' nay rab yu yu nu riib ic ze': ―I'ñ ru bi guut ñi. Cue' ga' gyicy seed zir ru Masht ―nay. 36Tees Jesuuz wangyicy cuen lam de riidz nu rniiy. Orze' nam rab mi yu nu riib ic ze': ―Cue' dzib ru. Bicy cup zi'l consuel lo̱ ―nam. 37Orze' wansaana'm cha ca zir mbecy ich mi nomaas Bed, nu Santiag, nu Waa, bicy yu za num. 38Gaze' nu ornu bru'ñam yu' yu nu riib ic ze', orze' bzaac mi nu se byach zi'l mbecy yu'y. Yu' mbecy ruun yu. Yu' ga'y rbish tiy. 39Na ornu gu'm nañ yu' na, orze' nam rab mi dey: ―¿Lagu dzi rded deet der? ¿Lagu ruun der? Ze' fiñ nguzh ii nu nas ñi; walab nu guut ñi ―nam. 40Orze' brugyi' rigy nu naañ dey mi. Orze' bloom dela dey par ich yu' ze'. Orze' gu'm nu uz fiñ nguzh ze' nu ñaañ nu chon de yu nu rsya' lom ze' par ze' nu mbish ñi. 41Orze' bdu' yaam yaañ. Gaze' nu nam rab mi ñii: ―Talita cum ―nam. Benu gyal riidz ze', orze' nam: Fiñ nguzh, ya̱ rne̱e̱ du̱ ru weshte, nam. 42Orze' laab or la ze' weshte fiñ nguzh ze' brugyi' rded ñi. Na fiñ ze' bi yu'ñ tub ña'n trocyup. Orze' tona' la za nu ic de mbecy. 43Tees Jesuuz pcach mi ru' dey nu cue' la cuic dey nu gad lagy mbecy nu ni bicy mi. Nunu mniim nu cuic dey coz nu gow fiñ nguzh ze'.

will be added

X\