San Marcos 4

1Orze' Jesuuz brugyi' ga'm rlyuum ni de mbecy ru' nisyudoo, nunu tona' la mbecy zigy byatublaazh dey lom. Orze' nde' nu gu'm, nañ tub barc gusub mi gal zaab zi'l ñi lo nis. Ze' de mbecy zigy gucua dey lo yu ru' nisyudoo. 2Ze' blyuum zañ coz ni dey nu riidz tiily. Na lat nu rlyuum ni dey, orze' nam: 3―Bzuub gyidag der: Tub mbecy bruuy zay za nuuz yu mbigy. 4Lat nu rtich yu mbigy ze', yu'ñ bet lag ñi ru' gyernez. Orze' bru'ña chigyiñ bdow ma ñii. 5Ze' yu' ga'ñ bet lag ñi lo yu las ru' nu ri gyita' par nañ. Orze' dzach briib ñi gun las ru' yu ze'. 6Na ornu briib doo na, orze' bziiñ. Orze' guwach ñi gun sac sheñ yu nu shet nap ñi lyuñ. 7Ze' yu'ñ bet lag ñi lat gyech. Orze' dzach guuly gyech ze'. Orze' pcyiig ñi de yamni ze'. Orze' wancuic ñi cosech. 8Ze' yu' ga'ñ nu bet lag ñi lo yu nap. Briib ñi nunu guuly ñi. Orze' tona' la cosech nap briic ñi. Yu'ñ briic ñi gal rub tii mbigy. Yu'ñ briic ñi gayon mbigy. Yu'ñ briic ñi tub gaynal mbigy ―nam. 9Orze' na ga'm: ―Yu nu zub gyidag rlagy ñi gyicy yu nu gyet lag yu cuen ―nam. 10Na ornu bya ub zim, de yu nu yu' lom nu de trocyup yu nu bloo sum ze' bdugyi' dey lom lac yaruu de riidz tiily ze'. 11Gaze' nu nam rab mi dey: ―Ñgyoozh briic mi nu gad lagy de ru coz ni gyel gubier nim, de coz nu wangad lagy mbecy gulas. Ze' de mbecy nu a̱' riib ic mi, ya̱ rshaala̱ lo dey nu riidz tiily. 12Gun orze' mas zac dey, tees wayu' loy, nunu mas gyeñ dey, tees wayet lag dey cuen, nunu nis cush cya dey par lom. Orze' gyicy sulagy mi ni dey ―nam. 13Gaze' nu na'm rab mi dey: ―Benu wagyet lag der cuen riidz tiily ze', ¿lac mod gyet lag der cuen de' zir ñi? 14Yu nu gua nuuz mbigy ze', nde' yu nu rshaal riidz nu bruu lo Ñgyoozh. 15Yu' mbecy nu na gal nu na mbigy nu nguaa ru' gyernez, lugaar ze' nu bdunuuz riidz ni Ñgyoozh. Orze' cuanzir nu reñ dey riidz ze', orze' lueg la dru'ña nuras nu rbooy ñi nañ lardoo dey. 16Ze' yu' ga' mbecy nu na gal nu na mbigy nu nguaa lo yu las ru' nu ri gyita' par nañ ze'. Ornu nu loga la reñ dey riidz ni Ñgyoozh ze', orze' “O” rnii dey, nunu yet lagy dey. 17Tees par nu las ru' yu ze', orze' wac shet riidz ze' sheñ lyuñ. Orze' ragyee dey la be zi'l tiem. Tees despuees, ornu dru'ñañ nu rzac zi dey o nu rzac deet dey nu nac riidz ze', orze' druu chu dey lo riidz ze'. 18Ze' yu' ga' mbecy nu na gal na de mbigy nu bdunuuz lat gyech ze'. De yu ze' rzuub gyidag dey riidz ni Ñgyoozh. 19Tees de gyel rsug ic nu nac de coz ni gyishlombecy ii, nunu de gyel ye rzac lo gyel nap, nunu de gyel rzaab lagy reña' coz, de nde' ricy ñi gan dey. Gal nu ricy gyech nu wacsaan ñi cuic yamni cosech, ni ricy de coz ze'. Wacsaan ñi gyicy nap riidz ni Ñgyoozh shcab ni de mbecy ze'. 20Ze' yu' ga' mbecy nu na gal nu na de mbigy nu bet lag lo yu nap ze'. De yu ze' “O” rniiy ornu reñ yu de riidz ni Ñgyoozh, nunu rbic ñi cosech nañ lardoo dey. Yu'ñ rbic ñi gal rub tii. Yu'ñ rbic ñi gayon. Yu' ga'ñ rbic ñi tub gaynal. Ni ricy riidz ni Ñgyoozh nu mbecy ze' ―nam. 21Gaze' nu na ga'm: ―¿Walab gaal ri de mbecy tub candiil nañ tub cajo̱o̱ o nañ tub nuun? ¿A walab nu rzuub dey ñi se'ñ? Gun orze' cuic ñi yaa. 22Sac ni tub coz ngach nu waruu zac ñi. Nunu dela coz nu wagad lagy mbecy, nde' gad lagy dey. 23De mbecy nu zub gyidag rlagy ñi gyicy yu nu gyet lag yu cuen ―nam. 24Gaze' nu na ga'm: ―Orze' nap bdu' cuen der de riidz nu reñ ru nim, gun dub gal nu ricy yac der de riidz ze', dub ñi gyet lag zir ru cuen. 25Gun yu nu ricy yac de riidz ze' nay gal na tub mbecy nu ricy cup la coz. Yu nu ricy cup sheñ, sheñ zir gad niy. Ze' yu nu sac ni, gashtal coz miiñ nu ricy cup yu gruuñ niy ―nam. 26Orze' na'm: ―Gyel gubier ni Ñgyoozh rac ñi gal nu rac nu tub mbecy nu rnuuz mbigy. Mbecy rza nuuz yu mbigy ze'. 27Orze' raas yu. Or za' yu yeshtey. Lat nu zaab za la dzi niy, mbigy ze' driib ñi. Gaze' nu raly ñi. Nunu wagad lagy yu lac mod driib ñi nunu ni lac mod raly ñi. 28Gun ub la yu ricy ñi nu driib mbigy ze'. Orze' nu loga la raly tub gyizh. Orze' gaze' nu da' za' niñ. Orze' lat ze' raly de mbigy nu da' nañ gyez ze'. 29Orze' ornu bi gul de mbigy ze', lueg la shi'ñ yuñ gun bi pshuub dzi nu dude'ñ. Ni' zi'l mod rac nu gyel gubier ni Ñgyoozh ―nam. 30Gaze' nu na ga'm: ―¿La ñuu coz nu rac gal nu rac nu gyel gubier ni Ñgyoozh? ¿La ñuu coz saapa̱ nu gyel gubier nim? 31Gyel gubier ni Ñgyoozh rac ñi gal nu rac nu tub mbigy ya urnishtas. Ornu rdunuuz ñi, miiñ zir ñi par dela mbigy nu yu' gyishlombecy. 32Tees ornu dunuuz ñi, orze' raly ñi. Orze' zily zir ñi yac ñi gaze' de' zir yag mi'. She rgyich yaañ mas gal de chigyiñ rzaa ma teez ma lat ga'l nu rbic de yaañ ze'. Ni mod rac nu gyel gubier ni Ñgyoozh ―nam. 33Zañ riidz tiily nu na gal nu na de nde' mniim. Ni mod blyuum de riidz ni gyel gubier ni Ñgyoozh ni dey. Dub gal mod nu gac gyet lag dey cuen, dub ni mniim lo dey. 34Tees wanniim lo dey benu walab nu de riidz tiily ze'. Nunu ornu ub zim nu de yu nu rsya' lom, orze' pshaal mi dela riidz ze' lo dey. 35Laab dzi ze', or becheñ, orze' Jesuuz nam rab mi dey: ―Yaa der chan gal naa tub la' ga' dzu ru' nisyudoo ―nam. 36Orze' bzeeñ dey dela mbecy zigy, za nu dey Jesuuz laab nañ barc nu bi rim ze'. Nunu za ga' reña' barc ze' nu za barc nu rim ze'. 37Tees lat nu za dey ze', sij la bru'ña tub gyey bi ily. Orze' de nguuly lo nisyudoo rzu'ñ nañ barc ze' se nu dzaa zi'l ñi. 38Ze' Jesuuz mbish mi nas mi par iiñ barc ze' lo tub almad. Gaze' nu pcueeñ dey mi. Orze' na dey rab yum: ―¡Masht! ¿A se la la nu ricy ñi nir nu nit lo den lo nis? ―na dey. 39Gaze' nu weshtem nunu bicy mi mandaar lo bi. Orze' nam rab mi nisyudoo: ―¡Guri! ―nam. Orze' guri bi nunu se ri zu la byac. 40Gaze' nu nam rab mi dey: ―¿Lagu dzi rdzib der? ¿Walab gaal gabee wagyicy cup der consuel lo̱? ―nam. 41Orze' tona' la gudzib dey. Orze' na dey rab yu losa'y: ―Ze' ¿cyu mbecy nac mi ii? Gal bi nunu gal nisyudoo rzuub gyidag ñi nim ―na dey.

will be added

X\