San Marcos 3

1Orze' tuuba' dzi, orze' gua ga' Jesuuz nañ tub yu' nu rsya' mbecy riidz ni Ñgyoozh. Ze' ri tub mbecy yaa gush beñ. 2Orze' de yu nu rzi lagy lom psiiñ dey nim ben a gyicy yac mi mbecy rat ze' sab, dzi nu rzu lagy mbecy, gun dzi ga ñgyaad tub mod nu riib dey cyi ic mi. 3Orze' nam rab mi mbecy yaa gush beñ ze': ―Wes su. Da lo̱ gashtal gazel ii ―nam. 4Gaze' nu nam rab mi de yu nu rzi lagy lom: ―¿A nap zuñ par lo leey ni Moisees nu gyicy den coz nap sab, dzi nu rzu lagy mbecy? ¿A nap nu gyicy den coz nap uti nu gyicy den coz a̱' nap? ¿A nii tub dzi nu gloo mbañ naa mbecy uti tub dzi nu gnit lon mbecy? ―nam. Tees wannii la dey. 5Orze' bgüii tañ mi lo dey, nunu bicy mi sentiir, gun sac gyel rashni lagy ni dey. Gaze' nu nam rab mi mbecy rat ze': ―Bzaab yaar lo̱ ―nam. Orze' mbecy ze' bzaab yaay lom. Orze' byanap lañ. 6Gaze' nu lueg la bruu chu de mbecy fariseo. Byatublaazh dey nu de mbecy ni Herodes nu bee dey riidz ben lac mod za' lo dey Jesuuz. 7Tees Jesuuz za num de mbecy nu rsya' lom gal ru' nisyudoo. Nunu tona' la mbecy zigy za ca dey ich mi. Yu' mbecy nu bruu de lo yu ni Galilea. Yu' mbecy nu bruu de lo yu ni Judea. 8Yu' mbecy nu bruu Jerusaleeng. Yu' mbecy nu bruu lo de yu nu la Idumea. Yu' mbecy nu bruu tub la' ga' ni gyoow Jordaang. Nunu yu' ga' mbecy nu bruu lo de yu ni Tiro nu Sidón. Dela ze' bruu dey za güii dey Jesuuz gun güeñ dey de coz ily nu bicy mi. 9Gaze' nu mniim lo de yu nu rsya' lom nu zu lily dey tub barc nu ruu chum nu nac de mbecy zigy nis cyi'ñ zu dey mi. 10Gun dela mbecy rat byatublaazh dey lom nu rlagy dey gal yaa dey mi nu nac nu bi bicy yac mi zigy mbecy. 11Nunu dela de yu nu bicy ni nuras, ornu rzac dey mi, yes saa la dey lom. Orze' dub ru' la dey rbish ti nuy mi. Orze' rnii dey: ―¡Ru nac ru i'ñ Ñgyoozh! ―rnii dey. 12Orze' tona' la fert mniim lo dey nu cue' nii dey lo mbecy cyu nac mi. 13Despuees nde' gaze' nu za Jesuuz tub logyi'. Orze' bredz mi ca na de yu nu rlagy mi. Orze' gua dey lom. 14Gaze' nu bloo zum trocyup dey par nu chesa num yu nunu par nu zuu nez mi dey chay cha shaal dey de riidz ni Ñgyoozh. 15Nunu briic mi rishbeey ni dey par nu co chu dey de nuras. 16Orze' nii nu la de trocyup yu nu pcuim ze'. Gush lañ: Simo̱o̱, yu nu bloo lam Bed, 17nu Santiag nu bicy yu Waa, de i'ñ Zebedeo. De yu ze' bloo lam Boanerges. Riidz ze' yaruuñ: De I'ñ guzii. 18Ze' tuuba'y Ndrees, nu Lip, nu Bartol, nu Mateo, nu Tomaas, nu Santiag, i'ñ Alfeo, nu Tadeo, nu Simo̱o̱, yu nu nac partid nu la Celote, 19nu Judas Iscariote, yu nu bish cya ich mi. 20Orze' Jesuuz gu'm nañ yu'. Orze' ze' byatublaazha' de mbecy zigy lom tuuba' tir gal wangaca' la ñgyow mi gyit nu de yu nu rsya' lom. 21Orze' de famil nim güeñ dey de coz nu guc. Orze' za dey lom nu ricy pee dey cha nu dey mi por fers la, gun mnii mbecy nu guton mi. 22Tees de mbecy nu bruu Jerusaleeng, de yu nu rlyuu leey ni Ñgyoozh, mnii dey nu Beelzebé, yu nu riib ic de nuras, bicy niy mi, nunu bicy yu nu cyiiñ yu ii nu co chuy de' zir nuras, na dey. 23Orze' Jesuuz bredz mi dey nu gyecha' dey lom. Gaze' nu mniim lo dey nu riidz tiily. Orze' nam: ―¿Walab gaal gac co chu nuras laab losa' nuras yu? 24Benu tub nac mbecy dulew dey nu chucoo dey laab nu losa' zi'l yu, orze' rila wazu dey. 25Nunu benu tub famil chu cooy laab nu losa' zi'l yu, orze' ni' zi'l wazu dey. 26Nunu benu de nuras dulew dey nunu chu coo dey laab nu losa' dey, orze' ni' zi'l wazu dey, sinu nit lo dey ―nam―. 27’Tees rlagy ñi nu gyicy mbecy gan yu nu riib ic de nuras zub lo. Gaze' nu gac co chuy de' zir nuras nu zaab ich. Gun ni tub la mbecy wac chu'y yu' tub mbecy fert nu coy suuy benu wacyiigy dey yu loga. Tees benu nu loga la cyiig dey yu, gaze' nu gac chu' dey yu'y nu coy suuy. 28’Rishli, ya̱ ne̱e̱ lo der nu Ñgyoozh gac gyicy sulagy mi ni de mbecy ni de lo la cyi nu ricy yu nunu de lo la riidz a̱' nap nu rniiy, 29tees cyu zi'l mbecy nu nii zi ni Espiriit Yon nim, yu ze' wayicy sulagy mi niy. Nde' cyi nu rila wac gyecy ―na Jesuuz rab mi de mbecy nu shiñ mnii ze'. 30Ni mniim lo dey gun mnii dey nu bicy ni nuras mi. 31Orze' bru'ña ñaam nu de bicy mi. Yu' dey gashtal ich yu'. Gaze' nu bzeed dey raso̱o̱ lo Jesuuz nu cham lo dey. 32Orze' na de mbecy zigy nu nguaa lom ze' rab yum: ―Gal ich yu' re zu ñaar nu de bicy ru ryub dey ru ―na dey. 33Orze' nam rab mi dey: ―¿Cyu ña̱a̱ nunu cyu de bicya̱? ―nam. 34Gaze' nu bgüiim dub yub la lom. Orze' nam rab mi dey: ―Ii nguaa ña̱a̱, nunu ii nguaa bicya̱. 35Cyu zi'l mbecy nu ricy coz nu rlagy Ñgyoozh, de yu ze' nac dey bicya̱, zana̱, nu ña̱a̱ ―nam.

will be added

X\