San Marcos 2

1Or bza' la be dzi bish cya ga' Jesuuz yam par Capernaum. Orze' brush las riidz nu zum yu'm. 2Orze' byatublaazh mbecy lom gal wagada' la lugaar nu gzu dey mas par ich ze' nu zub gyero'. Nunu pshaal mi riidz ni Ñgyoozh lo dey. 3Orze' bru'ña tap mbecy. Bru'ña nu dey tub mbecy chi̱. 4Na ornu tanta' nu wangac chu' dey lo Jesuuz na nu nac de mbecy zigy ze', orze' gup dey par too yu'. Gaze' nu pshaal dey par too yu' nañ ze' nu zub Jesuuz. Orze' pshet dey nuun nu riib mbecy rat ze' lom. 5Orze' ornu Jesuuz gud lagy mi nu ricy cup dey consuel lom, orze' nam rab mi mbecy chi̱ ze': ―Yu feñ, ya̱ bi ricy sulagya̱ de cyir ―nam. 6Laab ze' nguaa la be de yu nu rlyuu leey ni Ñgyoozh. Orze' de yu ze' na dey nañ lardooy: 7“¿Lagu ni rniiy? Coz nu rniiy, nde' zañ contr ni Ñgyoozh. Tub zi la Ñgyoozh gac gyicy sulagy mi de cyi nu ricy mbecy”, na dey. 8Orze' lueg la gud lagy Jesuuz nañ lardoom nu ni rnii too dey. Orze' nam rab mi dey: ―¿Lagu ni rnii too der? 9Dzi zir a̱' biigy par nu ne̱e̱ nu bi ricy sulagya̱ de cyir gaze' nu ne̱e̱ nu wes zu, byash nuun nir nunu bza. 10Tees ya̱ ne̱e̱ lo yu re nu gyes suy gzay par nu gad lagy der nu ya̱, biñ nu byac mbecy, ricy cupa̱ rishbeey nu gyicy sulagya̱ de cyi de mbecy gyishlombecy ii. Gaze' nu nam rab mi mbecy rat ze': 11―Ya̱ ne̱e̱ du̱ ru wes su, gush nuun nir, yaa yu'r ―nam. 12Orze' wes suy, nunu lueg la pshet yaay nuun niy. Orze' gush nez yu yay lo rgüii la dela mbecy ze'. Nu nac nde', nde' nu za nu ic dela dey nunu byabic dey gyel mbecy ni Ñgyoozh. Gaze' nu na dey: ―Rila nigul zac na coz nu na gal na nii ―na dey. 13Gaze' nu za ga' Jesuuz par ru' nisyudoo. Ze' dela mbecy zigy bru'ña dey lom, nunu rlyuum ni dey. 14Na nez nu zam, orze' bzaac mi Leví, i'ñ Alfeo. Zub yu ze' nu rboo mbecy tiñ por cuen ni gubier Rom. Gaze' nu nam rab mi yu: ―Da ca icha̱ ―nam. Orze' wes suy za cay ich mi. 15Na despuees, lat nu zub Jesuuz rom gyit yu' Leví, ze' nguaa zigy mbecy nu rboo tiñ por cuen ni gubier, nu zigy de mbecy bdune'. Nguaa dey ze' nu Jesuuz nu de yu nu rsya' lom, gun yu' zigy mbecy bdune' lat de mbecy nu rde' lom. 16Na ornu bzaac de mbecy fariseo nu de mbecy nu rlyuu leey ni Ñgyoozh nu Jesuuz rom gyit nu de mbecy ze', orze' bdugyi' dey lo de yu nu rsya' lom: ―¿Lagu moscuel ni de ru row yu gyit tublaazh nu de mbecy nu rboo tiñ por cuen ni gubier nu de mbecy bdune'? ―na dey. 17Ornu güeñ Jesuuz nde', orze' nam rab mi dey: ―Par de mbecy ruub walagy ñi doctoor, tees par de mbecy rat rlagy ñi. Gal nu doctoor wagyicy nuy mbecy ruub guñaa, ni' ya̱ a̱' yapa̱ nu redza̱ mbecy nu sac cyi, sinu dredza̱ de mbecy cyi par nu ne' dey cyiy ―nam. 18De yu nu rsya' lo Waa nu briib nis mbecy, nu de yu nu rsya' lo de mbecy fariseo rca dey ni ub yu nu cue' gow dey gyit lat nu rzu bich dey nu nac Ñgyoozh. Orze' gua mbecy lo Jesuuz. Orze' na dey rab yum: ―¿Lagu de yu nu rsya' lo Waa nu de yu nu rsya' lo de mbecy faraseo rca dey ni ub yu nu cue' goy gyit lat nu rzu bich dey nu nac Ñgyoozh, tees de mbecy nu rsya' lo ru wagyicy dey nde'? ―na dey. 19Orze' na Jesuuz rab mi dey: ―Ya̱ na gal nu na tub nob. ¿Walab gaal gac ca de yu nu yu' lo fandang ni ub yu nu cue' goy gyit lat nu gabee rded nob lat dey? Lat nu gabee rded nob lat dey, wac ca dey ni ub yu nu cue' goy gyit. 20Tees shuub tub dzi nu co mbecy nob ze' lat dey. Orze' tiem ze' ca dey ni ub yu nu cue' goy gyit par nu gyicy shni dey. 21’Gun mod nu bicy de gyitoo bel, nde' nañ gal nu na tub negy gush. Ni tub la mbecy wayicy mi rumien negy gush nu tub la' negy cub nu nigul gyo' nis, gun nis gash beñ negy cub ze'. Orze' shaa ye zir negy gush ze'. 22Nunu mod nu bicy de gyitoo bel, nde' nañ gal na tub gyid gush nu rgu' choow dey ñup ni urbyay. Ni tub la mbecy wac cu' choow yu ñup ni urbyay cub nañ gyid gush, gun nis cyich ñiñ. Orze' shu dela ñup ni urbyay ze', nunu nit lo gyid ze'. Nde' nu rlagy ñi cu' choow dey ñup urbyay cub nañ gyid cub ―nam rab mi dey. 23Na tub sab, dzi nu rzu lagy de mbecy Israeel, Jesuuz bded mi lat tub nac trig nu de yu nu rsya' lom. Orze' lat nu bded dem, orze' de yu nu rsya' lom ze' brugyi' rcyug dey za' nu gow dey. 24Na ornu gud lagy de mbecy fariseo na, orze' na dey rab yu Jesuuz: ―Güii, ¿lagu de yu nu rsya' lor ricy dey tub coz nu a̱' yad ñi nu gyicy dey dzi nu rzu lagy den? Nde' walab se'ñ par lo leey ni den―na dey. 25Orze' na Jesuuz rab mi dey: ―¿Walab gaal nigul sya' der coz nu bicy Dabi tiem nu bicy falt coz nu cyiiñ niy lat nu byan yu nu de mbecy nu gusa nuy? 26Laab de yu ze' gu'y nañ yu' ni Ñgyoozh tiem nu Abiatar bzuy riiñ ni yu nu riib ic de uz. Orze' Dabi bdow yu gyishtily nu bzeeñ de mbecy nañ yu' ze'. Nde' gyishtily nu zu riiñ lo Ñgyoozh. Nunu de uz nu zu riiñ ni Ñgyoozh zi'l gac gow yuñ. Tees Dabi bdow yu gyishtily ze', nunu briic yuñ gow de yu nu gusa nuy ―nam. 27Gaze' nu na'm rab mi dey: ―Ñgyoozh psa' lagy mi sab, dzi nu zu lagy mbecy par de mbecy. Walab nu psa' lagy mi de mbecy par leey ni dzi nu rzu lagy mbecy. 28Nde' nu ya̱, biñ nu byac mbecy, riib ica̱ sab, dzi nu rzu lagy mbecy ―nam.

will be added

X\