San Marcos 16

1Na ornu bded sab, dzi nu rzu lagy mbecy, orze' Li biñ nu bruu Magadán, nu Li ñaa Santiag, nu Salomé wii dem coz zguul nu cha coo dem cuerp ni Jesuuz. 2Orze' noming napor, briib zi'l doo za dem ru' baa ze'. 3Orze' lat nu za dem, ro dem riidz nu losa'm. Orze' na dem: ―¿Cyu ctuyub gyita' nu noow ru' baa par nu chu'n? ―na dem. 4Tees ornu bru'ña dem ru' baa ze', bzaac dem nu bi bruu yub gyita' nu noow ru'ñ ze'. Ze' nde' tona' la gyita' ily. 5Ornu gu' dem nañ gyerbaa ze', orze' bzaac dem tub yu feñ zub yu par yaa bee. Zuy tub negy cacy duñ. Orze' tona' la gudzib dem. 6Orze' yu feñ ze' nay rab yu dem: ―Cue' dzib der. De ru ryub der Jesuuz biñ nu bruu Nazaret, biñ nu biit dey lo cruuz. Na bi byabañ mi. Saca'm ii. Bgüii der ze' nu bri dey mi. 7Tees gua der gua niir lo de yu nu rsya' lom nu lo Bed nu bi ya gam lo dey par Galilea. Re zac der mi gal nu mniim ―nay. 8Orze' de mi ze' gush dem carer bruu dem ru' baa ze' yam. Nunu gush la bis nim nu gudzib mi. Ni wannii la dem lo ni tub la mbecy gun gudzib dem. 9Na ornu byabañ Jesuuz noming napor la, nu loga la bruu zac mi lo Li, biñ nu bruu Magadán, biñ nu bloo chum gagy nuras lo. 10Orze' mi ze' gush nez mi za toom riidz lo de' zir de yu nu gusa nu Jesuuz. Zam lo dey lat nu yu' dey ruun dey nunu ricy shniy. 11Tees ornu güeñ dey nu mnii Li nu byabañ Jesuuz nunu bzaac mim, orze' wancheña lagy dey. 12Despuees nde', orze' bruu saca'm lo cyup dey lat nu za dey ngush. Reña' nam byac mi. 13Orze' bish cya dey gua nii dey lo de' zir de losa'y. Tees ni' de yu ze' wancheña lagy dey. 14Despuees nde', orze' bruu zac mi lo de trotub yu nu bloo sum ze' lat nu nguaa dey lo mez row yu gyit. Orze' pshuu num dey nu nac nu wancheña lagy dey nunu bicy cyigy lardoo dey, gun wacheña lagy dey ni de yu nu bzaac nu bi byabañ mi. 15Orze' nam rab mi dey: ―Gua der dutuub la gyishlombecy. Mnii der riidz nu sac nu bruu lo Ñgyoozh lo dela mbecy. 16Yu nu gyicy cup consuel lo de riidz nu sac ze' nunu gzu nis yu, yu ze' gruu mbañ yu. Ze' yu nu wagyicy cup consuel, yu ze' waruu nap yu ornu ri beem niy nu nac cyiy. 17Nunu de yu nu ricy cup consuel gac gyicy dey zañ coz par nu gabe nu laab coz ni Ñgyoozh rnii dey. Nu nac ya̱ co chu dey nuras. Gnii dey riidz reña' mbecy. 18Benu gan dey bily se la la gzac yu. Nunu mas go' dey benen se la la gyicy nuñ dey. Ornu griib yaa dey mbecy rat, orze' gyac dey ―nam. 19Orze' Shuaan na Jesuuz despuees nu mnii num dey, orze' pshup Ñgyoozh mi gyibaa. Orze' gusub mi par yaa beem. 20Orze' de yu ze' bruu dey gusay, pshaal dey de riidz nu sac nu bruu lo Ñgyoozh dela lugaar. Nunu Shuaan na blocyuub mi dey, nunu bicy fert mi de riidz nu rnii dey nu nac de nusuriidz ily nu ricy dey. Ni gac ñii.

will be added

X\