San Marcos 15

1Laab bza' yu la tuuba' dzi, de uz zub lo, gal nu de yu bel ni de mbecy Israeel, nu de yu nu rlyuu leey ni Ñgyoozh, nu dela de mbecy nu zu riiñ ni junt zub lo byatublaazh dey beey riidz nu la gyicy nu dey Jesuuz. Gaze' nu pcyiig dey mi za nuy mi. Bgu' dey mi yaa Poncio Pilato. 2Orze' na Pilato rab yum: ―¿A ru nac ru rey ni de mbecy Israeel? ―nay. Orze' na Jesuuz rab mi yu: ―Laab ni gal nu ru mniir ―nam. 3Orze' de uz zub lo ze' briib dey zañ cyi toom. 4Gaze' nu na ga' Pilato rab yum: ―¿A wagniir? Güii ñuu la zañ cyi driib dey toor ―nay. 5Tees Jesuuz rila wanniim. Orze' za nu la ic Pilato zuy. 6Na de ña'n la lat nu rzu' sa' ni Pas, orze' Pilato rlaay tub ga pres, ca zi'l na yu nu gnii mbecy nu dulaa. 7Ze' yu' la be mbecy nañ yu' gyiib nu rboo lo lo gubier. De yu ze' biit dey mbecy lat nu gu' dey gyel yuu nu bish cyay ich gubier. Lat de mbecy ze' ri tub mbecy nu la Barrabás. 8Orze' bru'ña dela de mbecy zigy, nunu mnii dey lo Pilato nu gyicy yu gal nu ricy zi'l yu lat sa' ze' de ña'n la. 9Orze' na Pilato rab yu dey: ―¿A rlagy der la̱a̱ yu nu nac rey ni de mbecy Israeel? ―nay. 10Gun Pilato gud lagy yu nu de uz zub lo bgu' dey Jesuuz yaay nu nac gyel saap lagy. 11Tees de uz zub lo ze' bdu' dey lagy de mbecy zigy gun orze' laa dey Barrabás lugaar nu laa dey Jesuuz. 12Orze' Pilato nay rab yu dey: ―Beni, ¿la coz rlagy der gyicy du̱ yu nu rnii der rey ni de mbecy Israeel? ―nay. 13Orze' dub ru' la dey rbish tiy: ―¡Cut ruy lo cruuz! ―na dey. 14Gaze' nu na Pilato rab yu dey: ―¿La ñuu coz a̱' nap bicy yu? ―nay. Tees dzi zir rbish ti dey. Orze' na dey: ―¡Cut ruy lo cruuz! ―na dey. 15Gaze' nu blaa Pilato Barrabás, gun rlagy yu ganap lagy de mbecy zigy loy. Orze' despuees bicy yu mandaar nu gaaz dey Jesuuz. Gaze' nu bgu'y mi yaa de soldad nu caa dey mi lo cruuz. 16Orze' de soldad gua nu dey mi loli' ni yu' ze' nu riib ic gubier. (Nde' tub yu' nu la pretorio. ) Orze' ze' bicy tublaazh dey dela de soldad. 17Orze' bzuu dey mi tub negy bizat. Gaze' nu bel dey ya gyech bzaa dey tub coron nu bri dey toom. 18Gaze' nu brugyi' ricy dey nu rnii nuy mi ñgyoozh: ―¡Shnur, rey ni de mbecy Israeel! ―rnii dey. 19Nunu rshet dey toom nu tub yagyi, nunu rcoo yeñ dey lom, nunu rzu tib dey lom ricy dey nu dzi rca lagy dey lom. 20Orze' despuees nu bguu bdzaa dey mi, bloo dey negy bizat nu zu yeñ mi ze'. Orze' bzuu dey mi laab shab mi. Gaze' nu bruu nu dey mi lugaar ze', za nu dey mi par nu caay mi lo cruuz. 21Nez za dey bdzeel yu tub mbecy Cirene nu la Simo̱o̱. Yu ze' uz Alejandro nu Rufo. Bruuy ngush yeed yu. Ornu bdzeel yu de soldad, orze' por fers la pcaa dey yu nu cha nuy cruuz ni Jesuuz. 22Gaze' nu za nu dey mi tub lugaar nu la Gólgota. Nde' tub riidz nu yaruuñ: Lugaar ni cyug too añ. 23Gaze' nu briic dey ñup urbay nu yu' can nu tub lo asecy nu la mirra go'm. Tees wango'm ñii. 24Gaze' nu pcaa dey mi lo cruuz. Orze' de soldad bloo dey cuen ben ca na dey dugyiy tub ga shab mi. Ni mod bleez dey shab mi. 25Tub gyiib gaa or napor pcaa dey mi lo cruuz. 26Lo gyicy cyim pcaa dey: “Rey ni de mbecy Israeel”, pcaa dey. 27Pcaa dey mi lo cruuz nu cyup gubaan, tub yu par yaa beem, ze' tuuba'y par yaa reg mi. 28Orze' byu' niñ gal nu pcaañ lat de riidz ni Ñgyoozh ze' nu rniiñ: “Bicy dey mi par mbecy a̱' nap”, rniiñ. 29Orze' de mbecy nu rded ze' rguu bdzaa dey mi. Rgyib la ic dey nu gyel rguu bdzaa. Orze' na dey: ―¡Ja̱j! Ru mniir nu nit lor yu' nu driib zily mbecy Ñgyoozh nunu nañ chon dzi shes sur ñii. 30Na bloo mbañ ub ru na. Bet lo cruuz ―na dey. 31Ni' de yu zub lo ni uz nu de yu nu rlyuu leey ni Ñgyoozh rguu bdzaa dey mi. Rnii zi dey nim nu losa'y. Orze' na dey: ―Bloo mbañ yu reña' mbecy. Tees ub yu wagac co mbañ yu. 32Rlagy ñi nu gyet Mesías, biñ nu nac rey ni de mbecy Israeel, lo cruuz, gun orze' gzac na nunu cheña lagy na nu laab mi ―na dey. Orze' ni' zi'l de yu nu ca num lo cruuz rguu bdzaa dey mi. 33Orze' tub gyiib trocyup or widoo, bet cow dutuub la lo yu gal tub gyiib chon or gudze. Gaze' nu bzu yaa. 34Gaze' nu laab or ze' ye brish ti Jesuuz. Orze' nam: ―Eloi, Eloi, ¿lema sabactani? ―nam. Riidz ze' yaruuñ: Ñgyoozh ne̱, Ñgyoozh ne̱, ¿lagu bzaan ru ya̱? 35Orze' la be de mbecy nu yu' ze', ornu güeñ dey nu brish tim, orze' na dey: ―Güii, yu re rbedz yu Elías, yu nu mnii por cuen ni Ñgyoozh ―na dey. 36Orze' tub mbecy gush yu carer, psal yu tub coz nu chayo' nis lo ñup zii ni urbyay. Gaze' nu bzuub yuñ lo tub yagyi. Briic yuñ go'm. Orze' nay rab yu losa'y: ―Blez güiin ben a cyid Elías shet yuy lo cruuz ―nay. 37Tees Jesuuz brish tim stub nu ye. Orze' gut mi. 38Gaze' nu negy nu zaab gyero' ni lugaar yon nañ yu' nu driib zily mbecy Ñgyoozh pshaa la lañ gaal zi'l nu gush ñi gal ic lañ gal lo yu la. 39Orze' yu nu riib ic de soldad, yu nu zu par lo Jesuuz, ornu bzaac yu nu lac gut mi, orze' nay: ―Rishli gaal biñ ii guc mi i'ñ Ñgyoozh ―nay. 40Ni' yu' ga' la be biñ mñaa. Zet rgüii dem lo Jesuuz. Lat ze' ri Li, biñ nu bruu Magadán, nu Li ñaa Santiag mi' nu See, nu Salomé. 41De mi ze' gua ca dem ich Jesuuz, nunu bzu bich dem nu nac mi lat nu gusam Galilea. De mi ze' nu zigy zir biñ mñaa bruu num mi Galilea bri nu dem mi gal Jerusaleeng. 42Na dzi ze', nde' dzi nu zu lily mbecy par sa' ni Pas. Nde' dzi birs anzir sab dzi nu zu lagy mbecy. Orze' or gudze 43bru'ña See lo Pilato. Yad nu See yu nu guledz Arimatea. Nac yu tub mbecy lily nu zu riiñ lat junt zub lo. Nunu nac yu tub yu nu rcyish lo lo gyel gubier ni Ñgyoozh. Orze' See guay lo Pilato bdiiñ yu cuerp ni Jesuuz loy. 44Pilato za nu ic yu nu güeñ yu nu bi gut Jesuuz. Orze' bredz yu yu nu riib ic de soldad ze'. Orze' bdugyi'y loy ben a bi gut mi. 45Orze' ornu mnii yu nu riib ic ze' nu bi gut mi, orze' briic Pilato rishbeey nu cha nu See cuerp nim. 46Orze' See wiiy tub sab fin. Gaze' nu pshet yu cuerp ni Jesuuz lo cruuz. Gaze' nu ptiish yu sab ze' cuerp nim. Gaze' nu briy mi gyerbaa nu bduguuñ nañ gyita'. Gaze' nu psoow yu ru' baa ze' nu tub gyita' ily. 47Li, biñ nu bruu Magadán, nu Li ñaa See bzaac dem ze' nu briy cuerp ni Jesuuz.

will be added

X\