San Marcos 14

1Ornu ricy falt ru' cyup dzi par nu chu' sa' ni Pas, sa' nu row dey gyishtily nu sac lebadur, orze' de uz zub lo nu de yu nu rlyuu leey ni Ñgyoozh byub dey tub mod nu shet lag dey Jesuuz pres nu nac gyel rguu, gun orze' gyicy dey nu gat mi. 2Orze' na dey rab yu losa'y: ―Walagy ñi nu shet yaan yu lat sa', gun nis gyach de mbecy ―na dey. 3Lat nu rcyiiñ Jesuuz Betania nañ yu' ni Simo̱o̱, yu nu gurat gyedz nu la lepra, lat nu zub mi lo mez, orze' bru'ña tub biñ mñaa nu tub lamet nu byaa nu gyita' nu la alabastro. Dza laa nañ ñi yu' asecy zguul. Du uub la asecy nu bruu nu tub lo gyish nu la nardo. Tona' la ñgyup sac ñi. Gaze' nu pcyug mi yeñ lamet ze'. Pcoom asecy ze' too Jesuuz. 4Orze' yu' mbecy rdza' dey. Gaze' nu na dey rab yu losa'y: ―¿Lagu leew la mnit lom asecy zguul re? 5Gun nde ñgyac nsa'y ñi ñgyup zir par chon gaaynal tiñ denario. Orze' tiñ ze' mbic mi ni de mbecy zi ―na dey. Nunu rdza' dey ni biñ mñaa ze'. 6Tees Jesuuz nam rab mi dey: ―Zaan der. ¿Lagu ricy seed der mi? Mi ii tona' la nap bicy num ya̱. 7Gun mbecy zi dub laa tiem yu'y lat der. La zi'l tiem nu galagy der gac gyicy ru coz nap nur dey. Tees ya̱ walab dub laa tiem cyiiña̱ lat der. 8Mi ii ricy mi coz nu rac ricy mi. Driily ga lam asecy cuerp ne̱ gun orze' zu lily mi ñii anzir nu cach dey ñi. 9Ya̱ rishli rne̱e̱ lo der nu ca zi'l lugaar ni gyishlombecy nu shaal dey riidz nu sac nu bruu lo Ñgyoozh, nii ga' dey coz nu bicy nu biñ mñaa ii ya̱ par nu gyeza' lagy mbecy mi ―na Jesuuz. 10Orze' Judas Iscariote, tub yu nu bruu lat de trocyup yu nu bloo su Jesuuz, bruuy ze' zay lo de uz zub lo par nu gu' dzey mi yaa dey. 11Na ornu güeñ de uz zub lo ze' nu mnii Judas nu ni gyicy yu, orze' bet lagy dey. Gaze' nu mnii dey nu segur la cyish yu niy. Orze' Judas byub yu mod nu gu' dzey mi yaa dey. 12Dzi loga la ni sa' nu row dey gyishtily nu sac lebadur, dzi nu rut dey shily ni sa' ni Pas, orze' na de yu nu rsya' lom rab yum: ―¿Ca rlagy ru nu cha̱ de̱ zu ye̱ coz nu gyicy na che sa' ni Pas? ―na dey. 13Gaze' nu bzuu nez mi cyup dey. Orze' nam rab mi yu: ―Yaa der lat gyedz. Re dzeel der tub mbecy nu ya nu tub re' nis. Yu ze' cha ca der ich yu. 14Ze' nu chu'y nañ yu', ze' nii der lo shuaan yu' ze': “Masht nam nu yap tugyi̱' lor ben ca na cuart ze' nu gow mi gyit nu gyicy mi che ni sa' ni Pas nu de̱ ya̱, mbecy nu rsya' lom”, nii der. 15Gaze' nu yu ze' lyuuy tub cuart ily nu zub gya. Bi nguaa dela coz nu cyiiñ nañ ñi nunu bi zu lily ñii. Ze' zu ye der nu dow den comid ni sa' ni Pas ―nam rab mi dey. 16Gaze' nu bruu dey ze' ya dey lat gyedz. Guc ñi gal nu mnii Jesuuz. Gaze' nu ze' bzu ye dey comid ni sa' ni Pas. 17Na ornu becheñ na, orze' brim nu de trocyup yu nu bloo sum ze'. 18Lat nu zub nu Jesuuz dey lo mez row num dey comid ze', orze' nam: ―Ya̱ rishli rne̱e̱ lo der nu lo dela der gal nu nguaa der nu row nur ya̱ ii, rusu tub der nu cush cyar icha̱ ―nam. 19Orze' brugyi' ricy shni de yu nu rsya' lom ze'. Orze' tub ga la dey brugyi' rgugyi' dey lom. Orze' nay: ―¿Walab gaal ya̱? ―nay. 20Orze' nam rab mi dey: ―Lo trocyup der nu rne'r gyishtily nir nañ tub zi'l gya'n nu ya̱, grusu tub der nu cush cyar icha̱. 21Gun ya̱, biñ nu byac mbecy, rishli gata̱ gal nu pcaa de yu nu mnii por cuen ni Ñgyoozh. ¡Tees cuaa yu nu cush cya ich ya̱, biñ nu byac mbecy! Nap zir benu cue' ñgyal yu nu ni gyicy ze' ―nam. 22Na lat nu gabee nguaa dey row yu gyit, orze' Jesuuz gush mi tub gyishtily. Orze' briic mi gras ni Ñgyoozh nu nac ñii. Gaze' nu blew mi ñii briic mi ni dey. Orze' nam rab mi dey: ―Gush der nii, gun nii cuerp ne̱ ―nam. 23Gaze' nu gusha'm tub taz nu yu' ñup urbyay. Orze' briica'm gras ni Ñgyoozh. Gaze' nu briica'm ñi nu go' dela dey. 24Gaze' nu nam rab mi dey: ―Nu nii reña̱ nu dushu par nu gruu mbañ zigy mbecy. Nii reña̱ nu bzu nap ñi trat nu bicy nu Ñgyoozh mbecy. 25Ya̱ rishli rne̱e̱ lo der nu rila wado̱' ga̱' ñup ni urbyay gal do̱' la̱ ñup cub ze' nu riib ic Ñgyoozh ―nam. 26Ornu blazh biil num dey tub salmo, gaze' nu bruu num dey yu' ze' za num dey bicy ni ya Oliva. 27Gaze' nu nam rab mi dey: ―Dela der checa der nu gyicy cup ru consuel lo̱, gun ni rniiñ lat de riidz ni Ñgyoozh. Orze' nam: “Ya̱ duta̱ biñ nu rña shily. Orze' dela shily nim grush las ma”, nam. 28Tees despuees nu gyabaña̱, orze' ya̱ gya̱ ga̱ lo der par Galilea ―nam. 29Orze' na Bed rab yum: ―Mas dela dey checa dey nu gyicy cup dey consuel lor, tees ya̱ rila wayeca̱ ―nay. 30Orze' na Jesuuz rab mi yu: ―Ya̱ rishli rne̱e̱ lor nu laab rel na, anzir nu cuedz ngüel ru' cyup ma, ru chon tir niir nu a̱' yu' lor ya̱ ―nam. 31Tees Bed fert la zuy. Orze' nay: ―Mas gata̱ du̱ ru, tees ya̱ rila wane̱e̱ nu a̱' yu' lo̱ ru ―nay. Orze' dela dey ni' zi'l mniiy. 32Orze' bruu num dey bicy ni ya Oliva za num dey tub lugaar nu la Getsemaní. Orze' nam rab mi dey: ―Bzub der ii lat nu ya̱ cha ne̱e̱ du̱ Ñgyoozh ―nam. 33Gaze' nu gua nu reñ mi Bed, nu Santiag, nu Waa. Orze' brugyi' ricy shnim, nunu tona' la deet rac nañ lardoom. 34Gaze' nu nam rab mi dey: ―Ya̱ rlagy la̱ gata̱ nu shni rac nañ lardo̱o̱. Blez der ii, nunu bzu der altant nu ya̱ ―nam. 35Gaze' nu gua ga'm sñumiiñ par lo. Wes saa tiily mi lo yu. Orze' mnii num Ñgyoozh ben a wac gyicy mi nu cue' shuub or nu zac zim ze'. 36Gaze' nu nam rab mi Ñgyoozh: ―Uza̱, ru gac gyicy ru dela coz. Orze' bloo chu taz nu rlagy ñi zuub ru̱'. Tees cue' gac ñii gal nu rlagya̱, sinu gal nu rlagy ru ―nam. 37Na ornu bish cyam lo dey, nguaa nas dey. Orze' nam rab mi Bed: ―Simo̱o̱, ¿walab gaal nas ru? ¿Walab gaal ni tub or wangagyeer nzur altant? 38Bzu der altant nunu mnii nu der Ñgyoozh, gun orze' cue' gyicy de coz cyi gan der. Gun nañ lardoo der rlagy der gyicy ru coz nap, tees cuerp ni der waccyiiñ ñi ―nam. 39Gaze' nu guam tuuba' tir mnii num Ñgyoozh gal nu mnii ga' zi'l mi nu loga. 40Orze' bish cya ga'm tuuba' tir zam lo dey. Orze' ni' zi'l byap mi dey nguaa nas yu, gun rsuun la pcaal dey tanta' nu yeed ñi. Orze' ni wangash lagy dey nu nii nu dey mi. 41Gaze' nu guam tuuba' tir mnii num Ñgyoozh. Ornu bish cya ga'm byaj chon, orze' nam rab mi dey: ―¿Walab gaal gabee nas ru' der? ¿Walab gaal gabee zu lagy ru' der? Bi bded ni nu gas der na. Na byap or nu ya̱, biñ nu byac mbecy gu' dey ya̱ yaa de mbecy cyi. 42Wes su der yaa na, gun bi yad gaab yu nu cush cya icha̱ ―nam. 43Lat nu gabee rnii ru'm lueg la bru'ña Judas, tub yu nu bruu lat trocyup yu nu bi bloo sum ze'. Bru'ñay nu zigy mbecy, nu nuu mandzicy, nu yu nu nuu garot, nu. Yad dey par mandaar ni de yu zub lo ni de uz, nu par mandaar ni de yu nu rlyuu leey ni Ñgyoozh, nu par mandaar ni de yu bel ni de mbecy Israeel. 44Ze' Judas, yu nu bish cya ich mi, briic yu tub mod nu gad lagy dey cyu Jesuuz. Anzir bi mniiy: “Yu nu da̱w chit lo ze', yu ze' nde'. Bdu' yaa der yu nunu nap ña der yu lat nu cha nu der yu”, nay. 45Na ornu bru'ña Judas lo Jesuuz, orze' becha'y lom. Orze' nay rab yum: ―¡Masht! ―nay. Orze' bdow yu chit lom. 46Orze' bdu' la yaa dey mi nu cha nu dey mi pres. 47Tees tub yu nu zu lat ze' bloo zay mandzicy niy nañ gyid yu'ñ. Orze' pcyug yu gyidag tub moz ni yu nu riib ic de uz. 48Ze' Jesuuz nam rab mi de mbecy: ―¿Lagu yad tub der ya̱ gal nu rza tub dey tub gubaan: nu mandzicy nu garot? 49Gun de dzi la bri̱ blyu̱u̱ ni der loli' ni yu' nu driib zily mbecy Ñgyoozh, nunu wancu' yaa der ya̱ nu ñgya nu der ya̱ pres. Tees ni raac ñi par nu gyu' niñ gal nu bi pca lat riidz ni Ñgyoozh ―nam. 50Orze' dela de yu nu rsya' lom bzeeñ dey mi, bruu chu dey lom zay. 51Tees tub yu feñ gua cay ich mi. Tub la' li la negy mbish yu. Orze' bdu' yaa ga' dey yu. 52Tees yu ze' bruu za laay nañ negy ze' gush yu carer zay gyid yaagy lay. 53Gaze' nu gua nu dey Jesuuz lo yu nu riib ic de uz. Ze' byatublaazh dela de uz zub lo, nu de yu bel ni de mbecy Israeel, nu de yu nu rlyuu leey ni Ñgyoozh. 54Ze' Bed gua cay ich Jesuuz. Orze' zet zet zi'l zaab yu ich mi gashtal bri lay loli' ni uz nu riib ic ze'. Gal nañ ze' guay zub nuy de yu nu rña ze' bidz nuy dey gyi. 55De uz zub lo, nu de yu nu zu riiñ lo junt zub lo byub dey mod nu riib dey cyi too Jesuuz, gun orze' gad mod nu cut dey mi, tees rila wangad ni tub la mod ni dey. 56Gun zañ mbecy briib dey gyidza toom. Tees walab tub zi'l na riidz nu mnii dey. 57Orze' yu' mbecy wes suy briib yu gyidza toom. Orze' nay: 58―De̱ ya̱ güeñ de̱ nu nay: “Ya̱ tilya̱ yu' nu driib zily mbecy Ñgyoozh, yu' nu byaa nu yaa mbecy. Orze' nañ chon dzi shes su̱ tuuba' yu' nu gya nu walab nu yaa mbecy”, nay ―na dey. 59Tees mas ni par walab tub zi'l na riidz nu rnii dey. 60Orze' yu nu riib ic de uz wes suy lat de mbecy. Gaze' nu nay rab yu Jesuuz: ―¿A waniir lagu sac falt nir? ¿La ñuu cyi driib dey ic ru? ―nay. 61Tees Jesuuz ri zi'l zum. Rila wanii lam. Ze' bdugyi' ga' yu riib ic ze' lom. Orze' na'y rab yum: ―¿A ru nac ru Mesías, i'ñ Ñgyoozh Yon? ―nay. 62Orze' na Jesuuz rab mi yu: ―Laab ya̱ nde'. Nunu ru zac ru ya̱, biñ nu byac mbecy, zuba̱ yaa bee Ñgyoozh, biñ nu rac ricy de lo la coz ily. Nunu gzac der ya̱ yapa̱ lat za ―nam. 63Orze' yu nu riib ic de uz ze' pshaa lay shab yu par nu gabe nu walab se'ñ mniim. Gaze' nu nay: ―¿La' zir be teshtig rlagy ñi par yu ii? 64De ru güeñ ru nu rzat ziy Ñgyoozh. ¿La ñuu rnii too der? ―nay. Orze' dela dey mniiy nu rlagy ñi gat mi. 65Orze' yu' mbecy brugyi' rcoo yeñ yu lom. Nunu yu' dey psoow yu lom. Gaze' nu bdi dey mi. Orze' nay rab yum: ―¡Briic raso̱o̱! ¿Cyu bdi ru? ―rnii dey. Nunu de yu nu rña yu' ni Ñgyoozh briich yaa dey lom. 66Ze' Bed byeeñ yu loli' par gyi'. Orze' bru'ña tub criad ni yu riib ic de uz ze'. 67Ornu bzaac ñi Bed zuy rbidz yu gyi, bgüiiñ loy. Gaze' nu nañ rab ñiy: ―Ni' ru rded nur Jesuuz Nazaret, ¿shiñ? ―nañ. 68Tees Bed mniiy nu walab. Orze' nay: ―A̱' yu' lo̱ ya̱ yu ze'. Ni wagad lagya̱ la coz rniir ―nay. Gaze' nu bruuy loli' guay par gyero'. Orze' bredz la ngüel. 69Ze' criad ze' bgüiiñ loy tuuba' tir. Gaze' nu brugyi' rniiñ lo de mbecy nu yu' ze'. Orze' nañ: ―Mi re tub biñ nu bruu lat de mbecy ze' ―nañ. 70Tees Bed mnii ga'y nu walab. Na or guchi ga' sñuu nde', ze', orze' de yu nu nguaa ze' nay rab yuy: ―Wanted la nu ru bruur lat de mbecy ze', gun ru nac ru mbecy Galilea ―na dey. 71Orze' Bed mniiy nu Ñgyoozh shiñ gyicy num yu benu walab rishli rniiy. Orze' nay: ―¡Ñgyoozh rad lagy mi nu ya̱ a̱' yu' lo̱ cyu mbecy nu rnii der ze'! ―nay. 72Nunu lueg la bredza' la ngüel ru' cyup ma. Orze' byeza' la lagy Bed de riidz nu mnii Jesuuz ornu nam: “Anzir cuedz ngüel ru' cyup ma, ru niir nu a̱' yu' lor ya̱ chon tir”, nam. Byeza' lagy yu nde', orze' brugyi' ruun yu.

will be added

X\