San Marcos 12

1Orze' brugyi' rnii Jesuuz lo de mbecy nu riidz tiily. Gaze' nu nam rab mi dey: ―Tub mbecy mnuuz yu tub nac lyucy urbyay. Bdu'y lo' dub yub la ru'ñ. Orze' bzaay tub zo nu dushi̱i̱ de urbyay ze'. Nunu bzaay tub ze' nu gya bzuub yu tub yu' nu bduñañ. Gaze' nu bzeeñ yuñ yaa mbecy nu nuuz dey coz cyaal. Gaze' nu gush nez yu zay tub lugaar zet. 2Na ornu byap tiem nu dulag urbyay ze' na, orze' bzuu nez yu tub moz lo de yu nu mnuuz coz cyaal ze' par nu cha gyiy ca na de coz nu bruu lo de lyucy ze' nu bdugyiy. 3Tees de yu ze' bdu' yaa dey moz ze' bgaaz dey yu, nunu se la la briic dey niy yay. 4Orze' yu nu guni lyucy urbyay ze' bzeed yu tuuba' moz, tees ni' zi'l yu ze' tona' la shiñ bicy nu dey yu. Pcad güii dey tooy. Orze' gud güiiy bish cyay. 5Ze' bzeeda' yu nu guni lyucy urbyay ze' tuuba' moz. Orze' yu ze' biit dey yu. Ga ub ni laa bzeed yu zigy moz, nunu dela dey shiñ bicy nu dey yu. Yu'y bgaaz dey yu. Yu'y biit dey yu. 6’Saca' zir mbecy nu rcyiiñ loy. Ze' i'ñ zi'l yu nu dzi rcay zu. Por fi̱i̱ gaze' nu bzeed yu i'ñ yu. Orze' mnii tooy: “Ca gaal lagy dey lo i'ñ na”, mnii tooy. 7Na ornu bru'ña i'ñ yu ze' nu nash lyucy urbyay ze', orze' na de yu nu mnuuz coz cyaal ze' rab yu losa'y: “Yu re gyiyeeñ nuy de gyel nap ni uz yu. Yaa der chan dut nay, gun orze' gyiyeeñ gyel nap nin”, na dey. 8Orze' bdu' yaa dey yu ze'. Biit yuy. Bloo dey yu lat lyucy urbyay ze'. 9’Na ¿la coz gyicy yu nu guni lyucy urbyay ze' nu de yu nu mnuuz coz cyaal ze'? Chay cut yu dela yu nu mnuuz coz cyaal ze'. Orze' zeeñ yu lyucy urbyay ze' yaa reña' moz. 10Walab gaal gabee wacsya' der riidz ni Ñgyoozh ze' nu rniiñ: Gyita' nu mne' de biryu byac ñi gyita' nu ricy zir ñi presis. 11Nii tub coz nu ricy Ñgyoozh nunu tona' la cyit par de ub na, rniiñ, ―nam. 12Orze' ngulagy dey ngu' yaay mi, gun psa' lagy dey nu loy pcaam ornu mniim riidz tiily ze'. Tees rdzib dey lo de mbecy zigy. Orze' bruu chu dey lom. Gush nez dey zay. 13Gaze' nu bzuu nez dey la be mbecy fariseo nu la be mbecy ni Herodes par nu gyicy dey nu gadzam nu riidz gun orze' gad mod nu cu' zi dey mi. 14Bru'ña dey lom na. Gaze' nu na dey rab yum: ―Masht, de̱ ya̱ rad lagya̱ nu rniir nu rishli. Nunu ru wagyicy cuen ru de coz nu rnii mbecy, gun a̱' nac ru mbecy nu rcui, sinu rniir mod nu rlagy Ñgyoozh nu chu' den. Mnii lo de̱: ¿A gruu nap ñi nu riib na tiñ nu rbic dey ni César, yu nu riib ic de nasyoong, uti waruu nap ñi? ¿A rish na uti warish na? ―na dey. 15Tees Jesuuz gud lagy mi nu nac dey mbecy rzuu lo. Orze' nam rab mi dey: ―¿Lagu rzu der caa ze' lo̱? Da nu der tub tiñ güi̱i̱ ―nam. 16Gaze' nu gua nu dey tub tiñ lom. Orze' nam rab mi dey: ―¿Cyu nab ca lo tiñ ii nunu cyu nu la ca looñ? ―nam. Orze' na dey: ―Lo César, yu nu riib ic de nasyoong, gal nu nu lay ―na dey. 17Gaze' nu nam rab mi dey: ―Beni briic der ni César de coz nu nac niy, nunu briic der ni Ñgyoozh de coz nu nac nim ―nam. Orze' tona' la za nu ic dey. 18Gaze' nu bru'ña tub nac mbecy saduceo lom, de yu nu rnii nu wagyabañ de mbecy gut. Orze' na dey rab yum: 19―Masht, Moisees pcaay par dela den nu benu tub mbecy gat bicy yu nunu zeeñ yu mñaay, ze' sac i'ñ mi, orze' yu ze' rlagy ñi chelaay mñaa bicy yu par nu cuic yu i'ñ mi nu gyac ni bicy yu nu bi gut ze'. Orze' guul yuy. 20Bzu gagy mbecy nuy bicy yu. Orze' yu loga la pchelaay. Orze' gut yu nunu wancuic yu i'ñ mñaay. 21Orze' bicy cyup yu ze' pchelaa ga'y mi. Ze' guta'y nunu ni' zi'l wancuic yu i'ñ mi. Orze' ni' zi'l yu chon pchelaa ga'y nu biñ mñaa ze'. 22Orze' ni' zi'l za' gagy laa dey pchelaay mi. Tees ni tub la dey wancuic yu i'ñ mi. Por fi̱i̱ guta' la biñ mñaa ze'. 23Or shuub dzi nu gyabaña' de mbecy gut, ¿ca na dey ze' gac mñaay biñ mñaa ze', gun za' gagy laa dey pchelaay mi? ―na dey. 24Orze' na Jesuuz rab mi dey: ―De ru radza der gun wagyet lag der cuen de coz nu rniiñ lat riidz ni Ñgyoozh. Ni wagad lagy der la na coz nu gac gyicy mi. 25Gun ornu gyabañ de mbecy nu bi gut, orze' wachelaa ga' dey, sinu chu' dey gal nu yu' de anc nu yu' gyibaa. 26Ze' ni nu gyabañ mbecy, ¿walab gaal wacsya' der gyicy nu bzeeñ Moisees lac mod mnii nu Ñgyoozh yu ornu mniim lat tub yag nu rca gyi? Orze' nam rab mi yu: “Ya̱ naca̱ Ñgyoozh ni Abraham, naca̱ Ñgyoozh ni Isaac, nunu naca̱ Ñgyoozh ni Jacob”, nam. 27¡Gun Ñgyoozh a̱' nac mi Ñgyoozh ni mbecy nu bya' lo la, sinu nac mi Ñgyoozh ni mbecy nu mbañ, mas bi gut yu! Nde' nu de ru radza der ―na Jesuuz. 28Orze' bru'ña tub mbecy nu rlyuu leey ni Ñgyoozh. Yu ze' güeñ yu de riidz nu bee Jesuuz nu de mbecy saduceo nunu bdu' cuen yu nu nap mniim. Orze' nay rab yum: ―¿Ca na leey ni Ñgyoozh nac ñii leey zub lo zir? ―nay. 29Orze' na Jesuuz rab mi yu: ―Leey nu zub lo zir, nde': “De mbecy Israeel nap bzuub gyidag der. Ñgyoozh, Shuaan na, tub zi lam nac mi Ñgyoozh. 30Orze' pca der Shuaan ru, biñ nu nac Ñgyoozh nir nu dutuub la lardoor, nu dela gyel mbañ nir, nu dutuub la shcab nir, nu dela fers nir.” 31Nde' nu loga la. Ze' leey cyup nde': “Pca der losa'r gal nu rcar ub ru.” Saca' zir leey nu zily zir nac par cyup leey ze' ―na Jesuuz. 32Orze' mbecy ze' nay rab yum: ―Rishli, masht, dzi nap mniir nu zu tub zi Ñgyoozh. Sac cyu' zir Ñgyoozh. 33Nunu nu caan Ñgyoozh nu dutuub la lardoon, nu dutuub la shcab nin, nu dela gyel mbañ nin, nu dela fers nin, nunu caan losa'n gal nu rcaan ub na. De nde' ricy zir ñi presis gaze' de gun nu rzaay na lo Ñgyoozh gal nu dela de' zir gun nu ricy na lom ―nay. 34Ornu güeñ Jesuuz nu dzi nap mniiy gal nu rnii mbecy nu nap rad lagy, orze' nam rab mi yu: ―Ru walaba' nu dzi ricy falt par nu gyub ic Ñgyoozh ru ―nam. Orze' ni tuba' la mbecy wangash lagy yu nu ngugyi'y lom. 35Lat nu blyuu Jesuuz loli' ni yu' nu driib zily mbecy Ñgyoozh, orze' nam rab mi dey: ―¿Lagu rnii de yu nu rlyuu leey ni Ñgyoozh nu Mesías, biñ nu ca lo cuen nu co mbañ mbecy, gruum lat nez Dabi? 36Gun Espiriit Yon ni Ñgyoozh pcaam uub la Dabi nu niiy ornu nay: Ñgyoozh nam rab mi Shuaan na: “Gzub ru lugaar ni mbecy nu gya zir zu, par yaa be̱e̱ ii gashtal gyicy la̱ nu gyicy ru gan losa' yuur”, nam, na Dabi. 37Orze' ub la Dabi mniiy nu nac mi Shuaan yu. ¿Walab gaal gac gruu Mesías lat nez Dabi? ―na Jesuuz. Orze' dela de mbecy zigy yet lagy dey rzuub gyidag yu coz nu rniim. 38Lat nu rlyuum ni dey, orze' nam: ―Cuidad der nu de mbecy nu rlyuu leey ni Ñgyoozh. Gun dey re yet lagy dey chesay nu shab duñ yu, nunu yet lagy dey nu rca lagy mbecy loy ornu rnii nu dey yu lat yagyi'. 39Nunu gusht ni dey nu gzub yu lo yashily ni mbecy nu ricy ñi presis nañ yu' nu rsya' mbecy riidz ni Ñgyoozh, nunu yet lagy dey lugaar ni mbecy lily lat sa'. 40Tees rboo dey yu' byud gal nu gyel nap nim. Orze' par nu rsoow su dey lo de coz a̱' nap nu ricy nu dey byud ze', chi rnii nu dey Ñgyoozh. Nde' nu dey ze' cashtig ily zir gad ni dey ―nam. 41Jesuuz zub mi ro' ni yu' nu driib zily mbecy Ñgyoozh, gaab ze' nu ca alcansi nu rgu' dey gun. Zub mi rgüiim lo de mbecy nu rgu' tiñ nañ alcansi ze'. Orze' zigy de guani'ñ nu dru'ña ze' sheñ tiñ rgu' dey. 42Orze' bru'ña tub byud nu dzi gyel zi zu. Pshet lag mi cyup sentab mi' nañ alcansi ze', tiñ nu dzi a̱' sac. 43Orze' bredz Jesuuz de yu nu rsya' lom. Gaze' nu nam rab mi dey: ―Rishli gaal coz ily zir bicy byud re gaze' dela de' zir mbecy nu rgu' tiñ nañ alcansi ii. 44Gun dela de guani'ñ, de coz nu brusub zi'l ni dey briic yu. Ze' byud re gyel zi zum. Briic mi dela tiñ nim. Dela tiñ nu rcyiiñ nim briic mi ―nam rab mi dey.

will be added

X\