San Marcos 1

1Nu loga la ni de riidz nu sac nu rnii de coz ni Jesucrisht, i'ñ Ñgyoozh. 2Isaías, yu nu mnii por cuen ni Ñgyoozh nil bi pcaay: Ñgyoozh nam rab mi Mesías: Ya̱ zuu neza̱ tub mbecy nu cha nuy raso̱o̱ ne̱. Yu ze' cha gay lo ru. 3Zaab ti' tub mbecy rbishtiy tub lugaar ub zi. Orze' nay: “Nañ lardoo den nañ gal nu na tub nez. Orze' bicy nap der nez ze' par ornu cyid Shuaan den. Pshaal der tub nez nu li par nu ded mi”, nay. 4Orze' mbecy nu bzuu nez Ñgyoozh ze', nde' Waa nu briib nis mbecy. Pcyiiñ yu tub lugaar ub zi nunu blyuuy ni de mbecy nu rlagy ñi ne' dey dela cyi nu ricy yu, nunu gzu nis dey. Orze' gyicy sulagy Ñgyoozh de cyi dey. 5Orze' zigy mbecy nu yu' lo yu ni Judea nunu zigy de mbecy nu yu' Jerusaleeng rza dey loy nu rzuub gyidag dey de riidz nu rniiy. Na ornu blazh pshuub ru' dey dela cyi nu ricy dey na, orze' Waa briic yu nu wi nis dey gyoow Jordaang. 6Na shab Waa, nde' byaañ nu gyich camey. Ze' nañ yu ri tub sinch gyid. Coz nu bdow yu, nde' gushagy nu dziñ doo ni bez gyish. 7Orze' nay rab yu de mbecy: ―Par lo ya̱ bi yad la tuuba' mbecy nu gac gyicy coz ily zir par ya̱. Ya̱ ni wayapa̱ nu shaagya̱ gyid nu zub gyid lab mi. 8Ya̱ rica̱ nu zu nis der nu nis, tees mi ze' cuic mi Espiriit Yon ni der ―na Waa. 9Orze' guc ñi tiem ze' nu Jesuuz bruum Nazaret, tub gyedz nu ri lo de yu ni Galilea. Zam lo Waa gal ru' gyoow Jordaang. Orze' Waa briic yu nu zu nis mi gyoow ze'. 10Orze' cuanzir nu bruum lo nis, bzaac mi byaal baa. Orze' Espiriit Yon ni Ñgyoozh gal nu na tub begy nam bet mi gusub mi toom. 11Orze' zaab ti' Ñgyoozh gal gyibaa rniim. Orze' nam: ―Ru nac ru i'ña̱, biñ nu tona' la rca̱, nunu tona' la yet lagya̱ ―nam. 12Gaze' nu lueg la Espiriit Yon ni Ñgyoozh gua num Jesuuz tub lugaar ub zi. 13Orze' cyuu dzi brim lugaar ub zi ze'. Ze' bicy nuras preb mi. Ze' brim lat de bañ gyish. Tees de anc bzu bich dey nu nac mi. 14Na despuees nu guti Waa yu' gyiib na, Jesuuz bruum lo yu ni Judea, zam par lo yu ni Galilea nu shaal mi riidz nu sac ni Ñgyoozh. 15Orze' nam: ―Na bi pshuub dzi nunu sñuu ga cyid gyel gubier ni Ñgyoozh. Orze' mne' der dela cyi nu ricy ru, nunu bicy cup der consuel lo de riidz nu sac ze' ―nam. 16Na tub dzi na bded mi ru' nisyudoo ni Galilea. Orze' bzaac mi Simo̱o̱ nu Ndrees bicy yu. Yu' dey nu driy gyish nu rub bel lo nisyudoo, gun ruplaa dey nac yu mbecy rub bel. 17Orze' na Jesuuz rab mi dey: ―Da ca der icha̱. Orze' ya̱ gyicya̱ nu gal nu rub der bel, ni' zi'l te' der mbecy gun orze' cyid ca dey icha̱ ―nam. 18Orze' lueg la bzeeñ dey gyish niy za cay ich mi. 19Na ornu bza ga'm sñuu miiñ par lo, ze' bzaac mi Santiag, i'ñ Zebedeo, nu bicy yu Waa yu' dey nañ barc. Laaba' gyish nu rub bel ricy nap dey. 20Laab bzaac lam dey bredza' lam yu. Orze' lueg la bzeeñ dey uz yu Zebedeo nañ barc nu de moz niy. Orze' za ca la dey ich mi. 21Gaze' nu bri num dey tub gyedz nu la Capernaum. Sab, dzi nu rzu lagy mbecy, gu' num dey nañ yu' nu rsya' de mbecy Israeel riidz ni Ñgyoozh. 22Tona' la za nu ic dey de coz nu rlyuum, gun rlyuum ni dey gal nu rlyuu tub mbecy nu riib ic za' la, walab gal nu ricy de yu nu rlyuu leey ni Ñgyoozh. 23Na nañ yu' nu rsya' de mbecy riidz ni Ñgyoozh ze', ri tub mbecy nu bicy ni nuras. Orze' rbish tiy. 24Orze' nay rab yu Jesuuz: ―¿Lagu yad ru lat de̱ Jesuuz Nazaret? ¿A yad ru nu za' lor de̱ ya̱? Ya̱ rad lagya̱ nu ru nac ru mbecy yon ni Ñgyoozh ―nay rab yu Jesuuz. 25Orze' Jesuuz bdza'm ni nuras ze'. Orze' nam rab mi yu: ―Dzi chel nunu bruu chu lo yu ii ―nam. 26Orze' nuras ze' bicy yu nu bicy ñi bi ni mbecy ze'. Nunu rbish tiy. Gaze' nu bruu chuy loy. 27Orze' dela de mbecy ze' za nu la ic dey nunu brugyi' rnii dey lo losa'y: ―¿Lac yaruu nii? Rlyuuy tub leey cub, nunu rlyuuy gal nu ricy mbecy nu riib ic za' la. ¡Gaza' nuras ricy yu mandaar, nunu rzuub gyidag dey niy! ―na dey. 28Orze' lueg la brush las de riidz ni de coz nu bicy Jesuuz dela lugaar nu yu' gaab ga Galilea. 29Cuanzir bruum nañ yu' nu rsya' mbecy riidz ni Ñgyoozh ze', orze' guam yu' Simo̱o̱ nu Ndrees. Gua num Santiag nu Waa. 30Tees ñaa gud Simo̱o̱ riib rat mi. Pcaañ zig nim. Cuanzir bru'ña Jesuuz, mnii dey lom nu rat mi. 31Gaze' nu gua Jesuuz bdu' yaam yaa biñ rat ze' pshes sum mi. Orze' lueg la bruu zigy mi, nunu brugyi' rzu bich mi nu nac dey. 32Na ornu bi za doo, or nu bi yecheñ, orze' de mbecy bru'ña nu dey dela mbecy rat nunu dela mbecy nu bicy ni nuras lo Jesuuz. 33Nunu dela mbecy gyedz byatublaazh dey ro' Simo̱o̱ nu Ndrees. 34Orze' zigy mbecy bicy yac mi, nunu zañ lo güii bicy mi nu mnit ni dey. Nunu bloo chum zañ nuras. Tees wansaan mi nu nii de nuras, gun yu' lo dey mi. 35Na tuuba' dzi, or napor, gabee caas ru' zu, orze' weshtem. Bruum lat gyedz. Zam tub lugaar ub zi nu nii num Ñgyoozh. 36Ze' Simo̱o̱ nu de losa'y gua yub dey mi. 37Na ornu byad mi na, orze' na dey rab yum: ―Dela mbecy ryub dey ru ―na dey. 38Orze' nam rab mi dey: ―Yaa chan de' zir gyedz nu yu' gaab ga, gun orze' shaal na de riidz nu bruu lo Ñgyoozh, gun par nde' yapa̱ ―nam. 39Orze' gusam dela gyedz nu yu' Galilea. Pshaal mi de riidz nu bruu lo Ñgyoozh nañ de yu' nu rsya' de mbecy riidz ni Ñgyoozh. Nunu bloo chum zañ nuras nu bicy ni mbecy. 40Orze' bru'ña tub mbecy nu rat tub lo gyedz nu la lepra. Orze' gusu tib yu lo Jesuuz bdiiñ yu lom nu gyicy yac mi yu. Gaze' nu nay rab yum: ―Ru gac gyicy yac ru ya̱ benu rlagy ru ―nay. 41Orze' Jesuuz gushni lagy mi yu. Orze' gul yaam yu. Gaze' nu nam rab mi yu: ―Rlagya̱. ¡Na byac ru! ―nam rab mi yu. 42Orze' lueg la mnit la gyedz ze', nunu byacyudz dutuub la cuerp niy. 43Orze' fert pcach mi ru'y. Gaze' nu nam rab mi yu: 44―Na ne̱e̱ lor nu cue' la niir lo ni tub la mbecy, sinu gua lo uz cha lyuur ub ru loy. Orze' cuic ru gun nu rlagy ñi par nu gyacaacy ru par lo Ñgyoozh gal nu rniiñ lo leey ni Moisees, gun orze' gad lagy dela mbecy nu bi byac ru ni güii nir ―nam. 45Tees yu ze' guay mniiy lo ti cyu' la mbecy. Orze' brush las riidz ze' gal wangaca' la chu'm nu suelt la lat gyedz. Ze' ngush zi'l gusam. Tees de mbecy nu bruu gal reñ ga la lugaar dru'ña ru' dey lom.

will be added

X\