San Lucas 9

1Orze' Jesuuz bredz mi trocyup de yu nu rsya' lom nu gyatublaazh dey lom. Orze' briic mi rishbeey nu co chu dey nuras, nunu gyicy yac dey mbecy rat. Nunu bicy mi nu cyiiñ dey nu gyicy dey ñi. 2Orze' bzuu nez mi dey nu cha dey cha shaal yu de riidz ni gyel gubier ni Ñgyoozh, nunu par nu gyicy yac dey de mbecy rat. 3Orze' nam rab mi dey: ―Cue' cha nu der ni tub la coz nu cyiiñ ni der par nez. Cue' cha nu der yangar. Cue' cha nu der moraal. Ni cue' cha nu der gyit. Ni cue' cha nu der tiñ. Shab nu zu zi'l der cha nur. Cue' cha nu der reña' shab ru. 4Ca zi'l ze' nu chu' der nañ yu', orze' ze' cyiiñ der gashtal gruu la der lugaar ze'. 5Ca zi'l ze' nu washet ic dey nu chu' der nañ yu', orze' ornu gruu der lugaar ze', orze' cyib der yu gyedz nu ta' gyid lab ru par nu gabe nu a̱' nap bicy dey ―nam. 6Orze' gush nez dey zay de lugaar nu yu' gaab ga ze'. Pshaal dey riidz ni Ñgyoozh, nunu bicy yac dey de mbecy rat. 7Orze' rey Herodes güeñ yu coz nu guc nu nac Jesuuz. Orze' tona' la pcan shcab niy. Gun yu' mbecy nu rniiy nu Waa nu driib nis mbecy byabañ yu. 8Ze' yu' ga'y rniiy nu yu ze' Elías, yu nu mnii por cuen ni Ñgyoozh. Ze' yu' ga' dey rniiy nu yu ze' ca zi na de yu nu mnii por cuen ni Ñgyoozh nu gu' gulas. Na byabañ yu, rnii dey. 9Tees Herodes nay: ―Gunca laab ya̱ bicya̱ mandaar nu pcyug dey too Waa. ¿Ze' cyu mbecy nac yu ze' beni? Ya̱ reña̱ nu rnii mbecy zañ coz nu ricy yu ―nay. Nde' nu Herodes byub yu zañ mod nu gac zac yu Jesuuz. 10Na ornu bi bri de yu nu rsya' lom na, orze' mnii dey lom de coz nu bicy dey. Gaze' nu gua nu reñ mi dey tub gyedz nu la Betsaida. 11Na ornu gud lagy de mbecy zigy na, orze' za ca dey ich mi. Orze' Jesuuz pcueez mi dey. Orze' mniim riidz ni gyel gubier ni Ñgyoozh lo dey. Nunu bicy yac mi zañ mbecy rat. 12Na ornu bi rdze na, orze' de trocyup de yu nu rsya' lom becha' dey lom. Orze' na dey rab yum: ―Bzuu nez de mbecy ii nu cha yub dey posad niy, nunu cha yub dey coz nu goy. Cha dey de gyedz gal nu de ranch nu yu' gaab ga ii, gun ii tub lugaar ub zi ―na dey. 13Orze' na Jesuuz rab mi dey: ―Briic de ru coz nu gow dey ―nam. Orze' na dey rab yum: ―A̱' ricy cup de̱ sheñ. Nomaas ricy cup de̱ gaay zi gyishtily nu cyup bel. ¿A rlagy ru nu cha̱ zi̱ zir de̱ de coz nu gow dey? ―na dey. 14Gun nac gaay miily de mbecy ze'. Orze' na ga' Jesuuz rab mi dey: ―Mnii der lo de mbecy nu gzub dey bee cyaal gaynal ga dey tub ga se' ―nam. 15Orze' ni bicy dey. Orze' de mbecy gucua dey. 16Orze' bdu' yaam gaay gyishtily ze' nu cyup bel ze'. Orze' bgüiim par baa nunu briic mi gras ni Ñgyoozh nu nac ñii. Gaze' nu blew mi ñii. Nunu briica'm ñii ni de yu nu rsya' lom nu cyez dey ni de mbecy zigy. 17Orze' dela mbecy bdow gyel la dey. Nunu ii pte' dey trocyup ru' chicyiw de coz nguzh nu brusub ze'. 18Tub dzi bzub Jesuuz ub zi lam mnii num Ñgyoozh. Nomaas de yu nu rsya' lom yu' nu dey mi. Orze' nam rab mi dey: ―¿Cyu rnii mbecy nu nac ya̱? ―nam. 19Orze' na dey: ―Yu' mbecy nu rniiy nu ru Waa nu driib nis mbecy. Ze' yu' ga' dey rniiy nu ru Elías. Ze' yu' ga' dey rniiy nu ru tub yu nu mnii por cuen ni Ñgyoozh gulas. Ze' na byabañ yu, rnii dey ―nay. 20Orze' nam rab mi dey: ―Ze' de ru, ¿cyu rnii der nu naca̱? ―nam. Orze' na Bed rab yum: ―Ru nac ru Mesías, biñ nu bzuu nez Ñgyoozh nu cyid ―nay. 21Tees Jesuuz tona' la nap bdu'm riiñ yaa dey nu cue' nii dey de riidz ze' lo ni tub la mbecy. 22Gaze' nu nam rab mi dey: ―Ya̱, biñ nu byac mbecy, rlagy ñi nu zac zi̱ zañ lo coz deet. Nunu de yu bel ni de mbecy Israeel, nu de uz zub lo, nu de yu nu rlyuu leey ni Ñgyoozh gne' dey ya̱. Orze' cut mbecy ya̱. Orze' dzi chon, orze' gyabaña̱ ―nam rab mi de yu nu rsya' lom. 23Orze' na Jesuuz rab mi dela mbecy: ―Benu ca na mbecy rlagy yu nu gac yu mbecy nu rsya' lo̱, orze' rlagy ñi nu cue' gyicy cuen yu coz nu rlagy ub yu. Nunu rlagy ñi nu shet ic yu nu zac ziy de dzi la nu nac ya̱. Orze' rlagy ñi nu gyicy yu gal nu rlagya̱. 24Gun yu nu rlagy co nap ub, yu ze' gnit loy. Tees yu nu nit lo nu nac ya̱, yu ze' yu nu rishli gruu mbañ. 25¿Gun la rusub ni mbecy, benu gyicy yu gan dela coz ni gyishlombecy, ze' ub yu gnit loy? 26Tees cyu zi'l mbecy nu gat lo nu nac ya̱, nunu gat loo ga'y nu nac de riidz nu rne̱e̱ lo dey, orze' ni' ya̱, biñ nu byac mbecy, gat lo̱ nu nac de yu ze', ornu shuub dzi nu yapa̱ nu gyel lily ne̱, gal nu gyel lily ni Ñgyoozh uza̱, gal nu gyel lily ni de anc yon. 27Gun ya̱ rishli rne̱e̱ lo der nu la be de mbecy nu yu' lat der ii na wat dey gashtal zac la dey gyel lily ni Ñgyoozh ―nam. 28Na ornu bded shuñ dzi na, orze' Jesuuz gua nu reñ mi Bed, nu Santiag, nu Waa. Orze' gup mi num dey too tub bicy nu nii num Ñgyoozh. 29Na lat nu rnii num Ñgyoozh na, orze' bdza nu na lom. Nunu shab mi byacaacy ñi. Ryal lañ tanta' nu caacy ñi. 30Orze' sij la bruu zac cyup mbecy bee nu dey mi riidz. De yu ze' Moisees gal nu Elías. 31Nunu bzu yaa lo dela dey. Orze' bee nu dey Jesuuz riidz nu lac mod gat mi Jerusaleeng. 32Orze' lat ze' Bed nu de' zir de losa'y gush pcaal dey. Tees orze' briish dey yaa. Nunu bzaac dey gyel lily ni Jesuuz gal nu cyup de yu nu yu' num ze'. 33Ornu bruu chu cyup de yu ze' lo Jesuuz, orze' Bed nay rab yum: ―¡Masht, dzi ga nap nu yu̱' de̱ ii! Na za̱a̱ de̱ chon ramad ni der: tub par ru, tuuba' par Moisees, nu tuuba' par Elías ―nay. Gun Bed wangad lagy yu la coz niiy. 34Na lat nu rniiy na, orze' bruu zac tub za. Orze' psoow ñi dey. Orze' tona' la gudzib dey ornu psoow za ze' dey. 35Orze' lat za ze' zaab ti' mbecy nu rnii. Orze' nam: ―Mi ii i'ña̱ nu bzu chu̱. Bzuub gyidag der nim ―nam. 36Na ornu bi bded nu güeñ dey nu mnii mbecy ze' na, orze' bzaac dey Jesuuz ub zi lam zum. Orze' guchu' ri la dey. Orze' wanii la dey lo ni tub la mbecy de coz nu bzaac dey. 37Na or bza' yu tuuba' dzi na, orze' bruum par too bicy, bet mi par gyi'. Orze' bruu zac zigy mbecy nu gua cheel dey mi. 38Orze' lat de mbecy zigy ze' ri tub mbecy. Orze' ye la rbish tiy. Orze' nay: ―Masht, gyicy ru tub faboor nur ya̱ nu güiir i'ña̱, gun tub zi yu ii ne̱ zuy. 39Gun nuras rgu' yaay yu, nunu ricy yu nu rbish tiy. Nunu ii ricy yu nu ricy ñi bi niy. Nunu driib bdziñ ru'y. Tona' la shiñ ricy nuy yu, nunu walagy yu nu ruu chuy loy ne̱. 40Ya̱ mnishba̱a̱ lo de yu nu rsya' lor nu co chu dey yu, tees wangac ni dey ―nay. 41Orze' na Jesuuz rab mi dey: ―¡A der mbecy nu yu' na! ¡Dzi ga wagyicy cup der consuel lo̱! ¡Dzi ga mnu shcab ni der! ¿La' zir be tiem rlagy ñi nu chesa̱ du̱ der? ¿La' zir be tiem rlagy ñi nu gagye̱ lo der? ―nam. Gaze' nu nam rab mi uz yu nguzh ze': ―Da nu yu nguzh nir lo̱ ―nam. 42Na ornu yu nguzh ze' zay lo Jesuuz na, orze' nuras ze' mne'y yu nguzh ze' lo yu. Orze' bicy yu nu ricya'ñ bi niy. Tees Jesuuz bdza'm ni nuras ze'. Orze' bicy yac mi yu nguzh ze'. Orze' byabic mi yu ni uz yu. 43Orze' dela mbecy tona' la za nu ic dey nu nac de coz ily nu ricy Ñgyoozh. Lat nu yu' dey za nu ic yu nu nac de coz nu bicy mi, orze' nam rab mi de yu nu rsya' lom: 44―Bzuub gyidag der coz nu ne̱e̱ lo der, nunu cue' nit lagy der ñii. Ya̱, biñ nu byac mbecy, gu' dey ya̱ yaa de mbecy ―nam. 45Tees de yu ze' wangyet lag dey cuen de coz nu mniim. Gun Ñgyoozh wansaan mi nu ñgyet lag dey cuen. Nunu gudzib dey nu ñgugyi'y lom lac yaruu de riidz ze'. 46Na de yu nu rsya' lom brugyi' nu ro zi dey riidz ben ca na dey gyac yu yu nu gya zir zu. 47Na ornu gud lagy Jesuuz nu ni mnii dey na, orze' bdu' yaam tub yu nguzh bzum yu lat dey. 48Orze' nam rab mi dey: ―Cyu zi'l yu nu shet ic nu gac tub mbecy nu na gal nu na yu nguzh ii nu nac ya̱, orze' ni' zi'l shet ic yu nu gac nuy ya̱. Nunu yu nu shet ic nu gac nu ya̱, walab ne̱ ya̱ zi'l shet ic yu nu gac nuy, sinu ni' zi'l shet ic yu nu gac nuy Ñgyoozh, biñ nu bzuu nez ya̱. Gun mbecy nu gash zir zu lat de ru, yu ze' yu nu ricy zir ñi presis ―nam. 49Orze' na Waa rab yum: ―Masht, de̱ ya̱ bzaac de̱ tub mbecy nu bloo chuy nuras nu nac rishbeey nu bruu lor, tees mne̱e̱ de̱ nu cue' nu ni gyicy yu, gun wachesa nuy de ub na ―nay. 50Orze' na Jesuuz rab mi yu: ―Cue' ca der niy, gun yu nu wacha contr nin, yu ze' yu nu rza faboor nin ―nam. 51Na ornu bi rgaab nu shuub dzi nu chup Jesuuz gyibaa, orze' Jesuuz bi zuu lam ca na nu zum. Orze' gush nez mi zam par Jerusaleeng. 52Orze' bzuu nez mi mbecy nu cha ga dey lom nu cha nu dey raso̱o̱ tub lugaar ni Samaria. Gun orze' gzu lily dey ornu grim. 53Tees de mbecy Samaria wangalagy dey nu cuez mi lat dey, gun gud lagy dey nu par Jerusaleeng rsaap mi nu zam. 54Na ornu bzaac Santiag nu Waa nu ni ricy dey na, orze' na dey: ―Shuaana̱, ¿a walagy ru gyicy na mandaar nu gyet gyi nu gruuñ baa, gun orze' gnit loñ de yu ze'? ―na dey. 55Orze' bish cya Jesuuz bdza'm ni dey. 56Orze' lueg la za dey tuuba' gyedz. 57Na lat nu zaab za dem nez na, orze' na tub mbecy rab yum: ―Shuaana̱, ya̱ rlagya̱ cha du̱ ru ca zi'l ze' nu char ―nay. 58Orze' na ga' Jesuuz rab mi yu: ―De bez ricy cup ma blyuu ni ma. Ze' de chigyiñ ricy cup ma teez ma. Tees ya̱, biñ nu byac mbecy, a̱' ricy cupa̱ ni tub lugaar mi' par nu gabisha̱ zu lagya̱ ―nam. 59Orze' Jesuuz nam rab mi tuuba'y: ―Da ca icha̱ ―nam. Orze' yu ze' nay rab yum: ―Shuaana̱, ¿a wazaan ru leza̱ gashtal gat uza̱? Orze' gaze' nu cha ca̱ ich ru ―nay. 60Orze' na Jesuuz rab mi yu: ―Bzaan nde' par de mbecy nu na gal nu na mbecy gut nu cach dey losa' gut yu. Ze' ru char cha shaal ru riidz ni gyel gubier ni Ñgyoozh ―nam. 61Orze' tuuba'y nay rab yum: ―Shuaana̱, ya̱ rlagya̱ cha ca̱ ich ru. Nomaas ¿a wazaan ru nu gya̱ yu̱' gya̱ ne̱e̱ du̱ de famil ne̱ ñgyoozh? ―nay. 62Orze' na Jesuuz rab mi yu: ―Yu nu bi driib yaa ich yaa arad, ze' despuees cush cyay güiiy par ich yu, orze' yu ze' wac chu'y ze' nu riib ic Ñgyoozh ―nam.

will be added

X\