San Lucas 8

1Na ornu bded de nu nde' na, orze' Jesuuz gusam de gyedz, gal nu de ranch. Orze' pshaal mi de riidz nu sac ni gyel gubier ni Ñgyoozh. Nunu de trocyup de aposht gusa nu dey mi. 2Nunu ni' la be de biñ mñaa gusa num mi. Lat ze' ri Li nu bruu tub gyedz nu la Magadán. Jesuuz bloo chum gagy nuras lo mi ze'. 3Nunu ni' zi'l ri Wan, mñaa Cuza. Cuza yu ze' yu nu riib ic asunt ni Herodes. Nunu ri ga' Susan lat ze', gal nu zañ zir biñ mñaa. Orze' de biñ mñaa ze' rlocyuub dem Jesuuz, gal nu de yu nu rsya' lom. Rlocyuub dem Jesuuz nu nac de coz nu rad ni dem. 4Tona' la zañ mbecy bruu dey ledz yu za dey lo Jesuuz. Orze' tona' la mbecy zigy byatublaazh dey lom. Orze' brugyi' rniim nu riidz tiily. Orze' nam: 5―Tub mbecy bruuy zay za nuuz yu mbigy. Lat nu rtich yu de mbigy ze', yu'ñ bet lag ñi ru' gyernez. Orze' mbecy bded yu bzuub gyi'y tooñ. Nunu bru'ña chigyiñ bdow ma ñii. 6Ze' yu' ga'ñ bet lag ñi lo yu las ru' nu ri gyita' par nañ. Orze' ornu briib ñi na, orze' guwach ñi, gun a̱' lyup lo yu. 7Ze' yu' ga'ñ bet lag ñi lat gyech. Orze' gyech tublaazh la guuly ñi nu de ya mni ze'. Orze' pcyiig ñi de ya mni ze'. 8Ze' yu' ga'ñ bet lag ñi lo yu nap. Briib ñi nunu guuly ñi. Orze' tona' la cosech nap briic ñi. Gashtal tub gaynal mbigy briic tub ga mbigy nu bdunuuz ―nam. Orze' na ga'm: ―¡Mbecy nu zub gyidag rlagy ñi gyicy yu nu gyet lag yu cuen! ―nam. 9Orze' de yu nu rsya' lom bdugyi' dey lom lac yaruu de riidz tiily ze'. 10Gaze' nu nam rab mi dey: ―Ñgyoozh briic mi nu gad lagy de ru de coz ni gyel gubier nim, de coz nu wagad lagy mbecy gulas. Ze' de' zir mbecy ya̱ shaala̱ lo dey nu riidz tiily. Gun orze' mas zac dey, tees wayu' loy, nunu mas gyeñ dey, tees wayet lag dey cuen ―nam. 11Orze' nam: ―Orze' na ya̱ ne̱e̱ lo der lac yaruu de riidz tiily ze'. Orze' de mbigy ze' nañ gal na riidz ni Ñgyoozh. 12Orze' de mbigy nu bet lag ru' gyernez, nde' nañ gal nu na mbecy nu reñ de riidz ni gyel gubier ni Ñgyoozh. Rnii mbecy riidz ze' lo dey, tees orze' dru'ña nuras rbooy de riidz ze' nañ lardoo dey, gun orze' cue' nu cheña lagy dey niñ. Orze' cue' nu gruu mbañ dey. 13Ze' mbigy nu bet lag lo yu las ru' nu ri gyita' par nañ, nde' nañ gal nu na de mbecy nu reñ de riidz ze'. Orze' lueg la “O” rniiy nunu yet lagy yu. Tees a̱' fert yu par nu wacshet riidz ze' sheñ lyuñ nañ lardooy. Orze' la be zi'l dzi ragyeey. Tees ornu shuub dzi nu gac preb dey, orze' wagyee dey. 14Ze' de mbigy nu bet lag lat de ya gyech ze', nde' nañ gal nu na mbecy nu rzuub gyidag de riidz ze'. Tees como mbecy ze' dzi zuy shcab ni de coz ni gyishlombecy, nunu como rlagy yu gyicy yu gusht niy, orze' de nde' rsoow ñi lo de riidz ze'. Orze' nde' nu wacuic riidz ze' cosech nañ lardoo mbecy ze'. 15Ze' de mbigy nu bet lag lo yu nap ze', nde' mbecy nu rzuub gyidag de riidz ze' nu lardooy. Orze' bicy yac dey niñ. Orze' briic ñi cosech nap nañ lardoo dey ―nam. 16Orze' na ga' Jesuuz: ―Ni tub la mbecy wacaa dey gyi tub candiil nu riiy ñi nañ tub la coz, o nañ tub nuun, sinu zuub dey ñi se'ñ, gun orze' cuic ñi yaa lo de yu nu chu' nañ yu'. 17Ni' zi'l rac nu de riidz nu bruu lo Ñgyoozh. Gun dela de riidz ngach nim gyicy mi nu gad lagy de mbecy, nunu dela de riidz nu wagad lagy dey, shaal mi ñii lo dey. 18’Orze' nap bzuub gyidag der, gun yu nu ricy cup sheñ, sheñ zir gad niy. Ze' yu nu sac ni, gashtal coz miiñ nu rnii tooy nu gyicy cup yu gruuñ niy ―nam. 19Orze' bru'ña ñaam, nu de bicy mi. Tees wangac ñgyecha' dey lo Jesuuz, gun dzi yu' mbecy lom. 20Orze' tub mbecy byooy rishlo Jesuuz. Orze' nay rab yum: ―Ñaar nu de bicy ru yu' dey gashtal ich yu' re, nunu rlagy dey zac yu ru ―nay. 21Orze' na Jesuuz rab mi yu nu byoo rishlom ze': ―Yu nu reñ de riidz ni Ñgyoozh nunu “O” rniiy nu rzuub gyidag yuñ, orze' de yu ze' nac dey bicya̱ nu ña̱a̱ ―nam. 22Tub dzi Jesuuz gu'm nañ tub barc nu de yu nu rsya' lom. Orze' nam rab mi dey: ―Yaa der chan gal naa tub la' ga' dzu ru' nisyudoo ―nam. Orze' gu' dey nañ barc ze' za dey. 23Na lat nu za dey na, orze' Jesuuz gugyit mi nas mi. Orze' sij la bru'ña tub gyey bi ily. Orze' brugyi' nu rzu' nis nañ barc ze'. Orze' byarishdzidz nañ barc ze'. 24Gaze' nu gua cueeñ dey mi. Orze' na dey rab yum: ―¡Masht, masht, bi rnit lo den lo nis! ―na dey. Gaze' nu weshtem. Gaze' nu bicy mi mandaar lo bi, nu lo de nguuly lo nis. Orze' guri bi. Nunu se ri zu la byac. 25Gaze' nu nam rab mi de yu nu rsya' lom: ―¿La bzaac der? ¿Lagu wagyicy cup der consuel lo̱? ―nam. Orze' tona' la za nu ic dey nunu gudzib dey. Orze' na dey rab yu losa'y: ―¿Ze' cyu mbecy nac mi ii? Mi ii ricy mi mandaar mas gashtal lo bi nu lo nisyudoo, nunu rzuub gyidag ñi nim ―na dey. 26Orze' bri dem tub la' ga' ru' nisyudoo, tub lugaar nu la Gerasa nu ri par lo Galilea. 27Na laab bruu la Jesuuz nañ barc na, orze' bruu za la tub mbecy yad yu. Bruuy par lat gyedz. Yu ze' tub mbecy nu bicy ni nuras. Orze' becha'y lo Jesuuz. Nunu dzi bi rac tiem nu wacsuy shab yu. Nunu walab nañ yu' rcyiiñ yu, sinu lat de blyuu nu rcach dey añ rcyiiñ yu. 28Na ornu bzaac yu Jesuuz, orze' gusu tib yu lom. Orze' dub ru' la nuras ze' rbish tiy. Gaze' nu nay rab yu Jesuuz: ―¿La ryub ru yad ru lo̱ Jesuuz, i'ñ Ñgyoozh, biñ nu zily zir nac? ¡Ya̱ rnishba̱a̱ lor nu cue' shet zir ya̱! ―nay. 29Ni mniiy, gun Jesuuz mniim lo nuras ze' nu gruchuy lo mbecy ze'. Yad nu tona' la guzañ ña'n nu ni ricy nuy mbecy ze'. Nunu de mbecy rcyiig dey gyi'y nu yaay nu caden. Tees rshi'ñ rshi'ñ lay caden. Orze' nuras ze' ricy yu nu rza mbecy ze' lugaar ub zi. 30Orze' na Jesuuz rab mi nuras ze': ―¿La lar? ―nam. Gaze' nu nay rab yum: ―Ya̱ la̱ bee miily ―nay. Ni mniiy gun dzi zigy yu bicy niy mbecy ze'. 31Orze' de nuras ze' mnishbaa dey lom nu cue' zeed mi dey ze' nu cow. 32Gun lugaar ze' rded row tub nac cuch zigy. Orze' nuras ze' mnishbaa dey lo Jesuuz nu cuic mi rishbeey nu chu' dey nañ de cuch ze'. Orze' gaze' nu briic mi rishbeey ni dey nu chu' dey nañ de cuch ze'. 33Gaze' nu bruu chu dey lo mbecy ze'. Orze' gu' dey nañ de cuch ze'. Orze' de cuch ze' rzab la de ma bzu tiily ma par gyoow. Orze' bet lag de ma lo nisyudoo. Orze' gut de ma lo nis. 34Orze' de yu nu rña de cuch ze' gush dey carer ya niiy de coz nu guc lo de mbecy nu yu' lat gyedz, gal nu lo de mbecy nu yu' ngush. 35Gaze' nu bruu dey yad güiiy de coz nu guc. Na ornu bru'ña dey ze' nu zub Jesuuz na, orze' bzaac dey mbecy nu bicy ni nuras ze' zub yu yeñ gyi'm. Zuy shab yu, nunu byanap la shcab niy. Orze' tona' la gudzib dey. 36Orze' dela de mbecy nu bzaac coz nu guc ze' mnii dey lo de mbecy zigy ze' lac mod byac mbecy nu bicy ni nuras ze'. 37Orze' dela de mbecy nu yu' lo yu ni Gerasa brugyi' rnishbaa dey lo Jesuuz nu ruum ledz dey, gun tona' la rdzib dey lom. Orze' Jesuuz gu'm nañ barc zam. 38Orze' yu nu bicy ni nuras ze' mnishbaay lom nu cha num yu. Orze' Jesuuz nam rab mi yu: 39―Yaa lo de famil nir. Orze' gyoor rishlo dey de coz nu bicy Ñgyoozh num ru ―nam. Orze' mbecy ze' gush nez yu yay. Byooy rishlo dela mbecy nu yu' gyedz ze' de coz nu bicy Ñgyoozh num yu. 40Na ornu Jesuuz bru'ñam tub la' ga' ru' nisyudoo na, orze' de mbecy zigy nu yu' ze' tona' la bet lagy dey ornu bru'ñam lo dey. Gun dela dey yu' dey rbez yum. 41Orze' bru'ña tub mbecy nu la Jairo. Yu ze' riib ic yu nañ yu' nu rsya' mbecy riidz ni Ñgyoozh. Orze' gugyit tiily yu yeñ gyi' Jesuuz. Gaze' nu mnishbaay lom nu cham yu'y. 42Gun zu tub zi la i'ñ yu, tub fiñ mñaa ña'n trocyup. Orze' fiñ ze' rat ñi. Se nu gat zi'l lañ. Orze' rlagy yu nu gyicy yac mi ñii. Orze' Jesuuz za num yu, nunu tona' la mbecy zigy za nu dey mi gal rcyi'ñ su la dey mi. 43Orze' lat de mbecy ze' ri tub biñ mñaa nu bi bza' trocyup ña'n nu rshu reñ mi. Nunu mniit mi dela tiñ nim lo doctoor, tees ni tub la dey wangac ñgyicy yac dey mi. 44Orze' biñ mñaa ze' becha'm par ich Jesuuz. Orze' gul yaam ru' shab mi. Orze' laab or la ze' guca reñ ze'. 45Orze' Jesuuz nam: ―¿Cyu gul yaa ya̱? ―nam. Orze' dela mbecy mnii dey nu walab dey gul yaay mi. Orze' na Bed rab yum: ―Masht, de mbecy dub yub la rcyi'ñ su dey ru ―nay. 46Tees Jesuuz bzu fert mi. Orze' nam: ―Ca zi na mbecy gul yaa ya̱. Gun gud lagya̱, nu nac nu bruu fers ne̱ ―nam. 47Orze' ornu gud lagy biñ mñaa ze' nu waca' cach lom lo Jesuuz, orze' za laam gusu tib mi lom. Nunu rash la bis mi. Orze' mniim lo de mbecy zigy ze' la gyi' nu gul yaam shab Jesuuz. Nunu mnii ga'm nu byac mi laab or la ze'. 48Gaze' nu na Jesuuz rab mi biñ mñaa ze': ―Biñ mñaa, ru byac ru gun bicy cup ru consuel lo̱. Orze' dub gusht la yaa ―nam. 49Lat nu gabee rnii ru' Jesuuz nu biñ mñaa ze', orze' bru'ña tub mbecy nu biid nu raso̱o̱, yu nu bruu gashtal yu' Jairo, yu nu riib ic ze'. Orze' nay rab yu Jairo: ―I'ñ ru bi guut ñi. Orze' cue' ga' gyicy seed zir ru masht ―nay. 50Tees Jesuuz güeñ mi nu ni mniiy lo Jairo. Orze' nam rab mi Jairo: ―Cue' dzib ru. Bicy cup zi'l consuel lo̱. Orze' i'ñ ru gyac ñi ―nam. 51Na ornu bru'ñam yu' Jairo na, orze' wansaana'm nu chu' zir mbecy nañ yu' ze' nu mbish fiñ nguzh ze'. Nomaas gu' num Bed nu Santiag, nu Waa, gal nu uz fiñ nguzh ze' gal nu ñaañ. 52Orze' dela mbecy nu nguaa ze' ricy shni dey, nunu ruun dey nu nac fiñ nguzh ze'. Orze' nam rab mi dey: ―Cue' gun der. Fiñ nguzh ii nu nas zi'l ñi. Walab nu guut ñi ―nam. 53Orze' brugyi' nu rigy nu ñaañ dey mi, gun gud lagy dey nu gut fiñ nguzh ze'. 54Orze' bdu' yaam yaañ. Gaze' nu ye la mniim. Orze' nam rab mi ñii: ―¡Fiñ nguzh, weshte! ―nam. 55Orze' byabañ fiñ nguzh ze'. Orze' lueg la weshteñ. Orze' Jesuuz bicy mi mandaar nu cuic dey coz nu goñ. 56Orze' de mbel ni fiñ nguzh ze' za nu la ic dey. Tees Jesuuz bdu'm riiñ yaa dey nu cue' la nii dey lo ni tub la mbecy de coz nu guc ze'.

will be added

X\