San Lucas 7

1Na ornu blazh mniim lo de mbecy, orze' zam tub gyedz nu la Capernaum. 2Orze' ze' rcyiiñ tub mbecy nu riib ic tub gaynal soldad Rom. Ze' zu tub moz niy nu dzi rcay. Orze' moz ze' mbish rat yu. Se nu gat zi'l yu. 3Na ornu mbecy nu riib ic ze' güeñ yu riidz nu rnii mbecy ni de coz nu ricy Jesuuz, orze' bzuu nez yu la be yu bel ni de mbecy Israeel nu cha nishbaa dey lo Jesuuz, gun orze' cham gyicy yac mi moz niy. 4Orze' de yu bel ze' gua dey mnishbaa dey lo Jesuuz. Orze' na dey rab yum: ―Yad ñi nir nu locyuub ru mbecy ze', 5gun dzi rcay de mbecy Israeel. Nunu laab yu bicy yu nu byaa yu' nu rsya̱' de̱ riidz ni Ñgyoozh ―na dey. 6Orze' Jesuuz za num dey par yu' mbecy nu riib ic ze'. Na ornu bi ya gaab dem ze' nu zub yu'y, orze' yu nu riib ic ze' bzuu nez yu amig niy nu cha nii dey lo Jesuuz. Orze' na dey rab yu Jesuuz: ―Jesuuz, yu nu riib ic de soldad mniiy nu yap ne̱e̱ lor nu walagy yu gyicy seed yu ru, gun wangyap yu nu char yu'y. 7Nunu nde' nu ni wancyiid cheel ub yu ru. Nomaas nu nii zi'l ru nu gyac moz niy. Orze' gyac yu nay. 8Gun ni' yu ze' ricy yu de coz nu rnii de yu nu gya zir zu par ub yu, nay. Nunu ni' yu' ga' soldad nu gash zir zu par ub yu, nay. Na ornu niiy lo tub yu nu chay, orze' chay. Na ornu rbedz yu tuuba'y nu chay loy, orze' rzay. Na ornu rniiy lo moz niy nu gyicy yu tub riiñ niy, orze' ricy yuñ ―na amig ni yu nu riib ic ze'. 9Na ornu güeñ Jesuuz de riidz ze', tona' la za nu ic mi. Orze' bish cyam bgüiim lo de mbecy nu za ca ich mi. Orze' nam rab mi dey: ―Ya̱ rishli rne̱e̱ lo der nu lat de mbecy Israeel nigul gyapa̱ ni tub la mbecy nu ricy cup consuel lo̱ gal nu na consuel nu ricy cup yu ii ―nam. 10Orze' de amig ze' niy bish cyay yay. Na ornu bri dey na, orze' bi byac moz ni yu nu riib ic tub gaynal soldad ze'. 11Na ornu bded de nu nde' na, orze' Jesuuz zam tub gyedz nu la Naíñ. Orze' de yu nu rsya' lom, gal nu zigy de mbecy za nu dey mi. 12Na cuanzir nu brim ru' gyedz na, orze' bzaac mi nu yad de mbecy nu yad cach dey añ. Añ ze', yu ze' tub zi lay zuy ni ñaay. Nunu ñaay, mi ze' tub byud. Orze' zigy mbecy gyedz ze' yad nu dey añ ze'. 13Na ornu Shuaan na bzaac mi, orze' gushni lagy mim. Orze' nam rab mim: ―Cue' gun ru ―nam. 14Orze' becha'm lo gyiñ ni añ ze'. Orze' gul yaam ñii. Orze' de mbecy nu za nu gyiñ ze' guchu' ri la dey. Orze' na Jesuuz rab mi añ ze': ―Yu feñ, ya̱ rne̱e̱ du̱ ru: “¡Wes su!” ―nam. 15Orze' mbecy nu gut ze' gusub yu nañ gyiñ ze'. Orze' brugyi' rniiy. Orze' Jesuuz byabic mi yu ni ñaay. 16Orze' dela mbecy nu bzaac de nde' tona' la gudzib dey. Orze' brugyi' nu ryabic dey gyel mbecy ni Ñgyoozh. Orze' na dey: ―Bi bruu zac tub yu lily nu rnii por cuen ni Ñgyoozh lat de ub na ―na dey. Orze' rnii ga' dey: ―Ñgyoozh yad mi nu locyuub mi de mbecy nim ―na dey. 17Orze' brush las de coz nu bicy Jesuuz par dutuub la lo de yu ni Judea gal nu de lugaar nu yu' gaab ga. 18Orze' mnii de yu nu rsya' lo Waa nu driib nis mbecy dela coz nu ricy Jesuuz. Orze' bredz yu cyup de yu ze'. 19Orze' bzuu nez yu de yu ze' nu cha tugyi' dey lo Shuaan na Jesuuz ben a laab mi biñ nu ca lo cuen nu cyid, o ti cuez dey nu cyid reña'm. 20Orze' de yu ze' za dey lo Jesuuz. Na ornu bru'ña dey na, orze' na dey rab yum: ―Waa nu driib nis mbecy bzuu nez yu de̱ ya̱ nu yap tugyi̱' lor ben a laab ru biñ nu ca lo cuen nu cyid, o ti lez de̱ nu cyid reña'm ―na dey. 21Orze' laab or la ze' bicy yac mi zigy mbecy rat. Ricy yac mi mbecy nu rzac zi nu nac güii. Nunu ii rboo chum nuras nu bicy ni mbecy. Nunu ricy mi nu zigy lo ca' rzac yu. 22Gaze' nu lueg la mniim lo cyup yu nu bzuu nez Waa ze'. Orze' nam: ―Yaa nii der lo Waa dela coz nu bzaac der, gal nu dela coz nu güeñ der. Nii der nu de lo ca' bi rzac dey. Ze' de mbecy coj rac rza nap la dey. Ze' de mbecy rat nu ta' gyedz nu la lepra bi byac dey. Ze' de mbecy go̱' bi reñ dey. Nunu de mbecy nu bi gut byabañ dey. Nunu dunii de riidz nu sac ni Ñgyoozh lo de mbecy zi. 23Dzi ni mbecy nu wayeca nu ricy cup consuel lo̱ ―nam. 24Na ornu bi ya de yu ze' na, orze' Jesuuz bzat mi Waa lo de mbecy zigy. Orze' nam: ―Ornu gua der gua güiir Waa tub lugaar ub zi, ¿la nay guzii der? ¿O ti guzii der nu nac yu mbecy nu ricy cyup ic, gal nu na tub yagyi nu rguul bi par re par ii la guzii der? 25Ze' benu walab, orze' ¿la na tub mbecy gua güii der? ¿A gua güii der tub mbecy nu zu negy cyit na? Walab, gun rad lagy der nu yu nu zu negy cyit na, nunu zu baay, yu ze' rcyiiñ yu yu' rey. 26¿Orze' la gaal na tub mbecy nu gua güii der? ¿A gua güii der tub yu nu rnii por cuen ni Ñgyoozh? Laab, como ya̱ rne̱e̱ lo der nu gua güii der tub mbecy nu zily zir nac gaze' de yu nu mnii por cuen ni Ñgyoozh. 27Gun laab Waa rzat riidz ni Ñgyoozh ze' nu rniiñ: Ñgyoozh nam rab mi biñ nu ca lo cuen nu cyid: Ya̱ zuu neza̱ yu nu nii por cuen ne̱ nu cha gay lor, gun orze' zu lily yu nez nu char, nam. Ni rnii riidz ni Ñgyoozh. 28Gun ya̱ rishli rne̱e̱ lo der nu ni tub la mbecy a̱' zily zir nac yu gaze' Waa par lo Ñgyoozh. Tees yu nu gash zir zu lat de yu nu gyub ic Ñgyoozh, yu ze' gya zir zuy par Waa ―nam. 29Orze' dela mbecy mas mbecy nu rboo tiñ por cuen ni gubier Rom, ornu güeñ dey de riidz nu mnii Jesuuz, orze' mnii dey nu mod nu rlagy Ñgyoozh, nde' mod nu laab ñi. Gun anzir Waa briic yu nu zu nis dey. 30Tees de mbecy Fariseo, gal nu de yu nu rlyuu leey ni Ñgyoozh, wangalagy dey nu ndriib nis Waa dey, ca nu bzu chu dey mod nu rlagy Ñgyoozh nu gyicy num dey. 31Orze' na ga' Jesuuz: ―¿La ñuu tub coz nu saapa̱ de mbecy nu yu' tiem na? ¿La ñuu na dey? 32Na dey gal nu na yu nguzh nu nguaa rgyit lat yagyi'. Orze' ye la rbish ti dey nguaay. Orze' na dey rab yu losa'y: “Bla̱a̱ de̱ di gyel cyit nu bdzi. Tees wangulgyi' der. Na ornu bdulru' de̱ tub di nu shni za, ni wanguun der”, na dey. 33Gun de mbecy nu yu' na wangalagy dey ni tub la mod. Gun Waa biid yu wangow nap yu. Nunu wango'y ñup. Orze' de ru rnii der nu tub nuras bicy niy yu. 34Ze' ornu ya̱, biñ nu byac mbecy bri̱, orze' ya̱ rda̱w la zi'l coz, nunu rdo̱' la zi'l ñup. Orze' rnii der nu naca̱ mbecy row shaad, nunu naca̱ mbecy ro' ñup, nunu naca̱ amig ni de mbecy bdune', nunu naca̱ amig ni de yu nu rboo tiñ por cuen ni gubier Rom. 35Ni tub la mod wangyet lagy der. Tees rabee nu de mod nu psa' lagy Ñgyoozh, nde' mod nap, nu nac nu gruu nap ñi ―nam. 36Orze' tub mbecy fariseo bredz yu Jesuuz nu cha tom gyit yu'y. Orze' guam yu'y. Na ornu bi zub mi lo mez na, 37orze' bru'ña tub biñ mñaa lom. Orze' mi ze' tub biñ nu rcyiiñ gyedz ze', nunu nac mi mbecy a̱' nap. Orze' gud lagy mi nu Jesuuz za tom gyit yu' mbecy fariseo ze'. Orze' bru'ña num tub bas nu byaa nu gyita' nu la alabastro. Ze' nañ bas ze' dza laa nu yu' nis zguul. 38Orze' gusub tiily mi yeñ gyi' Jesuuz. Ruun mi. Gaze' nu rcoom nis urlom gyi' Jesuuz. Orze' gaze' nu rcuiigy mi ñii nu gyich ic mi. Lat ze' pca ru' biñ mñaa ze' gyi'm. Orze' pcoo ga'm asecy zguul ze' gyi' Jesuuz. 39Na ornu mbecy fariseo, yu nu bredz Jesuuz nu guam yu' ze', bzaac yu de coz nu bicy biñ mñaa ze', orze' nay nañ lardooy: “Benu rishli gaal mbecy ii nac yu tub yu nu rnii por cuen ni Ñgyoozh, orze' gad lagy yu la na biñ mñaa nu gul mi yu. Mi re tub biñ mñaa a̱' nap”, rnii tooy. 40Orze' na Jesuuz rab mi mbecy fariseo ze': ―Simo̱o̱, ya̱ rlagya̱ ne̱e̱ tub coz lor ―nam. Orze' na mbecy fariseo ze' rab yu Jesuuz: ―Mnii lo̱, masht ―nay. 41Orze' na Jesuuz: ―Cyup mbecy zaab yu tiñ ni tub mbecy nu rbic tiñ nu rboo losa'. Tub yu zaab yu gaay gaynal tiñ plat. Ze' tuuba'y zaab yu cyaal gaynal tiñ plat. 42Orze' como rup laa dey wangac gyabic yu tiñ ze', orze' yu nu rbic tiñ ze' bicy sulagy yu di'ñ rup laa dey. Na mnii lo̱ Simo̱o̱: ¿ca na de yu ze' rca zir dey yu nu rbic tiñ ze'? ―nam. 43Orze' na Simo̱o̱: ―Ya̱ rze̱e̱ nu mbecy nu coz ily zir bicy sulagy yu ni ze', yu ze' rca zir yu yu nu briic tiñ ze' co dey ―nay. Orze' na Jesuuz rab mi yu: ―Laab ni gal nu mniir ―nam. 44Orze' lat nu rgüiim lo biñ mñaa ze', orze' na Jesuuz rab mi Simo̱o̱: ―¿A rzac ru biñ ii? Ya̱, ornu gu̱' nañ yu'r, orze' wancuic ru nis nu diba̱ gyi̱'. Ze' biñ mñaa ii bdiib mi gyi̱' nu nis urlom, nunu pcuiigy mi ñii nu gyich toom. 45Ru ni wanca ru'r ya̱, tees biñ mñaa ii nese nu gu'm nañ yu' ii wanchecam nu rca ru'm gyi̱' ―nam―. 46’Ni wancoor asecy to̱o̱, tees mi ii pcoom asecy zguul gyi̱'. 47Nde' nu ya̱ rne̱e̱ lor nu Ñgyoozh gyicy sulagy mi dela cyi zañ nu bicy mi, gun tona' la rcam ya̱. Tees benu Ñgyoozh gyicy sulagy mi de cyi ñuu zi ni tub mbecy, orze' yu ze' beñ zi rcay ya̱ ―nam. 48Orze' nam rab mi biñ mñaa ze': ―Ñgyoozh bi bicy sulagy mi de cyir ―nam. 49Orze' de yu nu nguaa num lo mez brugyi' nu ro dey riidz nu losa'y. Orze' na dey: ―¿Cyu mbecy yu ii? Mas gashtal cyi mbecy ricy sulagy yu ―na dey. 50Orze' nam rab mi biñ mñaa ze': ―Ru bruu mbañ ru nu nac nu bicy cup ru consuel lo̱. Na yaa nu dub gusht la ―nam.

will be added

X\