San Lucas 6

1Na tub dzi sab, dzi nu rzu lagy mbecy Israeel, orze' Jesuuz bded mi nu de yu nu rsya' lom lat tub nac trig. Orze' de yu nu rsya' lom brugyi' nu rcyug dey za' ni trig ze'. Gaze' nu brugyi' nu rzuub dey ñi nu yaay. Orze' gaze' nu bdow dey ñi. 2Orze' la be mbecy fariseo na dey rab yu Jesuuz: ―¿Lagu ricy de ru riiñ nu a̱' yad ñi nu gyicy mbecy dzi nu rzu lagy den? ―na dey. 3Orze' na Jesuuz rab mi dey: ―¿Walab gaal nigul sya' der lat de riidz ni Ñgyoozh ze' nu rniiñ de coz nu bicy Dabi lat nu byan yu nu de losa'y nu gusa nuy? 4Orze' gu' dey nañ yu' ni Ñgyoozh. Bloo dey de gyishtily nu nguaa ze'. Nde' de uz nu zu riiñ lo Ñgyoozh zi'l gac gow yuñ. Tees Dabi bdow yu gyishtily ze', nunu briica'y gow de yu nu gusa nuy ―nam―. 5Gun ya̱, biñ nu byac mbecy, riib ica̱ sab, dzi nu rzu lagy mbecy ―nam. 6Na tuuba' dzi sab, dzi nu rzu lagy mbecy, orze' gu'm nañ yu' ze' nu rsya' mbecy riidz ni Ñgyoozh. Orze' brugyi' rlyuum ni dey, nunu nañ yu' ze' ri tub mbecy nu gush beñ tub la' yaa beey. 7Orze' la be de yu nu rlyuu leey ni Ñgyoozh, gal nu la be mbecy fariseo psiiñ dey nim, ben a gyicy yac mi mbecy rat ze' sab, dzi nu rzu lagy mbecy, gun dzi ga gad tub mod nu riib dey cyi ic mi. 8Tees Jesuuz gud lagy mi la coz rnii too dey. Orze' nam rab mi mbecy nu gush beñ yaa ze': ―Wes su. Da lo̱ gashtal gazel ii ―nam. Orze' mbecy nu gush beñ yaa ze' wes suy. 9Orze' Jesuuz nam rab mi de' zir de mbecy: ―Na ya̱ dugyi̱' tub coz lo der. ¿Ca na coz nu nap zuñ par lo leey ni Moisees nu gyicy na sab, dzi nu rzu lagy mbecy? ¿A nap nu gyicy na coz nap, o ti nap nu gyicy na coz a̱' nap? ¿A nii tub dzi nu gloo mbañ naa mbecy, o ti nii tub dzi nu gnit lon mbecy? ―nam. 10Orze' bgüiim lo de yu nu yu' lom. Gaze' nu nam rab mi mbecy yaa gush beñ ze': ―Bzaab yaar lo̱ ―nam. Orze' mbecy ze' bzaab yaay lom. Orze' byanap la yaay. 11Ze' de' zir de mbecy tona' la pcha' ic dey. Orze' brugyi' nu ro dey riidz ben lac mod gyicy nu dey mi. 12Orze' laab tiem ze' Jesuuz zam tub logyi' nu nii num Ñgyoozh. Orze' gua la rel nu rim ze' rnii num Ñgyoozh. 13Na ornu bza' yu na, orze' bredz mi de yu nu rsya' lom. Orze' lat de yu ze' bloo sum trocyup dey. Orze' bloo lam dey aposht. 14Orze' nii nu la de trocyup de yu nu bloo sum ze'. Gush lañ: Simo̱o̱, yu nu bloo lam Bed, nu bicy yu Ndrees, nu Santiag, nu Waa, nu Lip, nu Bartol, 15nu Mateo, nu Tomaas, nu Santiag, i'ñ Alfeo, nu Simo̱o̱, yu nu nac partid nu la celote, 16nu Judas, bicy Santiag, nu Judas Iscariote, yu nu bish cya ich mi. 17Orze' Jesuuz bruum logyi' bet mi nu de yu nu bloo sum ze'. Gaze' nu gucua dem tub ze' nu lacy. Orze' ze' bi nguaa zigy de yu nu rsya' lom. Nunu nguaa zigy zir mbecy, de yu nu bruu lo yu ni Judea, nu de yu nu bruu Jerusaleeng, nu yu nu bruu Tiro nu Sidón, cyup gyedz nu ri ru' nisyudoo. Dela dey ze' yad dey par nu zuub gyidag dey de riidz nu rnii Jesuuz, nunu par nu gyicy mi nu nit de güii nu rat dey. 18Nunu ni' zi'l bicy yac mi de mbecy nu bicy ni nuras. 19Nde' nu dela de mbecy rlagy dey nu gal yaa dey Jesuuz, gun gyicy yac mi dey nu nac fers nu gruu nim. 20Gaze' nu Jesuuz bgüiim lo de yu nu rsya' lom. Gaze' nu nam rab mi dey: ―Dzi ni de ru mbecy nu gyel zi zu, gun de ru gzac ru lo gyel gubier ni Ñgyoozh. 21’Dzi ni de ru mbecy nu ran na, gun orze' gad nu gyel ni der. ’Dzi ni de ru mbecy nu ruun na, gun par lo orze' gyigy der. 22’Dzi ni der ornu rzi lagy mbecy lo der, nunu ornu cyuu nu dey der, nunu ornu rnii zi dey ni der, nunu ornu rnii dey nu nac der mbecy a̱' nap nu nac ya̱, biñ nu byac mbecy. 23Orze' tona' la bet lagy der dzi ze', nunu gal briich la gyi' der lo yu, gun gyibaa gyad tub i der nu tona' la coz ily, gun ni' zi'l mod de gyitoo bel ni den pshet zi dey de mbecy nu rnii por cuen ni Ñgyoozh. 24’¡Tees cuaa de ru mbecy guani'ñ, gun bi bicy der gusht ni der! 25’¡Nunu cuaa de ru mbecy nu dza nañ, gun par lo gyan der! ’¡Nunu cuaa de ru mbecy nu dzi rigy na, gun par lo gun der nu gyicy shnir! 26’¡Cuaa ga' der ornu dela mbecy ryabic dey gyel mbecy nir, gun ni' zi'l de too bel ni dey byabic dey gyel mbecy ni de mbecy nu mnii fals por cuen ni Ñgyoozh gulas! 27’Tees ya̱ rne̱e̱ lo der mbecy nu rzuub gyidag ne̱ ya̱: Pca der losa' yuur, nunu nap bicy nu der de yu nu rzi lagy lor. 28Nunu nap mnii der ni de yu nu shiñ rnii rab de ru. Nunu bdiiñ der lo Ñgyoozh ni de yu nu rnii zi ni der. 29Benu tub mbecy shet yu zig tub la' ya lor, orze' zaaba' der tub la' ga' loy nu shet yu. Nunu benu ca na mbecy rbooy chicyet ni der, orze' briic la niy, nunu briica' yaag ru niy. 30Nunu benu ca na mbecy cyiñ yu la coz lor, orze' cuic ru ñii niy. Nunu benu ca na mbecy rbooy la coz nir, orze' cue' niir loy nu gyabic yu nir. 31Nunu bicy nu der de' zir mbecy gal mod nu rlagy ub der nu gyicy nu dey der. 32’Nunu benu de ru ca zi'l der de yu nu rca zi'l ru, ¿a dzi coz ilya' ricy der rziir? Gun mas gashtal de mbecy cyi rca dey losa'y benu ni' rca losa'y ub yu. 33Nunu benu nap gyicy der nu de mbecy nu nap zi'l gyicy nu ru, ¿a nde' la nu dzi coz ilya' ricy der, rziir? Gun mas gashtal de mbecy cyi ni ricy dey. 34Nunu benu rbic der de coz nu rboo mbecy nu rzii der nu gyabica'y nir, ¿a dzi coz ilya' ricy der rziir? Gun ni' zi'l de mbecy cyi rbica' dey de coz rboo losa'y. Nunu rgyish lo dey nu gyabica' losa'y niy. 35Orze' pca der losa' yuur, nunu nap bicy nu der dey, nunu briic der coz nu co losa'r. Nunu cue' cyish lo der nu gyabic yu ni tub la coz nir. Orze' gyad tub i der nu tona' la coz ily. Nunu orze' gyac der i'ñ Ñgyoozh, biñ nu gya zir zu. Gun mi ze' nap mi num de mbecy nu sac graseer, gal nu de mbecy a̱' nap. 36Guc der mbecy nu rashni lagy losa', gal nu Ñgyoozh uz der rashni lagy mi mbecy. 37’Cue' nii der nu yu' falt ni losa'r, gun orze' Ñgyoozh waniim ti yu' falt ni der. Cue' nii der nu rlagy ñi nu cha losa'r lo cashtig, gun orze' Ñgyoozh waniim nu de ru rlagy ñi char lo cashtig. Bicy sulagy der ni losa'r. Orze' Ñgyoozh gyicy sulagya'm ni der. 38Briic der coz nu galagy losa'r, gun orze' Ñgyoozh cuica'm de coz nu galagy der. Nunu cuic za' lam ñii ni der. Gun dub gal nu gyicy nu der losa'r, dub ni gyicy num de ru ―nam. 39Orze' Jesuuz mniim tub riidz tiily lo dey. Orze' nam: ―¿Walab gaal gac tub lo ca' lyuuy nez ni tuuba' mbecy lo ca'? ¿A walab orze' rup laa dey gyet lag yu nañ tub zi'l gyeegy? 40Sac ni tub yu nguzh scuel nu zily zir nac yu par moscuel niy. Tees ornu lazh sya' dey, orze' gaze' nu saap yu moscuel niy. 41’De ru na der gal na mbecy nu rgu' cuen toop mi' nu ri urlo losa', ze' yabicy nu ri urlo ub der, nde' wagyicy cuen der ñii. 42Ze' benu ri tub yabicy urlo der, ze' wayicy cuen ru ñii, ¿orze' lagu rnii ga' der lo losa'r: “Doo urlor, gun lo̱o̱ toop mi' ze'”, rnii ga' der? ¡A mbecy rzuu lo! Bloo yabicy ily nu ri urlor loga la, gun orze' nap zir zac ru cor toop mi' nu ri urlo losa'r. 43’Sac ni tub la yag nap nu cuic ñi uugy shiñ na, nunu ni' sac tub yag a̱' nap na nu cuic ñi uugy nap. 44Tub ga la yag rad lagy den la nañ nu nac de uugy nu rbic ñi, gun tub ya gyech wac cuic ñi urlas mni. Nunu ni' tub gyish gyech wac cuic ñi urbyay. 45Benu tub mbecy nap, yu ze' rniiy coz nap, gun coz nap yu' nañ lardooy. Benu tub mbecy a̱' nap, rniiy coz a̱' nap, gun yu' coz a̱' nap nañ lardooy. Dub gal lac na coz nu yu' nañ lardooy dub ni na coz nu rniiy. 46’¿Lagu rnii der ya̱, “Shuaana̱, Shuaana̱”, rnii der ze' wagyicy der gal nu rne̱e̱? 47Benu tub mbecy cyid yu lo̱, nunu gyeñ yu riidz nu rne̱e̱, nunu gyicy yac yuñ, orze' ya̱ rne̱e̱ lor la nay. 48Orze' yu ze' nay gal na tub mbecy nu bzaa tub yu'. Gyi bduuñ yu simient niñ. Orze' bzuub yu simient niñ lo gyita'. Na ornu bet gyey, orze' guuly gyoow. Orze' bdugyiñ ich yu' ze'. Tees wangyes saañ, gun nap byaañ. 49Tees dela mbecy nu rzuub gyidag coz nu rne̱e̱, ze' wayicy dey gal nu rne̱e̱, de yu ze' nay gal na tub mbecy nu bzaa tub yu'. Ze' ni wansu lay simient niñ. Na ornu bet gyey, orze' guuly gyoow. Orze' bdiñ yeeñ yu' ze'. Orze' wes saañ. Orze' mnit lo dutuub la yu' ze' ―na Jesuuz.

will be added

X\