San Lucas 5

1Guc ñi tub tiem nu Jesuuz brim ru' nisyudoo tub gyedz nu la Genesaret. Orze' de mbecy rcyi'ñ su laa dey mi, gun rlagy dey gyeñ dey de riidz ni Ñgyoozh nu rniim. 2Orze' Jesuuz bzaac mi cyup barc zuñ ru' nisyudoo. Nat laa nañ ñi, gun de yu nu rub bel bruu dey nañ ñi nu za tiib dey gyish niy. 3Orze' Jesuuz gu'm nañ tub barc ze'. Orze' barc ze', nde' barc ni Simo̱o̱. Gaze' nu mniim lo Simo̱o̱ nu gyicy zet zir yu barc ze' par ru' nisyudoo. Orze' gusub mi, nunu brugyi' rlyuum ni mbecy gal nañ barc ze'. 4Na ornu blazh blyuum ni dey na, orze' nam rab mi Simo̱o̱: ―Gua nu barc nir ze' nu gyi ni nisyudoo. Orze' ne'r gyish nir lo nis par nu cub ru bel ―nam. 5Orze' na Simo̱o̱ rab yum: ―Masht, gua la rel ricy de̱ riiñ nu rdub de̱ bel. Ze' ii rila wangad la ma ni de̱. Tees na como ru mniir, orze' ya̱ ne̱' gyish ne̱ lo nisyudoo ―nay. 6Na ornu mne' dey gyish niy lo nisyudoo na, orze' tona' la guud bel ni dey. Gashtal ri'ñ la gyish ni dey tanta' nu yu' bel nañ ñi. 7Gaze' nu bicy yaa dey lo losa'y, de yu nu yu' nañ reña' barc par nu cha locyuub dey yu. Gaze' nu gua nu de yu ze' barc niy. Orze' bdzaa la nañ rup laa barc ni dey nu yu' bel. Se nu ches ti zi'l barc ni dey lo nisyudoo tanta' nu yu' ma nañ ñi. 8Na ornu Bed bzaac yu de nu nde', orze' gusu tib yu lo Jesuuz. Orze' nay rab yum: ―Bruu chu lo̱ Shuaana̱, gun ya̱ naca̱ mbecy cyi ―nay. 9Ni mniiy gun gudzib yu, nunu ni' zi'l gudziba' de' zir mbecy nu nac de bel zañ nu guud ze'. 10Gaza' Santiag nu Waa, de i'ñ Zebedeo, gudzib dey. De yu ze' losa' Simo̱o̱. Orze' Jesuuz nam rab mi Simo̱o̱: ―Cue' dzib der, gun nese na la gal nu rub der bel, ni' zi'l te' der de mbecy, gun orze' cyid ca dey icha̱ ―nam. 11Gaze' nu gua zeeñ dey de barc niy par lo yu bigy. Orze' ze' bzeeñ dey barc niy. Orze' za ca̱ dey ich mi. 12Tub dzi Jesuuz zam tub gyedz. Orze' ze' bru'ña tub mbecy nu rat tub lo gyedz nu la lepra. Na ornu bzaac yu Jesuuz, orze' wes saa tiily yu gashtal lo yu la. Orze' mnishbaay lo Jesuuz. Orze' nay rab yum: ―Benu rlagy ru, ru gac gyicy yac ru ya̱ ―nay. 13Orze' Jesuuz gul yaam yu. Orze' nam: ―Rlagya̱. Orze' na byac ru ―nam. Orze' lueg la mnit la gyedz ze' cuerp niy. 14Orze' na ga' Jesuuz rab mi yu: ―Cue' niir lo ni tub la mbecy, sinu gua lo uz cha lyuur ub ru loy. Orze' cuic ru gun nu rlagy ñi par nu gyacaacy ru par lo Ñgyoozh gal nu mnii Moisees nu gyicy na, gun orze' gad lagy dela mbecy nu bi byac ru ni güii nu rat ru ―nam. 15Mas ni mniim, tees de coz nu bicy mi bzu zir ñi. Nunu tona' la mbecy zigy byatublaazh dey lom par nu zuub gyidag dey nim, nunu par nu gyicy yac mi de güii nu rat dey. 16Tees Jesuuz bruu chum lo dey zam tub lugaar ub zi nu nii num Ñgyoozh. 17Tub dzi zub Jesuuz rlyuum ni de mbecy. Lat ze' nguaa la be mbecy fariseo nu de yu nu rlyuu leey ni Ñgyoozh. De yu ze' bruu dey dela lugaar ni Galilea, nu de lugaar ni Judea, gal nu de lugaar ni Jerusaleeng. Nunu rabee nu Ñgyoozh ricy mi coz ily nu nac Jesuuz nu nac nu bicy yac mi de mbecy rat. 18Orze' bru'ña nu dey tub mbecy chi̱ lom riib yu lo tub nuun. Bicy pee dey nu chu' nu dey mbecy chi̱ ze' nañ yu' ze' nu zub Jesuuz par nu cyish dey yu lom. 19Tees wangad mod nu chu' nu dey mbecy chi̱ ze', gun dzi yu' mbecy. Gaze' nu gup dey par too yu'. Gaze' nu blaat dey tub gyeegy lat de tej. Gaze' nu pshet dey nuun nu riib mbecy rat ze' lat de mbecy zigy ze' nu zub Jesuuz. 20Na ornu gud lagy mi nu ricy cup dey consuel lom na, orze' nam rab mi mbecy chi̱ ze': ―Ru, de cyir bi byecy ñi ―nam. 21Orze' de yu nu rlyuu leey ni Ñgyoozh, nu de mbecy fariseo brugyi' nu rnii too dey: “¿Cyu mbecy yu ii? ¿Lagu rniiy coz nu za contr ni Ñgyoozh? Tub zi la Ñgyoozh gac gyicy sulagy mi de cyi nu ricy mbecy”, rnii too dey. 22Tees Jesuuz gud lagy mi nu ni rnii too dey. Gaze' nu nam rab mi dey: ―¿Lagu ni rnii too der? 23Dzi zir a̱' biigy par nu ne̱e̱ nu bi bicy sulagya̱ de cyir gaze' nu ne̱e̱ wes su nunu bza ―nam―. 24Tees ya̱ ne̱e̱ lo yu re nu gyes suy nunu gzay, gun orze' gad lagy der nu ya̱, biñ nu byac mbecy, ricy cupa̱ rishbeey nu gyicy sulagya̱ de cyi mbecy gyishlombecy ii ―nam. Gaze' nu nam rab mi mbecy chi̱ ze': ―Ya̱ ne̱e̱ du̱ ru wes su, gush nuun nir nunu yaa yu'r ―nam. 25Orze' lueg la wes suy lo rgüii la de mbecy zigy ze'. Orze' bdu' yaay nuun nu byub yu lo ze'. Orze' yay yu'y. Nunu ryabic yu gyel mbecy ni Ñgyoozh. 26Orze' dela yu nu nguaa ze' za nu la ic dey. Orze' byabic dey gyel mbecy ni Ñgyoozh, nunu tona' la gudzib dey. Orze' na dey: ―Dzi na bzaac na tub nusuriidz ily ―na dey. 27Ornu bded ni de nu nde', orze' bruu Jesuuz zam. Orze' bzaac mi tub yu nu rboo tiñ por cuen ni gubier Rom. Yu ze' lay Leví. Zub yu ze' nu rboo dey tiñ. Orze' na Jesuuz rab mi yu: ―Da ca icha̱ ―nam. 28Orze' wes suy. Bzeeñ ga lay de yu nu nguaa nuy ze' za cay ich mi. 29Na despuees, orze' Leví bicy yu tub sa' ily yu'y nu nac Jesuuz. Nunu ze' nguaa ga' de yu nu rboo tiñ por cuen ni gubier Rom, gal nu zigy zir de mbecy. Tublaazh la nguaa dey lo mez row dey gyit. 30Tees de mbecy fariseo, gal nu de yu nu rlyuu ley ni Ñgyoozh, brugyi' nu zi ga la rnii dey nu de yu nu rsya' lo Jesuuz. Orze' na dey: ―¿Lagu row der, nunu lagu ro' der nis nu de mbecy nu rboo tiñ por cuen ni gubier Rom, gal nu nu de mbecy cyi? ―na dey. 31Orze' Jesuuz nam rab mi dey: ―Par de mbecy ruub walagy ñi doctoor, tees par de mbecy rat rlagy ñi. 32Gal nu doctoor wagyicy nuy mbecy ruub guñaa, ni' ya̱ a̱' yapa̱ nu redza̱ mbecy nu sac cyi, sinu dredza̱ de mbecy cyi par nu ne' dey de cyiy ―nam. 33Orze' na dey rab yu Jesuuz: ―De yu nu rsya' lo Waa rca dey ni ub yu nu cue' goy gyit lat nu rzu bich dey nu nac Ñgyoozh. Nunu cya' rnii nu dey mi. Nunu ni' zi'l ricy de yu nu rsya' lo de mbecy fariseo. Ze' de yu nu rsya' lo ru de dzi la row dey nunu ro' dey ―na dey. 34Orze' Jesuuz nam rab mi dey: ―Ya̱ na̱ gal nu na tub nob. ¿Walab gaal gac ca de yu nu yu' lo fandang ni ub yu nu cue' goy gyit lat nu gabee rded nob lat dey? 35Tees shuub tub dzi nu co mbecy nob ze' lat dey. Orze' gaze' nu gac ca dey ni ub yu nu cue' goy gyit par nu gyicy shni dey. 36Orze' Jesuuz mniim tub riidz tiily lo dey. Orze' nam: ―Gun mod nu bicy de gyitoo bel, nde' nañ gal nu na tub negy gush. Ni tub la mbecy washi'ñ mi tub negy cub nu gad tub la' negy nu gyicy mi rumien negy gush, gun nis gash beñ negy cub ze'. Orze' gyicy ñi nu shaa negy cub ze'. Nunu negy cub ze' wagyap ñi negy gush ze'. 37Nunu mod nu ricy de gyitoo bel, nde' nañ gal nu na tub gyid gush nu rgu' choow dey ñup ni urbyay. Ni tub la mbecy wac cu' choow dey ñup ni urbyay cub nañ gyid gush, gun nis cyich ñiñ. Orze' shu dela ñup ni urbyay ze', nunu nit lo gyid ze'. 38Nde' nu rlagy ñi cu' choow dey ñup ni urbyay cub nañ gyid cub, gun orze' rup laañ wanit lom. 39Nunu ni tub la yu nu ro' ñup ni urbyay gush walagy yu go'y ñup ni urbyay cub, gun rnii dey nu “Nap zir ro' ñup ni urbyay gush”, rnii dey ―nam.

will be added

X\