San Lucas 4

1Orze' Jesuuz brugyi' riib ic za' la Espiriit Yon ni Ñgyoozh mi. Gaze' nu bruum gashtal gyoow Jordaang zam. Orze' Espiriit Yon ni Ñgyoozh za num mi tub lugaar ub zi. 2Ze' brim cyuu dzi. Orze' ze' bicy nuras preb mi. Dub laa lat nu brim ze' wangow lam gyit. Na despuees, orze' briib nu ran mi. 3Orze' na nuras rab yum: ―Benu ru rishli gaal nac ru i'ñ Ñgyoozh, orze' mnii lo de gyita' ii nu gyac ni gyishtily ―nay. 4Orze' Jesuuz nam rab mi nuras: ―Lat de riidz ni Ñgyoozh rniin: “Walab gyishtily zi'l gyicy ñi nu cui mbañ mbecy”, rniiñ ―nam. 5Gaze' nu nuras gua nuy mi tub ze' nu gya. Orze' nañ tub miiñ zi'l blyuuy dela lugaar ni gyishlombecy lom. 6Orze' nay: ―Ya̱ gyicya̱ nu gac gyub ic ru dutuub la gyishlombecy ii, nunu grica̱ dela gyel nap nu yu' loñ nir. Ya̱ bi guud ñi ne̱, nunu gac grica̱ ñii ni cyu zi'l mbecy nu rlagya̱. 7Ya̱ grica̱ nde' nir benu zu tib ru lo̱ nu griib zily ru ya̱ ―nay. 8Orze' Jesuuz nam rab mi nuras: ―Gun lat de riidz ni Ñgyoozh rniin: “Briib zily Shuaan ru, biñ nu nac Ñgyoozh nir, nunu se coz nu rlagy zi'l mi gyicy ru”, rnii riidz nim ―na Jesuuz. 9Gaze' nu za nu nuras mi par Jerusaleeng. Orze' pshup yum ze' nu gya zir ni yu' nu driib zily de mbecy Israeel Ñgyoozh. Orze' nay rab yu Jesuuz: ―Benu rishli gaal nac ru i'ñ Ñgyoozh, orze' bzut yeñ gashtal lo yu la re. 10Gun lat de riidz ni Ñgyoozh rniiñ: Ñgyoozh cu'm riiñ yaa de anc nim nu ña dey ru, nunu wazaan dey nu shiñ gzac ru. 11Orze' lagy yaa dey ru, gun orze' cue' nu gad güii par ni gyi'r lo de gyita', rniiñ, nay. 12Orze' Jesuuz nam rab mi yu: ―Ni' zi'l rniiñ lat de riidz nim: “Cue' gyicy ru preb Ñgyoozh, Shuaan ru”, rniiñ ―na Jesuuz. 13Orze' nuras wangada' mod nu ñgyicy yu preb Jesuuz. Orze' bruu chuy lom par la be tiem. 14Orze' Jesuuz ya ga'm par lo de yu ni Galilea, nunu riib ic za' la Espiriit Yon ni Ñgyoozh mi. Orze' brush las riidz ni de coz nu bicy mi dela lugaar nu yu' gaab ga ze'. 15Orze' rlyuum nañ de yu' nu rsya' de mbecy Israeel riidz ni Ñgyoozh de ga la lugaar ze' nu rded mi. Nunu dela mbecy ryabic dey gyel mbecy nim. 16Orze' Jesuuz yam Nazaret, gyedz ze' nu guul mi. Na ornu pshuub sab, dzi nu rzu lagy de mbecy Israeel, orze' bicy mi gal mod nu nil ricy mi. Orze' gu'm nañ yu' ze' nu rsya' dey riidz ni Ñgyoozh. Gaze' nu wes sum nu lab mi riidz ni Ñgyoozh. 17Orze' briic dey libr ni Isaías, tub yu nu rnii por cuen ni Ñgyoozh, par nu lab mi. Na ornu pshaal mi looñ, orze' byap mi ze' nu cañ nu rniiñ: 18Espiriit Yon ni Ñgyoozh Shuaana̱ riib ic mi ya̱, gun bzum ya̱ nu cha̱ ne̱e̱ de riidz nu sac lo de mbecy zi. Nunu bzuu nez mi ya̱ par nu gyicya̱ nu cue' gyub ic reña' coz nañ lardoo de mbecy. Nunu bzuu nez mi ya̱ nu gyicya̱ nu zac de mbecy nu wacsac. Nunu bzuu nez mi ya̱ par nu gyicya̱ nu gruu nap de mbecy nu rzac zi nu nac nu shiñ ricy nu de losa'y yu. 19Nunu bzuu nez mi ya̱ nu ne̱e̱ lo dela mbecy nu bi pshuub ña'n nu nap gyicy nu Ñgyoozh dela mbecy, rniiñ, nam. 20Laab nde' la. Orze' Jesuuz ptub mi gyicy ze'. Orze' byabic mi ñii ni yu nu zu riiñ nañ yu' ze'. Orze' gusub mi. Orze' mbi la bgüii de yu nu yu' nañ yu' ze' lom. 21Orze' brugyi' rniim. Orze' nam rab mi dey: ―Lat nu blaba̱ de riidz ze' lo der, orze' byu' niñ ―nam. 22Orze' dela mbecy nap mnii dey nu nac Jesuuz, nunu bet lagy dey de riidz cyit na nu mniim. Orze' na dey rab dey losa'y: ―Ze', ¿a walab yu ii i'ñ See? ―na dey. 23Orze' na Jesuuz rab mi dey: ―Ya̱ rad lagya̱ nu segur la nii der tub riidz cyit. Riidz ze', nde': “Ru nac ru tub mbecy nu ricy guñaa. Orze' gyicy yac ru ub ru. Orze' gal nu bicy ru gyedz Capernaum, ni' zi'l gyicy ru ledz ru ii”, nii der lo̱. 24Ya̱ rishli rne̱e̱ lo der nu ni tub la mbecy nu rnii por cuen ni Ñgyoozh, de mbecy ledz yu wagyicy cuen dey yu. 25Gun rishli gaal tona' la yu' byud Israeel tiem ni Elías, yu nu mnii por cuen ni Ñgyoozh, tiem nu wangyet gyey chon na'ñ nu. Nunu tona' la byan mbecy dutuub la lugaar ze'. 26Tees Elías wanchay lo ni tub la byud nu yu' Israeel, sinu guay lo tub byud nu rcyiiñ Sarepta. Nde' tub gyedz nu ri gaab ga Sidón. 27Ni' zi'l tiem ni Eliseo, yu nu mnii por cuen ni Ñgyoozh, tona' la zigy de mbecy Israeel gurat yu gyedz nu la lepra. Tees ni tub la dey wangyac yu. Nomaas byac tub mbecy nu la Naamán. Yu ze' tub mbecy nu bruu lo yu ni Siria ―nam. 28Ornu güeñ dela mbecy nu nguaa nañ yu' ze' de riidz nu mniim, orze' tona' la pcha' ic dey. 29Orze' wes su dey, nunu gua nu dey Jesuuz por fers la par ru' gyedz ze'. Gaze' nu pshup dey mi too tub bicy ze' nu ri gyedz ze', gun bicy pee dey nu nshet lag dey mi gal ze' nu gya ni bicy ze', gal lo yu la. 30Orze' bded mi lat dey yam. 31Orze' Jesuuz yam tub gyedz nu ri lo yu ni Galilea nu la Capernaum. Orze' sab, dzi nu rzu lagy mbecy Israeel, gu'm nañ yu' ze' nu rsya' de mbecy Israeel riidz ni Ñgyoozh par nu lyuum ni dey. 32Orze' de mbecy za nu la ic dey nu nac coz nu rniim, gun rlyuum ni dey gal nu rlyuu tub mbecy nu riib ic za' la. 33Na nañ yu' ze' ri tub mbecy nu bicy ni nuras. Orze' ye la rbish tiy. 34Orze' nay rab yu Jesuuz: ―Bruu chu. ¿Lagu yad ru lat de̱, Jesuuz, biñ nu bruu Nazaret? ¿A yad ru par nu za' lor de̱ ya̱? Ya̱ rad lagya̱ nu ru nac ru mbecy yon ni Ñgyoozh ―nay rab yu Jesuuz. 35Orze' Jesuuz bdza'm ni nuras ze'. Orze' nam rab mi yu: ―Dzi chel, nunu bruu chu lo yu ii ―nam. Orze' nuras ze' mne'y mbecy ze' lo yu lo rgüii la dela mbecy. Orze' gaze' nu bruu chuy lo mbecy ze', nunu se la la bicy yu. 36Orze' dela mbecy nu yu' ze' gudzib dey. Orze' na dey rab dey losa'y: ―¿Lac yaruu nu nii? ¡Mbecy ii ricy cup yu rishbeey, nunu ricy cup yu mod nu ricy yu mandaar gashtal nuras, nunu orze' druu chu dey lo mbecy! ―na dey. 37Orze' lueg la bzu riidz ni de coz nu bicy Jesuuz dela lugaar nu yu' gaab ga. 38Orze' Jesuuz bruum nañ yu' ze' nu rsya' de mbecy riidz ni Ñgyoozh. Orze' yam yu' Simo̱o̱. Ze' ñaa gud Simo̱o̱ riib rat mi. Tona' la pcaañ zig nim. Orze' mnishbaa dey lo Jesuuz nu nac mi. 39Orze' gaze' nu gua Jesuuz bzaab tily mi lom. Orze' bicy mi mandaar nu gruu zig ze'. Orze' bruu zig mi. Gaze' nu lueg la weshtem, nunu brugyi' rzu bich mi nu nac dey. 40Na ornu bi za doo na, orze' dela mbecy nu ricy cup famil ni nu rat zañ lo güii, orze' gua nu dey yu lo Jesuuz. Orze' mi ze' briib yaam too tub ga la dey. Gaze' nu byac dey. 41Nunu bruu chu zañ nuras nu bicy ni mbecy nu yu' lat de mbecy rat ze'. Orze' nuras ze' rbish ti dey. Orze' na dey rab yu Jesuuz: ―¡Ru nac ru i'ñ Ñgyoozh! ―na dey. Orze' Jesuuz bdza'm ni de nuras ze'. Orze' wansaan mi nu nii zir dey, gun yu' lo dey mi nu nac mi Mesías, biñ nu ca lo cuen nu cyid. 42Na or bza' yu tuuba' dzi na, orze' Jesuuz bruum lat gyedz zam tub lugaar ub zi. Orze' de mbecy brugyi' nu ryub dey mi. Orze' bru'ña dey ze' nu zum. Orze' bicy pee dey nu wazaan yu nu gruum lat dey. 43Orze' nam rab mi dey: ―Tees ni' zi'l rlagy ñi cha shaala̱ de riidz nap ni gyel gubier ni Ñgyoozh de reña' gyedz, gun par nde' bzuu nez Ñgyoozh ya̱ ―nam. 44Orze' Jesuuz gusam pshaal mi de riidz nu bruu lo Ñgyoozh nañ de yu' nu rsya' de mbecy riidz ni Ñgyoozh nu yu' de lo yu ni Judea.

will be added

X\