San Lucas 3

1Na bi bza' tiiñ ña'n nu riib ic yu nu la Tiberio de nasyoong. Ze' Poncio Pilato byub ic yu Judea por cuen ni gubier. Nunu Herodes byub ic yu por cuen ni gubier Galilea. Nunu bicy yu, Lip, byub ica'y por cuen ni gubier Iturea nu Traconite. Nunu Lisanias byub ic yu por cuen ni gubier Abilinia. 2Orze' Anás nu Caifás byub ic dey de uz Israeel. Orze' tiem ze' Ñgyoozh mniim lo Waa, i'ñ Zacarí, tub lugaar ub zi. 3Orze' Waa gusay dela lugaar nu ri gaab ga gyoow Jordaang. Orze' nay rab yu de mbecy: ― Mne' der dela cyi nu ricy ru nunu bzu nis der, gun orze' Ñgyoozh gyicy sulagy mi de cyi der ―nay. 4Gun Isaías, yu nu mnii por cuen ni Ñgyoozh, laab Waa bzat yu ornu pcaay: Zaab ti' tub mbecy rbish tiy tub lugaar ub zi. Orze' nay: “Nañ lardoo der nañ gal nu na tub nez. Orze' bicy nap der nez ze' par ornu cyid Shuaan ru. Pshaal der tub nez nu li par nu ded mi. 5Dela nez nu a̱' tub ru' gyicy tub ru' der ñii. Nunu de ze' nu zub bicy ily gyicy lacy der ñii. Nunu de nez nu a̱' li gu' li der ñii. Nunu dela de nez nu dzi wech zu, gyicy tub ru' der ñii. 6Orze' de lo la mbecy gzac dey biñ nu bzuu nez Ñgyoozh nu co mbañ den”, nay, na Isaías. 7Orze' tona' la mbecy zigy bruu dey nu yad yu par nu rlagy dey nu griib nis Waa dey. Orze' Waa nay rab yu dey: ―¡Der mbecy shiñ ricy! ¿Cyu mnii lo der nu gac gla der lo cashtig ily ni Ñgyoozh nu bi yad gaab? 8Bicy der tub mod nu nap gabe nu bi mne' der de cyi nu ricy ru. Cue' gnii too der nu gla der ni de cashtig ze' nu nac nu rnii der: “De ub na nac naa nez gyitoo bel nin Abraham”, rnii der, gun ya̱ rishli rne̱e̱ lo der nu Ñgyoozh gac gyicy mi nu mas gashtal de gyita' ii gyac ñi nez Abraham. 9Gun cashtig ni Ñgyoozh nañ gal na tub gyibag. Bi zu lily ñii par nu shi'ñ ñi dela yag gashtal lyu lañ. Dela yag nu wacuic uugy nap gyi'ñ ñi. Orze' chañ lo gyi ―na Waa. 10Orze' na de mbecy rab yu Waa: ―¿Lac mod gyicy de̱ beni? ―na dey. 11Orze' na Waa rab yu dey: ―Benu tub mbecy mbish cyup shab yu, orze' rlagy ñi cuic yu tub ni yu nu sac ni, nunu benu yu' nu row tub mbecy, orze' rlagya'ñ nu cuica'y ñuu gow yu nu sac nu row ―na Waa. 12Gaza' de yu nu rboo tiñ por cuen ni gubier Rom za ga' dey lo Waa par nu griib nis yu dey. Orze' na dey rab yu Waa: ―Masht, ze' de̱ ya̱, ¿la coz rlagy ñi nu gyicy de̱? ―na dey. 13Orze' Waa nay: ―Rlagy ñi nu co der tiñ gal nu ca lo cuen nu co der, nunu cue' nu sheñ zir co der ―nay rab yu dey. 14Ni' zi'l de soldad nu yu' ze' bdugyi' ga' dey lo Waa. Orze' na dey: ―Ze' de̱ ya̱, ¿lac mod gyicy de̱? ―na dey. Orze' na Waa rab yu dey: ―Cue' co der tiñ ni mbecy por fers la, nunu cue' riib der gyidza too dey. Bzu la der conform ca na la i der nu ricy ru gan ―na Waa rab yu dey. 15Orze' de mbecy brugyi' rgyish lo dey nu zac lo dey tub coz ily, nunu brugyi' rgugyi' dey lo losa'y ben a walab Waa nac yu Mesías, biñ nu ca lo cuen nu cyid. 16Orze' Waa nay rab yu dey: ―Ya̱ rishli griib nisa̱ der nu nis, tees cyid tub biñ nu cuic Espiriit Yon ni Ñgyoozh ni mbecy, nunu cuic mi cashtig nu na gal nu na gyi ni dey. Mi ze' tub biñ nu gya zir zu par ya̱. Ya̱ ni wayapa̱ nu shagya̱ gyid nu zub gyid lab mi. 17Mi ze' nam gal na tub mbecy nu bi zu lily nu tub yag ru' biiz par nu com dela mbigy trig, nunu gyicy tublaazh mi ñii par nu cu' choow mi nañ ye. Ze' de gyid ich ñi zeed mi ñii chañ lo tub gyi nu rila wayu ―na Waa. 18Orze' ni mod nunu zañ zir mod Waa pshaal yu de riidz nu sac nu bruu lo Ñgyoozh lo de mbecy. 19Orze' pshuu nuy Herodes, yu nu riib ic por cuen ni gubier nu nac nu gush yu Herodías, mñaa bicy yu Lip. Nunu yu' zir coz a̱' nap nu bicy yu. 20Nunu shiñ zir bicy yu ornu bicy yu mandaar nu pshet lag mbecy Waa nañ yu' gyiib. 21Tiem ze' ornu Waa griib nis yu de mbecy, orze' ni' zi'l Jesuuz briic yu nu winis mi. Na lat nu rnii num Ñgyoozh, orze' byaal la baa. 22Orze' bruu zac Espiriit Yon ni Ñgyoozh nu na gal na tub beg. Orze' bet mi toom. Orze' zaab ti' Ñgyoozh. Gal gyibaa rniim. Orze' nam: ―Ru nac ru i'ña̱ nu tona' la rca̱, nunu tona' la yet lagya̱ ―na Ñgyoozh gashtal gyibaa. 23Ornu bzuub Jesuuz gyi' riiñ nu ricy mi, orze' yu'm ña'n gal rup tii. Orze' de mbecy guzii dey nu mi ze' i'ñ See. Ze' See yu ze' i'ñ Elí. 24Orze' Elí guc yu i'ñ Matat. Orze' Matat guc yu i'ñ Leví. Orze' Leví guc yu i'ñ Melqui. Orze' Melqui guc yu i'ñ Janai. Orze' Janai guc yu i'ñ See. 25Orze' See guc yu i'ñ Matatías. Orze' Matatías guc yu i'ñ Amós. Orze' Amós guc yu i'ñ Nau. Orze' Nau guc yu i'ñ Esli. Orze' Esli guc yu i'ñ Nagai. 26Orze' Nagai guc yu i'ñ Maat. Orze' Maat guc yu i'ñ Matatías. Orze' Matatías guc yu i'ñ Semei. Orze' Semei guc yu i'ñ Josec. Orze' Josec guc yu i'ñ Judá. 27Orze' Judá guc yu i'ñ Joanán. Orze' Joanán guc yu i'ñ Resa. Orze' Resa guc yu i'ñ Zorobabel. Orze' Zorobabel guc yu i'ñ Salatiel. Orze' Salatiel guc yu i'ñ Neri. 28Orze' Neri guc yu i'ñ Melqui. Orze' Melqui guc yu i'ñ Adi. Orze' Adi guc yu i'ñ Cosam. Orze' Cosam guc yu i'ñ Elmadam. Orze' Elmadam guc yu i'ñ Er. 29Orze' Er guc yu i'ñ Jesuuz. Orze' Jesuuz guc yu i'ñ Eliezer. Orze' Eliezer guc yu i'ñ Jorim. Orze' Jorim guc yu i'ñ Matat. 30Orze' Matat guc yu i'ñ Leví. Orze' Leví guc yu i'ñ Simyo̱o̱. Orze' Simyo̱o̱ guc yu i'ñ Judá. Orze' Judá guc yu i'ñ See. Orze' See guc yu i'ñ Jonam. Orze' Jonam guc yu i'ñ Eliaquim. 31Orze' Eliaquim guc yu i'ñ Melea. Orze' Melea guc yu i'ñ Mena. Orze' Mena guc yu i'ñ Matata. Orze' Matata guc yu i'ñ Natán. 32Orze' Natán guc yu i'ñ Dabi. Orze' Dabi guc yu i'ñ Isaí. Orze' Isaí guc yu i'ñ Obed. Orze' Obed guc yu i'ñ Booz. Orze' Booz guc yu i'ñ Sala. Orze' Sala guc yu i'ñ Naasón. 33Orze' Naasón guc yu i'ñ Aminadab. Orze' Aminadab guc yu i'ñ Admin. Orze' Admin guc yu i'ñ Arni. Orze' Arni guc yu i'ñ Esrom. Orze' Esrom guc yu i'ñ Fares. Orze' Fares guc yu i'ñ Judá. 34Orze' Judá guc yu i'ñ Jacob. Orze' Jacob guc yu i'ñ Isaac. Orze' Isaac guc yu i'ñ Abraham. Orze' Abraham guc yu i'ñ Taré. Orze' Taré guc yu i'ñ Nacor. 35Orze' Nacor guc yu i'ñ Serug. Orze' Serug guc yu i'ñ Ragau. Orze' Ragau guc yu i'ñ Peleg. Orze' Peleg guc yu i'ñ Heber. Orze' Heber guc yu i'ñ Sala. 36Orze' Sala guc yu i'ñ Cainán. Orze' Cainán guc yu i'ñ Arfaxad. Orze' Arfaxad guc yu i'ñ Sem. Orze' Sem guc yu i'ñ Noé. Orze' Noé guc yu i'ñ Lamec. 37Orze' Lamec guc yu i'ñ Matusalén. Orze' Matusalén guc yu i'ñ Enoc. Orze' Enoc guc yu i'ñ Jared. Orze' Jared guc yu i'ñ Mahalaleel. Orze' Mahalaleel guc yu i'ñ Cainán. 38Orze' Cainán guc yu i'ñ Enós. Orze' Enós guc yu i'ñ Set. Orze' Set guc yu i'ñ Adaang. Orze' Adaang guc yu i'ñ Ñgyoozh.

will be added

X\