San Lucas 24

1Noming, dzi loga ni sman, orze' de biñ mñaa ze' napor la za dem ru' baa ni Jesuuz. Za nu dem coz zguul nu bzu lily dem ze'. 2Na ornu bru'ña dem ru' baa ze' na, orze' bzaac dem nu saca' gyita' nu noow ru' baa ze' se'ñ. 3Orze' gu' dem gyeegy ni baa ze'. Orze' bzaac dem nu saca' cuerp ni Shuaan na Jesuuz. 4Orze' pcan shcab ni dem yu'm. Orze' wagad lagy dem lac gyicy mi. Orze' sij la bruu zac cyup mbecy. Orze' gusu dey garee lom. Ze' zu dey negy cacy iily la. 5Tona' la gudzib dem. Orze' gusab tiily la dem gal lo yu la. Orze' de mbecy ze' nay rab yu dem: ―¿Lagu ryub der tub biñ mbañ lat de añ ii? 6Gun mi ze' saca'm ii, sinu bi byabañ mi. Bicy der nu gyeza' lagy der de coz nu mniim lat nu gusam Galilea. 7Mniim nu rlagy ñi nu gu' dey ub mi, biñ nu byac mbecy, yaa de mbecy cyi. Orze' de yu ze' rlagy ñi caa dey mi lo cruuz. Orze' nu za' dzi chon, orze' gyabañ mi, nam ―na de mbecy shab cacy ze'. 8Orze' gaze' nu de mi ze' byeza' lagy dem de riidz nu mnii Jesuuz. 9Orze' bruu dem ru' baa ze' bish cya dem yam. Orze' byoo dem rishlo de trotub de aposht, gal nu lo de' zir mbecy de coz nu guc. 10De biñ nu bya too riidz ze', mi ze' Li, biñ nu bruu Magadán, nu Wan, gal nu Li ñaa Santiag, gal nu de' zir de biñ mñaa. Orze' mnii dem riidz ze' lo de aposht. 11Tees de yu ze' guzii dey nu riidz ton zi'l rnii dem. Orze' wancheña lagy dey. 12Orze' mas ni, tees Bed gush yu carer zay ru' baa ni Jesuuz. Na ornu bru'ñay na, orze' bgüiiy nañ gyerbaa ze'. Orze' bzaac yu se sab zi'l nim mbish ñi. Orze' bish cyay yay par yu'. Nunu za nu la ic yu nu nac de coz nu guc. 13Orze' laab dzi ze' cyup de yu nu rsya' lom za dey tub gyedz nu la Emaés. Gyedz ze' riñ tub nu rnii trotub miily metr nu ruun Jerusaleeng ru'ñan gyedz ze'. 14Na nez nu za dey, orze' ro dey riidz nu nac dela coz nu guc. 15Na lat nu ro dey riidz na, orze' laab Jesuuz becha'm lo dey. Orze' gaze' nu za num dey tublaazh. 16Orze' mas bzaac dey mi, tees wangyu' lo dey mi. 17Orze' nam rab mi dey: ―¿La riidz ro der yad ru? ―nam. Orze' guca dey nu ricy shniy. 18Orze' tub yu nu rsya' lom ze' lay Cleofas. Orze' nay rab yum: ―¿A tub zi la ru mbecy nu pcyiiñ Jerusaleeng nu wagad lagy de coz nu sa guc ze'? ―nay. 19Orze' na ga' Jesuuz: ―¿La coz guc? ―nam. Orze' na ga'y: ―De coz ni Jesuuz, biñ nu bruu Nazaret. Mi ze' guc mi tub biñ nu rnii por cuen ni Ñgyoozh. Ñgyoozh, gal nu dela mbecy bicy dey Jesuuz par tub mbecy nu tona' la coz ily ricy nunu tona' la coz ily rnii. 20Orze' de uz zub lo gal nu de fushtiz ledz na bgu' dey mi yaa mbecy, gun orze' gyicy dey nu gat mi lo cruuz. 21Tees de̱ ya̱ brish lo̱ de̱ nu mi ze' nac mi biñ nu co mbañ de mbecy Israeel. Tees na bi bza' chon dzi nu gut mi. 22Tees la be de biñ mñaa nu nac nu de̱ ya̱ bicy mi nu za̱ du̱ la ic de̱. Gun cas ru' zu gua dem ru' baa ni Jesuuz. 23Na ornu wangyap dem cuerp ni Jesuuz, orze' bish cya dem yam. Orze' mnii dem nu bruu zac la be anc lo dem. Orze' anc ze' mniiy nu Jesuuz mbañ mi. 24Orze' gaze' nu gua la be de losa̱' gal ru' baa ze'. Orze' bzaac yu nu ni gaal ni zu, gal nu mnii de biñ mñaa ze'. Tees wansaca' dey Jesuuz ―na dey. 25Orze' na Jesuuz: ―¡Dzi ga cyigy too der! ¡Dzi ga gyee cheña lagy der de riidz ni de yu nu mnii por cuen ni Ñgyoozh! 26¿Walab gaal walagy ñi nu zac zi Mesías anzir nu gyam lo gyel lily nim? ―nam rab mi dey. 27Orze' gaze' nu brugyi' nu rshaal mi dela se' lat riidz ni Ñgyoozh ze' nu rzat ñi ub mi. Gush lam de riidz nu bzeeñ Moisees. Orze' yad mi dela libr nu pcaa de yu nu mnii por cuen ni Ñgyoozh rshaal mi lo dey. 28Na ornu bri dey gyedz nu rsaap dey ze', orze' Jesuuz bicy lam nu zu ga zi'l mi. 29Tees de yu ze' pcueez dey mi nu gyeeñ mi num dey. Orze' na dey rab yum: ―Byeeñ la nu de̱ ya̱, gun na bi gudze. Sñuu ga gyecheñ ―na dey. Orze' Jesuuz gu'm nañ yu' par nu gyeñ num dey. 30Na ornu bi nguaa dem lo mez na, orze' bdu' yaam gyishtily. Orze' briic mi gras ni Ñgyoozh nu nac ñii. Orze' blew mi ñii briic mi ni dey. 31Orze' or la ze' de yu ze' byaal la urlo dey. Orze' byu' lo dey mi. Orze' mi ze' mnit mi lo dey. 32Orze' na dey rab yu losa'y: ―¿A walab nu nap zu lagy na nez nu yap na ornu mniim lo den, nunu ornu pshaal mi riidz ni Ñgyoozh lon? ―na dey. 33Orze' wancuez la dey, sinu gush nez la dey yay Jerusaleeng. Na ornu bri dey na, orze' ze' byap dey za' trotub la de yu nu rsya' lom yu' tublaazh dey nu de' zir de losa'y. 34Orze' na de yu nu rsya' lom rab yu de yu nu bri ze': ―Rishli ni gaal Shuaan na byabañ mi, gun bruu zac mi lo Simo̱o̱ ―na dey. 35Orze' de yu nu bri ze' byoo dey rishlo dey nu la coz bzaac dey nez. Nunu mnii ga' dey lac mod byu' lo dey mi ornu psug mi gyishtily. 36Na lat nu gabee yu' dey rniiy de coz ze', orze' bruu zaca' Jesuuz lat dey. Orze' mnii num dey ñgyoozh. Orze' nam: ―Gyel ri zu briñ lat der ―nam. 37Orze' de yu nu rsya' lom tona' la gudzib dey. Bis guzii dey mi. 38Orze' Jesuuz nam rab mi dey: ―¿Lagu rdzib der? ¿Lagu wacheña lagy der nu ya̱ nu nde'? 39Güii der ya̱a̱ nunu güii der gyi̱'. Laab ya̱ nu nde'. Güii der ya̱, nunu gul yaa der ya̱. Bis a̱' ricy cup ñi cuerp niñ gal nu rzac der nu na ya̱ ―nam. 40Orze' ornu blazh mniim de nde', orze' blyuum yaam lo dey gal nu gyi'm. 41Orze' de yu ze' gabee wacheña lagy dey ti laab mi, tanta' nu yet lagy dey, nunu tanta' nu za nu ic dey. Orze' Jesuuz nam rab mi dey: ―¿A yu' ñuu la coz ni der don? ―nam rab mi dey. 42Orze' briic dey tub la' bel nu guuy lo boo gom. 43Orze' gush mi ñii. Orze' bdom ñii lo rgüii dela dey. 44Orze' gaze' nu nam rab mi dey: ―Coz nu bzaca̱, nde' mne̱e̱ lo der lat nu gabee gusa du̱ der. Orze' dela coz nu cañ lo leey ni Moisees, nu dela coz nu cañ lat de riidz ni de yu nu mnii por cuen ni Ñgyoozh, gal nu dela coz nu cañ lo libr ni salmos nu nac ya̱, dela riidz ze' byu' niñ ―nam. 45Orze' bicy mi nu gyet lag dey cuen de riidz ni Ñgyoozh. 46Orze' nam rab mi dey: ―Bi cañ nu ya̱, Mesías, biñ nu ca lo cuen nu cyid. Cañ nu rlagy ñi gata̱. Tees ornu za' dzi chon, orze' gyabaña̱'. 47Nunu rniiñ nu de mbecy rlagy ñi cha shaal dey riidz ni Ñgyoozh lo dela mbecy nu nac ya̱. Nii dey nu rlagy ñi ne' mbecy dela cyi nu ricy yu, gun orze' Ñgyoozh gyicy sulagy mi ni dey. Gash dey Jerusaleeng. Orze' cha dey dutuub la gyishlombecy nu cha shaal dey riidz ze'. 48Orze' de ru nac der teshtig ni de coz nu guc ze'. 49Orze' ya̱ gzuu neza̱ Espiriit Yon ni Ñgyoozh nu cyid mi lat der gal nu Ñgyoozh uz na bi mne' ic mi nu cuic mim ni der. Tees de ru gyeñ der gyedz Jerusaleeng ii gashtal gyicy la Ñgyoozh gyibaa nu cyiiñ der. Orze' gaze' nu gruu der char ―nam. 50Orze' gaze' nu Jesuuz bruu num dey gyedz Jerusaleeng. Guam num dey gal Betania. Orze' ze' pshes nañ yaam bdiiñ mi lo Ñgyoozh nu locyuub mi dey. 51Orze' lat nu ni bicy mi bruu chum lo dey. Gaze' nu gup mi gyibaa yam. 52Na ornu blazh nu briib zily dey mi, orze' bish cya dey yay par Jerusaleeng. Nunu tona' la bet lagy dey yay. 53Nunu de dzi la yu' dey nañ yu' nu driib zily de mbecy Ñgyoozh nu ryabic dey gyel mbecy nim.

will be added

X\