San Lucas 23

1Orze' dela mbecy wes su dey. Gaze' nu za nu dey Jesuuz lo Pilato. 2Na ornu bru'ña dey loy, orze' brugyi' nu driib dey cyi toom. Orze' na dey: ―De̱ ya̱ byap de̱ yu ii ricy yu nu radza de mbecy ledza̱. Nunu rniiy nu walagy ñi nu rish de̱ tiñ nu rboo dey por cuen ni yu nu riib ic de nasyoong. Nunu ricy yu ub yu nu nac yu Mesías. Nunu nac yu rey ricy yu ―na dey. 3Orze' Pilato nay rab yum: ―¿A ru nac ru rey ni de mbecy Israeel? ―nay. Orze' nam rab mi yu: ―Laab ni gal nu ru mniir ―nam. 4Orze' gaze' nu Pilato mniiy lo de yu zub lo ni uz, gal nu lo de mbecy. Orze' nay: ―Ya̱ wangyap la̱ ni tub la falt ni mbecy ii ―nay. 5Tees de mbecy fert la zu dey. Orze' na dey: ―Yu ii ricy yu nu deet rac ledz de̱ nu nac coz nu rlyuuy. Nu loga la ni bicy yu Galilea. Na ga' ni' zi'l ricy yu lo de yu ni Judea ii ―na dey. 6Ornu Pilato güeñ yu de nu nde', orze' bdugyi'y lo dey ben a nac mi mbecy Galilea. 7Na ornu gud lagy yu nu laab mi mbecy Galilea, orze' bzuu nez yum zam lo Herodes, gun yu ze' riib ic yu Galilea por cuen ni gubier Rom, nunu tiem ze' riy Jerusaleeng. 8Orze' Herodes tona' la bet lagy yu ornu bzaac yu Jesuuz, gun bi rac tiem rlagy yu gzac yum, gun güeñ yu de coz nu rnii mbecy nu ricy mi. Orze' rgyish loy nu rlagy yu zac yu tub nusuriidz nu gyicy mi. 9Orze' zañ coz bdugyi'y lom. Tees Jesuuz rila wanniim. 10Ni' zi'l ze' yu' de uz zub lo gal nu de yu nu rlyuu leey ni Ñgyoozh. Orze' bzu fert dey, nunu briib zir dey cyi toom. 11Orze' Herodes gal nu de soldad niy shiñ bicy nu dey mi. Orze' bigy nu naañ dey mi. Orze' ptiish dey mi tub negy fin. Orze' bzuu nez dey mi tub tira' nu zam lo Pilato. 12Orze' dzi ze' Herodes nu Pilato bicy dey rishnap nu losa'y. Ze' anzir rzi lagy dey lo losa'y. 13Orze' Pilato bicy tublaazh yu de uz zub lo, gal nu de yu bel ni de mbecy Israeel, gal nu de mbecy gyedz ze'. 14Orze' nay: ―De ru yad nu der mbecy ii lo̱, nunu mnii der nu ricy yu nu radza mbecy. Tees ya̱ bdugyi' biigya̱ loy lo rgüii la der, nunu wangyapa̱ ni tub la falt niy nu nac cyi nu briib der tooy. 15Nunu ni' zi'l Herodes wangyap yu falt niy. Nde' nu ptush cyay yu yad yu lo̱. Gun yu ii sac la cyi nu bicy yu nu gyicy ñi nu yad ñi nu gat yu. 16Orze' nde' nu ya̱ grica̱ cashtig niy. Orze' gaze' nu gla̱a̱ yu ―nay rab yu de mbecy. 17Na de ña'n la, lat nu rzu' sa' ni Pas, Pilato rlagy ñi laay tub pres par nu gyicy yu nu gyet lagy de mbecy. 18Tees orze' dela dey dub ru' lay rbish tiy. Orze' na dey: ―¡Biit yu! ¡Orze' glaar Barrabás! ―na dey. 19Gun Barrabás mne' dey yu nañ yu' gyiib par nu bicy yu nu byach mbecy, nunu par nu biit yu mbecy. 20Tees Pilato rlagy yu nu glaay Jesuuz. Orze' gaze' nu mniiy lo de mbecy tuuba' tir. 21Tees orze' de mbecy dzi zir ye rbish ti dey. Orze' na dey: ―¡Cut ruy lo cruuz! ¡Cut ruy lo cruuz! ―na dey rab yu Pilato. 22Orze' Pilato tir chon la mniiy lo de mbecy. Orze' nay: ―¿La ñuu coz a̱' nap bicy yu? Ya̱ wangyapa̱ ni tub la cyi nu bicy yu nu gyicy ñi nu yad ñi nu gat yu. Orze' ya̱ grica̱ cashtig niy. Orze' gaze' nu gla̱a̱ yu ―nay. 23Tees de mbecy ze' rzaab rbish ti la dey nu rnii dey nu gat mi lo cruuz. Orze' par nu tanta' rbish ti dey, orze' nde' nu “O” mnii Pilato. 24Orze' Pilato pshet ic yu nu gyicy yu gal mod nu mnii dey. 25Gaze' nu blaay yu nu mnii mbecy. Yu ze' yu nu bicy nu byach mbecy nunu yu nu biit mbecy. Orze' bgu'y Jesuuz yaa dey par nu gyicy dey ca na nu rlagy dey. 26Na ornu za nu dey Jesuuz nu caa dey mi lo cruuz, orze' nez nu za dey bdzeel dey tub mbecy Cirene nu la Simo̱o̱. Yu ze' bruuy ngush yeed yu. Orze' pshet yaa dey yu. Orze' briib dey cruuz nim yeñ yu. Orze' bicy dey nu guy cruuz ze' cha cay ich Jesuuz. 27Nunu tona' la mbecy zigy za ca ich mi. Nunu lat dey yu' zigy biñ mñaa. Ruun dem nunu rbish tim za ca dem ich mi nu nac nu tona' la ricy shni dem nu nac Jesuuz. 28Orze' Jesuuz bgüiim lo de biñ mñaa ze'. Orze' nam: ―Der biñ mñaa Jerusaleeng, cue' gun der nu nac ya̱, sinu biiñ der nu nac ub der nunu nu nac i'ñ der. 29Gun shuub dzi nu nii mbecy: “Dzi ni biñ mñaa nu wanchu' i'ñ. Dzi ni biñ mñaa nu wangaal mdoo. Nunu ni' zi'l dzi ni biñ mñaa nu wangaagy mdoo”, nii dey. 30Orze' cugyi' de mbecy nu niiy gab yu de bicy: “¡Bish cya to̱o̱ de̱!”, niiy, nunu nii ga' dey gab yu de bicy miiñ: “¡I pcach de̱ ya̱!” niiy. 31Gun benu ni mod ricy dey nu yag ca', orze' dzi zir gyicy dey ornu cha wach ñi ―nam. 32Nunu za nu ga' dey cyup mbecy nu bicy cyi par nu caa dey yu tublaazh nu Jesuuz lo cruuz. 33Na ornu bru'ña dey lugaar nu la Calavera, orze' pcaa dey Jesuuz lo cruuz. Nunu pcaa ga' dey cyup mbecy cyi ze' lo cruuz. Tub yu pcaa dey yu par yaa beem. Ze' tuuba'y pcaa dey yu par yaa reg mi. 34Orze' na Jesuuz rab mi Ñgyoozh: ―Ñgyoozh uza̱, bicy sulagy ni dey, gun wagad lagy dey de coz nu ricy yu ―nam. Orze' de soldad bloo dey suert par nu cyez dey shab mi lat losa'y. 35Orze' de mbecy yu' dey rgüiiy lom. Nunu gal de fushtiz bgubdzaa dey mi. Orze' na dey: ―Bloo mbañ yu reña' mbecy. Na rlagya'ñ nu co mbañ yu ub yu benu rishli gaal nac yu Mesías, biñ nu bloo zu Ñgyoozh ―na dey. 36De soldad ni' zi'l bgubdzaa dey mi. Orze' becha' dey lom nunu briic dey ñup zii go'm. 37Orze' na dey rab yum: ―¡Benu ru nac ru rey ni de mbecy Israeel, bloo mbañ ub ru! ―na dey. 38Ze' par too cruuz ze' pcaa dey tub yala nu ta' letr. Orze' rniiñ: “Yu ii rey ni de mbecy Israeel”, rniiñ. 39Na tub yu nu ca cuit mi mnii ziy nim. Orze' nay rab yum: ―Benu ru nac ru Mesías, biñ nu ca lo cuen nu cyid, orze' bloo mbañ ub ru, nunu bloo mbaña' de̱ ya̱ ―nay. 40Tees tuuba' losa'y bdza'y niy. Orze' nay rab yuy: ―¿A wacchib ru lo Ñgyoozh? Gun bi ta' den laaba' lo cashtig. 41Gun de ub na yad ñi nu gzac zin, gun na drish na de coz nu bicy na. Tees yu ii rila wangyicy yu coz a̱' nap ―nay rab yu losa'y. 42Orze' na ga'y rab yu Jesuuz: ―Jesuuz, gyeza' lagy ru ya̱, ornu cugyi' nu gyub ic ru de mbecy nir ―nay. 43Orze' Jesuuz nam rab mi yu: ―Ya̱ rishli rne̱e̱ lor nu dzi na bi ri nur ya gyibaa ―nam. 44Orze' tub gyiib trocyup or widoo, orze' bet cow dutuub la lo yu gashtal gyiib chon or gudze. Orze' bzu yaa. 45Ni doo wancuic ñi yaa. Ze' negy nu zaab lugaar yon ni yu' nu driib zily mbecy Ñgyoozh pshelañ. Cyaal, cyaal lañ guc ñi. 46Orze' Jesuuz ye la brish tim. Orze' nam rab mi Ñgyoozh: ―¡Uza̱, byash lardo̱o̱! ―nam. Na ornu blazh mniim nde', orze' gut mi. 47Na ornu bzaac yu nu riib ic de soldad Rom de coz nu guc na, orze' brugyi' ryabic yu gyel mbecy ni Ñgyoozh. Orze' nay: ―Rishli gaal yu ii nac yu mbecy nu sac falt ni ―nay. 48Orze' dela mbecy zigy nu yu' lugaar ze', ornu bzaac dey nu ni guc, orze' gush nez dey zay. Rgyich yaa dey lyush yu. 49Tees dela mbecy nu yu' lo Jesuuz, nunu gaza' de biñ mñaa, biñ nu za ca ich mi nese nu bruum Galilea, orze' de yu ze' byeeñ gay lugaar ze'. Orze' zet yu' dey rgüiiy de coz nu guc ze'. 50Bzu tub mbecy nu la See. Yu ze' bruuy tub gyedz ni Judea nu la Arimatea. Nunu nac yu tub mbecy nap. Nunu ricy yu mod nu se'ñ. Nunu yu ze' nac yu tub yu nu zu riiñ lat de junt zub lo ni de mbecy Israeel. 51Yu ze' rgyish loy lo gyel gubier ni Ñgyoozh, nunu wangyicy yu tub zi'l riidz nu de yu nu gu' junt ze' ben lac mod ñgyicy nu dey Jesuuz. 52Orze' gush nez yu guay lo Pilato bdiiñ yu cuerp ni Jesuuz. 53Na ornu bi pshet yu cuerp nim lo cruuz, orze' ptiish yu cuerp nim ze' tub sab nu byaa nu lino. Gaze' nu briy ñi nañ tub gyerbaa cub nu bduguuñ nañ tub gyita'. Gyerbaa ze' nigul cui la añ. 54Nde' guc ñi dzi byer or gudze. Dzi ze' rzu lily dey par nu zu lagy dey sab. 55Orze' de biñ mñaa nu guca ich Jesuuz nese nu bruum Galilea gua nu dem See par ru' baa ni Jesuuz. Orze' bzaac dem lac mod briy cuerp nim. 56Na ornu bri dem yu' na, orze' bzu lily dem coz zguul gal nu coz nu coo dem cuerp ni Jesuuz. Orze' ornu pshuub dzi sab, orze' bzu lagy dem gal nu rniiñ lo leey nu gyicy dem.

will be added

X\