San Lucas 21

1Orze' Jesuuz zum rgüiim lo de mbecy guani'ñ lat nu rgu' dey tiñ gun nañ alcansi. 2Gaze' nu bzaac mi nu pshet lag tub byud nu dzi gyel zi zu cyup sentab mi' nañ alcansi ze'. 3Orze' nam: ―Ya̱ rishli rne̱e̱ lo der nu byud re mas gyel zi zum, tees sheñ zir briic mi gaze' de' zir mbecy. 4Gun dela mbecy rbic yu tiñ nu drusub zi'l niy. Ze' byud re gyel zi zum. Tees briic mi dela tiñ nu rcyiiñ nim par nu cui mbañ mi ―na Jesuuz. 5Orze' la be de yu nu rsya' lo Jesuuz ro dey riidz nu losa'y nu nac yu' nu driib zily mbecy Ñgyoozh. Rnii dey nu tona' la cyit na de gyita' nu gup ñi, nunu rnii ga' dey nu cyit na lo gyita' nu bdudii nu gun nu briic mbecy. Orze' na Jesuuz rab mi dey: 6―Shuub tub dzi nu de yu' nu rzac der ii dudily ñi. Ni tub gyita' wayeñ ñi too losa'ñ, sinu delañ nit loñ ―nam. 7Orze' de yu nu rsya' lom bdugyi' dey lom. Orze' na dey rab yum: ―Masht, mnii lo̱ de̱. ¿Gul gac de coz nu mniir ze'? Nunu ¿la na muesht gruu zac ornu bi zuu lañ nu gac de coz ze'? ―na dey. 8Orze' na Jesuuz rab mi dey: ―Bzu der cuidad nis guu mbecy der, gun tona' la zigy mbecy gruu zac yu nu gash yu nu la̱. Nii dey nu “Ya̱ naca̱ mi ze'”, niiy. Nunu nii ga' dey nu “Na bi pshuub tiem”, niiy. Tees cue' cha ca der ich yu. 9Na ornu gyeñ der nu yu' gyel yuu, orze' cue' dzib der, gun nde' coz nu rlagy ñi nu gac nu loga la. Mas ni, tees walab nu bi pshuub la dzi ze' ―nam. 10Orze' na ga'm: ―Gun tub nac mbecy chu'y gyel yuu nu tub naca' mbecy. Nunu tub gubier chu'y gyel yuu nu tuuba' gubier. 11Grib duru ily. Nunu cyid cubiñ. Nunu chu' güii zañ lugaar ni gyishlombecy. Nunu baa gruu zac coz nu dzib mbecy. Nunu tona' la muesht ily gruu zac. 12’Tees anzir nu gac de coz ze', orze' shet yaa dey de ru. Nunu shet zi dey der. Orze' cha nu dey der nañ yu' nu rsya' de mbecy riidz ni Ñgyoozh. Orze' ze' gri bee dey ni der. Gaze' nu ne' dey der nañ yu' gyiib. Nunu cu' cyi dey der lo yu nu riib ic por cuen ni gubier gal nu lo de rey nu nac ya̱. 13Gun orze' gad mod nu gzat der ya̱ lo dey. 14Orze' bicy der tub mod nu cue' zu lily der ben lac mod niir anzir nu char lo dey. 15Gun ya̱ grica̱ riidz nu gnii der. Orze' par nu dzi nap gnii der, orze' rila wad mod nu gnii de losa' yuu der nu walab ni gal nu nii der. 16Tees zigy mbecy cush cya dey ich der. Gaza' uz der, nu bicy ru, nu de famil ni der, nu de amig nir, dela de yu ze' cush cya dey ich ru. Orze' cut dey ca na de ru. 17Nunu dela mbecy gazi lagy dey lo der nu nac ya̱. 18Tees de ru ni tub gyich too der wadune'ñ. 19Orze' bzu fert der, gun orze' ni mod gad nu gruu mbañ der. 20’Ornu gzac der nu dub yub la ru' gyedz Jerusaleeng bi bri lo' soldad, orze' gad lagy der nu sñuu ga gnit loñ. 21Orze' de yu nu yu' lo yu ni Judea, rlagy ñi nu ruu chu dey par logyi'. Nunu de yu nu yu' lat gyedz Jerusaleeng rlagy ñi nu ruu dey lat gyedz ze'. Ze' de yu nu ricy riiñ lat naa walagy ñi nu gyay par lat gyedz. 22Gun tiem ze', nde' tub tiem nu cuic Ñgyoozh cashtig, gun orze' gyu' niñ gal nu bi cañ lat de riidz ni Ñgyoozh. 23¡Cuaa de biñ mñaa nu segyi zu tiem ze'! Nunu, ¡cuaa ga' de biñ nu rgaagy mdoo tiem ze'! Gun tona' la gzac zi mbecy lugaar ii. Nunu Ñgyoozh tona' la cashtig ily cuic mi ni de mbecy ii. 24Yu' mbecy nu gat nu mandzicy. Nunu yu' ga' mbecy nu cha nu dey pres de ga la ze' ni gyishlombecy. Orze' de mbecy nu walab mbecy Israeel gzuub gyi' dey gyedz Jerusaleeng gal shuub la dzi nu gya' lo tiem nu briic Ñgyoozh ni dey. 25’Orze' gruu zac muesht lo doo, nu lo beey, gal nu lo de bel nu ta' baa. Nunu dela mbecy nu yu' lo yu lazh la consuel ni dey. Nunu dzib dey nu dzi siigy nisyudoo gal nu de nguuly loñ. 26Orze' de mbecy csuun ñi dey nu dzib dey ornu gash dey shcab de coz nu gac gyishlombecy. Nunu gashtal dela fers nu nash baa cueñ ñii. 27Orze' gaze' nu gzac dey ya̱ biñ nu byac mbecy yapa̱ lat za. Gzac dey nu gac gyicya̱ coz ily. Nunu tona' la lily na. 28Ornu cugyi' nu gac dela coz ze', orze' briic der baloor, nunu pshes nañ too der, gun sñuu ga bi gla der lo de coz a̱' nap ―nam. 29Orze' gaze' nu Jesuuz mniim tub riidz tiily lo dey. Orze' nam: ―Bdu' cuen der mod nu ricy ya las o ca zi'l na yag. 30Ornu bi rga'ñ nu driib lyag niñ, orze' de ru bi rad lagy der nu bi yad tiem zig. 31Orze' ni' zi'l mod, ornu gzac der nu gac de coz ze', orze' gad lagy der nu sñuu ga cyid gyel gubier ni Ñgyoozh. 32’Ya̱ rishli rne̱e̱ lo der nu dela coz ze' gac ñii anzir nu gat dela mbecy nu yu' tiem ze'. 33Baa nuñ gyishlombecy ii, delañ ded niñ, tees riidz nu ya̱ rne̱e̱, nde' rila waded niñ. 34’Bicy cuidad der nis zaan der nu gyacyigy lardoo der nu nac de bis, nu nac nu gzugy der, nu nac nu sug ic der, nu nac coz ni gyishlombecy ii. Gun orze' sij zi'l gruu zac dzi ze' 35gal nu ricy tub caa. Gun gruu zac ñi lo dela mbecy nu yu' gyishlombecy. 36Orze' bzu der altant, nunu mnii nu der Ñgyoozh dub laa tiem, gun orze' gad tub mod nu cue' gzac der lo dela coz nu gac ze', nunu orze' gac gyecha' der lo ya̱, biñ nu byac mbecy ―nam. 37Orze' Jesuuz rlyuum ni de mbecy orwi doo nañ yu' nu driib zily dey Ñgyoozh. Ze' or yecheñ, orze' rzam too bicy nu la bicy ni Ya Oliva. 38Orze' ornu rza' yu, orze' dela mbecy rza dey nañ yu' nu driib zily dey Ñgyoozh par nu rzuub gyidag dey de coz nu rniim.

will be added

X\