San Lucas 20

1Tub dzi Jesuuz rim nañ yu' nu driib zily mbecy Ñgyoozh. Rlyuum ni de mbecy nunu rshaal mi de riidz nu rbic gyel mbañ. Gaze' nu bru'ña de yu nu riib ic de uz, nu de yu nu rlyuu leey ni Ñgyoozh, gal nu de yu bel ni de mbecy Israeel. 2Gaze' nu na dey rab yum: ―¿La na rishbeey ricy cup ru nu ricy ru de coz ii? ¿Cyu briic rishbeey ze' nir? ―na dey. 3Orze' na ga' Jesuuz: ―Ni' zi'l ya̱ dugyi̱' ga̱' tub coz lo der. Mnii lo̱: 4¿Cyu bzuu nez Waa nu guay briib nis yu mbecy? ¿A Ñgyoozh bzuu nez mi yu, uti mbecy? ―nam. 5Orze' brugyi' nu ro dey riidz nu losa'y. Orze' na dey: “Benu niin nu Ñgyoozh bzuu nez mi yu biid yu, orze' niiy: ¿Lagu wancheña lagy der de riidz nu mniiy, beni?, niiy. 6Nunu wac niin nu mbecy bzuu nez dey yu, gun dzi ga cut mbecy de ub na nu gyita', gun dela dey rzu fert dey nu Waa mniiy por cuen ni Ñgyoozh”, na dey. 7Orze' nde' nu mnii dey nu wangad lagy dey cyu bzuu nez Waa nu griib nis yu mbecy. 8Orze' Jesuuz nam rab mi dey: ―Benu ni, ni' ya̱ wane̱e̱ la rishbeey ricy cupa̱ nu ricya̱ de nu nii ―nam. 9Gaze' nu lueg la Jesuuz brugyi' rniim nu riidz tiily lo de mbecy. Orze' nam rab mi dey: ―Bzu tub mbecy nu mnuuz tub nac lyucy urbyay. Gaze' nu briic yu nu nde' par coz cyaal ni tuuba' mbecy. Gaze' nu gush nez yu zay byaj tuñ tiem. 10Na ornu byap tiem nu dulag urbyay ze' na, orze' bzuu nez yu tub moz niy lo de yu nu gush coz cyaal ze' par nu cha gyiy ca na de coz nu bruu lo de lyucy urbyay ze', ca na nu dugyiy. Tees de yu ze' bgaaz dey moz ze' nunu dzi lay bzuu nez dey yu yay. 11Orze' gaze' nu yu nu guni lyucy urbyay ze' bzeed yu tuuba' moz niy. Tees ni' zi'l yu ze' mnii zi dey niy, nunu bgaaz dey yu, nunu ni' zi'l dzi lay bzuu nez dey yu yay. 12Gaze' nu bzeeda' yu nu guni lyucy urbyay ze' tuuba' moz. Orze' yu ze' pcad güii dey yu, nunu bloo dey yu lat lyucy urbyay ze'. 13’Laab nde' la, orze' na yu nu guni lyucy urbyay ze': “Ze' na, ¿lac gyicya̱? Orze' ya̱ zeeda̱ i'ña̱ nu dzi rca̱ nu chay lo dey. Ca gaal lagy dey loy, gun yu re i'ña̱”, nay. 14Tees ornu de yu ze' bzaac dey i'ñ yu nu guni lyucy urbyay ze', orze' na dey rab yu losa'y: “Yu re gyeñ nuy gyel nap ni uz yu. Yaa der chan dut nay, gun orze' gyeñ gyel nap ze' ni den”, na dey. 15Orze' bdu' yaa dey yu ze'. Bloo dey yu lat lyucy urbyay ze'. Orze' biit dey yu. ’¿Na lac gyicy yu nu guni lyucy urbyay ze' nu de yu nu mnuuz coz cyaal ze' rsa' lagy der? 16Na chay cut yu dela yu nu mnuuz coz cyaal ze'. Orze' zeeñ yu lyucy urbyay ze' yaa reña' mbecy ―nam rab mi dey. Na ornu güeñ dey de coz nu mniim ze', orze' na dey: ―¡Cue' nu ni gac ñii! ―na dey. 17Orze' Jesuuz bgüiim lo dey. Orze' nam rab mi dey: ―Beni lac mod yaruu de riidz ni Ñgyoozh ze' nu rniiñ: Gyita' nu mne' biryu, byac ñi gyita' nu ricy zir ñi presis rniiñ. 18Cyu zi'l mbecy nu gyes saa lo gyita' ze', orze' gzug lay. Ze' benu gyita' ze' gyet lag ñi too ca na mbecy, orze' gyagyez la mbecy ze' ―nam. 19Orze' de uz zub lo gal nu de yu nu rlyuu leey ni Ñgyoozh ngulagy dey ngu' yaa dey Jesuuz laab or la ze', gun gud lagy dey nu lo dey pcaam ornu mniim riidz tiily ze'. Tees wancu' yaa dey mi, gun rdzib dey lo de mbecy. 20Orze' psiiñ dey ni Jesuuz. Orze' bzuu nez dey la be mbecy nu chay lom. Orze' mbecy ze' bicy dey tub mod nap par lo Jesuuz, tees gal nu bdu' cuen zi'l dey mi ben a wad mod nu gu' dey mi yaa de yu nu riib ic por cuen ni gubier. 21Orze' na dey rab yum: ―Masht, de̱ ya̱ rad lagy de̱ nu de coz nu rniir gal nu de coz nu rlyuur, nde' coz rishli, nunu wagyicy cuen ru la na tub ga mbecy, sinu rlyuur mod nu rlagy Ñgyoozh nu chu' den nu rishli. 22¿A gruu nap ñi nu griib den tiñ nu rbic dey ni yu nu riib ic de nasyoong, uti waruu nap ñi? ―na dey. 23Tees Jesuuz bi gud lagy mi nu walab nu dutuub la lardoo dey rniiy lom. 24Orze' nam rab mi dey: ―Blyuu der tub tiñ lo̱. ¿Cyu nab ca lo tiñ ii? Nunu ¿cyu nu la ca looñ? ―nam. Orze' na dey: ―Lo César, yu nu riib ic de nasyoong, gal nu nu lay ―na dey. 25Gaze' nu nam rab mi dey: ―Briic der ni yu nu riib ic de nasyoong coz nu nac niy. Nunu briica' der ni Ñgyoozh coz nu nac nim ―nam. 26Orze' wangad mod nu riib dey cyi ic mi nu nac de coz nu mniim lo dela mbecy, sinu se za nu zi'l ic dey yu'y. Orze' wannii ga' la dey. 27Gaze' nu gua la be mbecy saduceo gua güii dey Jesuuz. Na de mbecy saduceo rnii dey nu ornu gat mbecy, orze' wayabañ dey. Orze' nde' nu bdugyi' dey lo Jesuuz. Orze' na dey rab yum: 28―Masht, Moisees pcaay par dela den nu benu tub mbecy gat bicy yu, nunu zeeñ yu mñaay, ze' sac i'ñ mi, orze' mbecy ze' rlagy ñi chelaay mñaa bicy yu nu gut ze' par nu cuic yu i'ñ mi por cuen ni bicy yu yu nu gut ze', na Moisees. 29Orze' bzu gagy mbecy nuy bicy yu. Orze' yu loga la guud mñaay. Orze' gut yu nunu wangyeeñ i'ñ yu ni mñaay. 30Orze' yu cyup ze' pchelaa ga'y mi. Orze' ni' zi'l guta'y, nunu wangyeeñ i'ñ yu ni biñ mñaa ze'. 31Orze' ni' zi'l yu chon pchelaa ga'y nu biñ mñaa ze'. Orze' za' gagy laa dey pchelaay mi. Tees wangyeeñ i'ñ ni tub la dey nim. 32Laab nde' la, orze' biñ mñaa ze' guta'm. 33Na ornu shuub dzi nu gyabañ de mbecy gut, ¿ca na dey ze' gac mñaay biñ mñaa ze'? Gun za' gagy laa dey pchelaay mi ―na dey. 34Orze' na Jesuuz rab mi dey: ―Gyishlombecy ii de yu gyeey, nu de biñ mñaa rchelaa dey losa'y. 35Tees de yu gyeey nu de biñ mñaa nu yad ñi nu gyabañ gri dey tuuba' lo yu, de yu ze' wachelaa ga' dey. 36Gun orze' wata' dey, sinu chu' dey gal nu yu' de anc, nunu gyac dey i'ñ Ñgyoozh nu nac nu gyabañ dey. 37Gun laab Moisees bicy yu nu bi gud lagy na nu gyabañ de mbecy nu bi gut lat de riidz nu bzeeñ yu ni yag nu rca gyi ze'. Lat de riidz ze' mnii Moisees nu Shuaan na nac mi Ñgyoozh ni Abraham, nac mi Ñgyoozh ni Isaac, nunu nac mi Ñgyoozh ni Jacob, rniiñ. 38Gun Ñgyoozh a̱' nac mi Ñgyoozh ni mbecy nu bi bya' lo la, sinu nac mi Ñgyoozh ni mbecy nu gabee zu, gun par mi ze' dela mbecy gabee zu dey ―na Jesuuz. 39Orze' la be de mbecy nu rlyuu leey ni Ñgyoozh nu yu' ze' na dey: ―Masht, tona' la nap mniir ―na dey. 40Gun wancuica' dey baloor nu ngugyi' zir yu lom. 41Orze' Jesuuz nam rab mi dey: ―¿Lagu rnii dey nu Mesías, biñ nu ca lo cuen nu cyid, gruum lat nez Dabi? 42Gun laab Dabi mniiy tub riidz lo libr ni Salmos. Orze' nay: Ñgyoozh nam rab mi Shuaana̱, Gzub ru lugaar ni mbecy nu gya zir zu, par yaa be̱e̱ ii, 43Gashtal gyicy la̱ nu gyicy ru gan losa' yuur, nam, na Dabi. 44Orze' ¿lac mod gruu Mesías lat nez Dabi, benu ub la Dabi rniiy rab yum: “Shuaana̱”, rniiy? 45Orze' dela de mbecy yu' dey rzuub gyidag yu ni Jesuuz. Orze' nam rab mi de yu nu rsya' lom: 46―Cuidad der nu de mbecy nu rlyuu leey ni Ñgyoozh. Gun de yu ze' yet lagy dey chesay nu shab duñ yu, nunu yet lagy dey nu rca lagy mbecy loy ornu rnii nu dey yu lat yagyi'. Nunu gusht ni dey nu gzub yu lo yashily ni de mbecy nu ricy ñi presis nañ yu' nu rsya' mbecy riidz ni Ñgyoozh. Nunu yet lagy dey lugaar ni de mbecy lily ze' nu yu' sa'. 47Tees rboo dey yu' byud. Orze' par nu rsoow su dey lo de coz a̱' nap nu ricy nu dey byud ze', orze' chi rnii nu dey Ñgyoozh. Nde' nu cashtig ily zir gad ni dey ―nam.

will be added

X\