San Lucas 2

1Tiem ze' Augusto, yu nu riib ic de nasyoong, pshes nañ yu tub acta nu mniiy lo dey nu cha boo dey ña'n mbecy dutuub la lugaar nu riib ic yu. 2Nde' tir loga la gua loo dey ña'n mbecy lat nu zu Cirenio riiñ nu riib ic yu de gyedz nu yu' lo yu ni Siria. 3Orze' dela mbecy bya dey ledz yu nu cuic yu ña'n yu. 4Nde' nu See bruuy tub gyedz ni Galilea nu la Nazaret. Orze' yay Beleeng, tub gyedz ni Judea, gun gyedz ze' gul rey Dabi, nunu See nac yu nez Dabi. 5Orze' ze' yay nu cuic yu ña'n yu. Nunu ya nuy Li, fiñ nu bi ca lo cuen nu chelaay. Nunu fiñ ze' bi yu' i'ñ ñi. 6Orze' lat nu rcyiiñ dey Beleeng, orze' pshuub dzi nu gal mdoo. 7Orze' ze' gul mdoo loga niñ. Orze' ptiish ñi mdoo ze' negy. Orze' briñ mdoo ze' nañ tub cano, ze' nu row bañcyug gyizh, gun wangada' lugaar nu ndri dey nañ yu' ni mbecy. 8Na gaab ga Beleeng yu' la be mbecy nu rña shily. Gua la rel rña dey shily niy lat gyish. 9Orze' bruu zac tub anc ni Ñgyoozh lo dey. Orze' pca yaa nu bruu lo Ñgyoozh dub yub la ze' nu yu' dey. Orze' tona' la gudzib dey. 10Orze' na anc ze' rab yu dey: ―Cue' dzib der. Ya̱ yap ne̱e̱ tub riidz nu tona' la nap. Nu nac riidz ze' tona' la gyet lagy dela mbecy. 11Dzi na la gul tub mdoo ledz Dabi. Nunu mi ze' biñ nu co mbañ der. Mi ze' nac mi Mesías, Shuaan na, biñ nu ca lo cuen nu cyid. 12Mod nu gad lagy der nu laab mi, nde' nu gyap der mdoo ze' mbish mi negy rim nañ cano ze' nu row bañcyug gyizh ―na anc ze'. 13Orze' laab or la ze' bruu zac tub nac anc zigy nu bruu gal gyibaa lo tuuba' anc ze'. Orze' ryabic dey gyel mbecy ni Ñgyoozh. Orze' na dey: 14Rlagy ñi gyabic mbecy gyel mbecy ni Ñgyoozh gal gyibaa lugaar nu gya zir zu. Ze' gyishlombecy ii rlagy ñi nu chu' dela mbecy nu gyel ri zu, de mbecy nu gyedzu' lagy mi, na de anc ze'. 15Na ornu de anc ze' ya dey gyibaa, orze' de yu rña shily ze' na dey rab yu losa'y: ―Yaa chan Beleeng, cha güiiñ de coz nu guc, de coz nu mnii Ñgyoozh Shuaan den ―na dey. 16Orze' bicy lal la dey zay. Na ornu bru'ña dey, orze' bzaac dey Li, nu See, gal nu mdoo ze' rim nañ cano. 17Orze' ornu bzaac de yu nu rña shily ze' mdoo ze', orze' byoo dey rishlo dela mbecy de coz nu mnii anc ze'. 18Orze' dela mbecy nu güeñ riidz nu mnii de yu nu rña shily ze' gush dey shcab nu nac ñii. 19Orze' Li pcaa ic ñi dela riidz ze' nunu gush ñi shcab nu nac ñii. 20Orze' de yu nu rña shily ze' yay ryabic dey gyel mbecy ni Ñgyoozh nu nac de coz nu güeñ dey nunu nu nac de coz nu bzaac dey. Gun guc ñi gal nu mnii de anc ze' lo dey. 21Na ornu bza' shuñ dzi nu gul mi, orze' pcaa dey beey nu la sircunsision cuerp nim. Orze' bloo la dey mi Jesuuz. Bloo la dey mi gal nu mnii anc ze' lo Li anzir nu chu' i'ñ ñi. 22Na ornu pshuub dzi nu gyicy dey gal nu rnii leey ni Moisees par nu gyacaacy mbecy lo Ñgyoozh, orze' za nu dey mdoo ze' Jerusaleeng par nu lyuu dey mi lo Ñgyoozh, Shuaan na. 23Ni bicy dey gun lat de riidz ni leey ni Ñgyoozh Shuaan na bi cañ: “Dela de i'ñ gyeey dey, benu mdoo loga la, orze' rlagy ñi zu chu dey yu nu gac yu ni Ñgyoozh, Shuaan na.” 24Orze' briic dey tub gun gal nu bi cañ lo leey ni Ñgyoozh, Shuaan na. Gun ze', nde' cyup begy o cyup culmbu feñ. 25Na tiem ze' zu tub mbecy nu la Simyo̱o̱ Jerusaleeng. Yu ze' tub mbecy nap, nunu tona' la rca lagy yu lo Ñgyoozh, nunu blez yu par ornu shuub dzi nu gruu mbañ de mbecy Israeel. Nunu Espiriit Yon ni Ñgyoozh guc num yu, 26nunu mniim loy nu wat yu anzir nu gzac yu Mesías, biñ nu zuu nez Ñgyoozh nu cyid. 27Orze' mniim loy nu chay nañ yu' nu driib zily mbecy Israeel Ñgyoozh. Orze' ornu de mbel ni Jesuuz bru'ña nu dey mi nañ yu' ze' par nu gyicy dey gal nu rniiñ lo leey, 28orze' Simyo̱o̱ bdu' yaay mdoo ze'. Orze' briic yu gras ni Ñgyoozh. Orze' nay: 29Ñgyoozh, Shuaan de̱, na bi bicy yac ru nu de riidz nu mniir nu segur la gyicy ru. Na ya̱, yu nu ricy coz nu rniir, bi guti ye lagya̱ nu gata̱. 30Gun ya̱ bi bzaac urlo̱ la̱ biñ nu bzuu nez ru nu co mbañ mbecy, 31biñ nu bzur nu bzaac lo de lo la mbecy. 32Mi ze' nam gal nu na tub yaa nu gyicy nu nap zac de mbecy nu walab mbecy Israeel. Nunu nu nac mi ze' gabe gyel lily ni de mbecy nir, de mbecy Israeel, na Simyo̱o̱. 33Orze' uz Jesuuz nu ñaam za nu la ic dey coz nu mnii Simyo̱o̱ nu nac mi. 34Orze' Simyo̱o̱ bdiiñ yu lo Ñgyoozh ni dey. Orze' nay rab yu Li, ñaa Jesuuz: ―Mdoo ii bi zuu lam nu gyicy mi nu nit lo zigy mbecy Israeel nunu gyicya'm nu zigy dey gruu mbañ yu. Mi ii tub muesht nu bruu lo Ñgyoozh. Nunu zigy mbecy cha dey contr nim. 35Gun orze' gabe coz nu rlagy zigy dey gyicy yu nañ lardooy. Tees de nu nde' gyicy nuñ ru gal nu ricy tub mandzicy ri'ñ nu gzub ñi gashtal nañ lardoor ―na Simyo̱o̱. 36Nunu bzu ga' tub biñ mñaa nu rnii por cuen ni Ñgyoozh nu la An. Mi ze' i'ñ Fanuel, tub mbecy nez Aser. Mi ze' tona' la gubel mi. Dzi feñ mi pchelaam. Nunu gagy zi ña'n pcyiiñ num ñgyeem. 37Orze' gut yu. Ze' ochent zub tap ña'n rac nu byeeñ byud mi. Orze' mi ze' rila wancyuum nañ yu' nu driib zily de mbecy Israeel Ñgyoozh. Sinu dzi rel la briib zily mi Ñgyoozh. Nunu pcam ni ub mi nu wangow mi gyit nu rnii num Ñgyoozh. 38Orze' laab or la ze' briic mi gras ni Ñgyoozh. Nunu bzat mi Jesuuz lo dela mbecy nu rbez nu co mbañ Ñgyoozh de mbecy Jerusaleeng. 39Na ornu bi bicy yac dey leey ni Ñgyoozh Shuaan na na, orze' bish cya dey yay Galilea. Ya dey gal ledz gaal yu, tub gyedz nu la Nazaret. 40Orze' Jesuuz zaab raly zir mi, nunu yafert zir mi, nunu ral zir shcab nim. Nunu Ñgyoozh nap guc num mi. 41Na de mbel ni Jesuuz de ña'n la rza dey Jerusaleeng rza dey sa' ni Pas. 42Orze' ornu bi yu' Jesuuz tub ña'n trocyup, gua dey sa' ze' gal mod nu nil ricy dey. 43Na ornu bi bded sa' ze', orze' gush nez dey yay. Ze' Jesuuz byeeñ gam Jerusaleeng. Nunu wangad lagy de mbel nim. 44Guzii dey nu ya Jesuuz lat de' zir mbecy. Bi bza' tub dzi nu zu dey nez. Orze' brugyi' nu ryub dey mi lat de famil nim, nunu lat de mbecy nu yu' lom. 45Tees wangyad mi ni dey. Orze' bish cya ga' dey yay laaba' Jerusaleeng nu yub dey mi. 46Na ornu bza' dzi chon, orze' byad mi ni dey zub mi nañ yu' nu driib zily mbecy Ñgyoozh nu de yu nu rlyuu leey ni de mbecy Israeel. Rzuub gyidag mi ni dey, nunu rgugyi'm lo dey. 47Nunu dela de yu nu reñ de riidz nu rniim za nu la ic dey nu nac nu dzi lily rniim. 48Ornu bzaac de mbel nim mi, za nu la ic dey. Orze' ñaam nañ rab ñim: ―Fiñ nguzh, ¿lagu ni bicy nur de̱? Uz ru nu ya̱ tona' la deet guc nañ lardo̱o̱ de̱ nu ryub de̱ ru ―nam. 49Orze' na Jesuuz rab mi ñaam: ―¿Lagu ryub der ya̱? ¿A wagad lagy der nu ya̱ rlagy ñi nu cui̱ nañ yu' ni Ñgyoozh uza̱? ―nam. 50Tees wangyet lag dey cuen de coz nu mniim. 51Orze' Jesuuz bish cya ga'm num dey yam Nazaret. Ze' pcyiiñ mi nunu bzuub gyidag mi dela coz nu mnii dey. Orze' ñaam pcaa ic ñi dela coz nu guc ze'. 52Orze' Jesuuz zaab raly zir mi. Raly cuerp nim, nunu ral shcab nim. Orze' Ñgyoozh bet lagy mi nu nac mi, nunu ni' zi'l mbecy bet lagy dey nu nac mi.

will be added

X\