San Lucas 19

1Orze' Jesuuz gu'm gyedz Jericó. Orze' brugyi' nu rded mi gyedz ze'. 2Laab gyedz ze' zu tub mbecy nu la Zaqueo. Yu ze' riib ic yu de mbecy nu rboo tiñ por cuen ni gubier Rom. Nunu tona' la guani'ñ yu. 3Orze' yu ze' rlagy yu zac yu Jesuuz, tees wangac gun dzi yu' mbecy. Nunu Zaqueo dzi shub yu. 4Nde' nu gush yu carer zay par lo. Orze' par nu rlagy yu gad mod nu gzac yum, orze' gup yu lo tub yag garee ze' nu ded mi. 5Na ornu bded Jesuuz gyi' yag ze', orze' pshes nañ lom bgüiim par ic. Orze' nam: ―Zaqueo, dzach ru bet, gun na rlagya̱ gyeche̱ yu'r ―nam. 6Orze' Zaqueo dzach bet yu. Orze' dub gal rii la lagy yu mniiy nu gyam yu'y. 7Na ornu bzaac de mbecy na, orze' dela dey brugyi' rnii zi dey ni Jesuuz. Orze' mnii dey nu a̱' nap ricy mi, gun cyiiñ mi lo tub mbecy cyi. 8Orze' Zaqueo wes suy. Orze' nay rab yu Shuaan na Jesuuz: ―Shuaana̱, lo dela coz nu yu' ne̱, ya̱ grica̱ cyaal ni de mbecy zi, nunu benu ya̱ bicy gubaana̱ coz ni ca na tub mbecy, orze' tap tant gyabica̱ niy ―nay. 9Orze' na Jesuuz: ―Dzi na gruu mbañ de mbecy nu yu' yu' ii. Nunu gaza' mbecy ii nac yu nez Abraham. 10Gun ya̱, biñ nu byac mbecy, yapa̱ gyishlombecy par nu yuba̱ de mbecy nu bdune', nunu par nu gloo mbaña̱ dey ―nam. 11Orze' de mbecy ze' rzuub gyidag dey de coz nu rnii Jesuuz. Orze' brugyi' rniim tub riidz tiily lo dey, gun lugaar ze' gaab ga Jerusaleeng, nunu de mbecy ze' mnii too dey nu laab or la ze' cyid gyel gubier ni Ñgyoozh. 12Orze' nam rab mi dey: ―Bzu tub mbecy. Orze' yu ze' famil ni rey. Orze' mbecy ze' bruuy zay tub lugaar zet. Zay gashtal tuuba' nasyoong par nu gac yu rey ni de mbecy nu yu' lugaar ze'. Orze' grii ga'y ledz yu ze' nu bruuy. 13Orze' anzir nu chay, orze' bredz yu tii moz niy. Orze' bzeeñ yu tub nac gaa la tiñ yaa tub ga dey. Orze' nay rab yu dey: “Gyicy der dalje̱z nu de tiñ nu brica̱ ni der ii gal shuub la dzi nu cush cya̱ tuuba' tir”, nay rab yu de moz niy. 14Na lugaar ze' nu zay nu gac yu rey ze', de mbecy ze' wangyet lagy dey yu. Orze' bzuu nez dey la be mbecy nu chay lo rey ze' nu cha niiy: “De̱ ya̱ walagy de̱ nu mbecy ii gac yu rey ne̱ de̱”, na dey. 15’Tees yu ze' gu'y nu gac yu rey. Gaze' nu bish cya ga'y briy ledz yu. Na ornu briy na, orze' bredz yu de moz niy, de yu nu bzeeñ yu tiñ yaa ze', par nu gad lagy yu la be bicy tub ga dey gan. 16Orze' bru'ña mbecy loga la. Orze' nay: “Tiñ nu bzeeñ ru lo̱, nde' byañ ñii. Byac ñi tii tant”, nay. 17Orze' rey ze' nay rab yuy: “Nap tona' la bicy ru. Ru nac ru tub moz nap. Par nu ru bicy paar nur ñumiiñ, orze' nde' nu gyicya̱ nu ru gyub ic ru tii gyedz”, na rey ze'. 18Orze' bru'ña tuuba'y. Orze' nay: “Shuaana̱, byañ tiñ nir. Byac ñi gaay tant”, nay. 19Orze' na rey ze' rab yu moz niy: “Ya̱ gyicya̱ nu ru gyub ic ru gaay gyedz”, nay. 20’Orze' bru'ña tuuba'y. Orze' nay: “Shuaana̱, ii yap du̱ tiñ nir. Bdu' choowa̱ ñii nañ tub bay. 21Gun ya̱ gudziba̱ lor, gun ru nac ru mbecy cyigy lardoo, gun ru gyash ru coz nu walab nir, nunu ru rte'r ze' nu walab ru rnuuz ru”, nay. 22Orze' rey ze' nay: “Moz a̱' nap, nu nac riidz nu rniir ya̱ ne̱e̱ nu yu' falt nir. Benu rad lagy ru nu naca̱ mbecy cyigy lardoo, benu rad lagy ru nu gyasha̱ coz nu walab ne̱, benu rad lagy ru nu rte̱' ze' nu walaba̱ mnuuza̱, 23¿orze' lagu wancha nur tiñ ne̱ nañ banc? Orze' ornu ya̱ nri̱ yu̱', orze' ñgyabic ru ne̱ nu i'ñ ñi”, na rey ze'. 24Orze' na ga' rey ze' rab yu de' zir mbecy nu yu' lugaar ze': “Bloo der tiñ niy. Orze' briic der ñii ni yu nu bicy gan tii tant”, nay. 25Orze' na dey: “Shuaan de̱, yu ze' bi ricy cup yu tii tant”, na dey. 26Orze' na rey ze' rab yu dey: “Tees ya̱ rne̱e̱ lo der nu yu nu ricy cup sheñ, sheñ zir gad niy. Tees yu nu sac ni, gashtal coz miiñ nu ricy cup yu gruuñ niy. 27Na de losa' yu̱u̱, de yu nu wangalagy nu gaca̱ rey ni ze', da nu der yu ii. Orze' biit der yu ii lo rgüi̱i̱ la̱”, nay ―na Jesuuz. 28Na ornu blazh mniim de coz ze' na, orze' gush neza'm zam par Jerusaleeng. 29Orze' bru'ñam tub lugaar gaab ga tub gyedz nu la Betfagé nu tuuba' gyedz nu la Betania. Lugaar ze' gaab ga bicy ni Ya Oliva. Orze' ze' bzuu nez mi cyup de yu nu rsya' lom nu cha ga dey lom. 30Orze' nam rab mi dey: ―Gua der gal gyedz mi' nu ri par lo ze'. Orze' ornu gru'ña der lugaar ze', orze' gyap der tub bur ca cuñ ma, bañ nu nigul gyub la mbecy. Orze' shaagy der ma. Gaze' nu cyid nu der ma. 31Benu ca na mbecy niiy lo der: “¿Lagu rshaagy der bur ze'?” niiy, orze' nii der, “Shuaan na cyiiñ ma nim”, nii der ―nam. 32Orze' de yu nu rsya' lom gua dey, nunu byap dey bur ze' gal nu mnii Jesuuz. 33Na lat nu rshaagy dey bur ze', orze' na yu nu guni ma rab yu dey: ―¿Lagu rshaagy der bur ze'? ―nay. 34Orze' de yu ze' nay: ―Shuaana̱ cyiiñ ma nim. Nde' nu rshaagy de̱ ma ―na dey. 35Orze' gaze' nu za nu dey ma lo Jesuuz. Gaze' nu briib dey shab yu ich ma. Orze' pshup dey mi ich ma. 36Orze' lat nu zaab za lam, orze' de mbecy rcuaa dey shab yu nez nu zam. 37Na ornu bru'ñam gaab ga ze' nu gyet nez par gyi' bicy ni Ya Oliva, orze' dela mbecy nu za ca ich mi brugyi' nu rbish ti dey nu yet lagy yu. Nunu ii ryabic dey gyel mbecy ni Ñgyoozh nu nac de nusuriidz nu bzaac dey nu bicy mi. 38Orze' na dey: ―¡Dzi ni biñ nu bzuu nez Ñgyoozh nu gac rey ni den! ¡Dela anc nu yu' gyibaa nap zu lagy dey! ¡Rlagy ñi gyabic den gyel mbecy ni Ñgyoozh, biñ nu gya zir zu! ―na dey. 39Orze' la be mbecy fariseo nu yu' lat de mbecy zigy ze' na dey rab yu Jesuuz: ―Masht, bdza' ni de mbecy nu yad ca ich ru ―na dey. 40Orze' nam rab mi dey: ―Ya̱ ne̱e̱ lo der nu benu de yu ii gari dey nu cush tiy, orze' gashtal de gyita' ii cush tiñ ―nam. 41Na ornu bi rgaab rim Jerusaleeng, orze' bgüiim par lat gyedz. Orze' ruun mi nu nac de mbecy ze'. 42Orze' nam: ―¡Dzi ga nap bicy na nu ru gyet lag ru cuen ni de riidz nu cuic gyel ri zu dzi na! Tees wagyet lag ru cuen ni de riidz ze'. Orze' wac zac ru gyel ri zu. 43Na cyid tub dzi nu gri lo' de losa' yuur. Orze' soow dey dela nez nu ruu der. Orze' dub yub la shet yaa dey ru. 44Orze' gnit lo za' la dey ru. Cut dey de mbecy ledz ru. Nunu ni tub gyita' wazeeña' dey ñi too losa'ñ. Ni zac ru, gun wancu' lor Ñgyoozh ornu biid mi nu co mbañ mi ru ―na Jesuuz. 45Na ornu blazh nde' na, orze' gaze' nu gu' Jesuuz nañ yu' nu driib zily mbecy Israeel Ñgyoozh. Orze' brugyi' rboom de mbecy nu nguaa rut nañ yu' ze'. 46Orze' nam rab mi dey: ―Lat de riidz ni Ñgyoozh rniiñ: “Yu' ne̱ gruu lañ yu' nu gnii nu mbecy ya̱. Ze' de ru ricy der ñii nu nañ gal na tub blyuu ni gubaan”, rniiñ ―nam. 47Orze' de dzi la Jesuuz rlyuum ni de mbecy nañ yu' nu driib zily dey Ñgyoozh. Orze' de yu zub lo ni uz, gal nu de yu nu rlyuu leey, gal nu de yu zub lo ni de mbecy gyedz, gusa dey nu ryub dey lac mod cut dey mi. 48Tees wangad mod nu ni ñgyicy dey, gun dela mbecy nap rzuub gyidag dey ni de coz nu rniim.

will be added

X\