San Lucas 18

1Orze' Jesuuz mniim tub riidz tiily lo dey, gun orze' glyuum ni dey nu zaab nii nu laa dey Ñgyoozh, nunu cue' shi'ñ dey baloor. 2Orze' nam: ―Tub gyedz bzu tub feez. Orze' ni wanchib lay lo Ñgyoozh, ni wanca lagy yu lo mbecy. 3Nunu laab gyedz ze' bzu tub byud. Orze' bicy cup mi tub gyel cha' ic. Orze' zaab rza lam lo feez ze' nu rgyiiñ mi loy nu gyicy nuy losa' yuum gal nu yad ñi. 4Orze' bi guzañ tiem feez ze' wangalagy yu locyuub yum. Orze' despuees mnii tooy: “Mas ya̱ wacchiba̱ lo Ñgyoozh nunu ni waca lagya̱ lo mbecy, 5tees como byud ii wachecam nu ricy seed mi ya̱, orze' ya̱ locyuuba̱m nu gad gyel fushtiz nim, gun orze' cue' nu zaab cyid lam. Gun benu zaab cyid lam, orze' gyicy mi nu lazh fers ne̱”, mnii tooy ―na Jesuuz. 6Orze' na ga' Jesuuz: ―De ru zuub gyidag der de coz nu mnii feez a̱' nap ze'. 7Beni, ¿walab gaal wabic Ñgyoozh gyel fushtiz ni de mbecy nu bi pcuim, de mbecy nu dzi rel la rnii num? Walab nu dzi tuñ laam. 8Ya̱ rne̱e̱ lor nu dzach cuic mi gyel fushtiz ni dey. Tees ornu ya̱, biñ nu byac mbecy, yapa̱ tuuba' tir, ¿a gyapa̱ mbecy nu ricy cup consuel lo̱ gyishlombecy ii? ―nam. 9Orze' mniim tuuba' riidz tiily ii lo la be mbecy nu ricy nu nac mbecy nap, ze' rgüii naañ yu lo de' zir losa'y. 10Orze' nam: ―Cyup mbecy guay nañ yu' ze' nu driib zily mbecy Ñgyoozh par nu nii nu dey mi. Tub yu nac yu tub mbecy fariseo. Ze' tuuba'y nac yu tub mbecy nu rboo tiñ por cuen ni gubier Rom. 11Orze' mbecy fariseo ze' bzuy mnii nuy Ñgyoozh. Orze' nay: “Ñgyoozh, ya̱ rica̱ gras nir, gun ya̱ walab nu na̱ gal nu na de' zir mbecy. A̱' naca̱ gubaan. A̱' naca̱ mbecy shiñ ricy. A̱' naca̱ mbecy nu ricy cyi nu biñ mñaa. Ni a̱' naca̱ mbecy nu na gal nu na mbecy ii, yu nu rboo tiñ por cuen ni gubier. 12Ya̱ rca̱ ne̱ nu cue' da̱w gyit cyup tir nañ tub sman par nu rzu bicha̱ nu nac ru. Nunu lo tii coz nu ricya̱ gan, rlo̱o̱ tuub ñi nu drica̱ nir”, nay. 13Tees mbecy nu rboo tiñ por cuen ni gubier ze' zet bzuy. Ni wangalagy yu shes nañ loy nu güiiy par baa, sinu pshet yu lyush yu. Orze' nay: “¡Ñgyoozh, gushni ñuu lagy ya̱, gun ya̱ naca̱ mbecy cyi!” nay. 14Orze' na ga' Jesuuz: ―Ya̱ rne̱e̱ lo der nu mbecy nu rboo tiñ por cuen ni gubier ze', Ñgyoozh bicy sulagy mi niy. Orze' yay. Ze' mbecy fariseo ze', Ñgyoozh wangyicy sulagy mi niy. Gun cyu zi'l mbecy nu ricy zily ub yu, yu ze' gruu gyel mbecy niy. Ze' yu nu ricy gyel gyidz ni, yu ze' gyed gyel mbecy niy ―nam. 15Orze' la be mbecy bru'ña nu dey yu nguzh mi' lo Jesuuz par nu gal yaam dey. Na ornu bzaac de yu nu rsya' lom, orze' brugyi' rdza' dey ni de mbecy nu yad nu de yu nguzh mi' ze'. 16Orze' Jesuuz bredz mi dey. Orze' nam rab mi dey: ―Bzaan der nu gyecha' de yu nguzh mi' lo̱. Cue' niir lo dey nu ruu chuy. Gun lugaar ze' nu riib ic Ñgyoozh, nde' lugaar nu yu' mbecy nu na gal nu na de yu nguzh ii. 17Ya̱ rishli rne̱e̱ lo der nu yu nu wazaan nu gyub ic Ñgyoozh gal nu ricy de yu nguzh ii, orze' wac chu'y ze' nu riib ic mi ―nam. 18Orze' tub yu nu riib ic lat de mbecy Israeel nay rab yu Jesuuz: ―Masht nap, ¿la ñuu coz rlagy ñi nu gyicya̱ par nu cui mbaña̱ tub la? ―nay. 19Orze' na Jesuuz rab mi yu: ―¿Lagu rnii ga' ru nu nap ya̱? Ze' cyu zir nu nap, sinu tub zi la Ñgyoozh. 20Ru bi rad lagy ru de coz nu rnii Ñgyoozh nu gyicy yac ru. Cue' gal ru mbecy nu wanchelaar. Cue' cut ru losa'r. Cue' gyicy ru gubaan. Cue' riib ru gyidza too losa'r. Pca lagy lo uz ru, nunu pca lagy lo ñaar ―nam. 21Orze' yu nu riib ic ze' nay rab yum: ―Dela nde' bi bicy yaca̱ ñi nese miiñ la̱ ―nay. 22Na ornu güeñ mi nde', orze' nam rab mi yu: ―Tees ru ricy falt se tub coz nir nu gyicy ru. Yaa cut ru dela coz nu yu' nir. Gaze' nu tiñ ze' cuic ru ni de mbecy zi. Orze' gyibaa gyad gyel nap nir. Gaze' nu cyid ru cyid car icha̱ ―nam. 23Tees ornu güeñ mbecy ze' nu ni mnii Jesuuz, orze' tona' la bicy shniy, gun tona' la guani'ñ yu. 24Na ornu bzaac Jesuuz nu dzi ricy shniy, orze' nam: ―¡Dzi ga biigy nu chu' mbecy guani'ñ lat de mbecy nu riib ic Ñgyoozh! 25A̱' biigy zir ded tub camey gyeegy gyi' tub gyishtiib, gaze' nu chu' tub mbecy guani'ñ lat de mbecy nu riib ic Ñgyoozh ―nam. 26Orze' de mbecy nu güeñ ze' na dey rab yum: ―Beni, ¿cyu gac gruu mbañ, beni? ―na dey. 27Gaze' nu nam rab mi dey: ―Coz nu wagac gyicy mbecy, tees Ñgyoozh gac gyicy mi ñii ―nam. 28Orze' na Bed rab yum: ―Shuaan de̱, de̱ ya̱ bzeeñ de̱ dela coz nu yu' ne̱ de̱ nu yap ca̱ de̱ ich ru ―nay. 29Orze' na ga'm rab mi yu: ―Ya̱ rishli rne̱e̱ lo der nu cyu zi'l mbecy nu bzeeñ la coz ni nu nac gyel gubier ni Ñgyoozh, orze' de yu ze' sheñ zir gyad niy. De yu nu bzeeñ yu', yu nu bzeeñ mñaa, yu nu bzeeñ bicy, yu nu bzeeñ uz, yu nu bzeeñ i'ñ, o la zi'l coz nu bzeeñ dey, 30tees sheñ zir gad niy gyishlombecy ii, nunu tuuba' lo yu ze' gad nu cui mbañ yu tub la ―nam. 31Orze' Jesuuz gua nu reñ mi trocyup de yu nu rsya' lom. Orze' nam rab mi dey: ―Na gyan par gyedz Jerusaleeng, gun orze' gyu' niñ ni dela coz nu pcaa de yu nu mnii por cuen ni Ñgyoozh nu gzac ya̱, biñ nu byac mbecy. 32Gun gu' dey ya̱ yaa mbecy yad. Nunu de yu ze' gubdzaa dey ya̱. Nunu gab zi dey ya̱. Nunu co yeñ dey lo̱. 33Orze' gaaz dey ya̱ nu cuart. Gaze' nu cut dey ya̱. Tees ornu za' dzi chon, orze' gyabaña̱ ―nam. 34Orze' de yu ze' rila wangyet lag dey cuen de nu nde'. Ni wangad lagy dey de coz nu mniim. Tees de coz ze', nde' coz nu wangac gyet lag dey cuen. 35Ornu bi rgaab Jesuuz tub gyedz nu la Jericó, orze' nez nu zam, ze' zub tub mbecy lo ca' nu rgyiiñ yu gun. 36Na ornu güeñ yu nu dzi rded mbecy zigy loy, orze' bdugyi'y ben la coz rac. 37Orze' mnii dey nu Jesuuz, biñ nu bruu Nazaret, yad mi lugaar ze'. 38Orze' brugyi' rbish tiy. Orze' nay: ―¡Jesuuz, nez Dabi, gushni ñuu lagya̱! ―nay. 39Orze' de mbecy nu yad lo bdza' dey niy, gun orze' gariy. Tees orze' rbish ti ga' zir yu. Orze' na ga'y: ―¡Jesuuz, nez Dabi, gushni ñuu lagya̱! ―nay. 40Gaze' nu gusum. Orze' mniim lo dey nu cha tee dey lo ca ze'. Na ornu bru'ñay lom na, orze' nam rab mi yu: 41―¿La coz rlagy ru gyicy du̱ ru? ―nam. Orze' na lo ca' ze' rab yum: ―Shuaana̱, rlagya̱ nu zac nap la̱ ―nay. 42Orze' na Jesuuz rab mi yu: ―¡Na gac gzac ru! Byac ru nu nac nu bicy cup ru consuel lo̱ ―nam. 43Orze' laab or la ze' lo ca' ze' brugyi' rzac yu. Orze' za cay ich Jesuuz, nunu ryabic yu gyel mbecy ni Ñgyoozh. Nunu ni' zi'l dela mbecy nu bzaac de coz nu guc ze' ryabic dey gyel mbecy ni Ñgyoozh.

will be added

X\