San Lucas 16

1Orze' na ga' Jesuuz rab mi de yu nu rsya' lom: ―Bzu tub mbecy guani'ñ. Nunu bzu tub moz nu byub ic de coz niy. Orze' bruu zu tub mbecy briib yu cyi ic moz ze' nu rniit ton yu gyel nap ni patro̱o̱ niy. 2Orze' gaze' nu patro̱o̱ niy ze' bredz yu moz niy. Orze' nay rab yuy: “¿La ñuu riidz zaab nu rnii dey nir? Zeed cuen ru lo̱ de riiñ nu ricy ru, gun na waca' gac ru moz ne̱”, nay. 3Orze' moz ze' bzub yu gush yu shcab: “¿Lac mod gyicy na? Gun patro̱o̱ nin blooy riiñ yaan. Ze' sac fers nin nu gyicy na riiñ ngush, nunu gat loon benu chesan diñ na gun. 4Na la bi rad lagy na la coz gyicy na. Gun orze' gad cyu nu cuic yu' chu'n ornu shuub dzi nu wayicya'n riiñ.” Ni mnii tooy. 5Orze' bredz yu tub ga yu nu zaab tiñ ni patro̱o̱ niy. Gaze' nu nay rab yu yu nu bru'ña loga la: “¿La be zaab ru ni patro̱o̱ ne̱?”, nay. 6Orze' yu nu bru'ña loga la ze' nay rab yuy: “Ya̱ zaaba̱ gal rub tii zu tap gaynal litr asecy niy”, nay. Orze' na moz nu riib ic ze' nay rab yuy: “Ii gyicy nu ta' de nu zaab ru. Gaze' nu zub ru zaar tuuba' nu niiñ nu zaab ru tiiñ zu tub gaynal litr asecy”, nay. 7Na ornu blazh mniiy lo yu ze' na, orze' nay rab yu tuuba' yu nu zaab ni patro̱o̱ niy ze': “Ze' ru, ¿la be zaab ru?”, nay. Orze' yu ze' nay rab yu yu nu riib ic ze': “Tub gaynal bult trig”, nay. Orze' na moz nu riib ic ze': “Ii gyicy nu ta' de nu zaab ru. Orze' zaar tuuba' gyicy nu niiñ nu zaab ru ochent bult trig”, nay. 8Orze' patro̱o̱ niy ze' mniiy nu dzi lily na moz niy par nu dzi bzuy altant. Gun de mbecy nu ricy mod ni cualcyer la mbecy gyishlombecy ii, de yu ze' dzi zir zu dey altant gaze' de mbecy nu ricy mod nu rishli. 9’Ya̱ do̱o̱ rishlor lac mod gyicy nur de gyel nap nir nu yu' gyishlombecy ii. Gyicy nur ñii tub mod par nu gad amig nir. Gun orze' ornu lazh de gyel nap nir, orze' gad mbecy nu nap nii nuy ru ze' nu cyiiñ ru tub la. 10’Gun yu nu ricy paa nu ñumiiñ, orze' ni' zi'l ricy paay nu sheñ. Nunu yu nu wagyicy paa nu ñumiiñ, ni' zi'l wagyicy paay nu sheñ. 11Orze' benu wac gyicy cup mbecy consuel lo der nu nac gyel nap ni gyishlombecy ii, ¿orze' walab gaal gac gyicy cup Ñgyoozh consuel lo der nu nac gyel nap nu rishli? 12Nunu benu wayicy paa der nu suu reña' mbecy, orze' se cyu la cuic la coz nir. 13’Gun ni tub la mbecy nu ricy riiñ wagyicy yu riiñ ni cyup patro̱o̱ niy. Gun benu ni, orze' ga zi lagy yu lo tub yu. Ze' tuuba'y cay yu. O nu gyicy paay nuy tub yu. Ze' güii naañ yu lo tuuba'y. Orze' wac zu bich mbecy nu nac Ñgyoozh, nunu ni' zi'l wac zu bich yu nu nac de gyel nap nu yu' gyishlombecy ii laab tub zi'l tiem ―nam. 14Na ornu güeñ de mbecy fariseo de coz ze' na, como dzi rca dey tiñ, orze' bgubdzaa dey Jesuuz. 15Orze' na Jesuuz: ―De ru lo mbecy zi'l ricy der nu dzi nap ru. Tees Ñgyoozh rad lagy mi la coz yu' nañ lardoo der. Gun de coz nu rzii mbecy nu tona' la sac, par lo Ñgyoozh rila a̱' sac ñi ―nam―. 16’Nese gulas gashtal pshuub la tiem ni Waa nu driib nis mbecy, de mbecy rshaal dey de riidz ni leey ni Moisees, gal nu de riidz ni de yu nu mnii por cuen ni Ñgyoozh. Tees nese tiem ze' rshaal dey de riidz nu sac ni gyel gubier ni Ñgyoozh. Nde' nu na zigy mbecy ricy dey fers par nu chu'y ze' nu riib ic Ñgyoozh. 17’Tees a̱' biigy zir nit lo baa nu gyishlombecy ii, gaze' nu ricy falt nu gyu' ni tub coz mi' ni leey. 18’Benu tub mbecy coy gyicy rishbeey nu zaan yu mñaay, ze' chelaay tuuba' biñ mñaa, orze' yu ze' ricy yu cyi. Nunu yu nu chelaa biñ mñaa nu bzaan ñgyee ze' ni' zi'l ricy yu cyi. 19’Bzu tub mbecy guani'ñ. Nunu tona' la negy ñgyup rzuy. Nunu de dzi la rzu baay. 20Ze' bzu ga' tub mbecy zi nu la Lázaro. Bzu laa gyedz dutuub la cuerp niy. Nunu rzub yu ro' ni guani'ñ ze'. 21Yu ze' rgyish loy nu mas ñuu de coz nguzh nu yet lag lo yu nu goy. Nunu gal de che̱' yecha' ma rle' ma ze' nu ta' gyedz niy. 22Orze' pshuub dzi nu gut mbecy zi ze'. Orze' anc ya nuy yu ze' nu ri gyitoo Abraham. Ni' zi'l yu guani'ñ ze' gut yu. Orze' pcach dey yu. 23’Orze' lat nu ri mbecy guani'ñ ze', ze' nu rza mbecy gut, orze' pshes nañ ic yu bgüiiy zet. Orze' bzaac yu Abraham nu Lázaro yu' dey tublaazh. 24Orze' brish ti nuy Abraham. Orze' nay: “¡Uza̱ Abraham, gushni ñuu lagy ya̱! Orze' zuu nez ru Lázaro nu cyid yu lo̱, gun sal yu too mbiz yu lo nis. Orze' gyicy yu nu gyag lyudza̱, gun tona' la rzac zi̱ lo gyi ii”, nay. 25Orze' na Abraham rab yuy: “Uza̱, bicy nu gyeza' lagy nu ru dzi gusht bzur lat nu gabee mbañ ru. Ze' Lázaro ii dzi shni pcyiiñ yu. Orze' na ya̱ rica̱ consuel niy ii. Ze' ru rzac zir. 26Ze' tuuba' coz, ri tub gyerlas ily cyaal nez par ze' nu ru rir. Orze' benu ca na tub mbecy nu ri ii galagy yu chay par ze' nu ru rir, orze' wac. Nunu ni' zi'l de yu nu ri ze' nu ru rir waca' cyid dey par ii”, na Abraham. 27’Orze' na yu guani'ñ ze': “Beni orze' ya̱ nishba̱a̱ lor uza̱ Abraham nu zuu nez ru Lázaro chay yu' uza̱. 28Gun zu gaay bicya̱. Orze' nii Lázaro lo dey nu gyicy cuidad dey ub yu, gun orze' cue' nu gyed dey lugaar ii ze' nu rzac zi mbecy”, nay. 29Orze' na Abraham: “De yu ze' bi ricy cup dey de riidz nu bzeeñ Moisees, nu de riidz nu bzeeñ de yu nu mnii por cuen ni Ñgyoozh. Orze' rlagy ñi nu gyicy cuen dey ñi”, nay. 30Orze' na yu guani'ñ ze': “Laab ni uza̱ Abraham, tees benu tub mbecy gut gyabañ yu nunu gruu zac yu lat dey, orze' ne' dey dela cyi nu ricy yu”, nay. 31Tees Abraham nay: “Benu wayicy cuen dey de riidz ni Moisees gal nu de riidz ni de yu nu mnii por cuen ni Ñgyoozh, orze' ni' zi'l waguugy lardoo dey mas tub mbecy gut gyabañ yu”, nay ―na Jesuuz.

will be added

X\