San Lucas 15

1Dela yu nu rboo tiñ por cuen ni gubier Rom, gal nu reña' mbecy bdune' becha' dey lo Jesuuz par nu zuub gyidag dey de coz nu rniim. 2Ze' de mbecy fariseo gal nu de yu nu rlyuu leey ni Ñgyoozh rnid ru' dey nu nac mi. Orze' na dey: ―Yu re rnii nuy mbecy cyi nunu row nuy dey gyit ―na dey. 3Orze' Jesuuz mniim riidz tiily lo dey. Orze' nam: 4―Benu ca na de ru zu tub gaynal shily nir, se' dune' tub ma, orze' ¿a walab zeeñ der nobent zuub gaa ma ngush? Orze' gaze' nu cha der cha yub der tub bañ nu bdune' ze' gashtal gyad la ma. 5Na ornu gyad ma na, orze' tona' la gyet lagy der. Orze' riib yeñ der ma gya nur ma. 6Na ornu rir yu'r na, orze' cha te'r de amig nir gal nu de mbecy nu yu' gaab ga. Orze' nii der gab ru dey: “Bet lagy der nur ya̱, gun ya̱ byada̱ shily ne̱, bañ nu bdune'”, nii der. 7Ya̱ rishli rne̱e̱ lo der, cyit zir rac gyibaa nu nac tub mbecy cyi ornu rne'y dela cyi nu ricy yu, gaze' nu nac nobent zub gaa mbecy nap nu walagy ñi nu ne' cyi nu ricy yu. 8’Gyicy peen nu tub biñ mñaa nu ricy cup tii tiñ plat. Orze' dune' tub ñi nim. Orze' ¿la coz gyicy mi? Nu loga la caam gyi candiil nim. Orze' gaze' nu lyuub mi nañ yu' nim. Orze' nap yub mi ñii gashtal gyad lañ. 9Na ornu gyad ñi nim na, orze' cuedz mi dela amig nim, gal nu dela mbecy nu yu' gaab ga. Orze' niim gab mi dey: “Tona' la yet lagya̱ gun bi byada̱ de tiñ nu bdune' ne̱”, niim. 10Orze' ya̱ rne̱e̱ lo der nu tona' la yet lagy de anc ni Ñgyoozh nu nac tub mbecy cyi nu rne'y de cyi nu ricy yu ―nam. 11Orze' Jesuuz mniim tuuba' riidz tiily lo dey. Orze' nam: 12―Zu tub mbecy. Zu cyup i'ñ yu. Orze' yu mi' ze' nay rab yu uz yu: “Tat, cuic ru gyel nap nir nu ya̱ dugyi̱”, nay. Orze' yu ze' blew yu gyel nap ze' niy lat de i'ñ yu. 13Na ornu bi rac la be tiem, orze' yu mi' ze' biit yu dela coz nu bdugyiy. Orze' gush nez yu za nuy tiñ ze' tub lugaar zet. Gashtal tuuba' nasyoong zay. Orze' ze' mniit ton yu dela tiñ niy. 14Na ornu blazh mniit yu dela tiñ niy, orze' biid tub cubiñ ily lugaar ze'. Orze' brugyi' rded yu gyel ran. 15Orze' gua yub yu riiñ lo tub mbecy guledz. Orze' yu ze' bzuu nez yuy chay ranch niy nu cha ñay cuch. 16Orze' yu mi' ze' ngulagy yu ñgyow yu gyid ich zaa nu row cuch ze' par nu dzaa nañ yu. Tees ni tub la mbecy wancuic yu nde' gow yu. 17Laab nde' la orze' mnii tooy: “De moz nu rcyiiñ lo uza̱ rad nu row dey gashtal drusuba' lañ. Ze' ya̱ se nu gat zi'la̱ gyel ran. 18Nde' nu na nap zir cush cya̱ gya̱ yu' uza̱. Orze' ne̱e̱ loy: Tat, ya̱ guch ñii ne̱ lo Ñgyoozh, nunu guch ñii ne̱ lo ru. 19A̱' yada'ñ nu nii dey nu naca̱ i'ñ ru. Orze' na bicy nu ya̱ gal nu ricy nur de moz nir, ne̱e̱ lo uza̱”, rnii tooy. 20Orze' gaze' nu gush nez yu yay lo uz yu. ’Na ornu gabee zet yay, orze' uz yu bzaac yuy. Orze' gushni lagy yuy. Gaze' nu gush nez yu zay za cheel yuy. Orze' bdu' yaay yeñ yu. Orze' bdoy chit loy. 21Orze' yu feñ ze' nay rab yu uz yu: “Tat, guch ñii ne̱ lo Ñgyoozh, nunu guch ñii ne̱ lo ru. A̱' yada'ñ ne̱ nu nii dey nu naca̱ i'ñ ru”, nay. 22Gaze' nu uz yu bicy yu mandaar lo de moz niy. Orze' nay rab yu de moz niy: “Dzach der, gua gyii der negy nu cyit zir na. Orze' zuu der yu negy ze'. Nunu rii ga' der tub bi' yaay. Nunu caa der gyid lab gyi'y. 23Orze' gua tee der chigud, bañ feñ nu re'ñ zir par lo dela ma. Orze' gyicy na sa'. 24Gun i'ña̱ ii nay gal nu na tub mbecy nu bi gut. Tees na byabañ yu. Guc yu mbecy bdune'. Tees na byad yu”, nay. ¡Orze' brugyi' nu ricy dey sa'! 25’Orze' lat ze' i'ñ yu yu gush ze' riy lat naay. Orze' bish cyay yay. Na ornu yay bi rgaab ro' na, orze' güeñ yu nu rlaa musiic. Nunu rulgyi' mbecy. 26Orze' bredz yu tub moz nu ri lo sa' ze'. Orze' bdugyi'y loy la coz rac. 27Orze' moz ze' nay rab yuy: “Bi bri bicy ru. Orze' uz ru bicy yu mandaar nu cut dey tub chigud, bañ feñ nu re'ñ zir par lo dela ma. Gun bicy ru bri nap yu, nunu bri ruub yu”, na moz ze' rab yu yu gush ze'. 28Orze' yu gush ze' tona' la guzi lagy yu. Orze' wangalagy yu ñgyu'y yu'. Orze' gaze' nu uz yu bruuy nu mnishbaay loy nu chu'y yu'. 29Orze' nay rab yu uz yu: “Ru rad lagy ru nu bi guzañ ña'n nu ya̱ ricya̱ riiñ nir. Nunu rila wangyicya̱ nu wazuub gyidaga̱ nir. Tees ru rila wancuic ru ni tub chiib feñ par nu ñgyicya̱ sa' nu de amig ne̱. 30Tees lugaar nu ni ñgyicy nur ya̱, per ca yu re biit ru chigud, bañ feñ nu re'ñ zir par nu gyicy ru sa' nu briy. Ze' yu re mniit ton yu tiñ nir lo de biñ congal”, nay. 31’Orze' na ga' uz yu rab yuy: “A uza, ru dub laa tiem nac nur ya̱, nunu dela coz nu ricy cupa̱, nde' coz nir. 32Tees na dzi nap nu gyicy na sa' nu gyet lagy na, gun bicy ru nay gal nu na tub mbecy nu bi gut. Tees na byabañ yu. Bi bdune'y, tees na byada'y”, nay.

will be added

X\