San Lucas 13

1Orze' laab tiem ze' la be mbecy gua güii dey Jesuuz. Orze' byoo dey rishlom nu Pilato bicy yu nu gut la be mbecy Galilea. Orze' gucan reñ de mbecy ze' nu reñ bañcyug nu briic dey gun lo Ñgyoozh. 2Orze' na Jesuuz rab mi dey: ―¿A rnii too der nu de mbecy nu gut ze' dzi zir nac yu mbecy cyi par de' zir mbecy Galilea, nunu nde' nu ni bzac dey? 3Ya̱ rne̱e̱ lo der nu walab. Nunu benu de ru wane' der dela cyi nu ricy der, orze' ni' de ru gat der. 4¿La coz rnii der nu nac tiiñ zu chon mbecy nu gut ornu bet lag tub yu' gya too dey tub gyedz nu la Siloé? ¿A rash der shcab nu de yu ze' dzi zir bicy dey coz cyi gaze' de' zir mbecy nu rcyiiñ Jerusaleeng? 5Ya̱ rne̱e̱ lo der nu walab, nunu benu de ru wane' der de cyi nu ricy ru, orze' ni' zi'l gat der ―nam. 6Orze' Jesuuz mniim tub riidz tiily lo dey. Orze' nam: ―Bzu tub mbecy. Bzub tub ya las niy. Bzub ñi lat lyucy urbyay niy. Orze' gua güiiy ben a ta' uugy niñ. Tees wangyap yu ni tub uugy niñ. 7Orze' nay rab yu moz niy nu ricy riiñ lat naa ze': “Güii. Bza' chon ña'n zaab ryap la̱ rgüi̱i̱ ya las ii nu ryuba̱ uugy niñ. Tees rila wagyapa̱ uugy niñ. Orze' na pshi'ñ ñi. ¿Gun lagu leew la ricy seed ñi lat naa?” nay. 8Tees yu nu ricy riiñ ze' nay rab yu patro̱o̱ niy: “Patro̱o̱, bzaan zub ñi stub ña'n. Orze' gla̱a̱ yu gyi'ñ. Gaze' nu du̱' abon gyi'ñ. 9Benu ni, orze' cyup ridz cuic ñi uugy. Ze' benu wabic ñi uugy, orze' nap zir gyi'ñ ñi”, nay ―nam. 10Tub tiem, tub sab, dzi nu rzu lagy mbecy, orze' Jesuuz rim nañ tub yu' nu rsya' de mbecy Israeel riidz ni Ñgyoozh rlyuum ni de mbecy. 11Nunu ze' ri tub biñ mñaa nu bi bza' tiiñ zu chon ña'n rat mi. Gun bi bicy ni nuras mi, nunu bicy yu nu brong mi. Orze' rila wangac ñgyu' lim. 12Na ornu Jesuuz bzaac mi biñ mñaa ze', orze' bredz mi biñ mñaa ze'. Orze' nam: ―Biñ mñaa, bi byac ru ni güii nu rat ru ―nam. 13Orze' gaze' nu gul yaam biñ mñaa ze'. Orze' laab or la ze' byu' li cuerp ni biñ mñaa ze'. Orze' brugyi' nu ryabic mi gyel mbecy ni Ñgyoozh. 14Tees yu nu riib ic nañ yu' ze' guzi lagy yu, gun Jesuuz bicy yac mi biñ mñaa ze' sab, dzi nu rzu lagy mbecy. Orze' nay rab yu de' zir de mbecy nu yu' ze': ―Yu' tub shuup dzi nañ tub sman par nu gyicy na riiñ. Orze' lat de dzi ze' cyid der par nu gyicy yac mbecy der. Tees dzi nu rzu lagy mbecy, cue' cyid der par nu gyicy yac mbecy der ―nay. 15Orze' na Jesuuz rab mi dey: ―Der mbecy rzuu lo, ¿de ru walab gaal washaagy der tor nir o bur nir sab, dzi nu rzu lagy mbecy, par nu cha nu der ma nu go' ma nis? 16Ze' biñ mñaa ii, mi ii nez Abraham, nunu bi bza' tiiñ zu chon ña'n nu pcyiig nuras biñ mñaa ii nu güii nu rat mi. Orze' beni ¿a wac gyagy biñ mñaa ii ni güii nu rat mi sab, dzi nu rzu lagy mbecy? ―nam. 17Ornu ni mnii Jesuuz, orze' de losa' yuum tona' la gut lo dey. Tees de' zir de mbecy tona' la bet lagy dey nu nac de coz ily nu ricy mi. 18Orze' na ga' Jesuuz: ―¿La na gyel gubier ni Ñgyoozh? ¿La ñuu coz saapa̱ nu gyel gubier nim? 19Gyel gubier ni Ñgyoozh rac ñi gal nu rac nu tub mbigy ya urnishtas nu rnuuz mbecy lo yu niy. Orze' gaze' nu raly ñi gashtal gyac lañ tub yag ily mas gashtal de chigyiñ rzaa ma teez ma lat yaañ ―nam. 20Gaze' nu na ga'm: ―¿La ñuu coz saapa̱ nu gyel gubier ni Ñgyoozh? 21Gyel gubier ni Ñgyoozh nañ gal nu na lebadur nu gush tub biñ mñaa. Bdu'm ñii lat chon nac arin, gun orze' lebadur ze' cshup ñi dela cub zañ ze' ―nam. 22Na nez nu yam par Jerusaleeng na, orze' blyuum ni de mbecy dela gyedz gal nu dela ranch nu yu' nez nu zam. 23Orze' gaze' nu bruu su tub mbecy. Orze' nay rab yum: ―Shuaana̱, ¿a ñuu zi zi mbecy gruu mbañ yu? ―nay. Gaze' nu nam rab mi yu: 24―Bicy der fers nu chu' der ro' shii, gun ya̱ ne̱e̱ lor tona' la zigy mbecy galagy dey chu'y, tees wac chu' dey. 25Orze' yu guyu' gyeshtey nunu soow yu ro'. Orze' de ru, de mbecy nu yu' par ich gnii der: “Shuaana̱, pshaal ro' ne̱”, nii der. Tees yu guyu' ze' gnii ga'y gab yu de ru: “Ya̱ wagad lagya̱ ca bruu der”, niiy. 26Gaze' nu nii ga' de ru: “Ze' ¿lagu ni rnii ru? Ze' de̱ ya̱ tublaazh la bda̱w du̱ de̱ ru gyit. Nunu tublaazh la bdo' du̱ de̱ ru. Nunu laab ru blyuur ne̱ de̱ lat cay ledz de̱”, nii der. 27Orze' yu guyu' ze' nii ga'y gab yu der: “Ya̱ bi mne̱e̱ lo der nu wagad lagya̱ ca bruu der. Orze' bruu chu der lo̱, der mbecy nu shiñ ricy”, niiy gab yu de ru. 28Orze' ze' gun der nunu siigy lay der ornu zac der Abraham, nu Isaac, nu Jacob, gal nu de' zir de yu nu mnii por cuen ni Ñgyoozh yu' dey ze' nu riib ic mi. Ze' ii de ru bi zu chu der par ich. 29Gun cyid mbecy nu gruu gaza' dela lugaar ni gyishlombecy nu gzub dey lo mez nu gow dey gyit ze' nu riib ic Ñgyoozh. 30Orze' la be de mbecy nu gash zir zu na, de yu ze' gyac yu yu nu gya zir zu par lo, nunu la be de mbecy nu gya zir zu na, de yu ze' gyac yu yu nu gash zir zu par lo ―nam. 31Gaze' nu bru'ña la be de mbecy fariseo. Orze' na dey rab yu Jesuuz: ―Gua la ru, gun Herodes rlagy yu cut yu ru ―na dey. 32Gaze' nu nam rab mi dey: ―Gua der gua niir lo mbecy rguu ze' nu na gal nu ina ya̱ lo̱o̱ chu̱ nuras nu bicy ni mbecy, nunu gyicy yaca̱ mbecy rat. Orze' widz na, gya' lo de riiñ nu ricya̱. 33Rlagy ñi zab za̱ la̱ nez dzi na, nu ina, nu widz na. Gun walab se'ñ nu gat tub mbecy nu rnii por cuen ni Ñgyoozh reña' lugaar par Jerusaleeng. 34’¡A der mbecy Jerusaleeng! Rut der de mbecy nu rnii por cuen ni Ñgyoozh. Nunu rgoow gyita' der de mbecy nu rzeed Ñgyoozh lat der. Zañ tir ngulagya̱ ñgyicy tublaazha̱ der gal nu ricy tub gyid ornu ricy tublaazh ma dzich ni ma nañ lowe' ma. Tees de ru wangalagy der. 35Na ledz der gyiyeeñ ub ziñ. Gun ya̱ ne̱e̱ lo der nu wazaca' la der ya̱ gashtal shuub la dzi nu nii der: “Dzi ga zily nac biñ nu bzuu nez Ñgyoozh Shuaan na, biñ nu cyid lo den”, nii der ―na Jesuuz.

will be added

X\