San Lucas 1

1Zigy mbecy gush dey riiñ nu caay de coz nu guc lat den 2dub gal nu na de riidz nu bzeeñ de yu nu bzac urlo la de coz ze' nese nu bzub la gyi'ñ, de riidz nu bzeeñ de yu nu bzu riiñ nu tush las yu de riidz ze'. 3Nde' nu ru, shi Tioj, como ya̱ nap bdugyi̱' nu nac dela coz ze', orze' ya̱ rze̱e̱ nu nap benu ca̱a̱ dela coz ze' lo gyicy, tub ga la riidz nu lugaar niñ. Orze' zeeda̱ ñii nir. 4Gun orze' gad lagy ru nu rishli dela coz nu bdulyuu nir. 5Orze' tiem nu guc Herodes rey ni de gyedz nu yu' lo yu ni Judea, bzu tub uz nu la Zacarí. Orze' yu ze' byeeñ yu lo tub nac uz nu rnii dey uz ni Abías. Ze' mñaay lam Bee. Gaza' mi ze' nac mi nez Aroong. 6Orze' rup laa dey bicy dey coz nu se'ñ par lo Ñgyoozh. Bicy dey dela coz nu mniim lo leey nim. Orze' ni tub la mbecy wangac nii dey nu yu' falt niy. 7Tees sac i'ñ dey, gun Bee wangac chu' i'ñ mi. Nunu rup laa dey bi gubel yu. 8Orze' tub tiem de uz nu nac nu Zacarí briic dey sman niy. Orze' gaza' Zacarí bzuy riiñ lo Ñgyoozh. 9Orze' de uz blooy cuen ich cushtom ni dey, nunu laaba' Zacarí bdugyiy nu chu'y nañ yu' nu driib zily mbecy Ñgyoozh, Shuaan na, par nu zu dzeeñ yaal yu. 10Na lat nu rzu dzeeñ yaal yu, orze' dela mbecy nu rca Ñgyoozh lugaar ze' byatublaazh dey ich yu' ze' nu nii nu dey mi. 11Orze' lat ze' bruu zac tub anc ni Ñgyoozh lo Zacarí gusuy par bee mez ze' nu zub psi'ñ yaal. 12Orze' ornu bzaac Zacarí anc ze', orze' lorgut lay. Orze' tona' la gudzib yu. 13Tees anc ze' nay rab yu Zacarí: ―Cue' dzib ru Zacarí, gun Ñgyoozh “O” mniim gush mi de riidz nu mniir lom, nunu mñaar, Bee, gaal mi tub mdoo. Ze' mdoo ze' co lar yu Waa. 14Orze' tona' la chesu cyit lagy ru nu nac yu, nunu zigy mbecy gyet lagy yu nu nac nu gal mdoo ze'. 15Gun yu ze' gac yu tub yu lily par lo Ñgyoozh. Orze' rila wo'y ñup ni urbyay. Ni wo'y mashcaly. Ni wo'y ni tub la loñ. Nunu Espiriit Yon ni Ñgyoozh bi riib ic za' lam nañ lardooy nese anzir nu gal yu. 16Orze' yu ze' gyicy yu nu zigy mbecy Israeel ca dey Ñgyoozh, Shuaan dey. 17Orze' yu ze' chay riiñ ni Ñgyoozh anzir nu cyid Shuaan na. Fert gyicy yu riiñ nim gal nu bicy Elías, yu nu mnii por cuen nim. Gun orze' gyicy yu nu gyanap riidz ni de mbecy nuy i'ñ yu, nunu gyicy yu nu sya' de mbecy nu rnid ru' lo de mbecy nap. Orze' ni mod gac par nu zu lily yu de mbecy par ornu cyid Shuaan na ―na anc ze'. 18Orze' na Zacarí rab yu anc ze': ―¿Lac mod gad lagya̱ nu gac ñii gal nu mniir? Gun ya̱ dzi byabela̱. Nunu ni' zi'l mña̱a̱ ―nay. 19Orze' na ga' anc ze': ―Ya̱ naca̱ Gabrieel. Ya̱ zu̱ lo Ñgyoozh. Nunu mi ze' bzuu nez mi ya̱ nu yap ne̱e̱ du̱ ru nunu rica̱ nu gad lagy ru de riidz nap nu mne̱e̱ ze'. 20Orze' na, como wancheña lagy ru de riidz nu mne̱e̱ lor, de riidz nu segur la gac, orze' nde' nu gyac ru mbecy gop. Wac niir gashtal shuub la dzi nu gyu' ni de riidz nu mne̱e̱ ―na anc ze'. 21Lat ze' yu' de mbecy rbez yu Zacarí ich yu'. Gush dey shcab ben lagu dzi blaay nañ yu' ni Ñgyoozh. 22Na ornu bruuy nañ yu' ze', wangaca' niiy. Orze' gud lagy dey nu bde' loy nañ yu' ze', gun bicy yaay lo dey. Nunu ni la mod nay byeeñ yu. Wangaca' niiy. 23Na ornu pshuub dzi niy bruuy sman, orze' yay yu'y. 24Orze' despuees ni de nu nde', orze' gu' i'ñ mñaay Bee. Orze' nañ gaay beey wancyuu lam yu'm. Orze' mnii toom: 25“Ni bicy nu Ñgyoozh ya̱, gun orze' na cue' güii naañ mbecy lo̱ par nu sac i'ña̱”, mnii toom. 26Na ornu bi bza' shuup beey nu yu' i'ñ Bee, orze' Ñgyoozh bzeed mi Gabrieel, yu nu nac anc nim, zay Nazaret, tub gyedz nu ri lo yu ni Galilea. 27Zay lo tub fiñ feñ nu nigul dzeel yu gyeey. Fiñ ze' lañ Li. Fiñ ze' bi guc nap niñ nu chelaañ See, tub mbecy nu bruu lat nez rey Dabi. 28Orze' gu' anc ze' ze' nu zub ñi. Orze' nay rab yuñ: ―¡Shnur! ―nay―. Ñgyoozh nac num ru, nunu tona' la nap gyicy mi num ru ―nay. 29Orze' ornu bzaac ñi anc ze', tona' la deet guc nañ lardooñ nu nac riidz nu mniiy. Orze' gush ñi shcab ben lac mod yaruu riidz nu mniiy loñ. 30Orze' na anc ze' rab yuñ: ―Li, cue' dzib ru, gun Ñgyoozh bi psa' lagy mi nu nap gyicy num ru. 31Ru chu' i'ñ ru. Orze' gaal ru tub mdoo gyeey. Orze' co lar mi Jesuuz. 32Mi ze' gac mi tub biñ lily. Nii dey nu “Mi ze' i'ñ Ñgyoozh biñ nu gya zir zu”, nii dey. Orze' Ñgyoozh gyicy mi nu gac mdoo ze' nir rey lugaar ni gyitoo bel nim Dabi, 33gun orze' gyub ic mi de nez Israeel tub la, nunu rila wayeca nu gyub ic mi den ―na anc ze'. 34Orze' na ga' Li: ―¿Lac mod chu' i'ña̱ ze' rila nigul dzeela̱ biñ gyeey? ―nañ. 35Orze' na ga' anc ze': ―Espiriit Yon ni Ñgyoozh gyet mi nu gac num ru. Nunu Ñgyoozh, biñ nu gya zir zu, tona' la coz ily gyicy mi lat nu gac num ru. Nde' nu mdoo nir nu gal gac mi mbecy yon, tub mbecy nu nii dey “I'ñ Ñgyoozh”, nii dey. 36Ni' nis ru, Bee, gaal mi tub mdoo mas byabel mi. Biñ nu rnii dey nu wagac chu' i'ñ, mi ze' bi bza' shuup beey nu yu' i'ñ mi, 37gun Ñgyoozh gac gyicy mi dela coz ―na anc ze'. 38Orze' na Li: ―Ya̱ naca̱ tub fiñ feñ nu ricy de coz nu rlagy Ñgyoozh. Orze' Ñgyoozh gyicy num ya̱ gal nu mniir ―naañ. Orze' laab nde' la bruu anc ze' yay. 39Laab tiem ze' bruu Li ze' nu rcyiiñ ñi zañ carer tub gyedz nu ri tub logyi' ni Judea. 40Na ornu bru'ñañ, orze' gu'ñ nañ yu' Zacarí. Orze' mnii nuñ Bee ñgyoozh. 41Na ornu güeñ Bee riidz nu mnii Li, orze' pcueñ mdoo nañ mi. Orze' briib ic za' la Espiriit Yon ni Ñgyoozh mi. 42Orze' ye la mniim: ―¡Nap zir gyicy nu Ñgyoozh ru gaze' de' zir biñ mñaa! ¡Nunu ni' zi'l nap gyicy num mdoo nir! 43¿Cyu guc ya̱ par nu cyid güii ñaa Shuaana̱ ya̱? 44Cuanzir nu güeña̱ nu mnii nur ya̱, orze' pcueñ mdoo naña̱ nu dzi bet lagy ñi. 45Dzi nir nu guña lagy ru nu gyu' niñ gal nu mnii Ñgyoozh, Shuaan na ―na Bee. 46Orze' na Li: Ya̱ gyabica̱ gyel mbecy ni Ñgyoozh nu dutuub la lardo̱o̱. 47Tona' la yet lagya̱ nañ lardo̱o̱ nu nac Ñgyoozh, biñ nu co mbañ ya̱. 48Gun mi ze' bdu' cuen mi ya̱, tub fiñ feñ nu ricy coz nu rlagy mi. Bzaac mi nu naca̱ tub mbecy shni. Orze' zigy mbecy nu yad par lo nii dem nu ya̱ naca̱ tub fiñ feñ nu dzi ni. 49Gun Ñgyoozh, biñ nu gac gyicy dela coz, mi ze' tona' la coz ily ricy num ya̱. ¡Mi ze' tona' la yon mi! 50Dub laa tiem nap ricy num de mbecy nu rca lagy lom. Tant de mbecy ze' nap ricy num, tant i'ñ dem nu gruu zac par lo nap gyicy num. 51Coz ily ricy mi nu nac nu dzi fert mi. Mas la zi'l coz nu rboo ic mbecy le', tees ptush las mi dem. 52Mi ze' bloom riiñ nu zu biñ nu nac rey. Tees laagy nañ mi de mbecy shni. 53Cuic mi coz nap gow mbecy ran gashtal dzaa la nañ dem. Ze' mbecy guani'ñ, zuu nez mi dem gyam ñgyi'ñ yaam. Ni wabic lam coz nu gow dem. 54Blocyuub mi de mbecy Israeel, de biñ nu ricy coz nu rniim. Nunu wanit lagy mi nu nap gyicy num dem par nu rashni lagy mi dem. 55Bicy num Abraham gal nu dela nez mi gal nu mniim lo de gyitoo bel ni den nu segur la gyicy mi. Ni mnii Li. 56Orze' Li pcyiiñ nuñ Bee tub chon beey. Orze' bruuñ yaañ yu'ñ. 57Na ornu pshuub dzi nu gaal Bee mdoo, orze' gul tub mdoo gyeey. 58Orze' ornu de mbecy nu rcyiiñ num garee ga, gal nu dela famil nim bzaac dey nu nap bicy nu Ñgyoozh mi, orze' bet lagy dey nuy mi. 59Orze' ornu bza' shuñ dzi nu gul mdoo ze', orze' pcaa dey beey sircunsision cuerp ni mdoo ze'. Orze' bicy pee dey mboo la dey yu laaba' gal nu la uz yu, Zacarí. 60Tees ñaa mdoo ze' nam: ―¡Cue'! Rlagy ñi loo lan ñi Waa ―nam. 61Orze' na dey rab yum: ―Sac ni tub la famil nir nu ni lay ―na dey. 62Orze' bicy yaa dey lo Zacarí par nu gad lagy dey lac rlagy yu gruu la mdoo niy. 63Orze' bdiiñ yu tub la' yala nu caay loñ. Orze' dela mbecy tona' la za nu ic dey ornu bzaac dey nu pcaay: “Yu ze' gruu lay Waa”, pcaay. 64Orze' laab or la ze' briib rishniiy tuuba' tir. Orze' brugyi' ryabic yu gyel mbecy ni Ñgyoozh. 65Orze' dela de mbecy nu yu' nuy garee tona' la gudzib dey. Orze' dutuub la logyi' ni Judea bzu riidz de coz nu guc. 66Orze' dela mbecy nu güeñ riidz ze' gush dey shcab nu nac ñii. Orze' na dey rab yu losa'y: ―¿Ben cyu gac yu nguzh ze'? ―na dey―. Gun rishli gaal rabee nu ricy Ñgyoozh coz ily num yu ―na dey. 67Orze' Espiriit Yon briib ic za' lam Zacarí, uz mdoo ze'. Orze' brugyi' rniiy por cuen ni Ñgyoozh. Orze' nay: 68¡Rlagy ñi gyabic na gyel mbecy ni Shuaan na, biñ nu nac Ñgyoozh ni de mbecy Israeel! Gun biid mi nu co mbañ mi dela mbecy nim. 69Bzuu nez mi tub biñ fert nu co mbañ de ub na. Mi ze' laaba' nez Dabi, yu nu bicy de coz nu rlagy mi. 70Gulas mniim nu ni gyicy mi nu nac de riidz nu bzeeñ de yu nu mnii por cuen nim. 71Nunu mniim nu com de ub na yaa losa' yuun nu yaa de yu nu rzi lagy lon. 72Ni bicy mi par nu mniim nu nap gyicy num de too bel ni den. Gun wannit lagy mi trat yon nim. 73Nunu trat ze', nde' riidz nu mniim lo gyitoo bel ni den Abraham nu segur la gyicy mi. 74Riidz ze' rniiñ nu gyicy mi nu glan lo de losa' yuun, gun orze' wadzib la den gyicy den coz nu rniim, 75nunu gun orze' cuin lom como nac naa mbecy nu nac nim, nunu mbecy nu bi byanap lom. Orze' cuin lom dutuub la lo yun. 76Ze' ru, i'ña̱, mbecy gnii dey nu ru nac ru tub yu nu gnii por cuen ni Ñgyoozh, biñ nu gya zir zu, gun ru cha gar par lo Shuaan na. Gyicy nap ru nañ lardoo de mbecy gal nu ricy nap dey tub nez ornu ded tub yu lily. 77Gun orze' gad lagy dela mbecy ni Ñgyoozh nu gyicy sulagy mi de cyi dey. Nunu co mbañ mi dey. 78Gun Ñgyoozh ni den, nu nac nu tona' la rashni lagy mi mbecy nim, nde' nu ni gyicy num dey. Gyicy mi nu cyid biñ nu co mbañ mbecy gal nu driib doo. 79Orze' dzi ze' cuic mi yaa ni de mbecy nu yu' ze' nu cow, de mbecy nu ca lo cuen nu gat, gun orze' lyuuñ ni dey ca par gash yu par nu che ti ri añ ni dey, na Zacarí. 80Orze' yu nguzh ze' zaab raly yu, nunu byafert yu nu nac de coz ni Ñgyoozh. Orze' pcyiiñ yu tub lugaar ub zi gashtal pshuub la dzi nu blyuuy ub yu lo de mbecy Israeel.

will be added

X\