San Judas 1

1Ya̱ Judas, bicya̱ Santiag, naca̱ tub mbecy nu ricy coz nu rlagy Jesucrisht. Orze' ya̱ zeeda̱ gyicy ii lo de ru mbecy nu dzi razañ lagy Ñgyoozh, Uz den. Ñgyoozh blosum de ru nu gac nim. Nunu Jesucrisht rñam der nu cue' shiñ zac ru. 2Ñgyoozh gyicy mi nu sheñ coz nap zac der nu nac nu rashni lagy mi der, nunu gyicy mi nu cheti ri añ ni der, nunu rcam de ru. 3De ru, bicya̱ nu dzi rca̱, ya̱ dzi rlagya̱ nu zeeda̱ tub gyicy lo der nu rne̱e̱ lac yaruu nu gruu mbañ den: tant de ru, gal nu ya̱. Tees na rad lagya̱ nu ricy zir ñi presis nu zeeda̱ gyicy ii lo der par nu nishba̱a̱ lo der nu gzu fert der nu nac de riidz ni Crisht nu bzeeñ Ñgyoozh yaa mbecy par tub tir zi'l. 4Gun yu' la be mbecy nu dzi bi rac tiem ca lo cuen nu nit lo dey. Orze' de yu ze' dze ga gu' dey lat de ru nu nac nu bguu dey der. Nac dey mbecy nu za contr ni Ñgyoozh. Par nu nac nu Ñgyoozh ricy mi faboor nu nap ricy num den, orze' nde' nu rzii dey nu gac gyicy yu mas coz to' lo, nunu se la la gac, rzii dey. Nunu rzu chu dey Shuaan den Jesucrisht, biñ nu riib ic de ub na. 5Mas de ru bi rad lagy der, tees rlagya̱ nu gyeza' lagy der nu Ñgyoozh bloom de mbecy nim Egipto nu ya num dey par Israeel. Na ornu bi bloom dey, orze' mnit lom de yu nu wangyicy cup consuel lom. 6Nunu de anc nu wancuez lo riiñ nu briic Ñgyoozh, sinu bruu dey se'y, orze' Ñgyoozh bri noow mi dey tub lugaar ze' nu cow, tub lugaar ze' nu rila wala dey. Orze' ze' cuez dey par ornu shuub dzi nu gri bee Ñgyoozh ni dela mbecy. 7Nunu ni' zi'l gzac de anc ze' gal nu bzac de mbecy Sodoma nu Gomorra, cyup gyedz nu ri tublaazh ga la. De yu ze' pshet ic dey nu ricy yu de cyi bag nu a̱' yad ñi nu gyicy dey nu losa'y, nunu pshet ic dey nu gyicy yu cyi nu zañ contr ni mod nu psa' lagy Ñgyoozh nu gyicy yu. Nde' nu bzac zi dey nu gyi nu rila wayu. Nde' tub mod nu ryoo Ñgyoozh rishlo dela mbecy, gun orze' gyicy cuidad dey. 8Tees ni' zi'l mod ricy de mbecy rguu nu gu' dze ga lat der ze'. Pcaal rniiñ lo dey nu lac mod gyicy yu. Orze' ricy dey cyi nu ricy ñi nu rabag cuerp ni dey. Nunu rzuub yaa dey de riidz nu rnii Shuaan den Jesuuz nu gyicy na. Nunu rab zi dey de anc fert. 9Mas Miguel, tub anc zub lo, ornu gush losa'y nuras nu riidz gyi' cuerp ni Moisees, orze' wangash lagy yu niiy nu riidz a̱' nap nu gab yu nuras, sinu mniiy: “Shuaan de̱ niim nu yu' falt nir”, nay rab yu nuras. 10Tees de mbecy ze' rnii zi dey ni de coz nu wagad lagy yu. Ricy dey gal nu ricy bañcyug nu sac shcab ni. La zi'l na coz nu rnii too dey ricy yu. Nde' nu nit lo dey. 11¡Dzi ga cuaa de mbecy ze'! Gun za ca dey ich coz nu bicy Caiing. Orze' nu nac tiñ gudza dey gal nu gudza Balaam. Nunu gat dey gal nu gut Coré ornu guay contr ni Ñgyoozh. 12Ornu tublaazh la row der gyit nu nac nu rca der losa'r, orze' de yu ze' na dey gal nu na tub coz a̱' nap nu ri lat der. Lat ze' row dey nunu ro'y. Nap la zu lagy dey rded yu. Nunu waca bee ti rca lagy dey lo reña' mbecy. Na dey gal nu na yu nu rña shily, tees laab ub zi'l dey ricy cuidad yu ub yu. Na dey gal nu na za nu ta' baa nu a̱' ricy cup nis. Za nu dza la biñ. Na dey gal nu na yag nu wacuic uugy tiem ni. Na dey gal nu na yag nu gut la par nu bruu lyuñ gal lyu lañ. 13Na dey gal nu na de nguuly ni nis nu fert rded lo nisyudoo. Orze' de coz to' lo nu ricy dey, nde' nañ gal nu na bdziñ nu rzeeñ de nguuly ru' nisyudoo. Na dey gal nu na bel baa nu gudza ma nez nu rded ma. Nde' nu Ñgyoozh mniim nu chesa dey ze' nu blaazha' zir cow tub la. 14Ni' zi'l Enoc, yu nu bruu zac gashtal ornu bza' gagy nac nez Adaang, yu ze' ni' zi'l mniiy por cuen ni Ñgyoozh. Orze' bzat yu de mbecy ze'. Orze' nay: “Ya̱ bzaaca̱ nu bi yad Shuaan den. Bi yad num be miily la de anc nim. 15Orze' gri beem ni dela mbecy. Nunu niim lo dela mbecy nu shiñ ricy nu cha dey lo cashtig nu nac dela coz a̱' nap nu bicy yu gyi' nu nac dey mbecy a̱' nap. Nunu cha dey lo cashtig nu nac de riidz a̱' nap nu mnii dey, como nac dey mbecy cyi. Mnii dey de riidz nu gua contr ni Ñgyoozh”, nay. 16De mbecy ze' nac dey mbecy nu rnid ru' lo Ñgyoozh. Nunu nac dey mbecy nu rnii zi nim. Tub lo zi'l nu ryub dey mod nu cha ca dey ich gusht ni ub yu. Nunu driib zily dey ub yu. Nunu driib zily yu losa'y par nu gad mod nu gyicy losa'y gal mod nu rlagy ub yu. 17Tees na de ru bicy na nu dzi rca̱, ca ga ic der de riidz nu mnii de aposht ni Shuaan den Jesucrisht. 18De yu ze' mnii dey: “Ornu bi yad lazh tiem, orze' gruu zac mbecy rgubdzaa. Orze' de yu ze' zaab gyicy la dey de coz nu rlagy ub zi'l yu”, na de aposht. 19De yu ze' gyicy yu nu gyacyup nac mbecy. Gyicy dey de coz nu rlagy ub zi'l yu. Nunu a̱' ricy cup dey Espiriit Yon ni Ñgyoozh. 20Tees de ru, bicy na nu dzi rca̱, bzu fert der nu consuel nu ricy cup ru, como nde' consuel nu bruu lo Ñgyoozh. Mnii nu der Ñgyoozh dub gal mod nu rnii Espiriit Yon nim nañ lardoo der. 21Pcyiiñ der gyishlombecy ii gal mod nu rlagy Ñgyoozh, gun orze' nap gyicy num de ru nu nac nu rcam der. Blez der ornu shuub dzi nu Shuaan den Jesucrisht gyicy mi nu cui mbañ den tub la. Ni gyicy mi par nu rashni lagy mi de ub na. 22Gushni lagy der de mbecy nu ricy cyup ic. 23Gac gyicy der nu gruu mbañ la be de yu ze'. Nde' nañ gal nu na nu cor dey lo lyush gyi. Nunu gushni ga' lagy der de' zir dey. Nomaas nu bicy cuidad der ub ru nu nac de yu ze'. Nunu güiñ lagy der lo de cyi nu ricy dey. 24Orze' Ñgyoozh, biñ nu tub zi la zu, biñ nu co mbañ de ub na, mi ze' cyiiñ mi nu ñam de ru, gun orze' cue' gyet lag der lo cyi. Nunu cyiiñ mi nu gu'm de ru ze' nu rcyiiñ mi nu gyel lily nim. Nunu lat ze' gac der mbecy nu sac falt ni. Nunu tona' la gyet lagy der. Orze' mi ze' nac mi biñ lily. Nac mi biñ nu gya zir zu. Gac gyicy mi dela coz. Nunu gyub ic mi dela mbecy. Gyabic den gyel mbecy nim nu nac Shuaan den Jesucrisht nese gulas, nu na la, gal nu tub la. ¡Laab ni gac ñii!

will be added

X\